1. ¿Chem am ayühulqueiñmu?

 CHAU JEHOVÁ ayüquei taiñ ayüucüleal, quisu eluqueiñmu ñi nehuen taiñ ayüucüleal (Gál. 5:22). ¿Chem dungu ayühulqueiñmu? Biblia feipi doi ayüucülequeiñ hulün mu ta llohun meu. Feimu amuldungun mu quellufiel mu taiñ pu peñi ca pu lamngen, doi ayüucülequeiñ (Hech. 20:35).

2, 3. 1) Ñi feipin Gálatas 6:4, ¿chem epu dungu quelluaiñmu ayüucülen serfinieafiel Jehová? 2) ¿Chem peaiñ tüfachi troquiñ mu?

² Ti apostol Pablo feipi epu dungu taiñ quelluaeteu ayüucülen cüdahuelnieafiel Jehová (papeltunge Gálatas 6:4). Hunelu mu, mülei taiñ eluafiel ta Jehová ti doi cümelu taiñ nieel, femngechi doi ayüucületuaiñ (Mat. 22:36-38). Epu, trürümuulayaiñ caquelu che engu. Com taiñ nieel iñchiñ Jehová mu cüpai, feimu cülfünchengeliyiñ cam nieliyiñ pepiluhun quiñeque dungu mu, mañumafiyiñ ta Jehová. Huelu caquelu pu peñi ca lamngen doi pepiluule iñchiñ mu tañi amuldungual, ¿chumaiñ? Ayüucüleaiñ fei engün mu, quisu engün am serfiniefilu Jehová com tañi nehuen ca ñi adümuhun mu. Fei engün ayüquelai ñi doi cümelu troquingeal. Huesa raquiduamlayaiñ quisu engün mu, doi mai inayentuafiyiñ tañi femqueel engün.

³ Quiñeque mu, müte cüdahuelquelafiyiñ Jehová chumngechi taiñ ayüqueel iñchiñ. Tüfa huesa duamelafeiñmu. Tüfachi troquiñ mu peaiñ chem quelluafeiñmu huesa duamcüleliyiñ. Ca peaiñ chumafuiñ adümuuliyiñ quiñeque dungu mu ca chem quimürpuafuiñ caquelu pu peñi ca pu lamngen mu.

4. ¿Chem huesa duamelafeiñmu iñchiñ? Feipinge ñi rupan taiñ lamngen Carol.

⁴ Taiñ cutrancülen mu cam taiñ füchalen mu, müte cüme cüdahuel-layafuiñ ta Jehová. Tüfa huesa duamelafeiñmu. Femngechi dungu rupai taiñ lamngen Carol. Quisu amuldunguquefui cheu ñi doi duamniengeel quellu. Feichi mu taiñ lamngen 35 che chillcatulfi Biblia ca fentren engün taiñ lamngen quellufi ñi fautizahual engün. Rume cüme tripaquefui ñi amuldungun ta Carol. Rupalu tripantu, taiñ lamngen Carol rume cutrani, pepi tripahuelai ñi ruca mu. Taiñ lamngen feipi: “Iñche quimnien tañi cutrancülen mu pepi femquelan caquelu lamngen tañi femqueel. Feimu raquiduamquen tañi cüme cüdahuelnofiel Jehová fei engün reque. Tüfa rume huesa duamelqueneu” pi taiñ lamngen. Taiñ lamngen Carol femquei com tañi pepi femqueel ñi serfiafiel Jehová, rume saquifali tañi femqueel taiñ lamngen. Taiñ Huenu Chau Jehová rume ayüucülei tañi femqueel mu taiñ lamngen.

5. 1) ¿Chem raquiduamtucuaiñ com iñchiñ? 2) Ñi pengelün tati adentun, ¿chumngechi pengeli ti peñi ñi femquen com tañi pepilnieel?

⁵ Huesa duamcüleliyiñ taiñ fente cüdauquenon cuifi reque, ramtuhuaiñ: “¿Chem dungu feipiqueneu Jehová tañi femal iñche?”. Jehová ayüquei taiñ cüdahuelafiel com piuque mu, chem dungu rupalefuliyiñ rume. Raquiduamnge tüfa: quiñe lamngen 80 tripantu nielu, raquiduamquei cuifi ñi rume amuldunguquen 40 tripantu niefulu. Feimu ti lamngen rume hueñancülei tañi pepi amuldunguquenon cuifi reque. Quisu femquei com tañi pepilnieel fachantü, huelu ayüucülenolu Jehová troquiuquei. Huelu tüfa ¿rüfngefui chi am? Femlai llemai. Raquiduamaiñ, taiñ lamngen 40 tripantu niefulu femürpui com tañi pepilel, feula 80 tripantu nielu amulei tañi femmequen. Com tañi mongen mu femquei com tañi pepilel. Raquiduamliyiñ Jehová ñi ayüucülenon taiñ cüdau mu, raquiduamaiñ Jehová ayüquei taiñ cüdahuelafiel com piuque mu, femngechi ayüucüleai (ca ngüneduamafuimi Mateo 25:20-23).

6. ¿Chem quimürpuafuiñ María tañi femün mu?

⁶ Raquiduamaiñ chem taiñ pepilel, raquiduamlayaiñ taiñ pepilnoel. Raquiduamaiñ chem tañi femün ta María. Quisu cutrancülei, feimu pepi amuldungulai chumngechi tañi ayüquefel. Hunelu mu tüfa rume huesa duameleyu, huelu raquiduamtucufi quiñe lamngen cutrancülelu, pepi tripaquenolu tañi cahuitu mu. Taiñ lamngen María eluhui tañi quelluafiel. Feipi: “Compañfiñ tüfachi lamngen tayu amuldungual carta mu ca telefono mu. Quellufiel mu iñche tüfachi lamngen, rume ayühuleneu”. Iñchiñ ca inayentuafuiñ taiñ lamngen María. Raquiduamaiñ chem taiñ pepilel iñchiñ, femngechi ayüucülen serfiafiyiñ Jehová. Feula peaiñ chumafuiñ adümuucüleliyiñ quiñe cüdau mu.

7. ¿Chem ngülam huli Pedro?

⁷ Ti apostol Pedro huirintucui com pu cristiano elungeingün adümuhun, huelu feichi adümuhun mu yafültucuafingün pu peñi ca pu lamngen (1 Ped. 4:10). Nieliyiñ adümuhun quiñeque dungu mu, ellcalayafiyiñ. Raquiduamlayaiñ caquelu taiñ ütriraeteu cam ñi huesa duamcüleal iñchiñ taiñ adümuhun mu. Ellcafiliyiñ  taiñ adümuhun, com piuque mu poyelayafuiñ ta Jehová.

8. Ñi feipin 1 Corintios 4:6, 7, ¿chumngelu mallmaulayaiñ taiñ adümuhun mu?

⁸ Huelu mülei taiñ cuñiutucuhual, ngelai taiñ mallmaunoal taiñ adümuhun mu (papeltunge 1 Corintios 4:6, 7). Por ejemplo, eimi feipiquefimi chi tati pu che tami papeltulelafiel Biblia, rumel femqueimi fei cüme tripaquei tami femün. ¡Müna cüme dungu! Mülei tami elcünunoafiel ta tüfa. Huelu ngelai tami mallmaunoal feitachi dungu mu. Raquiduamnge tüfa mu. Eimi tripaimi amuldungual, rume cüme tripai tami amuldungun. Peimi quiñe che tami papeltulelafiel Biblia, eimi rume ayüucüleimi. Com tripalu pu peñi ca pu lamngen ayüimi tami feipiafiel chum tripan tami amuldungun. Com trahutuulu tati amuldunguquelu, eimi ina acutuimi. Fei allcütuimi quiñe lamngen dungudungungei ñi elcünun quiñe revista, rume ayüucülei ti lamngen. Huelu quiñe revista müten elcünui, eimi entuimi quiñe estudio. ¿Chumaimi eimi? Cümeafui ca antü tami feipial, femngechi tami huesa duamelnoafiel tati lamngen elcünulu quiñe revista. Huelu loncontucunienge, eimi adümuucüleimi tami entual estudio. Fentecünulayaimi tami femmequen.

9. ¿Chumaiñ am taiñ pepiluhun mu?

⁹ Loncontucuaiñ: taiñ nieel adümuhun Jehová ta elueiñmu. Taiñ pepiluhun mu ngelai taiñ mallmaunoal, huelu mai yafültucuafiel ti trahunche (Filip. 2:3). Poyefiliyiñ Jehová taiñ adümuhun mu, ayüucüleaiñ. Doicülelu troquiucülelayaiñ caquelu peñi ca lamngen mu, huelu mai püramyeafiyiñ Jehová taiñ adümuhun mu.

10. ¿Chumngelu cümelafui taiñ trürümuhual caquelu peñi ca lamngen mu?

¹⁰ Cuñiutucuunoliyiñ, trürümuhuafuiñ caquelu peñi ca lamngen mu, fei doicülelu troquihuafuiñ. Raquiduamnge epu peñi mu. Quiñe peñi hulquei cümeque hueupin. Tüfachi peñi doicülelu troquihui cangelu peñi mu ñi hulal cümeque hueupin. Feiti cangelu peñi cüdautuquei ñi hueupial, huelu quelluchequei, cüme quimeltuquefi tañi pu yall ca rume amuldunguquei. Tüfachi epu peñi fillque adümuhun nieingu. Jehová ñi troquiñche mu com pu peñi ca pu lamngen fillque adümuhun nieingün, fei poyequefingün  Jehová ca quelluchequeingün. Feimu rume mañumniefiyiñ engün.

11. ¿Chumngelu inayentuafuiñ Jesús?

¹¹ Deu peiñ taiñ trürümuunoal caquelu peñi ca lamngen mu, huelu cümeque dungu quimafuiñ ñi femquen pu peñi ca pu lamngen. Raquiduamnge Jesús mu. Iñchiñ trürümuulayafuiñ Jesús mu, quisu culpaquelafui, iñchiñ mai culpaqueiñ. Huelu fentren cümeque dungu quimafuiñ tañi chumngechi chengen ca ñi femquen ta Jesús (1 Ped. 2:21). Inayentufiliyiñ com taiñ nehuen mu ta Jesús, doi cüme poyeafiyiñ Jehová ca doi cüme quimeltuchefengeaiñ.

12, 13. ¿Chem cümeque dungu quimafuiñ rey David mu?

¹² Biblia mu pengelngequei fentren dungu ñi femquen pu poyequefilu Jehová. Culpafechengefuingün, huelu inayentuafuiñ tañi cümeque femün (Heb. 6:12). Raquiduamnge ti rey David mu. Jehová rume ayühulmaeyu ñi piuque ta David (Hech. 13:22). Huelu fentren rupa huelulcahui David. Rume culpafengefui rume, huelu fentren dungu quimafuiñ David mu. ¿Chumngelu? Norümngelu huelu quisutu incaulai, eluhui tañi norümngeal ca rüf repentiuhui tañi huesa femün mu. Fei Jehová perdonaeyu (Sal. 51:3, 4, 10-12).

¹³ Ramtuhuaiñ: “¿Chumngechi llouquefiñ tañi ngülamtungeel? ‘Mai, huesa femün’ ¿piquepen mai? Cam, ¿quisutu incauquen? ¿Culpatuquefiñ caquelu iñche tañi huesa femün mu? ¿Eluuquepen mai tañi huelulcauhuenoal femngechi dungu mu?”. Iñchiñ ramtuhuafuiñ com tüfa petu papeltuliyiñ ñi femün cuifique huentru ca domo poyequefilu Jehová. Tañi rupan engün, ¿eimi ca femngechi dungu mu rupaquepelaimi? Huesaque dungu mu rupafulu engün, ¿chumngechi pengelquei tañi poyequefiel Jehová? Feimu ramtuunge: “¿Chumngechi inayentuafun ñi cüme femün engün?”.

14. ¿Chem quimeltueiñmu taiñ pu peñi ca pu lamngen?

¹⁴ Iñchiñ ca femngechi cümeque dungu quimafuiñ ñi femquen pu peñi ca pu lamngen huechelelu ca füchalelu. Por ejemplo, ¿quimniefiyiñ quiñe  peñi cam quiñe lamngen ñi rupamequen huesaque dungu mu? Colegio mu cam cüdau mu chaftumequepelafi huesaque dungu. Tañi pu familia mu chi caiñetungei cam cutrancülei chi. ¿Ngüneduamafuimi chem dungu mu inayentuafuimi tüfachi pu peñi ca pu lamngen? Ngüneduamülmi feitachi pu peñi pu lamngen chumngechi ñi chaftuquefiel huesaque dungu, eimi ca femngechi quimaimi chumngechi tami chaftuafiel nielmi huesaque dungu. Rume mañumquefiyiñ pu peñi ca pu lamngen ñi cüme chaftuquefiel huesaque dungu, inayentufalngeingün (Heb. 13:7; Sant. 1:2, 3).

15. ¿Chem ngülam huli ti apostol Pablo? Ca, ¿chumngechi quelluaiñmu?

¹⁵ Com iñchiñ mülei taiñ poyeafiel ta Jehová com taiñ piuque mu, femngechi tati trahunche quiñeucüleaingün ca tüngcüleaingün. Raquiduamnge pu cristiano hunen siglo mu. Quisu engün niequefuingün fillque adümuhun ca fillque cüdau trahunche mu (1 Cor. 12:4, 7-11). Huelu fei engün notucauquelaingün feitachi dungu mu. Fei Pablo feipifi pu cristiano chem dungu mu rume adümuucülele engün, mülei ñi yafültucuafiel ti trahunche. Pablo feipifi pu Éfeso che: “Fei Cristo meu com ñi troquiñche cüme adüucülei engün. Ca cüme hueluconquechi quelluucülequei, femngechi ñi cüme amuleal engün ñi quiñeucülen ta piuqueyehun meu” (Efes. 4:1-3, 11, 12, 16). Feichi mu, pu inalu Pablo tañi ngülam quelluntucuingün ñi quiñeucüleal ca ñi tüngcüleal ti trahunche. Famülque mu, ca femngechi rupaquei.

16. ¿Chem am eluucüleaiñ taiñ femal? (Hebreos 6:10).

¹⁶ Trürümuulayaiñ caquelu peñi ca lamngen mu. Eluucüleaiñ taiñ inayentuafiel ta Jesús. Papeltulmi Biblia, entuaimi cümeque dungu ñi femün quiñeque huentru ca quiñeque domo. Ca entuaimi cümeque dungu tami pu peñi ca pu lamngen famülque mu. Com tami adümuhun mu cüdahulmi, Jehová turpu ngoimanentulayai tami femün (papeltunge Hebreos 6:10). Poyeniefinge Jehová, quisu rume falintuquei tami femquen com piuque mu.