Ñi huiño curengetun mu ti huentru, fentepuhui tañi hunen curehuen. Femngechi ti trahunche raquiduamafui ñi hue curengetun mu ti huentru ñi falin-ngen. ¿Chumngelu feipiafuiñ tüfa? Inaduamafiyiñ tüfa Jesús ñi feipin hudahun mu quiñe curehuen ca ñi mületual hue curehuen.

Jesús feipi chumngelu eluñmangeafui quiñe cristiano che ñi hudayal tañi afcadi. Fei feipi: “Inei rume hudafile tañi domo fei ñi ngenon pecan cudumuhun, ca huiño curengetule, feita ñihualquefi tañi hunen domo” (Mat. 19:9, TNM). Jesús tañi feipin quimeltuqueiñmu epu dungu. Hune, mülen mu müten pecan cudumuhun Biblia eluñmaquefi ti cristiano che ñi hudayafiel tañi afcadi. Cangelu dungu, quiñe huentru hudafile tañi domo Biblia eluñmanoeliyu rume, fei cangelu domo nietufile, tüfa ta ñihualuhun ca pecan cudumuhun. a

Fei quiñe huentru conle pecan cudumuhun mu, fei hudafile tañi domo, fei ¿Biblia eluñmapeafeyu mai ñi nietuafiel cangelu domo? Femlai. Hune, ti domo tañi ñihuañpeteu tañi füta fei mülei ñi feipial ñi perdonayafiel cam ñi femnoal. Ti domo eluucülenole tañi perdonayafiel tañi füta, mülei ñi hudahual engu ley dungu mu. Femngechi mu müten Biblia eluñmayafeyu ñi curengetual cam ñi fütangetual.

Ca femngechi, ti domo ayüafui ñi perdonayafiel tañi huentru, femngechi ñi curehuencüleal engu. Huelu ti huentru hudafile müten tañi domo, ti domo pinon mu rume tañi hudahual, fei Biblia eluñmalayaeyu ñi nietuafiel ta cangelu domo, ñi cure am eluucülefulu tañi perdonayaeteu. Ti huentru nietufile müten cangelu domo Biblia ñi eluñmanoeteu mu rume, ca quiñe rupa coni pecan cudumuhun mu. Feimu elcünungeai quiñe troquiñ loncolelu ñi juzgangeal ti culpalu (1 Cor. 5:1, 2; 6:9, 10, TNM).

Quiñe huentru huiño curengetule Biblia ñi eluñmanoeteu rume, ¿chem raquiduamafui ti trahunche? ¿Ñi hunen curehuen petu falilei? Ti domo ñi ñihuañpeteu tañi füta, ¿petu mülei ñi pengelal ñi perdonayafiel cam ñi duamhuenofiel? Ñi hue curengetun mu ti huentru, ¿rumel ñi peniengeal ñi concülen pecan cudumuhun mu?

Raquiduamquefuiñ petu ñi mongelen ñi hunen domo, petu tañi ca fütangetunon ca connole pecan cudumuhun mu, ñi hue curengetun mu ti huentru, ti trahunche feipiafui: “Tüfa concülei pecan cudumuhun mu”. Huelu Jesús nütramcalu ti hudahun dungu mu, ñi curengetual cam ñi fütangetual, duamtulafi rume ti culpanolu. Jesús feipi quiñe huentru hudafile tañi domo, ca nietufile cangelu domo Biblia eluñmanoeliyu rume, tüfa ta ñihualuhun ca coni pecan cudumuhun mu. Feimu hudafiel mu tañi domo, ñi nietufiel mu cangelu domo, ñi hunen curehuen falihuelai.

Falihuenolu am tüfachi curehuen, feimu ti culpanolu ngelai tañi pengelal ñi lloutuafiel cam ñi duamhuenofiel tañi füta. Cüdaungeafui  ñi dullial, huelu duamfalngelai ñi femal. Femngechi ti trahunche quimaingün ti huentru ñi hue curengetun mu ñi falin-ngen, ti culpanolu petu mongelele rume, ca fütangetunole rume ca connole rume pecan cudumuhun mu. b

Deu nütramcaiñ chem dungu rupayafui ti huentru ñihuañpefile tañi domo, fei hula hudafile. Huelu ¿chem dungu rupayafui quiñe huentru hudafile tañi domo ñi connon pecan cudumuhun mu rume, fei nietufile cangelu domo? Ca ¿chem dungu rupayafui quiñe huentru hudafile tañi domo ñi connon mu rume pecan cudumuhun mu, huelu femle deu ñi hudafiel mu tañi domo, fei nietufile cangelu domo tañi hunen domo eluucülefulu rume tañi perdonayaeteu? Femngechi dungu ñi rupan mu, ti huentru hudafi tañi hunen domo fei ca domo nietufi, fei ñihualuhui ca coni pecan cudumuhun mu. Femngechi mu, ti hunen curehuen afi, falihuelai. Ñi hue curengetun mu ley dungu mu falin-ngei. Ti chillca La Atalaya tripalu 15 conchi febrero mu, 1980 tripantu mu, pagina 29 mu feipi: “Ti huentru nietui hue curehuen, feimu cümelayafui tañi hudayafiel tañi hue domo tañi nieel ñi huiñotual tañi cuifi domo engu. Ñi hudafiel mu tañi domo, ñi ñihuañpefiel mu ca ñi nietun cangelu domo, ti hunen curehuen afi”.

Feula ñi cambian mu chumngechi taiñ entendefiel tüfachi quimeltun, ¿feipiafuiñ ti curehuen ñi müte falihuenon? Ca ¿feipipeafuiñ mai ti ñihualuhun ñi müte huesa dungungenon? No, felelai. Quiñe huentru hudafile tañi domo Biblia ñi eluñmanoeteu mu rume, fei nietufile cangelu domo, pu loncolelu mütrümaeyu, femngechi elcünungeai quiñe troquiñ loncolelu ñi juzgayaeteu. (Ti hue domo ñi nieel mu ti huentru ca coni pecan cudumuhun mu. Cristianangele ca mütrümaeyu pu loncolelu, fei elcünungeai quiñe troquiñ loncolelu ñi juzgayaeteu). Felei llemai, raquiduamlayaiñ tüfachi hue curehuen ñi concüleal engu pecan cudumuhun mu. Femfulu rume, fentren tripantu mu ti huentru elungelayai falinque cüdau trahunche mu. Pu che ñi quimfiel mu chem dungu ñi rupan doi illcuhuenole engün ca eluule ñi respetayafiel tati huentru engün, fei hula inaduamngeafui ñi elungeal falinque cüdau trahunche mu cam ñi elungenoal. Pu loncolelu eluule ñi inaduamafiel tüfachi dungu, hune mülei ñi raquiduamal engün chumlen ti hunen domo. Ti huentru ayüniefui chi ñi hudahual tañi hunen domo engu, femngechi chi coni pecan cudumuhun mu. Cam ti huentru quisucünufi chi tañi domo ñi cuidayal tañi püñeñ. Com tüfa mülei ñi loncontucunieal pu loncolelu (Mal. 2:14-16).

Quiñe che hudafile tañi afcadi Biblia ñi eluñmanoeteu mu rume, fei cangelu che engu nieutule, tüfa rume huesaque dungu mu conafui. Iñchiñ taiñ cristiano chengen, Jehová reque rume falintuquefiyiñ ti curehuen dungu (Ecl. 5:4, 5; Heb. 13:4).