Hechos 7:1-60
7 Feimu ti hunen lonco sacerdote ramtueyu: “¿Rüfngei tüfachi dungu?”.
2 Esteban huiñoldungui:* “Pu peñi, pu chau, allcütumün. Taiñ cuifi lacu Abrahán, petu ñi mülenon Harán huaria mu, Mesopotamia mapu mülerquei. Üyeu pefi ñi peufaluhun tañi Fütra Chau Ngünechen.
3 Fei feipieyu: ‘Elcünunge tami mapu ca tami pu che. Iñche pengelelayu ti mapu cheu tami amual’.
4 Abrahán elcünui pu caldeo ñi mapu, fei Harán huaria mu mülenagi. Deu lalu tañi chau, Chau Ngünechen feipieyu ñi cüpayal tüfachi mapu meu cheu tamün mülen eimün.
5 Huelu quiñe pichi mapu rume elungelai, Chau Ngünechen feipicünueyu ñi ngen-ngeal tüfachi mapu quisu ca tañi pu cüpanche engün. Feichi mu Abrahán petu nierquelai fotüm.
6 Cafei Chau Ngünechen feipicünueyu ta Abrahán tüfachi dungu: tañi pu cüpanche catripanchengerpuai* caque che ñi mapu meu. Feichi pu che ngünenieaeyu, fei cutrancayaeyu engün 400 tripantu.
7 Chau Ngünechen feipi: ‘Iñche juiciantucuafiñ feichi troquiñche ñi ngüneniefiel tami cüpanche’. Ca feipi: ‘Fei hula tripapatuaingün tañi püramyeaeteu ta iñche tüfachi mapu meu’.
8 Cafei Chau Ngünechen eldungucünui Abrahán engu, fei ca tañi pu fotüm ñi circuncidangeal.* Feimu choyüngelu tañi fotüm Isaac, pura antü rupai, fei circuncidangei. Isaac fotümyefi* ta Jacob, fei Jacob nierpui mari epu fotüm. Tüfa engün mari epu troquiñchengerpui.
9 Tüfachi pu huentru ütrirfingün tañi peñi José. Fei fendefingün tati pu Egipto che mu. Huelu Chau Ngünechen quisucünulaeyu.
10 Fei montuleyu com tañi cutrancahun meu. Cafei Chau Ngünechen elueyu quimün ca quellueyu ñi tuteafiel ta Faraón, Egipto ñi Lonco Ülmen. Fei elcünueyu ñi ngünenieal Egipto mapu ca com tañi ruca.
11 Feichi mu com Egipto, cafei Canaán mapu mu mülerquei fütra ngüñün. Taiñ pu cuifiqueche nielafuingün chem iyael no rume. Fütra cutrancahun mülerquei.
12 Huelu Jacob allcüntucui ñi mülen iyael* Egipto mapu meu. Fei huercüfi taiñ pu cuifiqueche ñi amual üyeu.
13 Epu rupa amulu engün Egipto mapu meu, José feipifi tañi pu peñi ñi ineingen. Fei Faraón quimürpufi José tañi pu che.
14 Fei José huercüi ñi yelelngeal tañi chau Jacob ca com tañi pu che, 75 che ürque.
15 Femngechi Jacob puhui Egipto mapu meu. Fei üyeu lai, taiñ pu cuifiqueche reque.
16 Siquem huaria mu yengei engün. Fei elcünungei ti eltun* Abrahán ñi ngillafiel Hamor ñi pu fotüm.
17 Epe puulu ti antü ñi femtripayal Chau Ngünechen ñi feipicünufiel ta Abrahán, rume alün-ngerpui pu Israel che Egipto mapu meu.
18 Fei hula ca lonco ülmen ngünenietui Egipto mapu meu. Fei quimlafi ta José.
19 Tüfachi lonco ülmen huesa femfi taiñ pu cuifiqueche. Huercüfi ti pu chau ñi quisucünual tañi pu pichiche, fei ñi layal engün.
20 Feichi mu choyüngei ta Moisés, rume cüme adngefui.* Cüla cüyen tremümngei tañi chau ñi ruca meu.
21 Huelu tranacünungelu Moisés, Faraón ñi ñahue metapürameyu. Fei tremümeyu quisu tañi püñeñ reque.
22 Femngechi quimelngei ta Moisés pu Egipto che ñi quimün. Fei fütraque dungu femi ca tañi dungun mu pengeli ñi adümuhun.
23 Fei hula meli mari tripantu nielu Moisés, eluhui ñi pemeafiel* tañi pu peñi, pu Israel che.
24 Pei quiñe Egipto che huesalcamequefilu quiñe Israel che. Fei incafi, ca ñi huiñoleltuafiel ñi huesa femün, langümfi.
25 Moisés feipi: ‘Tañi pu peñi feipiaingün: “Rüfcünu llemai tüfachi huentru meu Chau Ngünechen montulaiñmu”’. Huelu fei engün femngechi raquiduamlai.
26 Ca antü amui cheu ñi mülen epu huentru quehuatumequelu. Fei ngülamtufi ñi cümelcautual engu. Feipifi: ‘Pu huentru, eimu ta peñihuen, ¿chumngelu* quehuatumequeimu?’.
27 Huelu feichi huentru huesalcamequefilu tañi peñi, ültrefi* ta Moisés ca feipifi: ‘¿Inei ta loncocünueimu ca juezcünueimu ta iñchiñ meu?
28 Huiya langümfimi ti Egipto che. ¿Ca cüpa langümen ta iñche?’.
29 Moisés allcülu tüfachi dungu lefmahui. Fei Madián mapu mu mülenagi catripanche reque. Üyeu nierpui epu fotüm.
30 Meli mari tripantu rupalu, Moisés mülerquei Sinaí huincul, huellin mapu püle.* Fei peufaluhui quiñe cüme püllü ti üicülechi zarza meu.
31 Moisés pefilu tüfachi dungu afmatulehuei. Fei pülleconlu ñi doi cüme adquintual, allcüi Chau Jehová ñi dungun* feipilu:
32 ‘Iñche tami pu cuifiqueche ñi Ngünechen. Abrahán, Isaac ca Jacob ñi Ngünechen’. Moisés müllmüllcülehuei, fei doi cüpa adquintuhuelai.
33 Chau Jehová* feipieyu: ‘Nentunge tami ocota.* Ti mapu cheu pünoleimi, dullicünufiñ iñchengealu.
34 Rüfcünu mai ngüneduamün ñi rume huesa femngeel tañi pu che Egipto mapu meu. Allcün ñi fütra ngümacaumequen engün, fei montulpayafiñ. Feimeu cüpange, huercüayu ta Egipto mapu meu’ pi Chau Ngünechen.
35 Tüfachi huentru Moisés illamcangefui. ‘¿Inei loncocünueimu ca juezcünueimu?’ pingei. Huelu ti cüme püllü meu, zarza mu peufaluulu, Chau Ngünechen huercüfi tüfachi huentru tañi loncoleal ca lifrenentuafiel ti pu che.
36 Moisés entufi pu Israel che. Fei fütraque afmatun dungu femi Egipto mapu meu, ti Quelü Lafquen ca meli mari tripantu miyaulu engün ti huellin mapu mu.
37 Tüfachi huentru Moisés feipifi tati pu Israel che: ‘Tamün troquiñche meu, Chau Ngünechen entulelaimünmeu quiñe huerquen iñche reque’.
38 Rangi pu Israel che mülerquefui tüfachi huentru huellin mapu meu. Sinaí huincul mu nütramcai ti cüme püllü engu, fei mülerquefui taiñ pu cuifiqueche engün. Moisés llohui Chau Ngünechen ñi dungu pepiluhun nielu, fei taiñ elueteu ta iñchiñ.
39 Huelu taiñ cuifiqueche pilai ñi allcütuafiel engün, doi mai illamcafingün. Fei tañi piuque mu cüpa huiñotuingün ta Egipto mapu mu.
40 Feipifingün ta Aarón: ‘Deumalmuiñ quiñeque dios taiñ adnieaeteu. Quimlaiñ chem ñi rupan ta Moisés, feiti huentru taiñ entueteu ta Egipto mapu meu’.
41 Feichi mu deumaingün quiñe adentun,* pichi culliñ reque felelu. Chalintuculelfingün mañumtun. Fei eluhuingün ñi fiestañmayal chem ñi deumael engün.
42 Feimu Chau Ngünechen quisucünueyu engün. Fei elcünui ñi püramyeafiel engün ti antü, cüyen ca huangülen callfü huenu mülelu. Femngechi huirintucuingün Chau Ngünechen ñi pu huerquen: ‘¡Ahuem pu Israel che! Meli mari tripantu miyaulu eimün ta huellin mapu mu, iñche ta chalintuculelngelan mañumtun no rume.
43 Huelu mai fill püle yequeimün Moloc pingechi dios ñi tolto,* cafei Refán pingechi dios ñi huangülen, feichi pu adentun deumalu eimün ñi püramyengeal. Feimu doi camapu ñi mülen Babilonia esclavongeaimün’.
44 Huellin mapu mu taiñ pu cuifiqueche niefuingün ti tolto ruca, tüfa pengeli Chau Dios ñi mülen fei engün meu. Chau Ngünechen feipifi ta Moisés chumngechi ñi deumayal ti tolto ruca. Chumngechi ñi pengelngeel ta Moisés, femngechi femingün.
45 Fei hula taiñ pu cuifiqueche ñi pu yall nüingün ti tolto ruca. Fei Josué engün puhulingün ti tolto ruca caque che ñi mapu meu. Üyeu Chau Ngünechen huemünentufi* feichi pu che, taiñ pu cuifiqueche ñi adquiñ meu. Üyeu mülenagi ti tolto ruca puulu hula David ñi antü.
46 Chau Ngünechen fürenefi ta David. Fei tüfachi huentru ayüfui ñi deumalelafiel quiñe ruca ta Jacob ñi Ngünechen.
47 Huelu mai Salomón deumai feichi ruca.
48 Huelu tati Doi Alüpüralelu mülequelai pu huentru ñi deumaelchi ruca. Femngechi feipilei Chau Ngünechen ñi huerquen:
49 ‘Ti huenu, fei tañi ülmen huancu. Ti mapu, fei tañi pünotuhue. ¿Chem ruca deumalelngean ta iñche?’ pi Jehová.* ‘¿Cam cheu mülei tañi ürcütuam?
50 Iñche ta deuman com tüfachi dungu’ pi.
51 Eimün pu huentru huesa loncongeimün, yafü piuquengeimün. Allcütuquelaimün. Piquelaimün ñi adcünuaeteu Chau Ngünechen ñi nehuen. Chumngechi ñi femün tamün cuifiqueche, ca femngechi femimün.
52 Tamün pu cuifiqueche caiñetufingün ca langümfingün Chau Ngünechen ñi pu huerquen. Fei engün feipicünui ñi cüpayal ti nor huentru, feichi huentru tamün hultucufiel ca tamün langümfiel.
53 Chau Ngünechen huercüi ñi cümeque püllü ñi eluafiel ta eimün ti ley. Huelu eimün inaquelafimün” pi Esteban.
54 Allcülu tüfachi dungu, rume huesa illcuingün.* Fei petu leliniefilu ta Esteban, cütrüri* ñi foro engün.
55 Huelu Esteban nierquei Chau Ngünechen ñi nehuen. Lelipürai huenu mu, fei pei Chau Dios ñi pepiluhun. Ca pefi ta Jesús Chau Dios ñi man püle.
56 Fei feipi: “¡Adquintumün! Nülatripalei ti huenu. Cafei Chau Ngünechen ñi man püle huitralei ti Huentru ñi Fotüm”.*
57 Feimu nehuentu huirari engün. Tacucünui tañi pilun engün, fei lefcontufingün ta Esteban.
58 Deu nentungelu huecuntu huaria püle, curatufingün. Fei ti pu dallucafe elcünuingün ñi tacun cheu huitralelu quiñe hueche, Saulo pingelu.
59 Petu curatungelu, Esteban llellipui: “Ñidol Jesús, lloumaen tañi mongen”.*
60 Fei lucutunagi ca nehuentu huirari: “Chau Jehová* rulpacünuafimi tañi culpan engün”.* Deu feipilu tüfachi dungu, lai.*
Quimnieal
^ Cam: “Lloudungui”.
^ Cam: “Camapu cüpachi chengerpuai”.
^ Ngüneduamnge “circuncision”.
^ Ca feipiafui chi: “Ca femngechi femfi”.
^ Cam: “Fün quetran”.
^ Cam: “Pantion”.
^ Cam: “Cüme adngefui Chau Ngünechen ñi adquiñ meu”.
^ Cam: “Cüpa ngüneduamfi”.
^ Cam: “Chemu”.
^ Cam: “Peltrifi, rütrefi”.
^ Tüfa cüpa feipilei quiñe troquiñ mapu ñi epe mülenon che.
^ Cam: “Tranu”.
^ Cam: “Carpa”.
^ Cam: “Quechanentufi”.
^ Cam: “Lladcüingün”.
^ Cam: “Trütrüri, rünurünutui”.
^ Ngüneduamnge “Huentru ñi Fotüm”.
^ Cam: “Yafcan engün”.
^ Griego quehun feipilei: “Umautui”.
