• “Tañi füta fill antü tañi ngünencaqueteu troquiuquefun”.

• “Illamcangelu troquiufun, falinolu ca cüme adngenolu troquiuquefun”.

• “Quisu cutrancaucülefun müten, inei no rume feipiquelafiñ”.

• “Raquiduamürpun Jehová ñi quelluquenoeteu”.

Pu domo femngechi dungu mu rupaquei ñi füta ñi pequefiel mu podngechi dungu, pornografia pingechi dungu. Quiñeque huentru ellcaquechi pequefi pornografia fentren cüyen ca tripantu mu cütu. Feimu ti domo turpu maneluulayan tañi füta piafui. Quiñe domo feipi: “Ñi füta quiñeque mu quimlafiñ ñi ineingen, ¿ca chem dungu chi femquei quisulen mu? piquen”.

Eimi tami huentru, ¿pequefi podngechi cudumuhun? a Tüfachi troquiñ quelluaimu. Peafimi cümeque ngülam Biblia mu tami yafültucuaeteu. Peafimi Jehová tami quelluaeteu ca tami piuqueyenieteu. Tüfachi troquiñ ca quelluaimu tami tüngcüleal ca tami fülmanieafiel Jehová. b

Chem dungu rume femle tami füta, eimi ¿chumafuimi tami tüngcüleal? Peafiyiñ quiñeque dungu.

Culpatuuquilnge. Quiñe domo culpatuhuafui tañi füta ñi pequefiel mu pornografia. Alice c cümelcalenolu ca cüme adngenolu troquiuquefui. Feipi: “¿Chumngelu tañi füta caquelu domo müten adquintuniequefui, iñche duamquelaeneu?”. Quiñeque domo rume illcutuquefingün tañi füta, feimu culpatuuqueingün. Daniela feipi: “Rume illcuquefun ñi pequefiel mu pornografia tañi füta. Rume hueñancülequefun. Ca iñche tañi duam mu epeque hudafuyu troquiuquefun”.

Eimi femngechi dungu rupalmi, quimtucunge Jehová culpatuquelaeimu ñi pequefiel mu pornografia tami füta. Santiago 1:14 feipi: “Caque quiñeque che ngüchaltucuqueyu quisu tañi illutuqueel” (Rom. 14:12; Filip. 2:12). Feimu Jehová culpatuquelaeimu ta eimi, ca falintueimu tami feyentuquefiel mu ta Jehová (2 Crón. 16:9).

 Tami füta pefile pornografia, eimi ta culpalaimi ca cüme domongelan pilayaimi. Pu quimche feipi pequelu pornografia ñi lonco mu rupaquei com dungu ñi illutuqueel, fei quiñe domo mu tuduamquenolu troquihuingün. Feimu pequefingün pornografia.

Müte raquiduamcülequilnge. Catherine antü ca pun raquiduamcülequefui tañi füta ñi pequefiel pornografia, ca dungu raquiduamquelafui. Ca domo Frances pingelu feipi: “Quimnoli cheu ñi mülen tañi füta, püroucülelu ñi pütra troquiuquefun tañi fill raquiduamcülen mu”. Caquelu pu domo feipi ñi mülen mu pu peñi ca lamngen engün quiñeque quimnielu ñi femün tañi füta rume yehuequeingün. Caquelu domo quisulelu troquiuqueingün, inei no rume entendequelaeneu tañi rupamequen pingün.

Eimi femngechi dungu rupalmi, eimi müten no. Fentrenque domo ca femngechi dungu rupaquei. Re raquiduamcülelmi tüfa mu, huesalcayafeimu. Doi cümei tami raquiduamal tami hueniyeniefiel Jehová, fei quelluaimu tami nehuencüleal (Sal. 62:2; Efes. 6:10).

Papeltufilmi ca raquiduamülmi chem ñi feipin Biblia, quelluaimu. Biblia mu peaimi quiñeque domo ñi rupan cüdaungechi dungu mu, huelu ñi llellipuquefiel mu Jehová fei tüngduamcületuingün. Quiñeque mu Jehová entufemüñmaquelafi ñi huesa rupan engün, huelu eluquefi ñi tüngcüleal. Raquiduamnge chem dungu ñi rupan Ana. Biblia feipi Ana rume hueñancülequefui. Fei alüñma llellipufi ta Jehová, fei elueyu ñi tüngduamcüleal. Fei Ana tüngduami quimnolu rume chem dungu ñi rupayal (1 Sam. 1:10, 12, 18; 2 Cor. 1:3, 4).

Feipiafimi pu loncolelu tami quelluaeteu. Fei engün “quiñe ellcaupeyüm cürüf mu reque feleai, quiñe ellcaupeyüm tati cürüftucu mahun meu” reque felei (Is. 32:2). Fei engün feipiafeimu chem lamngen tami nütramcayafiel, femngechi tami yafültucuaeteu (Prov. 17:17).

Eimi, ¿quelluafimi tami füta ñi pehuenoafiel pornografia? Femafuimi chi. Biblia feipi “epu che doi cümelcalei tati quisulelu mu”, femngechi quelluhuingu ñi chaftuafiel huesaque dungu (Ecl. 4:9-12). Pu quimche ngüneduamfingün quiñentrür cüdaule ti curehuen, ti huentru pehuelayafui pornografia ca ti domo huiño maneluhuafui tañi huentru mu.

 Tami füta eluucülele ñi pehuenoafiel pornografia, eimi quelluafuimi ñi femhuenoal. Tami füta, ¿llellipufi ta Jehová ca feipifi pu loncolelu tañi quelluaeteu? (2 Cor. 4:7; Sant. 5:14, 15). Tami füta tañi femün mu, ¿pengelquepei mai ñi famentuafiel pornografia? ¿Cuñiutucuucülen mu pünequefi mai tati electronico chemcün? ¿Püntütripaquepei mai ñi penoafiel pornografia? (Prov. 27:12). ¿Eluucülequepei mai ñi quellungeal ca chem no rume ñi ellcanoal eimi mu? Femngechi femle, eimi quelluafuimi.

¿Chumngechi quelluafuimi? Peafiyiñ ñi femquen Felicia. Tañi füta Ethan pingelu pichicalu müten pequefui pornografia, feimu rume cüdautuquei ñi pehuenoafiel. Fei ayüfule ñi peafiel pornografia, tañi domo eluucülequei ñi allcütuafiel. Ethan feipi: “Iñche com ñi mülen ñi piuque mu feipiafuiñ tañi domo. Quisu piuqueyenquechi quelluqueneu ñi quiñe püle nentuafiel tüfachi huesaque illutun. Ca ramtuqueneu ñi pefiel mu pornografia cam ñi pehuenofiel. Ca quelluqueneu chumngechi ñi pünequefiel internet ca cheu tañi femquen”. Felicia huesa duamelqueyu ñi füta ñi cüpa pefiel pornografia. Felicia feipi: “Illculeli, quellulayafun tañi füta ñi pehuenoafiel pornografia. Feimu eluhun ñi allcütuafiel chem ñi rupan. Deu nütramcan mu tüfachi dungu, fei tañi füta quelluqueneu ñi huesa duamcülenoal iñche”.

Eimi domo femngechi nütramcahulmu tami füta eimu, quelluafuimi ñi pehuenoafiel pornografia. Ca femngechi femülmi, quelluaimu eimi ñi huiño maneluhual tami füta mu. Ti füta ellcalnofile tañi domo tañi ayüqueel, cheu tañi amulen ca chem tañi femquen, femngechi ti domo müleduamcülelayai ca huesa raquiduamcülelayai fei mu.

¿Chumngechi quelluafuimi tami füta? Trür papeltuafuimu ca inaduamafuimu tüfachi troquiñ. Ti füta mülei ñi elcünual ti pornografia ca manelfal chengetual. Eimi domo, nütramcafilmi tami füta tüfachi dungu mu, tami füta ngelai ñi illcufemal, doi mai mülei ñi quimtucunieal tami chum duamcülen. Eimi domo, ¿chem mülei tami femal? Quellufinge tami füta ñi pehuenoafiel pornografia, femngechi eluñmayafimi tañi manelfal chengetual. Rume falin-ngei mür tamu quimafiel chumngelu pu che pequefi pornografia ca chumafui ñi pehuenoafiel. d

Eimi cüpa nütramcafilmi tami füta feitachi dungu mu, huelu quimtucunielmi tami illcual cam ñi illcual tami füta, ¿chumafuimi? Feipifinge  quiñe loncolelu tamu doi manelniefiel ñi müleal ti nütramcan mu, fei yeniepe ti nütramcan. Quimtucunienge, tami füta pehuenofiel mu rume pornografia, huelu tami maneluutual tami füta mu rupayafui alün tiempo. Feimu fentecünulayaimi. Eluunge tami peafiel pichiquen cümeque dungu ñi rupalen tamu curehuen-ngen mu. Maneluucülenge tami curehuen mu ñi nehuencületual (Ecl. 7:8; 1 Cor. 13:4).

Huelu tami füta huiño petufile pornografia alün tiempo ñi rupan mu, ¿feipiafuimi tañi füta repentiuquelai, turpu elcünulayai pornografia piafuimi? No, feipilayafuiñ. Ti füta nünieafeyu reque ti pornografia, feimu com ñi mongen mu chi mülei ñi chaftuafiel tüfa. Fentren tripantu rume pehuenofile pornografia, huelu quiñe antü perumetuafui. Feimu rumel mülei ñi cuñiutucuucüleal ñi pehuenoafiel turpu, alün tripantu rume pehuenofile pornografia (Prov. 28:14; Mat. 5:29; 1 Cor. 10:12). Ti füta mülei ñi cümelcacünutual ñi raquiduam. Mülei ñi üdeafiel huesaque dungu: ti pornografia ca chem podngechi dungu rume, por ejemplo ñi quisutu malütuuquen quiñeque che (Efes. 4:23; Sal. 97:10; Rom. 12:9). Tami füta eluucülele ñi cangelu chengetual, maneluhuafuimi ñi femhuenoal ti huesa dungu. e

Tami füta pinole ñi elcünuafiel ti pornografia, ¿chumafuimi? Eimi ¿rume huesa duamcülepelayafuimi? Ngünencaniengen troquihuafuimi ca rume illcuafuimi. Elcünulelfinge Jehová tami huesa duamcülen, fei quelluaimu tami tüngcüleal (1 Ped. 5:7). Ngillatuniefinge Jehová, papeltuniefinge Biblia ca raquiduamnge tami papeltuel mu, femngechi doi fülconaimi Jehová mu ca quisu doi fülconai eimi mu. Isaías 57:15 feipi Jehová mülei pu hueñancülelu ñi piuque ca pu cuñifallcülelu engün, ca ayüniei ñi ayüucületual engün. Eluunge tami doi cüme serfiafiel Jehová, quelluen piafimi pu loncolelu, ca rüf maneluunge tami füta ñi cümelcacünutuafiel ñi mongen (Rom. 2:4; 2 Ped. 3:9).