Deuteronomio 29:1-29
29 Chau Dios deu eldungucünurquei pu Israel che engün Horeb mu. Feula Chau Jehová feipicünufi ta Moisés ñi huiño eldungucünual fei engün mu Moab mapu meu. Tüfa ñi feipin feichi eldungu.
2 Fei Moisés trahulfi com pu Israel che, feipifi: “Eimün ngüneduamimün com ñi femfiel Chau Jehová tati Faraón, com tañi pu cüdaufe ca com tañi mapu tamün adquiñ meu Egipto mapu mu.
3 Tamün nge mu pefimün feichi fütraque cutrancahun dungu* ca fütraque afmatun dungu.
4 Fantepu mu Chau Jehová elulaeimünmeu pepiluhun tamün adümafiel* chem tamün pefiel ca chem tamün allcütuel.
5 Quisu feipi: ‘Iñche adniehurqueiñ ta eimün 40 tripantu ti huellin mapu meu.* Ti tacun tamün yenieel ca ti ocota* tamün nieel namun meu huesañmaulai.
6 Cafei ilafimün cofque, putulaimün* pulcu ca chem no rume,* femngechi quimürpuimün iñche tamün Chau Dios Jehová’.
7 Af meu acuimün tüfa meu. Fei Sehón, Hesbón ñi lonco ülmen, ca Og, Basán ñi lonco ülmen, hueichapaeiñmu,* huelu iñchiñ hueufiyiñ engün.
8 Fei hula nüñmafiyiñ tañi mapu engün. Elufiyiñ ñi ngen-ngeal pu Rubén che, pu Gad che ca Manasés ñi rangiñ troquiñche.
9 Feimu llemai huechunentuafimün ca inanieafimün ñi feipin tüfachi eldungu. Femngechi com tamün femün cüme tripayai.
10 Fachantü com eimün mülepaimün tamün Chau Dios Jehová ñi adquiñ meu: pu loncolelu tamün troquiñche mu, pu füchaqueche, pu huentru nielu elfal cüdau, com pu Israel huentru,
11 pu pichiqueche, pu domo fütangelu ca pu ca cüpanche mülelu eimün mu, ti ñimitumamüllquelu* ca ti entucoquelu.
12 Fachantü mülepaimün fau, feipicünuaimün tamün conal tamün Chau Dios Jehová ñi eldungu mu. Tüfachi eldungu tamün Chau Dios Jehová feipicünueimünmeu* fachantü.
13 Femngechi Chau Dios fachantü femcünuai quisu tañi troquiñchengerpual eimün ca quisu tamün Chau Dios ngeai. Femngechi feipicünufi ca eldungucünulelfi tamün cuifiqueche yem Abrahán, Isaac ca Jacob.
14 Tüfa hula feipicünumequen ñi eldungucünual, huelu eimün meu müten no.
15 Eldungucünumequefiñ tüfachi pu che mülelu iñchiñ mu fachantü taiñ Chau Dios Jehová ñi adquiñ mu, huelu cafei feichi pu che mülepanolu iñchiñ mu fachantü.
16 Eimün cüme quimnieimün chumngechi mülefuiñ Egipto mapu mu ca chumngechi rupaiñ fillque troquiñche püle petu taiñ miyahun.
17 Eimün pequefuimün tañi üdefalchi chemcün:* feiti ünufalchi* adentun* ñi nieel engün deumangelu mamüll mu, cura, plata ca oro mu.*
18 Cuñiutucuucüleaimün, femngechi quiñe huentru no rume, domo, familia ca troquiñche ñi mülepan fachantü püntütripalayaingün* taiñ Chau Dios Jehová mu ca poyelayafi feitichi troquiñche ñi pu dios. Inei rume femle, trürümngeafui ti folil reque ñi nieel quiñe fürechi anümca* venenongelu.
19 Huelu inei rume allcütule ñi chem pin tüfachi eldungu, tañi mallma piuquengen mu feipiafui chi: ‘Calli, feman müten tañi ayünieel, chumngelayan rume’.* Fei huesalcafile com pu che ñi hualloñmanieteu,*
20 Chau Jehová cüpa rulpacünuñmalayayu ñi femün. Doi mai, Chau Jehová rume illcutuafi* feichi huentru, fei com ti malisian dungu huiriconcülelu tüfachi lifru mu puhuai quisu mu. Fei Chau Jehová rüfcünu femcünuai ñi acordangehuenoal* tañi üi mapu meu.
21 Quisu inalafi ti eldungu, feimu Chau Jehová püntücünuafi* com pu troquiñche ñi mülen Israel mu. Femngechi cutrancayafi, eluafi com ti malisian dungu huiriconcülelu tüfachi lifru mu nielu ti ley dungu.
22 Tami pu fotüm ñi pu cüpanche ca ti pu che alü camapu cüpalu ngüneduamaingün tati huesaque dungu Chau Jehová ñi huercüfiel tüfachi mapu mu.
23 Quisu huercüi azufre, chadi ca cütral. Femngechi com ti mapu mu ngan-ngelayafui, chem no rume choyülayafui* ca chem anümca no rume huefpalayafui. Femngechi apümcangei Sodoma, Gomorra, Admá ca Zeboyim, Chau Jehová fütra illculen mu* apümcafi.
24 Tami pu fotüm, pu ca cüpanche ca com pu troquiñche ramtuaingün: ‘Jehová, ¿chumngelu* femngechi femfi tüfachi mapu? ¿Chem dungu fente illculcaeyu?’.*
25 Huiñoldunguaingün:* ‘Elcünuingün Jehová tañi eldungu, tañi cuifiqueche yem ñi Chau Ngünechen. Femngechi eldungucünuhurqueingün quisu nentufilu engün Egipto mapu mu.
26 Poyefingün caquelu dios, pochongnagingün* tañi adquiñ meu. Quimlafuingün feitichi pu dios, Chau Dios feipicünurqueyu engün ñi poyenoafiel.
27 Fei Jehová rume fütra illcui.* Huercüi feichi mapu meu com ti malisian dungu huiriconcülelu tüfachi lifru mu.
28 Chau Jehová fütra illculen mu* entufi engün tañi mapu mu, ca mapu mu yefi engün cheu ñi mülen ta fantepu mu’.
29 Taiñ Chau Dios Jehová quimniei com ti ellcalechi dungu.* Quisu rumel quimelelqueiñmu ca taiñ pu cüpanche, femngechi taiñ inanieafiel com ñi feipin tüfachi ley.
Quimnieal
^ Hebreo quehun feipilei: “Juician dungu”.
^ Hebreo quehun feipilei: “Quiñe piuque tamün quimafiel”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Tranu”.
^ Ca lof mu: “Pütocolaimün”.
^ Cam: “Chem no rume ngollilcachequelu”.
^ Ca lof mu: “Quehuapaeiñmu”.
^ Ca lof mu: “Ngümitumamüllquelu”.
^ Ca lof mu: “Cuyalltueimünmeu”.
^ Ca lof mu: “Fillem”.
^ Tüfachi feipin hebreo quehun mu nüucülei me culliñ mu. Feipingequefui ñi pengelal tañi ünufalngen quiñe dungu.
^ Ca lof mu: “Imagen”.
^ Ca lof mu: “Milla mu”.
^ Ca lof mu: “Mucür anümca”.
^ Ca lof mu: “Hudatripalayaingün”.
^ Cam: “Mallmangen mu inayafiñ ñi feipieteu tañi piuque”.
^ Ca lof mu: “Huallmanieteu”.
^ Ca lof mu: “Lladcütuafi”.
^ Ca lof mu: “Conümpangehuenoal, tuculpangehuenoal”.
^ Ca lof mu: “Hudacünuafi”.
^ Ca lof mu: “Choyolayafui”.
^ Ca lof mu: “Fütra lladcülen mu”.
^ Ca lof mu: “Chemu”.
^ Ca lof mu: “Lladcülcaeyu”.
^ Ca lof mu: “Lloudunguaingün”.
^ Ca lof mu: “Lloyünagingün, ponornagingün”.
^ Ca lof mu: “Lladcüi”.
^ Ca lof mu: “Fütra lladcülen mu”.
^ Ca lof mu: “Llumcülechi dungu”.
