Hebreos 1:1-14
1 Fütra cuifi Chau Ngünechen eli tañi pu huerquen ñi nütramcayafiel taiñ pu cuifiqueche. Fentren rupa femi ta tüfa, cafei caquerumei chumngechi ñi dungufiel engün.
2 Famülque mu* dunguqueiñmeu quisu tañi Fotüm mu. Chau Ngünechen dullicünufi ñi llohual com dungu, fei ñi duam mu elcünui huenu ca mapu mu müleyechi dungu.*
3 Fei cüme pengelquei Chau Ngünechen ñi afmatufalngen. Tañi chumngechi chengen, Chau Ngünechen mu trüri. Cafei com dungu quiñeucünuquefi Chau Ngünechen ñi nehuen-ngechi dungun meu.* Fei liftueiñmeu taiñ culpan mu,* fei hula huenu mu anücünuhui tañi Fütra Chau Ngünechen ñi man püle.
4 Feimu doicülei tati pu cümeque püllü meu. Doi yamfal üi elungei ta fei engün meu.
5 Raquiduamaimün, Chau Dios feipilafi chem caquelu cüme püllü no rume: “Eimi iñche tañi fotüm, fachantü tami chaungerpun iñche”. Ca feipilafi ta caquelu: “Iñche, quisu tañi chaungean, fei iñche tañi fotümngeai”.
6 Feichi huiño huercüfile tañi Hunen Fotüm mapu meu,* feipiai: “Chau Ngünechen ñi pu cümeque püllü mülei ñi püramyeaeteu”.*
7 Cafei tati pu cümeque püllü meu feipi: “Elcünuquefi ñi rume nehuen-ngeal* tañi pu cümeque püllü, ca tañi pu serfiqueteu hueihuiñ cütral reque* femcünuquefi”.
8 Huelu tañi Fotüm meu feipi: “Chau Ngünechen elueimu autoridad* rumel meu, ca ngünenieaimi nor dungu mu.
9 Piuqueyefimi ti nor dungu ca üdefimi ti huesaque dungu.* Feimu Ngünechen, eimi tami Chau Ngünechen, hutruleimu aceite tami dullieteu ca doi ayühun elueimu tami pu compañ mu”.
10 Cafei Chau Ngünechen ñi huirintucuel feipi: “Ahuem Ñidol, ellaca mu elcünuimi cheu ñi anümngeal ti mapu, ca quisu tami cuhu mu deumaimi ti callfü huenu.
11 Com tüfa ngehuelayai, huelu eimi mongelecayaimi. Mapu ca ti callfü huenu huesañmahuai chumngechi huesañmauquei quiñe tacun.
12 Fei eimi müchamtucuafimi quiñe macuñ reque, quiñe tacun, modaungetuai reque.* Huelu eimi felecaimi müten, aflayai tami mongelen”.
13 Huelu Chau Dios cangelu cüme püllü feipilafi: “Anüpange iñche tañi man püle, famnacümfili hula tami pu caiñe tami pünoafiel namun meu”.
14 Com pu cümeque püllü serfiquefingün ta Chau Ngünechen, huercüngeingün ñi quelluafiel tati pu montulngealu.
Quimnieal
^ Griego quehun feipilei: “Epe aflu tüfachi antü”.
^ Cam: “Tati antü ñi rupayal ti dungu”.
^ Ca feipiafui chi: “Jesús ñi nehuen-ngechi dungun”. Griego quehun feipilei: “Tañi nehuen-ngechi dungun”.
^ Cam: “Yafcan”.
^ Griego quehun feipilei: “Mapu cheu mülei che”.
^ Cam: “Lucutual tañi adquiñ mu”.
^ Cam: “Cürüf reque elcünuquefi”.
^ Cam: “Üicülechi cütral”.
^ Griego quehun feipilei: “Chau Ngünechen fei tami ülmen huancu”.
^ Griego quehun feipilei: “Ñi inangenon ti ley”. Cüpa feipilei ñi illamtungeel Chau Dios ñi ley.
^ Cam: “Cambiangetuai reque”.
