1. ¿Inei am elueiñmu taiñ dungual?

 JEHOVÁ elueiñmu taiñ dungual. Cüme yehun llemai. Tati hunen huentru, Adán pingelu, ca elungei tañi dungual. ¿Chumi Adán Jehová elueteu tañi dungual? Feitachi huentru nütramcauquefui Jehová engu. Doi dungulu ta Adán, quisutu quimürpui ca enturpui hueque dungun, ca femngechi tucuüifi tati pu culliñ (Gén. 2:19). Ca femngechi ayüucülepelafui hue dungufilu tañi domo Eva (Gén. 2:22, 23).

2. Cuifi mu ca fachantü, ¿chem huesaque dungu triparpui pu che ñi hun mu?

² Rupachi antü mu, fei peufaluhui ta Huecüfü. Tüfa cüme dungulai, coilatulfi ta Eva. Fei tañi coilatun mu, com che culpanchengerpui (Gén. 3:1-4). Culpalu ta Adán, cüme dunguhuelai, culpatufi ta Eva ca Jehová quisu ñi culpan mu (Gén. 3:12). Doi rupachi antü mu, Caín deu langümfilu ta Abel coilatulfi ta Jehová (Gén. 4:9). Rupachi tripantu mu, ñi feipiel Lamec pengeli ñi huesa piuquengequefel tati pu che feichi mu (Gén. 4:23, 24). ¿Fachantü cai? ¿Chumngei cai che? Por ejemplo, pu politico yehuentucuuquelai tañi ngüchatucheal. Ca femngechi pelicula mu, groseria cam femngechi dungu ta allcüngequei. Colegio mu, cüdau mu ca huesaque dungu ta feipingequei. Re huesaque dungu ñi tripan tañi hun mu, pengeli fente ñi huesalcalen ta che fachantü.

3. 1) ¿Chem dungu mu cuñiutucuhuaiñ? 2) ¿Chem peaiñ tüfachi troquiñ mu?

³ Cuñiutucuunoliyiñ fente taiñ allcütufiel mu feitachi huesaque feipin, ca femngechi dungurpuafuiñ. Feimu taiñ cristianongen cüpa ayühulquefiyiñ Jehová, fei famentuquefiyiñ com feitachi huesaque dungun. Iñchiñ  taiñ feipin mu, ayüqueiñ taiñ püramyeafiel ta Jehová. Feimu tüfachi troquiñ mu, peaiñ chumngechi iñchiñ taiñ dungun mu püramyeafuiñ ta Jehová amuldungun mu, trahun mu ca nütramcafiel mu ta che. Hune, peaiñ chumngelu fente falin-ngei Jehová mu chem taiñ feipiqueel.

4. Ñi feipin Malaquías 3:16, ¿chumngelu fente falintuquei Jehová chem taiñ feipiqueel?

⁴ (Papeltunge Malaquías 3:16). Pu che tañi feipin mu püramyequefilu Jehová, Jehová huirintucuñmaquefi tañi üi engün quisu ñi lifru mu. ¿Chumngelu femquei? Taiñ feipiqueel pengelquei chem ñi mülen taiñ piuque mu. Jesús feipi: “Chem dungu ñi mülen ta piuque meu, fei dunguquei ta hun” (Mat. 12:34). Felei, taiñ feipiqueel mu pengelqueiñ chumte taiñ piuqueyeniefiel ta Jehová. Jehová ayüquei tañi pu piuqueyenieteu ñi rumel müleal tüfachi Mapu mu, fei ñi ayüucüleal.

5. 1) Cüme dunguliyiñ, ¿chumai Jehová? 2) Ñi pengelün tati adentun, ¿chem dungu mu cuñiutucuhuaiñ?

⁵ Cüme dunguliyiñ, Jehová ayüucüleai taiñ serfifiel mu (Sant. 1:26). Quiñeque che piuqueyenofilu Jehová illcunquechi dunguquei, huesa piquefi ta caquelu (2 Tim. 3:1-5). Iñchiñ femngechi chengelayaiñ. Feimu iñchiñ taiñ feipin mu ayüqueiñ taiñ ayühulafiel ta Jehová. Huelu iñchiñ trahun mu cam amuldungun mu piuqueyenquechi dungufiliyiñ pu che, huelu taiñ ruca mu huesa piquefiyiñ taiñ familia, ¿ayüucülepeafui mai ta Jehová iñchiñ mu? Femlayafui (1 Ped. 3:7).

6. Tañi cüme dungun mu ta Kimberly, ¿chem rupai?

⁶ Cüme dunguliyiñ pengelquefiyiñ ta caquelu pu che taiñ poyequefiel Jehová. Femngechi pu che ngüneduamai “ñi trürnon quiñe poyequefilu ta Chau Dios ca quiñe femquenolu” (Mal. 3:18). Peaiñ ñi rupan quiñe lamngen Kimberly pingelu. b Tüfachi lamngen colegio mu  feipingei ñi femal quiñe cüdau quiñe tañi compañ engu. Rupan cüdaulu engu, tañi compañ ngüneduami trürnon caquelu compañ engu. Kimberly huesa dunguyequelafi ta caquelu, piuqueyenquechi nütramcachequei ca huesaque dungu tripaquelai tañi hun mu. Kimberly tañi compañ afmatulehuei tañi chumngechi dunguquen ta Kimberly, fei eluhui tañi papeltual Biblia. Cüme dungun mu iñchiñ, pu che taiñ allcütuqueteu fülconafui Jehová mu. Fei, ¿ayüucülenoafulu ta Jehová?

7. ¿Chem ayüqueiñ taiñ femal com iñchiñ?

⁷ Iñchiñ ayüqueiñ taiñ cüme dungual, femngechi taiñ püramyeafiel ta Jehová ca taiñ doi fülmaucüleal pu peñi ca pu lamngen iñchiñ. Feula peafiyiñ chumngechi inayentufalngeafuiñ taiñ feipin mu.

8. ¿Chem quimeltueiñmu Jesús ñi femün?

⁸ Lladcülcangeliyiñ, piuqueyenquechi ca yamquechi dunguafiyiñ ti che. Mülepalu Mapu mu, Jesús huesa pingequefui. Pu che “müna ifengei ca putufengei ta Jesús” piquefui. Ca feipingequefui tañi cüdahuelquefiel ta Huecüfü. Ca “cüdauquei sabado antü mu” pingequei ca “respetaquelafi ta Chau Dios” piqueyu pu che (Mat. 11:19; 26:65; Luc. 11:15; Juan 9:16). Huesa pingefulu rume ta Jesús, quisu huesa huiñoldungulafi tañi feipieteu. ¿Chem quimeltuqueiñmu ñi femün ta Jesús? Amuldunguyaulu iñchiñ, huesa piafeiñmu pu che, huelu Jesús reque huesa huiñoldungulafiyiñ engün (1 Ped. 2:21-23). Huelu quiñeque mu, cüdautuafuiñ taiñ femal (Sant. 3:2). ¿Chem quelluafeiñmu? Peaiñ.

9. ¿Chem quelluafeiñmu taiñ huesa huiñoldungufemnoafiel tati che?

⁹ Huesa pingeliyiñ amuldungun mu, illcufemlayaiñ. Quiñe peñi, Sam pingelu, feipi: “Iñche raquiduamquen chumte duamniei tañi amuldungulelngeal ti che. Cafei, ‘feitachi che cüme elcünutuafui tañi mongen’ piquen” pi taiñ peñi. Quiñeque mu amuldungufiel mu tati pu che, huesa rupamequeingün chi, fei illcufemafuingün. Quiñe rupa, quiñe lamngen Lucía pingelu, amuldungulelfi quiñe che illculelu. Feimu ti lamngen ngillatufi ta Jehová tañi tüngcüleal ca ñi huesa pinoafiel tati che. Iñchiñ amuldungulelfiliyiñ illculechi che, inayentuafuiñ Lucía ñi femün.

10. Ñi feipin 1 Timoteo 4:13, ¿chem mülei ñi femal com iñchiñ?

¹⁰ Cüme enseñacheaiñ. Timoteo cüme quimeltuchequefui, huelu femfulu rume duamniefui ñi doi adümuucüleal ñi  quimeltucheal (papeltunge 1 Timoteo 4:13). ¿Chumngechi doi cüme pepiluhuafuiñ taiñ quimeltucheal? Cüme pepicahuaiñ. Iñchiñ fentren quellu niefuiñ taiñ quimeltucheal. Por ejemplo, nieiñ ti folleto Eluwnge tami küme papeltual ka kimeltucheal pingelu. Ca mülei ti troquiñ “Cüme quimeltuchefengeaiñ” mülelu ti papel Taiñ Mongen ca Taiñ Amuldunguqueel, ti papel taiñ pepicahuam. ¿Papeltuquefuimi feitachi quellu? Cüme pepicahun mu iñchiñ, fente llicalelayaiñ taiñ feipial ca cüme dunguafuiñ amuldungun mu.

11. Quiñeque peñi, lamngen, ¿chumingün ñi doi cüme quimeltucheal?

¹¹ ¿Ca chumngechi doi cüme quimeltucheafuiñ? Inaduamfiliyiñ ta caquelu chumngechi tañi enseñachequen engün. Taiñ peñi Sam inaduami quiñeque peñi ca quiñeque lamngen ñi fente cüme enseñachequen engün, feimu cüme allcütufi ca inayenturpufi. Quiñe lamngen, Talía pingelu, cüme allcütuquefi chumngechi quimeltuchequen pu cümeque hueupife, femngechi cüme quimürpui chumngechi ñi amuldungulelafiel tati pu che.

12. Quiñeque peñi ca lamngen, ¿chem mu yehuequeingün?

¹² Com iñchiñ trahun mu, quiñentrür ülcantuqueiñ ca cüme pepicaqueiñ chem taiñ huiñoldungual (Sal. 22:22). Quiñeque peñi ca quiñeque lamngen yehuequei tañi ülcantual ca ñi huiñoldungual trahun mu. Eimi, ¿femngechi dungu mu rupamequeimi? Peaiñ chem quellueyu quiñeque peñi ca lamngen femngechi dungu mu rupalu.

13. ¿Chem quelluafeimu tami ülcantual trahun mu?

¹³ Ülcantuaiñ com taiñ piuque mu. ¿Chumngelu ülcantuqueiñ trahun mu? Taiñ fampüramafiel taiñ Chau Jehová. Quiñe lamngen, Sara pingelu, cüme ülcantuquenolu troquiuquei. Femfulu rume, ülcantuquei müten tañi fampüramafiel Jehová. ¿Chem quellueyu tüfachi lamngen? Pepicafiel mu ti trahun, ca adümcantuquefi chumngechi tañi ülcantual. Taiñ lamngen ülcantulu tañi ruca mu, raquiduamquei ti ülcantun chumngechi nüucülei tañi inaduamngeal trahun mu. Taiñ lamngen feipi: “Cüme ngüneduamfiel mu iñche chem pin ti ülcantun, ngoimanentuquen reque tañi cüme ülcantuquenon” pi taiñ lamngen.

14. Yehuenchengelmi, ¿chem quelluafeimu tami huiñoldungual trahun mu?

¹⁴ Rumel huiñoldunguaiñ trahun mu. Tüfa cüdaungeafui quiñeque che mu. Taiñ lamngen Talía feipi: “Dungual caquelu che ñi adquiñ mu, trefcü-trefcüngequei tañi piuque. Feimu  cüdautuquen tañi huiñoldungual trahun mu”. Femngechi dungu rupaquefulu rume, huiñoldunguquei müten. Trahun mu quiñe peñi femle ti hunen ramtun, ayüquei ñi pichiñmayal müten, feimu taiñ lamngen femngechi huiñoldungun pepicaquefi. Fei tüfa cüme duamelqueyu.

15. ¿Chem loncontucuaiñ?

¹⁵ Quiñeque peñi ca quiñeque lamngen yehuenchengelaingün, huelu cüdautuquei tañi huiñoldungual engün. Peafiyiñ ñi feipin quiñe lamngen, Juliet pingelu. Quisu feipi: “Quiñeque mu müte cümenolu tañi huiñoldungun troquiuquefun, feimu ayüquelan tañi huitrañpüramal tañi cuhu trahun mu”. Loncontucuaiñ, huiñoldunguliyiñ llicalefuliyiñ rume, Jehová rume ayüucüleai. c

16. ¿Chem huesaque dungu tripalayafui taiñ hun mu?

¹⁶ Famentuafiyiñ “huesaque pihun” (Efes. 4:31). Quiñe cristiano ngelafui ñi entual huesaque dungu tañi hun mu. Por ejemplo, huesa dunguyelayafiyiñ ca tuhun-ngechi che. Cafei inei no rume huesa pilayafiyiñ taiñ hueñancülnoafiel. Quiñe peñi feipi: “Quiñeque mu tañi feipiqueel ayecan dungu troquiquefiñ, inei no rume huesalcanofilu troquiuquefun. Huelu inaduamürpun tañi hueñancülquefiel quiñeque peñi ca quiñeque lamngen. Huelu tañi domo quelluqueneu, feipiqueneu ñi huesa duamelfiel ta quisu cam caquelu”.

17. Ñi feipin Efesios 4:29, ¿chumngechi yafültucuafuiñ ta caquelu?

¹⁷ Taiñ feipin mu yafültucucheaiñ. Huesa dungu feipiyaulayaiñ, huelu mai yafültucucheaiñ (papeltunge Efesios 4:29). Pu israelche fentren dungu mu mülefui tañi mañumal engün, huelu femlaingün, re huesaque dungu ta feipiyauquefuingün. Iñchiñ re huesaque dungu feipiyauliyiñ cam tromtromquiyauliyiñ, caquelu che ca inayentuafeiñmu. Por ejemplo, tati mari espia huesa entulu ñi feipin, fei “com pu israelche eluhuingün ñi fillpiafiel ta Moisés” (Núm. 13:31–14:4). Yafültucufiliyiñ ta caquelu che, com ayüucüleafuingün. Por ejemplo, Jefté tañi ñahue rume yafültucueyu tañi pu hueni, fei tüfa quellueyu ñi poyenierpuafiel ta Jehová (Juec. 11:40). Taiñ lamngen Sara taiñ nütramcapeel feipi: “Yafültucufiel mu taiñ pu lamngen, piuqueyeteu Jehová ca ti trahunche  troquiuqueingün” pi taiñ lamngen. Feimu quintuaiñ chumngechi yafültucuafiel taiñ pu peñi ca pu lamngen.

18. 1) Ñi feipin Salmo 15:1, 2, ¿chumngelu rüf dungu dunguaiñ? 2) ¿Chem femlayaiñ?

¹⁸ Rüf dungu dunguaiñ. Coilangeliyiñ, ayühul-layafiyiñ ta Jehová. Jehová üdequei com coila dungu (Prov. 6:16, 17). Fentren che huimtulei tañi coilatual, huelu iñchiñ femquelaiñ Jehová am enseñaeteu iñchiñ taiñ coilatunoal (papeltunge Salmo 15:1, 2). Feimu coilatulayaiñ. Huelu, ¿ca chem femlayaiñ? Ellcalayaiñ chem dungu no rume taiñ hueluraquiduamelnoafiel tati pu che.

19. ¿Ca chem dungu mu cuñiutucuhuafuiñ?

¹⁹ Huesa dunguyelayafiyiñ caquelu che (Prov. 25:23; 2 Tes. 3:11). Juliet, taiñ nütramcapeel, feipi: “Allcün mu iñche ñi huesa dunguyengequen caquelu che, huesa duamelqueneu. Maneluuhuequelan feitachi che huesa dunguyequefilu ta caquelu. Huesa dunguyequefilu am ta che, iñche ca huesa dunguyequeneu chi” pi taiñ lamngen. Quiñe peñi cam quiñe lamngen iñchiñ nütramcamequeliyiñ caquelu che mu, fei huesa dunguyerumefiliyiñ, pürüm cacünutuaiñ taiñ nütram. Nütramcatuaiñ re cümeque dungu mu (Col. 4:6).

20. ¿Chem am eluucülefuiñ taiñ femal?

²⁰ Fachantü, pütrüquen che re huesaque dungu ta nütramcaquei. Iñchiñ mülei taiñ famentuafiel com tüfa ca ayühulafiel Jehová chem taiñ dunguqueel. Loncontucuaiñ, Jehová am elueteu taiñ dungual feimu ayüfui taiñ re cümeque dungu nütramcayal. Cüme dungufiliyiñ taiñ amuldungulelquefiel, ülcantuliyiñ ca huiñoldunguliyiñ trahun mu ca cümeque nütram entuliyiñ nütramcauliyiñ caquelu che iñchiñ, Jehová cümelcayaiñmu. Pichilehuei Jehová ñi apümcayafiel com huesaque dungu, feimu doi cüdautuhuelayaiñ taiñ nütramcayal re cümeque dungu mu (Jud. 15). Petu ñi acunon feichi antü, eluucüleaiñ fachantü taiñ ayühulafiel Jehová ‘iñchiñ taiñ feipin’ mu (Sal. 19:14).