1. ¿Chem dungu femafuiñ taiñ doi cüme cüdahuelafiel Jehová?

 IÑCHIÑ pu rüf cristianongen rume piuqueyequefiyiñ Jehová, feimu ayüqueiñ taiñ cüme cüdahuelafiel. Huelu taiñ femal tüfa, mülei taiñ raquiduamal chem dungu femafuiñ ca mülei taiñ cüdahual taiñ femürpual. Por ejemplo, cüdahuafuiñ taiñ doi cüme cristianongeal, cüdahuafuiñ taiñ doi adümuhual ca quintuafuiñ chumngechi taiñ quelluafiel ta caquelu che.

2. ¿Chemu mülefui taiñ raquiduamal chumngechi taiñ doi cüdahuelafiel Jehová?

² ¿Chemu mülefui taiñ raquiduamal chumngechi taiñ doi cüdahuelafiel Jehová? Hune, ayüqueiñ taiñ ayühulafiel taiñ cüme Chau Jehová. Iñchiñ cüdahuelfiel mu ta Jehová com taiñ pepiluhun mu, quisu müna ayüuquei. Ca epu, ayüqueiñ taiñ doi cüme cristianongeal, femngechi taiñ quelluafiel taiñ pu peñi ca pu lamngen (1 Tes. 4:9, 10). Com iñchiñ cüdahuafuiñ taiñ doi cüme serfiafiel Jehová, chumten tripantu yeniefuliyiñ rume taiñ cristianongen. ¿Chem quelluafeiñmu? Peafiyiñ.

3. Pablo, ¿chem ngülamtufi ta Timoteo ñi femal? (1 Timoteo 4:12-16).

³ Timoteo petu huechelefui huirintuculeleteu Pablo tañi hunen carta, huelu mufü tripantu yenieuyefui tañi loncolen trahunche mu. Femfulu rume, Pablo yafültucueyu ñi doi cüme serfiafiel ta Jehová (papeltunge 1 Timoteo 4:12-16). Pablo, ¿chem epu dungu meu ayüfui ñi cüdahual ta Timoteo? Hune, Timoteo cüdahuafui tañi doi  piuqueyechefengeal, tañi doi feyentual Chau Jehová mu ca ñi yenieal lif mongen. Ca epu, Timoteo cüdahuafui tañi doi adümuucüleal tañi papeltual, ngülamtucheal ca ñi quimeltucheal. Feula peaiñ Timoteo ñi femün. Tüfa quelluaiñmu taiñ raquiduamal chem dungu rüf femafuiñ taiñ doi cüme cüdahuelafiel Jehová. Ca peaiñ chumafuiñ taiñ quelluafiel ta caquelu.

4. Ñi feipin Filipenses 2:19-22, ¿chumngelu Jehová elufi falinque cüdau ta Timoteo?

⁴ Jehová, ¿chumngelu elufi falinque cüdau ta Timoteo? Quisu rume inayentufalfui tañi femngen mu (papeltunge Filipenses 2:19-22). Timoteo ñom piuquengefui, müna cüdaufengefui, püntütripaquelafui Jehová mu ca manelfalngefui. Piuqueyenquechi troquiquefi tañi pu peñi ca pu lamngen ca rüf duamtuquefi. Tañi femngen mu ta Timoteo feimu Pablo rume piuqueyefeyu ca elueyu falinque cüdau (1 Cor. 4:17). Iñchiñ eluuliyiñ taiñ doi cüme cristianongeal, Jehová piuqueyeaiñmu ca eluaiñmu falinque cüdau trahunche mu (Sal. 25:9; 138:6).

5. 1) ¿Chumngechi quimafuiñ chem mu taiñ cüdahual femngechi taiñ doi cüme cristianongeal? 2) Inaduamfinge tati lamngen mülelu adentun mu. ¿Chem dungu femi tañi duamtuafiel ta caquelu?

⁵ Raquiduamaiñ chem dungu meu cüdahuafuiñ taiñ doi cüme cristianongeal. Llellipuafuiñ Jehová taiñ quimelaeteu chem dungu meu cüdahuafuiñ femngechi taiñ doi cüme chengeal. Fei dulliaiñ quiñe dungu ca eluhuaiñ taiñ cüdahual. Por ejemplo, doi eluucüleafuiñ chi taiñ duamtuafiel ca quelluafiel taiñ pu peñi ca pu lamngen. Cafei cüdahuafuiñ taiñ cüme yehual caquelu che iñchiñ cam doi eluucüleafuiñ taiñ perdonayafiel ta caquelu. Ramtuafuiñ quiñe cüme hueni: “Eimi, ¿chem raquiduamqueimi iñche mu? ¿Chem dungu meu cüdahuafun tañi doi cüme chengeal?” (Prov. 27:6).

6. ¿Chem quelluafeiñmu taiñ doi cüme cristianongeal?

⁶ Cüdahuaiñ taiñ doi cüme cristianongeal. ¿Chumngechi? Por ejemplo, ayüliyiñ taiñ perdonachefengeal, papeltuafuiñ Biblia mu ñi femün quiñeque che quim perdonachequelu ca quiñeque quim perdonachequenolu. Fei raquiduamafuiñ tañi femün mu engün.  Jesús inayentufalfui, quisu quim perdonachequefui (Luc. 7:47, 48). Jesús raquiduamquelai ñi huelulcahun mu caquelu che, doi mai raquiduamquei ñi cüme femquen mu engün. Huelu femngechi femquelaingün tati pu fariseo, fei engün “illamtuniequefi caquelu pu che” (Luc. 18:9). ¿Ca chem chumafuiñ? Ramtuhuaiñ: “¿Chem raquiduamquen caquelu mu? ¿Ngüneduamüñmaquefiñ tañi cüme femquen engün?”. Cüdautuliyiñ taiñ perdonayafiel quiñe che, huirintucuafuiñ quiñe papel mu com ti cümeque dungu ñi nieel ti che tañi piuque mu. Ca ramtuhuafuiñ: “¿Chem raquiduamquei Jesús feichi che mu? ¿Perdonapeafeyu mai?”. Com feitachi dungu femliyiñ iñchiñ, doi cüme raquiduamtuaiñ. Cüdautuafuiñ taiñ perdonayafiel taiñ huesalcaeteu, huelu cüdauliyiñ taiñ perdonachefengeal, femürpuaiñ llemai.

7. Ñi feipin Proverbios 22:29, ¿chumngechi Jehová pünequefi pu peñi ca pu lamngen adümuulu?

⁷ ¿Ca chumafuiñ taiñ doi cüdahuelafiel Jehová? Cüdahuaiñ taiñ doi pepiluucüleal. Por ejemplo, raquiduamnge pu peñi ca pu lamngen cüdauquelu ñi deumangeal Betel ruca, Trahunhue Ruca ca Fütraque Trahunhue Ruca. Fentren fei engün adümuhurpuingün cüdahun mu caquelu peñi ca lamngen adümuulu. Chumngechi pengeli ti adentun nüucülelu tüfachi parrafo mu, pu peñi ca pu lamngen adümurpuingün ñi cüme elcünutual Trahunhue Ruca ca Fütraque Trahunhue Ruca. Jehová ca Jesús pünequefi com pu peñi ca pu lamngen pepiluucülelu ñi femürpual falinque cüdau (papeltunge Proverbios 22:29; 1 Tim. 1:17; 6:15). Iñchiñ ayüqueiñ taiñ cüdahuelafiel Jehová com taiñ pepiluhun mu, iñchiñ taiñ fampüramuunoal, Jehová tañi fampüramyengeal llemai (Juan 8:54).

8. ¿Chumafuiñ taiñ quimal chem dungu meu doi adümuhuafuiñ?

⁸ Raquiduamaiñ chem cüdau doi cüme adümafuiñ. Quimnoliyiñ chem dungu meu doi adümuhuafuiñ, ramtuafiyiñ pu loncolelu ca ti huitran-ngepaquechi loncolelu. Fei engün feipiafeiñmu chi taiñ doi cüme hueupifengeal cam taiñ doi cüme quimeltuchefengeal. Fei ramtuafuiñ: “¿Chem dungu meu cüdahuafun tañi doi cüme hueupifengeal cam quimeltuchefengeal?”. Feimu cüdahuaiñ llemai. ¿Chumngechi femafuiñ? Peafiyiñ. 

9. ¿Chumafuimi tami cüme quimeltuchefengeal?

⁹ Cüdahuaiñ taiñ doi adümuhual. Ayülmi tami cüme quimeltuchefengeal, ¿chumafuimi? Cüme estudiayafuimi ti papel feipilu Eluwnge tami küme papeltual ka kimeltucheal. Fei petu tami hulnon quiñe hueupin trahunche mu, feipiafuimi quiñe peñi adümuulu tami allcütuaeteu ñi chum tripan tami hueupin ca tami feipiaeteu chumafuimi tañi doi cüme tripayal. Cüme pepicahulmi, cüme quimeltuchefengeaimi. Cafei, caquelu peaimu tami cüme cüdaufengen ca tami manelfalngen (Prov. 21:5; 2 Cor. 8:22).

10. ¿Chumafuiñ taiñ adümuhual quiñeque dungu? Feipinge ñi rupan taiñ peñi Garry.

¹⁰ Cüdautuliyiñ rume taiñ adümuhual quiñeque dungu, fentecünulayaiñ taiñ quimcantual. Ngüneduamaiñ ñi rupan quiñe peñi, Garry pingelu. Quisu ellaca mu nehue cüme papeltuquelafui. Feitachi peñi müna yehuequefui tañi papeltual ta trahun mu. Huelu fentecünulai, amulei tañi quimürpual. Pu peñi adümuulu  ca tati publicacion quellueyu ñi cüme papelturpual. Fachantü, hulquei cümeque hueupin trahun mu ca fütraque trahun mu.

11. Timoteo reque, ¿chem quelluafeiñmu taiñ pepicaucüleal llohual falinque cüdau trahunche mu?

¹¹ Timoteo, ¿cüme hueupifengequepefui mai ca cüme enseñaquepefui mai? Quimlaiñ, Biblia feipilai. Huelu quimnieiñ ñi inafiel Pablo ñi ngülamtueteu. Timoteo ñochiquechi adümuhurpupelai, fei rupachi antü mu doi pepicahurpui ñi entual tañi cüdau (2 Tim. 3:10). Timoteo reque doi adümuhurpuliyiñ, elungeaiñ doi cüdau trahunche mu.

12. ¿Eimi cai? ¿Chumngechi quelluqueimu ta caquelu?

¹² Ayüuqueiñ taiñ quellueteu mu ta caquelu. Pitalconcülen mu iñchiñ, mañumtuquefiyiñ taiñ yafültucumequeteu mu pu loncolelu. Ca rupan mu huesaque dungu mu, mañumtuquefiyiñ pu loncolelu taiñ allcütueteu mu ca taiñ yafültucueteu mu. Ca ayüuqueiñ taiñ compañeteu mu quiñe precursor pepiluulu, femngechi taiñ enseñalmeafiel Biblia quiñe che. Ca ayüuqueiñ taiñ ngülamtueteu mu taiñ doi cüme quimeltuchefengerpual. Com feitachi pu peñi ayüucülequei tañi quelluafiel ta caquelu. Iñchiñ ca ayüucüleafuiñ quellufiliyiñ taiñ pu peñi ca pu lamngen. ¿Chumngelu? Jesús feipi: ‘Doi ayühun-ngei ta hulal ta llohun meu’ (Hech. 20:35). Ayüliyiñ taiñ quelluafiel ta caquelu taiñ doi serfiafiel Jehová, ¿chumafuiñ? Feula peafiyiñ.

13. Ayülmi tami quelluntucual trahunche mu, ¿chem mülei tami raquiduamal?

¹³ Eimi feipiafuimi chi: “Ayüafun tañi doi quelluntucual trahunche mu”. Femngechi feipilmi, cüdautuafuimi chi tami quimal chem hune tami femal. Doi mai, ayülmi tami quelluafiel tami pu peñi ca pu lamngen, cüme raquiduamaimi chem dungu meu quelluntucuafuimi. Ca huirintucuafuimi quiñe papel mu chem mu quelluntucuaimi trahunche mu ca chumngechi femürpuafuimi.

14. Quiñeque mu mülei taiñ raquiduamal ca chem femal taiñ cüdahuelafiel Jehová. ¿Chumngelu?

¹⁴ Iñchiñ com ngünelayafuiñ chem taiñ rupamequen. Calerumetuafui taiñ  mongen. Feimu ayüliyiñ rume taiñ femal quiñe dungu taiñ doi cüdahuelafiel Jehová, quiñeque mu pepi femlayafuiñ. Feimu mülei taiñ raquiduamal ca chem dungu femafuiñ. Raquiduamnge ñi femün ta Pablo. Quisu quelluntucui ñi deumangeal quiñe hue trahunche Tesalónica huaria mu. Quisu ayülepelafui ñi mülenagal fei mu tañi quelluafiel tañi pu peñi ca lamngen. Huelu caiñetungelu ta Pablo, mülefui ñi lefmahual cañpüle (Hech. 17:1-5, 10). Lefmaunole ta Pablo, huesalcangeafui com ti trahunche. Huelu Pablo fentecünulai ñi quelluafiel tañi pu peñi ca pu lamngen. Cüme raquiduami chem mu tañi quelluntucual. Feimu, rupachi antü mu, huercüfi ta Timoteo ñi yafültucuafiel tañi pu peñi ca pu lamngen (1 Tes. 3:1-3). Timoteo eluucülefui cheu rume tañi amual, cheu ñi doi duamniengeel ta quellu. Pefiel mu tüfa pu Tesalónica che müna ayüucülepelafuingün.

15. Calerumetule taiñ mongen, ¿chem rupayafui taiñ ayüelchi cüdau mu? Feipinge quiñe rupachi dungu.

¹⁵ ¿Chem quimeltuqueiñmu ñi rupan ta Pablo Tesalónica huaria mu? Iñchiñ ayüafuiñ taiñ femal quiñe falin cüdau taiñ doi serfiafiel Jehová, huelu calerumetuafui taiñ mongen, fei tüfa catrütuafeiñmu taiñ femnoal taiñ ayüqueel (Ecl. 9:11). Femngechi dungu mu rupaliyiñ, ¿chumafuiñ? Raquiduamaiñ ca cüdau mu chi taiñ femafel. Femngechi dungu mu rupaingu Ted ca Hiedi. Fei cutranrumeingu, feimu pepi cüdauhuelaingu Betel mu. Piuqueyefilu am ta Jehová engu raquiduamingu chem mu tañi cüdahuafel. Hunelu mu, hunelerpuingu amuldungun mu. Rupachi antü mu, precursor especialngerpuingu ca Ted pepicangei ñi huitranmayafiel pu trahunche. Huelu tañi füchan mu elungelai ñi femal. Ellaca mu, huesa duamfuingu, huelu quimniefuingu ca cüdau ñi femafel Jehová ñi troquiñche mu. Ted feipi: “Alünque cüdau femafuiñ Jehová ñi troquiñche mu, taiñ ayüelchi cüdau müten no”.

16. ¿Chem quimeltuqueiñmu ñi feipin Gálatas 6:4?

¹⁶ Iñchiñ com ngünelayafuiñ tañi rupaquen. Feimu rume falin-ngei taiñ loncontucual tüfa: Jehová falintuquelaeiñmu müten taiñ falinque cüdau taiñ nien mu. Cafei, pepi femnoliyiñ quiñe cüdau, raquiduamquiyaulayaiñ caquelu peñi cam lamngen ñi nien taiñ ayüelchi cüdau. ¿Chumngelu? Hiedi feipi: “Trürümuuliyiñ caquelu lamngen mu, ayüucülehuelayafuiñ” (papeltunge Gálatas 6:4). Feimu, doi cümeafui taiñ raquiduamal  ca chem cüdau femafuiñ taiñ serfiafiel ta Jehová ca taiñ quelluafiel ta caquelu. b

17. Ayülmi tami llohual doi falinque cüdau, ¿chumafuimi?

¹⁷ Cüdauliyiñ taiñ mongeluhuam müten ca defecaunoliyiñ, doi cüdau femafuiñ taiñ serfiafiel Jehová. Ayüliyiñ taiñ femürpual quiñe cüdau, hunelu mu pichique cüdau femafuiñ. Por ejemplo, ayülmi tami precursor regularngeal, hunelu mu quiñeque cüyen mu precursor auxiliarngerpuafuimi. Cafei, ayülmi tami siervo ministerialngerpual, hunelu mu doi tiempo elcünuafuimi tami amuldungual ca tami pemeafiel pu peñi ca pu lamngen füchalelu ca cutrancülelu. Cüme cüdaucülelmi ta fachantü, doi pepicaucüleaimi tami llohual falinque cüdau cüpalechi antü mu. Chem cüdau rume nielmi, com tami piuque mu cüdahuelafimi ta Jehová (Rom. 12:11).

18. ¿Chem quimeltuqueiñmu Beverley ñi femün? (Ca ngüneduamafuimi ti adentun).

¹⁸ Chumte füchafuliyiñ rume, raquiduamafuiñ chem mu taiñ cüdahual. Raquiduamnge ñi femün taiñ lamngen Beverley. Quisu 75 tripantu niei. Tañi cutrancülen mu nehue cüme trecaquelafui. Huelu fülcülepalu ñi acordangeal Jesús tañi lan, taiñ lamngen rume ayüniefui ñi coneltual ñi mangelcheal. Fei ¿chumi? Cüme raquiduami tañi chumafel. Fei femürpulu, müna ayühui. Tañi femün mu quelluquefi ta caquelu ñi doi cüdahuelafiel ta Jehová. Fachantü pu fütaqueche cutrancülefule rume, serfiquefingün ta Jehová feimu Jehová rume falintuqueyu engün (Sal. 71:17, 18).

19. ¿Chumafuiñ taiñ doi serfiafiel Jehová?

¹⁹ Ayülmi tami doi serfiafiel Jehová, raquiduamaimi chem cüdau tami rüf femafel. Cüdahuaimi tami doi cüme cristianongeal, femngechi tami ayühulafiel ta Jehová. Cüdahuaimi tami doi pepiluucüleal, femngechi tami llohual doi falinque cüdau trahunche mu. Ca quintuaimi chumngechi tami doi quelluafiel tami pu peñi pu lamngen. c Femngechi femülmi, Jehová cümelcayaimu. Ca Timoteo reque, com che peai tami cüme cüdaucülen (1 Tim. 4:15).