Hechos 9:1-43
9 Saulo eluucülefui ñi cutrancayafiel Ñidol Jesús ñi pu inanieteu. Cüpa langümfi engün. Feimu pemefi ti hunen lonco sacerdote.
2 Feipifi ñi huirintucual carta, femngechi ñi pengelal fillque ngillatuhue ruca* Damasco huaria mu mülelu. Feichi carta mu ñi presuyeafiel ta Jerusalén tuchi concülele Chau Dios ñi rüpü mu,* huentru cam domongele rume.
3 Saulo püllelerquei ñi puhual ta Damasco huaria. Fei alofrumei quiñe pelon cüpalu huenu mu.
4 Fei tranapui mapu meu. Allcüi quiñe dungun feipilelu: “Saulo, Saulo ¿chumngelu* caiñetumequeen?”.
5 Fei ramtui: “¿Inei am ta eimi Ñidol?”. Fei huiñoldungungei:* “Iñche ta Jesús, feiti tami caiñetufiel.
6 Feula mai huitrapürange, huaria mu conpunge. Üyeu feipingeaimi tami chumal” pi Jesús.
7 Pu huentru compañquiyahulfilu ta Saulo allcüingün quiñe dungun, huelu inei no rume pelafingün. Feimu huitracünuhuingün. Chem pilai rume engün.
8 Saulo huitrapüratui mapu mu, nülaniei tañi nge, huelu pelohuelai. Fei nüñmangei ñi cuhu ñi yengeal ta Damasco huaria mu.
9 Cüla antü pelohuelai chem no rume, ilai ca pütocolai rume.
10 Damasco huaria mu mülerquei Jesús ñi inanieteu, Ananías pingelu. Pefi ta Ñidol Jesús quiñe afmatun dungu mu ñi feipieteu: “¡Ananías!”. Fei huiñoldungui:* “Tüfa mu mülen, Ñidol”.
11 Fei Ñidol Jesús feipifi ta Ananías: “Huitrapürange, amunge Norngelu pingechi rüpü mu. Fei Judas ñi ruca mu quintuaimi quiñe huentru Saulo pingelu, Tarso huaria tuhui. Tüfachi huentru llellipumequei.
12 Quiñe afmatun dungu mu peeimu ta eimi, Ananías. Conpuimi, fei fampuhulfimi tami cuhu, fei tañi huiño pelotual”.
13 Huelu Ananías feipieyu: “Ñidol, allcüquefiñ fentren che ñi nütram tüfachi huentru ñi femün, cafei fente ñi caiñetufiel tami pu inanieteu Jerusalén huaria mu.
14 Pu loncolechi sacerdote huercüeyu tüfa mu ñi presuafiel* com tati maneluulu* tami üi meu”.
15 Huelu Ñidol Jesús feipifi: “¡Amunge! Iñche ta dullifiñ tüfachi huentru, fei ñi huldungual iñche meu pu catripanche,* pu lonco ülmen ca pu Israel che.
16 Iñche pengelelafiñ com tati huesaque dungu ñi cutrancahual iñche tañi üi meu” pi Jesús.
17 Fei Ananías amui, conpui ruca mu, fampuhulelfi tañi cuhu, fei feipifi: “Peñi Saulo, cüpalelu eimi rüpü meu peimi ñi peufaluhun ta Ñidol Jesús. Fei huercüeneu tami huiño pelotual. Cafei Chau Ngünechen eluaimu ñi nehuen”.
18 Feimeu müten tañi nge mu trolüf reque llancünagi, fei pelotui. Feimu huitrapürai ca fautizangei.
19 Deu ilu, nehuencontui.
Fei hula quiñeque antü mülenagi Damasco huaria mu quiñentrür pu inanieteu engün.
20 Müchai müten fillque ngillatuhue ruca püle eluhui ñi quimeltuafiel pu che. Feipiquei Chau Ngünechen ñi Fotümngen ta Jesús.
21 Huelu pu che allcütufilu, afmatulehuei. Ca feipi engün: “Tüfachi huentru rume caiñetufi pu maneluulu Jesús ñi üi mu Jerusalén huaria meu. Feimu mülepai tüfa mu, ñi presuyeafiel engün* pu loncolechi sacerdote ñi adquiñ meu, ¿felei no am?” pi engün.
22 Chau Ngünechen elueyu pepiluhun ta Saulo. Feimu cüme pengelcünufilu ñi Cristo ngen ta Jesús, pu judio che Damasco huaria mu mülelu fill raquiduamcülehuetui engün.
23 Pütrüntu rupalu hula, pu judio nütramcahuingün ñi langümafiel ta Saulo.
24 Huelu fei quimürpui ñi chem cüpa femeteu ti pu che. Fill antü ca pun meu feichi pu che llihuatulerquei* ti huaria ñi conhue püle, femngechi ñi langümafiel.
25 Feimu quiñe pun tañi pu inanieteu cülco mu* tucucünufingün. Fei cheu huechodcülelu ti fütra malal nentufingün tañi nacümafiel.*
26 Jerusalén mu puulu nehuentui ñi trahuluhual Jesús ñi pu inanieteu engün. Huelu fei engün feyentulafi ta Saulo ñi inaniefiel Jesús, feimu llicanieyu engün.
27 Feimu Bernabé amui ñi quelluafiel ta Saulo. Fei yefi cheu ñi mülen pu apostol. Bernabé cüme nütramcalelfi engün Saulo ñi pefiel ca ñi nütramcauquen Ñidol Jesús engu rüpü meu. Cafei nehuen piuquecünuhui ñi amuldungual Jesús ñi üi meu Damasco huaria mu.
28 Saulo mülenagi pu apostol engün, cheu püle rume miyauquefui* Jerusalén huaria mu. Cafei nehuen piuquecünuhui ñi amuldungulelafiel pu che Ñidol Jesús ñi üi meu.
29 Saulo ca pu judio griegodunguquelu nütramcahuingün ca chaftudunguhuingün. Huelu tüfa engün fillque rupa cüpa langümfi.
30 Pu peñi quimlu tüfachi dungu, Cesarea huaria yefingün ta Saulo. Fei hula huercüngei Tarso huaria mu.
31 Feichi mu com püle Judea, Galilea ca Samaria mapu mu tüngcületui* ti trahunche, fei nehuen-ngetui. Fei engün feyentufi ta Jehová.* Cafei Chau Dios ñi nehuen yafültucueyu engün. Feimu doi alün-ngerpui pu inaniefilu ta Jesús.
32 Feichi mu Pedro miyahurquei com feichi mapu püle. Feimu amui ñi pemeafiel Jesús ñi pu inanieteu Lida huaria mülelu.
33 Üyeu mülerquei quiñe huentru Eneas pingelu, lañmalerquei ñi cuerpo.* Pura tripantu tranalerquei ngütantu mu.*
34 Pedro feipieyu: “Eneas, Jesucristo ta tremoltueimu.* Huitrapürange, fei cüme elcünutunge tami ngütantu”. Feimeu müten huitrapüratui.
35 Com pu che Lida huaria mülelu ca Sarón mapu mu, pefingün chem ñi rupan Eneas. Fei feyentuingün ta Ñidol Jesús meu.
36 Jope huaria mu mülerquei quiñe domo inaniefilu ta Jesús, Tabita pingei, griego quehun Dorcas pingei.* Tüfachi domo fentren cümeque dungu femquefui. Cafei fürenequefi pu pofre.
37 Huelu feichi mu cutrani ti domo, fei lai. Feimu cüchañmangei ñi cuerpo, fei elcünungei huenu mülechi pieza mu.
38 Jesús ñi pu inanieteu Jope huaria mülelu allcüingün ñi mülen Pedro Lida huaria meu. Tüfachi epu huaria püllelerquei. Feimu huercüngei epu huentru ñi llellipuafiel ta Pedro: “Fürenemuiñ, matu cüpange tüfa mu”.
39 Pedro huitrapürai, fei amufemi quiñentrür ti epu huentru engu. Puulu üyeu, yengei huenu mülechi pieza mu. Com pu lantu domo ngümamequelu fülcontupaeyu.* Fei pengelpafingün fillque tacun ñi deumael Dorcas petu mongelelu.
40 Feimu Pedro feipi ñi tripayal com pu che. Lucutunagi, fei llellipufi ta Chau Ngünechen. Fei hula lelifi ti cuerpo, feipifi: “¡Tabita, huitrapürange!”. Fei ti domo nülai ñi nge. Fei pefilu müten ta Pedro anüpürai.
41 Pedro nüñmafi ñi cuhu, quellufi ñi huitrapürayal. Fei mütrümfi Jesús ñi pu inanieteu ca ti pu lantu domo. Fei com engün pefingün Tabita ñi mongetun.
42 Com pu che Jope huaria mu mülelu quimürpui tüfachi dungu. Feimu fentren che feyentuingün ta Ñidol Jesús meu.
43 Pedro fentreñma mülenagi Jope huaria meu, Simón ñi ruca mu. Tüfachi huentru lahumtrülquequefui.
Quimnieal
^ Griego quehun feipilei: “Sinagoga”.
^ Tüfa cüpa feipilei chumngechi yenieal ta mongen ca Cristo ñi quimeltun.
^ Cam: “Chemu”.
^ Cam: “Lloudungungei”.
^ Cam: “Lloudungui”.
^ Griego quehun feipilei: “Cadena meu traricünuafiel”.
^ Griego quehun feipilei: “Mütrümlu”.
^ Cam: “Camapu cüpachi che”.
^ Griego quehun feipilei: “Trariyeafiel engün”.
^ Cam: “Uhuamtulerquei”.
^ Cam: “Chaihue”.
^ Cam: “Nagümafiel”.
^ Griego quehun feipilei: “Conpuquefui ca tripaquefui”.
^ Cam: “Cüme duamcületui”.
^ Cam: “Calül”.
^ Cam: “Cahuitu”.
^ Cam: “Mongeltueimu”.
^ Griego quehun Dorcas pingei, arameo quehun Tabita pingei. Huelu tüfachi epu üi feipilei “gacela”.
^ Cam: “Püllecontupaeyu”.
