1. Daniel, ¿chumngelu afmatulfi pu Babilonia che?

 HUECHENGELU Daniel, Babilonia huaria mu yengei, fütra camapu. Elcünui tañi mapu ca tañi familia. Ñi huechengen mu rume, afmatufalngefui. Pu Babilonia che peniefui ta Daniel quiñe hueche huentru cüme adngelu ca quiñe falin familia mu tuhui (1 Sam. 16:7). Feimu quimelelngei ta Daniel fei ñi falin chengeal pu Babilonia che mu (Dan. 1:3, 4, 6).

2. Chau Jehová, ¿chem raquiduamquei Daniel mu? (Ezequiel 14:14).

² Jehová piuqueyefi ta Daniel, huelu penielafi ñi cüme adngen ca ñi falin chengen, doi mai peniefi ñi chumngechi chengen. ¿Chemu quimiyiñ tüfa? Quiñe rupa Chau Jehová nütramcai ñi nor chengen ta Noé ca Job, tüfa engu fentren tripantu poyeniefi ta Jehová. Huelu ca nütramyefi ta Daniel, ¿fei niepelafui 20 tripantu? (Gén. 5:32; 6:9, 10; Job 42:16, 17; papeltunge Ezequiel 14:14). Daniel fentren tripantu mongelefui ca fentren afmatun dungu mu rupai, huelu Chau Jehová amulei ñi piuqueyeniefiel ta Daniel (Dan. 10:11, 19).

3. ¿Chem ngüneduamaiñ tüfachi chillcatun mu?

³ Tüfachi chillcatun mu ngüneduamaiñ Daniel ñi nehuen piuquengen ca ñi nor piuqueyefiel Jehová, tüfa quellueyeu falin chengeal Jehová ñi adquiñ mu. Ca peaiñ chem quellueyu Daniel ñi femngechi chengeal ca chumngechi inayentuafuiñ ta Daniel. Tüfachi chillcatun huirintuculelngei pu hueche, huelu caque quisuque iñchiñ quelluafeiñmu ñi femün ta Daniel.

4. Daniel, ¿chumngechi pengeli ñi nehuen piuquengen? Feipinge quiñe dungu ñi rupan.

⁴ Pu che nehuen piuquengelu llicayafuingün. Femlu rume, eluuqueingün ñi femal cümeque dungu. Femngechi  femi Daniel, quisu pengeli ñi nehuen piuquengen. Peaiñ epu dungu ñi rupan. Hune, rupalu epu tripantu peno pu Babilonia che apümcafilu ta Jerusalén, ti lonco ülmen Nabucodonosor peumai. Pei quiñe fütra adentun, fei rume pellquelefui. Feimu feipifi com pu quim huentru, Daniel cütu, ñi feipiaeteu chem ñi peuman ca chem pifel. Femnolmün, com langümngeaimün pifi (Dan. 2:3-5). Fentren che langümngeafulu, feimu Daniel amufemi ti lonco ülmen mu, fei llellipufi ñi eluaeteu tiempo. Fei pengelelayu chem pifel tami peuma pifi (Dan. 2:16). Ñi femal tüfa, mülefui ñi feyentuleal ca nehuen piuquecünuhual, ¿chumngelu? Biblia feipilai Daniel ñi quimeltuchequen peuma cuifi. Daniel feipifi tañi pu cüla hueni Sadrac, Mesac ca Abednego b ñi ngillatuafiel Chau Ngünechen tañi cutranpiuqueyeaeteu, fei ñi quimal ti ellcalechi dungu (Dan. 2:18). Jehová lloudungueyu tañi llellipun. Tañi quellun mu, Daniel quimelelfi ta Nabucodonosor chem pifel tañi peuma. Femngechi Daniel ca tañi pu hueni montuingün ñi lanoal.

5. Daniel, ¿chumngechi pengeli ñi nehuen piuquengen? Feipinge quiñe dungu ñi rupan.

⁵ Rupachi antü mu, Daniel ca duamniefui ñi nehuen piuquecünuhual. Nabucodonosor ca quiñe peuma huesa duameleyu, pei quiñe fütra anümca. Daniel nehuen piuquecünuhui ca quimelelfi ta Nabucodonosor tañi peuma, huedhued duamaimi ca elungehuelayaimi ngünenieal pifi (Dan. 4:25). Tañi feipieteu Daniel, fei Nabucodonosor raquiduamafui chi tañi caiñetumequeteu, fei langümngepe Daniel piafui. Huelu Daniel nehuen piuquecünuhui, fei dungui müten.

6. ¿Chem quellueyu Daniel tañi nehuen piuquecünuhual?

⁶ ¿Chem quellueyu ta Daniel ñi nehuen piuquecünuhual com tañi mongen mu? Huechengelu quimtucupelafui ñi chumün tañi pu chau. Tañi chau ca ñuque inafingu ñi feipin Jehová ñi femal pu chau Israel mu, ca quimeltufingu Daniel Chau Dios ñi ley dungu (Deut. 6:6-9). Daniel quimniefui chem pin tati mari huerquen dungu. Huelu ca cüme quimniefui caquelu  dungu ñi feipin ti ley, por ejemplo, chem felefui ñi iyal ca inoafiel pu Israel che (Lev. 11:4-8; Dan. 1:8, 11-13). c Cafei cüme quimniefui chem ñi rupan cuifi Chau Dios ñi pu che, ca ñi huesa tripan engün tañi inanofiel mu Jehová ñi ngülam (Dan. 9:10, 11). Com ñi rupan Daniel tañi mongen mu quellueyu ñi quimtucual Chau Jehová ca tañi cümeque püllü eluucülei tañi quellueteu (Dan. 2:19-24; 10:12, 18, 19).

7. ¿Ca chem quellueyu Daniel ñi nehuen piuquengeal? (Ca inaduamnge ti adentun).

⁷ Daniel huimtulefui ñi chillcatual chem ñi huirintucuel Chau Dios ñi pu huerquen, quiñe tüfa Jeremías. Femngechi Daniel quimürpui ñi fülcülepan ñi lifrengetual pu judio Babilonia ñi huaria mu (Dan. 9:2). Daniel ngüneduamlu chumngechi ñi huechutripamequen ti profecia, doi maneluhui Jehová mu. Fei quiñe che maneluulu Jehová mu, doi nehuen piuquecünuuquei (ca ngüneduamafuimi Romanos 8:31, 32, 37-39). Cafei Daniel rume llellipuquefi tañi Huenu Chau, tüfa rume quellueyu (Dan. 6:10). Feipiquefi ñi huelulcan ca ñi chum duamcülen ca quelluen piquefi (Dan. 9:4, 5, 19). Com che mülei ñi quimürpual chumngechi nehuen piuquengeal, Daniel ca femi. ¿Chem quellueyu? Ñi chillcatual, llellipual ca maneluhual Jehová mu.

8. ¿Chem quelluaiñmu taiñ nehuen piuquengeal?

⁸ Taiñ pu chau nehuen piuquengeingün chi ca nehuen piuquecünuhuaimün piafeiñmu, huelu caque quisuque iñchiñ mülei taiñ cüdahual taiñ femngechi chengeal. Raquiduamnge tüfa: hue adümuuliyiñ quiñe dungu mu, duamfali taiñ cüme ngüneduamafiel inei taiñ quimeltueteu, femngechi inayentuafuiñ tañi femün. Ca femngechi taiñ nehuen piuquengeal, mülei taiñ ngüneduamafiel ñi femün quiñeque che nehuen piuquengelu. ¿Chem quimeltueiñmu Daniel? Mülei taiñ cüme chillcatuafiel ti Biblia, mülei taiñ cüme hueniyeafiel ta Chau Jehová ca piuque mu tripape taiñ ngillatuquefiel. Cafei mülei taiñ maneluhual taiñ rumel quelluaeteu. Com tüfachi dungu femliyiñ, nehuen piuquengeaiñ rupaliyiñ rume huesaque dungu.

9. ¿Chum tripaquei pu nehuen piuquengelu ñi femün?

⁹ Cüme tripaquei ñi femün pu nehuen piuquengelu. Ngüneduamaiñ quiñe hueche ñi rupan, Ben pingelu Alemania mapu mu. Tañi colegio mu com feyentuquefuingün ti evolucion mu. Cafei raquiduamqueingün ñi feipin ti Biblia Chau Dios ñi deumael mu, re epeu müten piqueingün. Quiñe antü feipingei ñi quimelelafiel tañi pu compañ chumngelu ñi maneluucülen Chau Dios ñi deumafiel ta mongen, fei nehuen piuque mu nütramcai tañi feyentun, ¿chum tripai? Quisu feipi: “Tañi quimeltuchefe cüme allcütueneu. Iñche huirintucufiñ quiñe papel tañi hueupial, fei tañi profesor copiafi feitachi papel ca elufi com tañi pu compañ fei ñi inaduamafiel”. ¿Chumingün Ben tañi pu compañ? Quisu feipi: “Epe com yamquechi allcütueneu engün, inayentufalimi pingen”. Ñi rupan Ben pengeli pu nehuen piuquengelu yamngequei ca raquiduamelafui caquelu che fei ñi quimafiel Chau Jehová. Feimu rume falin-ngei nehuen piuquengeal.

10. ¿Chem pengeli ti palabra “nor piuqueyen”?

¹⁰ Biblia mu, ti palabra hebrea rulpadungungelu “nor piuqueyen” cam “piuqueyen” pengeli tañi fente piuqueyechen quiñe che. Fentren rupa tüfachi palabra pengeli Chau Dios ñi nor piuqueyefiel tañi pu che, ca chumngechi piuqueyeuquei pu serfiquefilu ta Chau Dios (2 Sam. 9:6, 7). Rupalu ta antü doi nor piuquengerpuafui ta che. Tüfachi dungu mu rupai ta Daniel.

11. Füchalelu Daniel, ¿chumngechi pengeli ñi nor piuquengen? (Inaduamnge ti adentun hunen pagina mu).

¹¹ Com tañi mongen mu Daniel fentren rupa pengeli ñi nor piuqueyefiel ta Chau Jehová. Huelu nielu doi 90 tripantu rupai quiñe fütra cüdaungechi dungu mu. Feichi mu pu medo ca pu persa ngüneniequefi ta Babilonia, fei Darío lonco ülmencülefui. Quiñeque huentru adniequelu ti lonco ülmen ñi ruca üdequefuingün ta Daniel ca yamquelafingün ta Chau Jehová, feimu nütramcahuingün chumngechi ñi langümafiel ta Daniel. Tüfa engün feipi feipiyefingün ta Darío ñi entual quiñe ley. Daniel ñi inayal tüfachi ley mülefui ñi ngillatuhuenoafiel ta Chau Jehová 30 antü. Femle, Daniel pengelafui ñi nor piuqueyefiel ti lonco ülmen müten, huelu Jehová no. Fei, ¿chumi Daniel? Daniel feyentufi Jehová müten, feimu ütrüftucungei ti rüngan mu cheu ñi mülen trapial. Huelu Jehová montulfi ca fürenefi Daniel ñi nor piuquengen mu (Dan. 6:12-15, 20-22). ¿Chem quelluaiñmu taiñ nor piuquengeal Daniel reque?

12. ¿Chumi Daniel ñi püntütripanoal Jehová mu?

¹² Taiñ püntütripanoal Jehová mu, mülei taiñ rume piuqueyeafiel. Daniel rume piuqueyeniefi tañi Huenu Chau, feimu püntütripalai quisu mu. Daniel raquiduami chi Jehová chumngechi pengelquefui tañi cüme piuquengen, feimu doi piuqueyefi (Dan. 9:4). Cafei Daniel raquiduami com ti cümeque dungu ñi femün Chau Jehová quisu mu ca tañi pu che mu, feimu rume mañumcülefui (Dan. 2:20-23; 9:15, 16).

13. 1) Pu huecheque cristiano, ¿chem dungu famentuquefingün ñi nor piuqueyeafiel Jehová? Feipinge quiñe rupan dungu (ca inaduamnge ti adentun). 2) Ramtungeliyiñ pu testigo ñi quelluntucupefiel mai ñi femün pu homosexual, ¿chem feipiafuiñ? (Inaduamnge ti video).

 ¹³ Famülque mu, Daniel reque, taiñ pu huechequeche hualloñmaqueyu pu che yamquenofilu Chau Jehová ca tañi huercün dungu. Feichi pu che illamcayafui tuchi piuqueyefilu ta Chau Dios cam ngüchaltucuafui pu huechequeche ñi püntütripayal Chau Jehová mu. Femngechi rupai quiñe hueche huentru Gabriel pingelu, mülelu Australia mapu mu. d Huechengelu, quiñe cüdaungechi dungu rupai colegio mu. Ti quimeltuchefe ramtufi ti pu estudiante chumafuimün quiñe hueni feipifule ñi homosexualngen. Ca feipi: “Quiñe püle mülenagcülepe pu quelluntucualu tañi hueni, cañpüle mülenagcülepe pu quelluntucunofilu”. Fei Gabriel feipi: “Epe com tañi compañ quelluntucufingün, huelu cangelu testigo iñchiu femlayu”. Fei hula Gabriel mülefui ñi pengelal ñi nor piuqueyefiel ta Chau Jehová, quisu feipi: “Petu faltai ñi fentepuhual ti clase, feimu tayu pu compañ ca tayu quimeltuchefe afel-lai tayu lucatueteu ca tayu ayentueteu. Chem rume femün tañi tüngduamcüleal ca tañi incañpehual tañi feyentun, huelu pilaingün tañi allcütuaeteu”. ¿Chum duami Gabriel? Fei feipi: “Ayülan tañi lucatungen, huelu rume ayühun tañi nor piuqueyefiel ta Jehová ca tañi incañpefiel ñi feyentun”. e

14. ¿Chumaiñ taiñ püntütripanoal Jehová mu?

¹⁴ Daniel reque, piuqueyeafiyiñ ta Jehová com piuque mu, femngechi turpu püntütripalayaiñ quisu mu. Taiñ doi piuqueyeafiel Jehová duamfali ñi cüme quimafiel tañi chumngen. ¿Chumngechi femafuiñ? Cüme ngüneduamaiñ com ñi deumael (Rom. 1:20). Hueche, ¿chem quelluaimu tami doi piuqueyeafiel ca yamnieafiel ta Jehová? Ti troquiñ “¿Deumangepei mai?” mülei video ca caquelu troquiñ tami ngüneduamal. Ca ngüneduamafuimi ti folleto ¿Es la vida obra de un Creador? ca El origen de la vida. Cinco cuestiones dignas de análisis. Ngüneduamnge ñi feipin quiñe hueche lamngen, Ester pingelu, mülelu Dinamarca mapu mu, fei feipi: “Müna ayüfiñ ñi feipin tüfachi folleto. Feipilaeiñmu chem taiñ feyentual, doi mai quimeltuqueiñmu fillque dungu fei taiñ dullial chem taiñ feyentual”. Ben, nütramcangelu ti parrafo 9, feipi: “Tüfachi papel nehuentueneu tañi feyentun, pengeleneu Chau Ngünechen ñi deuman ta mongen”. Ngüneduamlu eimi com tüfachi publicacion, quimtucuaimi ñi rüfngen chem pin Apocalipsis 4:11: “Taiñ Chau Ngünechen Jehová, eimi nehuen-ngeimi, deumaimi com tati mülelu, eimi tami pin meu mülei ca deumangei engün. Feimu mülei tami püramyengeal ca yamniengeal”. f

15. ¿Ca chem femafuiñ taiñ doi hueniyeafiel Jehová?

¹⁵ ¿Ca chem dungu quelluaiñmu taiñ doi piuqueyeafiel Jehová? Taiñ ngüneduamal ñi femün tañi fotüm, Jesús. Tüfachi dungu femi quiñe lamngen Samira pingei, Alemania mu tuhui, fei feipi: “Quimfilu ta Jesús doi cüme quimürpufiñ ta Chau Jehová”. Pichi domongelu Samira, cüdautuquefui  ñi raquiduamal Jehová ñi hueniyeteu ca ñi piuqueyeteu. Huelu femngechi raquiduamquelafui Jesús mu. Samira feipi: “Rume ayüfiñ chumngen ta Jesús, fei piuqueyefi pu pichiqueche ca huenifalngei” pi. Doi quimfilu ta Jesús, doi hueniyefui ta Jehová. ¿Chumngelu? Samira feipi: “Ñochiquechi quimürpufiñ Jesús ñi cüme inayentuniefiel tañi Chau, cafei ngüneduamün Chau Jehová ayüniei com che tañi quimaeteu, feimu huercüi tañi fotüm mapu mu” (Juan 14:9). Hueche, ayülmi tami doi hueniyeafiel ta Jehová, eluhuafuimi tami doi cüme quimürpuafiel ta Jesús. Femülmi, doi piuqueyeafimi ta Chau Jehová ca püntütripalayaimi quisu mu.

16. ¿Chumngelu mülei taiñ nor piuquengeal? (Salmo 18:25; Miqueas 6:8).

¹⁶ Fentren che nor piuquengelu nieingün cümeque hueni püntütripaquenolu fei engün meu (Rut 1:14-17). Cafei nor piuqueyefiliyiñ Jehová, tüngduamcülequeiñ. ¿Chemu? Chau Dios feipicünui ñi nor piuqueyeafiel tuchi tañi nor piuqueyeteu (papeltunge Salmo 18:25; Miqueas 6:8). Iñchiñ falin chengelaiñ, huelu Chau Jehová tati com deumalu, tati com nehuen-ngelu ayülei taiñ rumel piuqueyeaeteu. Afmatufali ta tüfa. Chem huesa dungu no rume, taiñ pu caiñe no rume, ti lan dungu no rume catrütulayaiñmu taiñ hueniyefiel Jehová (Dan. 12:13; Luc. 20:37, 38; Rom. 8:38, 39). Felei llemai, rume cümei taiñ inayal Daniel ñi femün ca nor piuqueyeafiel ta Chau Jehová.

17, 18. ¿Ca chem quimeltueiñmu Daniel?

¹⁷ Tüfachi troquiñ mu ngüneduamiyiñ epu cüme dungu ñi femün Daniel, huelu ca fentren dungu quimürpuafuiñ tañi mongen mu. Por ejemplo, Chau Jehová pengelelfi Daniel peuma ca afmatun dungu, cafei elufi pepiluhun ñi quimelal Chau Ngünechen ñi feipicünun. Fentren tüfachi dungu huechutriparpui, caquelu feipieiñmu chem dungu rupayai cüpalechi antü mu.

¹⁸ Cüpalechi troquiñ mu ngüneduamngeai epu dungu feipicünungelu Daniel ñi lifru mu. Cüme ngüneduamfiliyiñ quelluafeiñmu com iñchiñ taiñ cüme femal, fütaqueche cam huechequeche cütu. Chau Dios ñi feipicünuel quelluaiñmu taiñ nehuen piuquecünuhual ca nor piuquengeal, femngechi pepicaucüleaiñ taiñ chaftuafiel cüpalechi huesaque dungu.