Rut 1:1-22
1 Feichi antü cüdaumequelu* pu juez, acurumei quiñe fütra filla Israel mapu mu. Mülerquei quiñe huentru Belén huaria mu, tüfa Judá mapu mu mülei. Fei amui cañpüle tañi domo engu ca tañi epu fotüm. Huiñamtuhuingün Moab mapu mu.
2 Ti huentru Elimélec* pingefui, tañi domo Noemí,* ca tañi epu fotüm Mahlón* ca Kilión* pingefui engu. Tuhurqueingün Efrata mu, tüfa ca feipingequefui Belén Judá mapu mu. Fei puhuingün Moab mapu mu, tiye mu mülenagpuingün.
3 Petu ñi mülen üyeu, Elimélec lai. Feimu tañi domo Noemí ca tañi epu püñeñ quisulehueingün.
4 Rupachi antü, tañi epu püñeñ quintuingu domo Moab mapu mu. Orpá ca Rut pingefui engu. Üye mu mari tripantu mülepuingün.
5 Huelu Mahlón ca Kilión ca laingu. Feimu Noemí niehuetulai tañi huentru ca tañi epu püñeñ.
6 Mülelu Moab mapu mu, Noemí allcüi Chau Jehová huiño cümelcatufi tañi pu che ca elutufi iyael.* Feimu eluhui ñi huiñotual tañi mapu mu tañi epu nanüng engün.
7 Noemí ca tañi epu nanüng tripaingün cheu ñi mülequefel. Petu ñi amulen engün Judá mapu mu,
8 Noemí feipifi tañi epu nanüng: “Doi cümeafui tamu huiñotual tamu ñuque ñi ruca mu. Eimu piuqueyefimu* tañi epu püñeñ* ca iñche, fei Chau Jehová ca femngechi piuqueyeaimu.
9 Chau Jehová quisuque eluaimu tamu fütangeal ca tamu cüme feleal”.* Fei Noemí truyufi* tañi epu nanüng, feimeu müten eluhuingu ñi ngümacahual.
10 Fei feipingu: “Femlayayu, huiñotulayayu. Quisucünuulayayiñ ca müleayu tami pu che mu”.
11 Noemí feipifi: “Huiñotuaimu saquinque püñeñ. ¿Chumngelu am ta* femaimu? ¿Ca nieafun püñeñ tamu nieaeteu?
12 Huiñotumu saquinque püñeñ, amutumu. Iñche deu cusen tati, tañi huiño fütangeal. Tüfachi pun müten fütangefuli ca niefuli püñeñ,
13 ¿üngümcüleafuimu tañi fütraque huentrungeal, fei tamu nieafeteu? ¿Eluucüleafuimu mai tamu nienoal huentru fentren tripantu? Felelai tati, saquinque püñeñ. Jehová cutrancamequeneu.* Tüfachi dungu mu eimu ca cutrancaumequeimu, feimu iñche rume cutrantupiuquemequen”.
14 Fei huiño ngümacahuingün. Orpá truyufi* tañi nanüng, fei amutui. Huelu Rut pilai ñi elcünuafiel ta Noemí.
15 Feimu Noemí feipifi: “¡Tüfei! Orpá huiñotui tañi pu che mu ca tañi pu dios mu, inafinge”.
16 Huelu Rut feipi: “¡Feipiqueeli! Iñche elcünulayayu ca quisucünulayayu. Cheu rume amulmi, iñche ca amuan. Cheu umalmi, iñche ca umayan. Tami pu che, iñche tañi pu chengeai. Tami Dios, iñche tañi Dios ngeai.
17 Cheu lalmi, iñche ca layan, ca fei mu rüngaltucungean. Petu tañi mongelen elcünulayayu. Femli, Chau Jehová rume cutrancayaeneu”.
18 Rut pilai ñi quisucünuafiel ta Noemí, feimu Noemí chem dungu rume feipihuelai.
19 Fei trecacünuhuingu ñi puhual ta Belén mu. Quimlu tati pu che ñi acun engu, afmatuingün. Pu domo ramtuingün: “¿Rüfcünu ta Noemí?”.
20 Fei Noemí* huiñoldungufi* pu domo: “Chau Ngünechen* rume cutrantupiuquemequeneu, feimu Mara* pingean, Noemí pingehuelayan.
21 Tripalu iñche ta tüfa meu, niefun com tañi duamnieel. Feula huiñotun, huelu niehuelan chem no rume Jehová ñi duam mu. ¿Chumngelu* Noemí pingequen? Chau Jehová cutrancamequeneu, Chau Ngünechen rume hueñancülqueneu”.
22 Femngechi Noemí elcünui Moab mapu, fei huiñotui tañi mapu mu. Compañeyu tañi nanüng Rut, Moab tuhun-ngelu. Puulu engu ta Belén, hue cosechamequengerquei ti cahuella.*
Quimnieal
^ Hebreo quehun feipilei: “Juzgamequelu”.
^ Tüfachi üi cüpa feipi “tañi Chau Ngünechen lonco ülmencülei”.
^ Tüfachi üi cüpa feipi “tañi ayühun”.
^ Tüfachi üi hebreo quehun mu cüpa feipi chi “ngañhuadcüleal” cam “cutrancüleal”.
^ Tüfachi üi cüpa feipi “tati ngañhuadnaglu” cam “tati fentepuulu”.
^ Hebreo quehun feipilei: “Cofque”.
^ Hebreo quehun mu feipi piuqueyechen ca fürenechen afquenolu. Diccionario mu ngüneduamnge “piuqueyen afquenolu”.
^ Cam: “Tati epu huentru lalu”.
^ Cam: “Pechitufi, trurufi, trepetufi”.
^ Hebreo quehun feipilei: “Cheu tamu ürcütual”.
^ Cam: “Chemu”.
^ Cam: “Jehová tañi cuhu chaftumequeneu”.
^ Cam: “Pechitufi, trurufi, trepetufi”.
^ Tüfachi üi cüpa feipi “tañi ayühun”.
^ Cam: “Lloudungufi”.
^ Hebreo quehun feipilei: “Tati Com Nehuen Nielu”.
^ Hebreo quehun mu tüfachi üi cüpa feipi “mucüri” cam “fürei”.
^ Cam: “Chemu”.
^ Cam: “Cebada”.
