1, 2. 1) ¿Ineingefui Eunice? ¿Chumngelu cüdautui ñi quimeltuafiel tañi püñeñ? 2) Pefinge ti adentun huenulelu, ¿chem dungu rupai?

 TATI Biblia feipilai chumngechi ñi fautizahun Timoteo. Huelu, rume ayüucülepelafui Eunice ñi fautizahun mu tañi püñeñ (Prov. 23:25). Raquiduamnge tüfa. Eunice pefilu ta Timoteo ñi conpun co mu ñi fautizahual, Loida, Timoteo ñi chuchu, fülcontufi Eunice fei pancofi. Quenaiconpulu Timoteo co mu, Eunice fente ñi ayühun mu tripai ñi cülleñu ñi nge mu. Cüdaungefulu rume, huelu Eunice quimeltufi ta Timoteo ñi piuqueyeafiel ta Jehová ca Jesús. ¿Chem cüdaungechi dungu rupai Eunice ñi quimeltuafiel ta Timoteo? Peafiyiñ.

² Timoteo tañi chau ca tañi ñuque trür femngechi religion niequelaingu. Tañi chau griego tuhun-ngefui. Tañi ñuque ca tañi chuchu judio tuhun-ngefui (Hech. 16:1). Eunice ca Loida cristianangerpulu, Timoteo huechengefui chi, quimngelai. Huelu Timoteo ñi chau, cristianongerpulai. Fei Timoteo mülefui quisu ñi dullial chem dungu ñi femal. ¿Chumafui? ¿Inapeafui mai tañi chau ñi religion? ¿Inayafui pu judio ñi huimtun ñi quimeltungeel pichi huentrungelu? Cam, ¿inayafui ta Jesús?

3. Ñi feipin Proverbios 1:8, 9, ¿chem raquiduamquei Jehová pu ñuque ñi quimeltuquefiel tañi pu püñeñ?

³ Eunice reque, fachantü tati pu ñuque ca piuqueyequefingün tañi pu familia. Huelu doyelchi mai rume duamnieingün tañi quimeltuafiel tañi pu püñeñ ñi hueniyeafiel Jehová. Taiñ Chau Ngünechen Jehová rume falintuquefi  ñi femqueel tati pu ñuque (papeltunge Proverbios 1:8, 9). Jehová quelluquefi ti pu ñuque ñi quimeltuafiel tañi pu püñeñ ñi serfiafiel ca ñi piuqueyeafiel Jehová.

4. Pu ñuque, ¿chem cüdaungechi dungu chaftuquefingün famülque mu?

⁴ Famülque mu, Satanás ñi ngünenien mu pu hueche fentren cüdaungechi dungu rupaqueingün (1 Ped. 5:8). Cafei fentren ñuque quisu tremümquefingün tañi pu püñeñ. Cam fütangele, tüfa poyequelafi Jehová. Feimu quiñe ñuque ramtuhuafui: “¿Rüf serfipeafingün mai ta Jehová tañi pu püñeñ, Timoteo reque?”. Quiñe lamngen, Christine pingelu, b feipi: “Tañi füta cüme chaungefui ca piuqueyequeiñmu, huelu ayüquelafui tañi quimeltulelafiel tañi pu püñeñ Chau Jehová ñi dungu. Fentren rupa ngümacauquefun. Ramtuuquefun: ¿Rüf serfipeafingün mai ta Jehová tañi pu püñeñ?”.

5. ¿Chem peaiñ tüfachi troquiñ mu?

⁵ Eimi ñuque, quelluafuimi tami pu püñeñ ñi piuqueyeafiel ca ñi serfiafiel ta Jehová, Eunice reque. Tüfachi troquiñ mu, peaiñ pu ñuque chumngechi inayentuafui ta Eunice. Femngechi tañi feipin mu ca ñi femqueel mu, pu ñuque quimeltuafuingün tañi pu püñeñ. Ca peaiñ chumngechi Jehová quelluquefi pu ñuque.

6. Ñi feipin 2 Timoteo 3:14, 15, ¿chem quellueyu ta Timoteo ñi cristianongerpual?

⁶ Pichi huentrungelu Timoteo, tañi ñuque quimeltuquefeyu Ngünechen ñi huirintucun. Huelu feichi mu, Eunice müte quimquelafui Jesús mu. Müte quimnolu rume, huelu tañi quimeltufiel ta Timoteo, quellufi tañi cristianongerpual (papeltunge 2 Timoteo 3:14, 15). Cüdaungefulu rume, Eunice rume ayüucülefui tañi quimeltufiel ta Timoteo Chau Jehová mu. Eunice tañi üi cüpa feipiquei “huehun”. Fei Eunice cüme chaftufi cüdaungechi dungu ñi quimeltuafiel tañi püñeñ, hueufi ti cüdaungechi dungu.

7. Deu fautizaulu ta Timoteo, ¿chumngechi quellueyu Eunice?

⁷ Rume falin-ngefui ta Timoteo ñi fautizahual, huelu Eunice petu raquiduamcülefui. Eunice ramtuupelai: “¿Chumai ñi püñeñ feula? ¿Cümeque hueni dullipeai mai cam huesaque hueni? ¿Amupelayai Atenas mu ñi chillcatual? Amule, ¿feyenturpupelayai coilaque quimeltun? ¿Ayüpelayai ñi rumeñma cüdahual tañi ricungerpual?”. Eunice obligalayafui ta Timoteo tañi femal ca ñi femnoal, huelu quelluafui tañi cüme dullial ñi chumal. ¿Chumngechi quelluafui? Petu quimeltulelafui tañi püñeñ ñi doi piuqueyeafiel Jehová ca ñi mañumafiel ta Jehová ca Jesús ñi femün fei engün mu. Pu chau ca pu ñuque nielu afcadi poyequenofilu Jehová, cüdautuafuingün ñi quelluafiel tañi pu yall ñi piuqueyeafiel Jehová. Huelu, ¿fei engün müten cüdautuqueingün? Femlai. Mür ti chau ca ti ñuque poyefile Jehová ca cüdautuafuingün. Feimu, ¿chem quimürpuafuingün pu chau ca pu ñuque Eunice ñi femün mu?

8. Pu ñuque, ¿chumngechi quelluafui ñi füta ñi enseñayafiel tañi püñeñ Jehová mu?

⁸ Chillcatuafimi Biblia tami püñeñ engu. Eimi ñuque, Jehová ayüquei tami quelluafiel tami füta, femngechi mür  eimu tamu quimeltuafiel tami püñeñ Jehová mu. ¿Chumngechi quelluafuimi tami füta? Tami füta feipile com ti familia ñi trür chillcatual Biblia quiñe antü, quelluntucuafimi. Yafültucuafimi tami pu püñeñ ñi ca coneltual. Ca raquiduamafuimi chumafuimi ñi ayüfalngeal ti chillcatun. Ca quelluafuimi chi tami füta ñi chem ngüneduamal feichi antü. Cafei tami füta chillcatulfile ti lifru ¡Rumel ayüucüleaimi! tami püñeñ engu, fei quelluntucuafuimi tami füta.

9. Quiñe ñuque, ¿chem quelluafeyu ñi cüme quimeltuafiel tañi pu püñeñ?

⁹ Quiñeque ñuque chillcatulquefingün Biblia tañi pu püñeñ, ¿chumngelu? Quisu tremümquefingün chi. Cam niele füta, poyequelafi Jehová. Eimi ñuque femngechi dungu mu rupalmi, quisulelaimi. Jehová quelluaimu. Jehová ñi troquiñche entuquei fentren quellu tami quimeltuafiel tami pu püñeñ, fei cüme püneafimi feitachi quellu. Cafei ramtuafuimi caquelu pu chau ca ñuque ñi chumngechi pünequefiel engün feitachi quellu c (Prov. 11:14). Cafei pediafimi ta Jehová tami quelluaeteu cüme nütramcayafiel tami pu püñeñ, femngechi tami quimal chem ñi mülen ñi piuque mu engün (Prov. 20:5). Quiñeque mu, re ramtufilmi tami püñeñ: “Püñeñ, ¿chem cüdaungechi dungu rupamequeimi colegio mu?”, rume quelluafeimu tami nütramcayafiel tami püñeñ.

10. ¿Ca chumngechi quimeltuafuimi tami pu püñeñ Jehová mu?

¹⁰ Rumel nütramcayafimi tami püñeñ Chau Jehová mu. Feipiafimi chumngechi tami cümelcaqueteu Jehová (Deut. 6:6, 7; Is. 63:7). Rume falin-ngei tami femal tüfa, doyelchi mai catrütungelmi tami enseñalnoafiel tami pu püñeñ ruca mu. Christine, taiñ ngüneduampeel parrafo meli mu, feipi: “Ruca mu, tañi füta eluquelaeneu ñi enseñayafiel tañi pu püñeñ Jehová mu. Feimu pasiayaulu iñche ca tañi pu püñeñ ca miyaulu iñchiñ quiñe pichi bote mu, nütramcaquefiñ engün Jehová mu ca tañi deumael mu. Doi tremlu tañi pu püñeñ, feipifiñ tañi quisu chillcatual Biblia engün”. Eimi ñuque, ¿ca chem femafuimi? Feipiafimi tami pu püñeñ cümeque dungu Jehová ñi troquiñche mu ca tami pu lamngen mu. Huesa dunguyelayafimi tati pu loncolelu. Cümeque dungu feipilmi pu loncolelu meu, tami pu püñeñ fülcontuafingün tañi quelluaeteu.

11. Ñi feipin Santiago 3:18, ¿chumngelu falin-ngei tami quellual ñi cüme yeucüleal com ti familia?

¹¹ Quelluafuimi ñi cüme yeucüleal com ti familia. Rumel pengelelafimi tami füta ca tami pu püñeñ tami piuqueyeniefiel. Nütramcafilmi caquelu che tami füta mu, cümeque dungu feipiaimi. Fei quimeltuafimi tami pu püñeñ ñi ca femngechi femal. Femülmi tüfa, cüme yeucüleai ti familia, feimu tami pu püñeñ doi cüme quimürpuafuingün Jehová mu (papeltunge Santiago 3:18). Peaiñ ñi rupan quiñe precursor especial, Jozsef pingelu. Pichi huentrungelu taiñ peñi, tañi chau piquelai Jozsef tañi familia engün ñi poyeafiel Jehová. Jozsef feipi: “Tañi ñuque fillque dungu femquefui taiñ cüme yeucüleal com iñchiñ. Illculu tañi chau, tañi ñuque piuqueyenquechi dunguquefeyu. Quiñeque mu, iñche ca tañi pu peñi ca pu lamngen cüdautuquefuiñ taiñ yamafiel  taiñ chau, feimu taiñ ñuque pengelelquefeiñmu Efesios 6:1-3. Fei hula feipiquefeiñmu ñi cüme piuquengen taiñ chau ca chumngelu mülei taiñ yamnieafiel. Femngechi femün mu tañi ñuque, quelluquefui ñi müleal ta tüngün”.

12. Ñi feipin 2 Timoteo 1:5, ¿chumngechi quellufi Timoteo Eunice ñi femün?

¹² (Papeltunge 2 Timoteo 1:5). Eunice quimeltuquefi ta Timoteo chumngechi tañi femün mu pengelafui tañi feyentun Jehová mu (Sant. 2:26). Timoteo pei chumngechi tañi ñuque femquefui cümeque dungu fente ñi piuqueyefiel mu ta Jehová. Ca pefi chumngechi tañi ñuque ayüucülen serfiquefi Jehová. Eunice ñi femün mu, ¿chumngechi quellufi Timoteo? Timoteo ñi ngüneduamfiel mu tañi femquen ñi ñuque, cüpa inayentufi. Feimu rume feyentulequefui Jehová mu, Eunice reque. Famülque mu, alünque pu ñuque tañi femqueel mu quelluquefi tañi familia ñi poyeafiel Jehová (1 Ped. 3:1, 2). Eimi ñuque ca femngechi femafuimi, ¿chumngechi?

13. Quiñe ñuque, ¿chumngelu mülei ñi doyümafiel ñi hueniyeafiel Jehová?

¹³ Doyümaimi tami hueniyefiel Jehová (Deut. 6:5, 6). Eimi ñuque, fentren dungu tami ayüqueel, famentuqueimi chi tami cüme cuidayafiel tami pu püñeñ. Huelu turpu famentulayaimi tami hueniyefiel Jehová. Elcünuaimi antü tami llellipual, papeltual Biblia ca tami amual trahun mu. Femngechi femülmi, doi cüme hueniyeafimi Jehová ca inayentufalngeaimi.

14, 15. Ñi rupan Leanne, María ca Juan, ¿chem quimeltueiñmu?

¹⁴ Inaduamaiñ ñi rupan quiñeque hueche. Fei engün inaduamingün ñi femün tañi ñuque. Tüfa quellueyu ñi maneluhurpual Jehová mu ca ñi piuqueyerpuafiel. Christine tañi hunen püñeñ, Leanne pingelu, feipi: “Mülen mu tañi chau ruca mu, pepi chillcatuquelafuiñ tati Biblia. Huelu taiñ ñuque rumel amuquefui trahun mu. Müte quimquelafuiñ Biblia ñi dungu, huelu ñi femün taiñ ñuque quellueiñmu taiñ doi feyentual Jehová mu. Feimu petu taiñ amunon mu rume ta trahun mu, deu quimquefuiñ pu Dunguquelu Ineingen Jehová ñi nien tati rüf dungu”.

¹⁵ Raquiduamnge ñi rupan María. Quisu tañi pu che engün amulu trahun mu, fei ti chau rume illculequefui acutulu engün ruca mu ca hulelcangequeingün. María feipi: “Pichi domongelu iñche, femquelan quiñeque dungu tañi llicaquefiel mu tati pu che. Huelu pefiel mu tañi ñuque ñi llicaquenofiel ti pu che ca ñi hunentucuquefiel Jehová ñi dungu, quellueneu tañi ca llicanoafiel tati pu che”. Feula peaiñ chem dungu rupai Juan. Fei ca tañi familia pepi nütramcaquelafuingün Jehová mu mülelu ñi ruca mu engün. Tañi chau eluquelaeyu tañi femal. Taiñ peñi feipi: “Ñi ñuque famentui fentren dungu ñi ayühulafiel iñche tañi chau, huelu turpu elcünulai tañi poyefiel Jehová. Tüfa quellueneu”.

16. Quiñe ñuque ñi cüme femün, ¿chumngechi quelluafui ta caquelu che?

¹⁶ Loncontucuaimi: tami femün meu, quelluafuimi caquelu pu che. ¿Chumngechi? Raquiduamnge ti apostol Pablo mu. Quisu afmatulehuei ñi fente feyentulen ta Eunice. Pablo feipifi ta Timoteo ñi cüme feyentulen rüf piuque mu, huelu tañi ñuque Eunice  hunelu mu feyenturpui (2 Tim. 1:5). Pablo, ¿chumngechi quimürpui Eunice ñi rume feyentulen Chau Dios mu? Ti hunen rupa Pablo ñi amuldunguyahun fill püle, puhui Listra huaria mu, cheu ñi mülen Loida ca Eunice. Fei mu Pablo ngüneduami Eunice ñi cüme feyentulen. Feichi mu chi Pablo quellufi Loida engu Eunice ñi cristianangerpual (Hech. 14:4-18). 15 tripantu rupalu, Pablo huirintucufilu ta Timoteo, petu acordalequefui Eunice tañi cüme feyentulen ca feipi ñi inayentufalngen. ¡Rüfngei llemai! Tañi femün Eunice rume yafültucufi ta Pablo ca caquelu cristiano. Feimu eimi ñuque, petu quisu tremümfilmi tami pu püñeñ cam tami füta testigongenole, yafüluunge. Loncontucunge: tami cüme feyentulen mu, nehuentucuafuimi tati pu che tami pequeteu.

17. Inaduamülmi tami püñeñ ñi ayüquenon ñi serfiafiel Jehová, ¿chumafuimi?

¹⁷ Inaduamülmi tami püñeñ ñi eluucülenon ñi serfiafiel Jehová, ¿chumafuimi? Loncontucunge tüfa: tañi quimeltungeal quiñe pichiche duamniengei alün tiempo. Raquiduamnge. Eimi tuculmi quiñe fün mapu mu, ramtuhuafuimi: “¿Hulpeai mai fün feitachi anümca?”. Eimi quimnolmi rume ñi hulal ta fün, huelu huitruconiefimi müten, femngechi ñi cüme tremcülerpual (Mar. 4:26-29). Ca femngechi eimi ñuque, ramtuuqueimi chi: “¿Rüf quellupefiñ mai  tañi püñeñ ñi piuqueyerpuafiel Jehová?”. Eimi quimlaimi tami püñeñ ñi piuqueyerpuafiel ta Jehová cam tañi femnoal. Huelu eimi com nehuen mu enseñafilmi tami püñeñ, quisu hueniyerpuafui Jehová (Prov. 22:6).

18. Jehová, ¿chumngechi quelluafui tami pu püñeñ ñi hueniyerpuaeteu?

¹⁸ Ti Biblia pengeli cuifi mu Jehová quelluquefi fentrenque hueche ñi hueniyerpuaeteu (Sal. 22:9, 10). Feimu tami pu püñeñ ayüle ñi poyeafiel Jehová, quisu quelluafi (1 Cor. 3:6, 7). Tami püñeñ com piuque mu serfinofile rume ta Jehová, Jehová piuqueyenieyu (Sal. 11:4). Fei tami püñeñ eluule ñi serfiafiel Jehová com piuque mu, Jehová ayühunquechi quelluaeyu (2 Crón. 16:9; Hech. 13:48). Cafei, Jehová quelluafeimu tami cüme nütramcayafiel tami püñeñ ca feipiafiel chem ñi duamnieel (Prov. 15:23). Ca femngechi Jehová ñi duam mu, quiñe peñi cam quiñe lamngen quelluafui tami püñeñ. Tami pu püñeñ doi tremle engün, Jehová quelluafeyu ñi acordayal tami quimeltufiel pichicalu engün (Juan 14:26). Feimu tami feipin mu ca tami femqueel mu quimeltumequefilmi tami pu püñeñ, Jehová cümelcayaimu.

19. Eimi ñuque, ¿chumngechi quimnieimi tami ayühulquefiel Jehová?

¹⁹ Chem rume dullile ñi femal tami pu püñeñ, Jehová fentecünulayai tami piuqueyeaeteu, eimi am ca piuqueyefilu. Eimi ñuque, quisu tremümfilmi tami pu püñeñ cam tami füta testigongenole, acordanienge tüfa: Jehová cuñiutucuaimu eimi ca quiñe chau reque feleai eimi tami pu püñeñ mu (Sal. 68:5). Eimi quimlaimi tami pu püñeñ ñi serfiafiel Jehová cam tañi femnoal. Huelu maneluhulmi Jehová tañi quellun mu ca com nehuen mu quimeltufilmi tami pu püñeñ, ayühulafimi ta Jehová.