TROQUIÑ ÑI CHILLCATUNGEAL 19
Doi maneluhuaiñ Jehová ñi cümelcacünutuafiel ti mapu
‘Chau Ngünechen feipicünuquelu quiñe dungu, ¿femnoafulu?’ (NÚM. 23:19).
ÜLCANTUN 142 Maneluunge com tami piuque mu
¿CHEM QUIMAIÑ? a
1, 2. ¿Chem mülei taiñ femal petu ñi acunon ti hue mapu?
JEHOVÁ feipicünueiñmu tüfachi mapu ñi cümelcacünutuafiel, feimu rume mañumniefiyiñ (2 Ped. 3:13). Quimlaiñ rume chumül ñi acual ti hue mapu, huelu com dungu ñi rupamequen pengeli pichiñma mu ñi acual (Mat. 24:32-34, 36; Hech. 1:7).
2 Fentren tripantu rume yenieliyiñ taiñ testigongen, huelu com iñchiñ mülei taiñ doi maneluhual ñi feipicünuel ta Jehová. ¿Chumngelu? Cuñiutucuunoliyiñ, maneluuhuelayafuiñ. Pablo feipi cüdaungelayafui taiñ fente maneluucülehuenoal, feimu feipi taiñ famentuafiel “feichi culpan taiñ catrütufemqueteu” (Heb. 12:1). Tüfachi dungu taiñ rupanoal, ¿chem mülei taiñ femal? Inaduamnieafiyiñ chumngechi Jehová ñi huecünutuafiel tüfachi mapu (Heb. 11:1).
3. ¿Chem peaiñ tüfachi troquiñ mu?
3 Tüfachi troquiñ mu inaduamafiyiñ chumngelu duamnieiñ taiñ doi maneluhual ñi acual ti hue mapu. Ca peafiyiñ cüla dungu quelluaiñmu taiñ doi maneluucüleal: 1) raquiduamaiñ Jesús ñi hulün tañi mongen, 2) raquiduamaiñ Jehová ñi nehuen mu, ca 3) femaiñ cümeque dungu taiñ fülmanieafiel ta Jehová. Ca ngüneduamaiñ Jehová ñi feipifiel ta Habacuc, tüfa quelluaiñmu taiñ doi nieal maneluhun.
¿CHUMNGELU DUAMNIEIÑ TAIÑ MANELUHUAL JEHOVÁ MU?
4. ¿Chem mu duamnieiñ taiñ maneluucüleal?
4 Duamnieiñ taiñ nieal cüme maneluhun taiñ cüme dullial taiñ femal. Por ejemplo, inei taiñ hueniyeafiel, chumngechi taiñ cüme rupaleal, chem educacion taiñ nieal, inei engu taiñ niehual, taiñ nieal pichiqueche cam taiñ nienoal ca chem cüdau taiñ nieal. Ramtuhuaiñ: “Tañi femquen, ¿chem pengeli? ¿Pengelquepen mai pichiñma mu ñi afal huesaque dungu ca ñi acual ti hue mapu? Cam pu poyequenofilu Jehová reque, ¿pengelquepen mai turpu ñi acunoal ti hue mapu?” (Mat. 6:19, 20; Luc. 12:16-21). Maneluuliyiñ Chau Dios pichiñma mu ñi cüme elcünutuafiel ti mapu, fei cüme raquiduamaiñ taiñ femal.
5, 6. Rupaliyiñ huesaque dungu mu, ¿chumngelu duamnieiñ taiñ feyentual Jehová mu? ¿Chumngechi adentucünuafuimi?
5 Ca duamnieiñ taiñ maneluhual rupaliyiñ huesaque dungu mu. Inacangeafuiñ, contuafeiñmu quiñe huesa cutran cam rupayafuiñ caquelu huesaque dungu. Alün tripantu mu rupayafuiñ femngechi dungu mu, feimu duamnieiñ taiñ doi maneluhual Jehová mu. Femliyiñ, nehuencüleaiñ ca ayühunquechi serfinieafuiñ Jehová (Rom. 12:12; 1 Ped. 1:6, 7).
6 Rupaliyiñ huesaque dungu mu, fei feipiafuiñ: “Chau Dios, ¿cüpalpeai mai cümeque dungu? Rume alüñmai tati” piafuiñ. Femngechi raquiduamliyiñ, ¿müte feyentuquelaiñ Jehová mu piafuiñ? Femlai. Raquiduamnge tüfa: fentren cüyen mu huesa arengele, ¿acupeai mai mahun? piafuiñ. Rume alüñmai tati. Huelu cüme quimnieiñ tañi mahunal quiñe antü. Ca femngechi huesaque dungu mu rupaliyiñ, huesa duamafuiñ, fei Jehová alüñmaquei ñi cüpalal ti hue mapu piafuiñ. Huelu taiñ feyentun mu Jehová mu, cüme quimnieiñ ñi femtripayal Jehová ñi feipicünuel (Sal. 94:3, 14, 15; Heb. 6:17-19). Taiñ quimfiel mu tüfa, hunentucuquefiyiñ ta Jehová taiñ mongen mu.
7. ¿Chem raquiduam famentuafiyiñ?
7 ¿Ca chem mu duamnieiñ taiñ maneluhual Jehová mu? Taiñ amuldungual. Fentren che maneluuquelai Chau Dios ñi cüme elcünutuafiel ti mapu, ¿rüf fempeai mai? piqueingün (Mat. 24:14; Ezeq. 33:32). Turpu femngechi raquiduamlayaiñ. Rumel feyentunieafiyiñ Jehová tañi feipicünuel mu. ¿Chem quelluafeiñmu taiñ doi feyentuleal? Peafiyiñ cüla dungu.
RAQUIDUAMAIÑ JESÚS ÑI HULÜN ÑI MONGEN
8, 9. Raquiduamliyiñ Jesús ñi hulün tañi mongen mu, ¿chumngechi quelluafeiñmu?
8 Raquiduamliyiñ Jesús ñi hulün ñi mongen, fei doi maneluhuaiñ Jehová ñi feipicünuel mu. Jesús tañi lan mu, cüme pengeli Jehová ñi femtripayal tañi feipicünuel. Raquiduamliyiñ chumngelu ñi lan ta Jesús ca com ñi femün Jehová ñi hulal tañi fotüm, doi maneluhuaiñ Jehová ñi cüme elcünutuafiel ti mapu ca taiñ rumel mongeleal.
9 Raquiduamaiñ tañi femün ta Jehová. Huli tañi poyen fotüm. Huenu mu, rume quiñeucülefuingu, fei huercüfi tañi nagpayal mapu mu. Tüfa mu fentren huesaque dungu mu rupai, rume cutrancahui ca langümngei. Raquiduamnge tüfa mu: Jehová ¿hulpeafui mai tañi fotüm taiñ cümelcaleal pichin antü mu müten? Femlayafui (Juan 3:16; 1 Ped. 1:18, 19). Feimu Jehová hulün mu tañi fotüm taiñ montulaeteu, eluhuai tañi huechurpual ñi feipin taiñ rumel mongeleal.
RAQUIDUAMAIÑ JEHOVÁ ÑI NEHUEN MU
10. Ñi feipin Efesios 3:20, ¿chem femafui Jehová?
10 Raquiduamliyiñ fente ñi nehuen-ngen ta Jehová, doi maneluhuaiñ quisu meu. Jehová niei com nehuen ñi femal ñi feipicünuel. Fentren che maneluuquelai ñi feipin ta Jehová taiñ rumel mongeleal. Huelu Jehová femai pu che tañi femnoafel, Jehová am nielu com pepiluhun (Job 42:2; Mar. 10:27). Feimu com dungu ñi feipicünuel Jehová huechunentuafi, feimu afmatulquelaeiñmu (papeltunge Efesios 3:20).
11. Feipinge quiñe afmatufalchi dungu ñi feipicünuel Jehová (inaduamnge ti huichulechi dungu “ Afmatufalchi dungu ñi feipicünuel Jehová huechutriparpui”).
11 Peafiyiñ quiñeque afmatufalchi dungu Jehová ñi feipicünufiel tañi pu che cuifi. Feipifi Abrahán engu Sara ñi nieal engu quiñe püñeñ, füchalen mu rume engu (Gén. 17:15-17). Ca feipifi Abrahán ñi pu cüpanche ñi eluafiel ti mapu Canaán pingelu. Fentren tripantu mu, Abrahán ñi pu cüpanche esclavongequefuingün Egipto mapu mu, feimu huechutriparpualu reque felelafui ñi feipicünuel ta Jehová, huelu huechutriparpui llemai. Jehová ca feipifi ta Elisabet ñi nieal quiñe püñeñ cuselelu rume. Ca feipicünufi ta María ñi choyümafiel ta Jesús fütangenofulu rume. Femngechi ca femtriparpui quiñe dungu ñi feipicünuel Jehová jardin de Edén mu fentren tripantu cuifi mu (Gén. 3:15).
12. Ñi feipin Biblia, Jehová ¿chumquei fente ñi nehuen-ngen mu? (Josué 23:14; Isaías 55:10, 11).
12 Raquiduamliyiñ Jehová chumngechi ñi femtriparpun tañi feipicünuel, fei quimtucuaiñ Jehová ñi fente nehuen-ngen. Tüfa quelluaiñmu taiñ doi maneluhual ñi acual ti hue mapu (papeltunge Josué 23:14; Isaías 55:10, 11). Ca femngechi quelluafuiñ caquelu che ñi rüf maneluhual Jehová ñi cüme elcünutuafiel ti mapu, tüfa quiñe peuma no, rüfngeai llemai. Jehová feipi ñi müleal hue huenu ca hue mapu, fei tüfa “manelfali ca rüfngei” pi Jehová (Apoc. 21:1, 5).
FEMAIÑ CÜMEQUE DUNGU TAIÑ FÜLMANIEAFIEL JEHOVÁ
TI TRAHUN
Tüfachi dungu, ¿chumngechi quelluqueiñmu taiñ doi feyentuleal? (Inaduamnge parrafo 13).
13. ¿Chumngechi quelluqueiñmu ti trahun taiñ doi nieal maneluhun?
13 ¿Ca chumafuiñ taiñ doi maneluhual Jehová ñi feipicünuel mu? Femaiñ cümeque dungu fülmanieafiel Jehová. ¿Chem dungu femaiñ? Quiñe dungu, amuaiñ trahun mu. Peafiyiñ ñi rupan Anna. Fentren tripantu mu, Anna fillque cüdau niefui Jehová ñi troquiñche mu. Quisu feipi: “Ti trahun quelluqueneu tañi rüf feyentuleal Jehová mu. Quiñeque mu, ti hueupiquelu müte cüme quimeltuquelai cam feipiquei iñche tañi quimnieel. Femfulu rume, huelu eluucülequen tañi cüme allcütuafiel, feimu fill trahun mu doi cüme adümürpuquefiñ chem pin Biblia, tüfa quelluqueneu doi feyentuleal Jehová mu” pi taiñ lamngen. b Cafei allcütufiliyiñ taiñ pu peñi ca pu lamngen ñi huiñoldungun, quelluaiñmu taiñ nieal doi maneluhun (Rom. 1:11, 12; 10:17).
AMULDUNGUN
Tüfachi dungu, ¿chumngechi quelluqueiñmu taiñ doi feyentuleal? (Inaduamnge parrafo 14).
14. Taiñ amuldunguchen, ¿chumngechi quelluqueiñmu taiñ doi feyentuleal?
14 ¿Ca chem dungu taiñ femal? Amuldunguaiñ (Heb. 10:23). Barbara pingechi lamngen, doi 70 tripantu yeniei ñi testigongen. Quisu feipi: “Amuldungun rume quelluqueneu ñi doi nieal maneluhun. Doi ñi dungufiel mu pu che Jehová mu ca tañi feipicünuel mu, doi feyentulequen”.
PAPELTUN BIBLIA
Tüfachi dungu, ¿chumngechi quelluqueiñmu taiñ doi feyentuleal? (Inaduamnge parrafo 15).
15. Taiñ papeltufiel Biblia, ¿chumngechi quelluqueiñmu doi nieal maneluhun? (Ca inaduamnge ti adentun).
15 Ca mülei taiñ estudiayal Biblia. Quiñe lamngen Susan pingelu, cüme adcünuquei tañi tiempo tañi papeltual Biblia. Quisu feipi: “Domingo antü mu, ngüneduamquefiñ Ti Huerquen ñi chillcatungeal ca semana mu. Lunes ca martes antü, pepicaquefiñ chem ñi inaduamngeal ti trahun rangiñ semana mu. Caquelu antü ngüneduamquefiñ ta Biblia ñi doi cüme quimafiel”. Taiñ lamngen fill semana inaduamquei chem pin Biblia, tüfa quelluqueyu tañi doi feyentuleal. Cangelu lamngen Irene pingelu, fentren tripantu yeniei ñi cüdaucülen fütra Betel ruca mu. Irene papeltuquefi ti profecia ñi quelluaeteu doi maneluhual Jehová mu. Fei feipi: “Itrocom dungu ñi feipicünuel Jehová com huechutriparpuquei. ¡Tüfa afmatulqueneu!”. c
JEHOVÁ ÑI FEIPICÜNUEL RÜF FEMTRIPAYAI
16. Jehová ñi feipifiel ta Habacuc, ¿iñchiñ ca feipipeiñmu mai? ¿Chumngelu feipiafuiñ? (Hebreos 10:36, 37).
16 Quiñeque testigo yeniei fentren tripantu ñi esperaniefiel ti hue mapu. Quiñeque che raquiduamquei deu ñi acuafel ti hue mapu. Jehová quimniei chum duamcülen tañi pu che, feimu feipifi ta Habacuc: “Medin antü mu mupiai iñche tami pengelelmequefiel, pürüm amulei ñi femtripayal ca coilatulayai. Alüñmafule rume, ¡llihuatulenge fei mu! Tüfa rüf femtripayalu am. ¡Alüñmalayai!” (Hab. 2:3). ¿Jehová feipifi Habacuc müten? Iñchiñ ca femngechi feipieiñmu taiñ yafültucuaeteu, ¿chumngechi quimfiyiñ? Jehová ñi duam mu, Pablo feipifi tüfachi dungu com pu cristiano ayülelu ñi cüme elcünungetual ti mapu (papeltunge Hebreos 10:36, 37). Raquiduamliyiñ rume ñi alüñmalen ñi acunon ti hue mapu, huelu Jehová ñi feipicünuel ‘femtripayai, ¡alüñmalayai!’.
17. Tüfachi lamngen, ¿chem femi tañi llihuatuleal?
17 Fentren Jehová ñi pu che llihuatulequeingün ñi femtripayal Jehová ñi feipicünuel fentren tripantu rupale rume. Peaiñ ñi rupan quiñe lamngen Louise pingelu. 1939 tripantu mu, eluhui ñi serfiafiel Jehová, fei feipi: “Raquiduamquefun ñi acual ti Armagedón petu ñi puhulnon 18 tripantu, huelu femlai. Rupalechi tripantu mu, rume quelluqueneu ñi inaduamafiel ñi rupan Noé, Abrahán, José ca caquelu che poyequefilu Jehová cuifi. Fei engün fentren tripantu mu llihuatulequefuingün ñi femtripayal tañi feipicünueteu ta Jehová engün. Fei engün reque llihuatuleli iñche ca caquelu, fei maneluucüleafuiñ pichilehuei ñi acual ti hue mapu”. Eimi fentren tripantu mu yenielmi tami serfiniefiel Jehová, ¿ca femngechi raquiduamquepelaimi?
18. Inaduamfiliyiñ Jehová ñi deumael, ¿chumngechi quelluaiñmu taiñ maneluucüleal?
18 ¿Ca chem quelluafeiñmu taiñ doi feyentuleal? Inaduamfiliyiñ Jehová ñi deumael: huangülen, anümca, pu culliñ ca ti pu che. Jehová petu ñi deumanofiel chem no rume, tüfachi dungu ngequelafui, huelu com taiñ pequefiel Jehová tañi deumael (Gén. 1:1, 26, 27). Ca femngechi Jehová feipicünui ñi huecünutuafiel ti mapu, fei femtripayai tañi feipicünuel. Ti hue mapu mu, pu che nieai afnoachi mongen ca rumel nieaingün cüme mongen. Feimu maneluucüleafuiñ Jehová ñi cüme elcünutuafiel tüfachi mapu ti medin antü meu (Is. 65:17; Apoc. 21:3, 4).
19. ¿Chem dungu femaiñ taiñ doi feyentuleal?
19 Petu ñi acunon ti hue mapu, eluucüleaiñ taiñ doi feyentuleal. ¿Chumngechi femafuiñ? Falintuafiyiñ Jesús ñi hulün ñi mongen, raquiduamaiñ Jehová ñi nehuen mu ca femaiñ cümeque dungu taiñ fülmanieafiel Jehová. Femliyiñ, pengelaiñ taiñ feyentulen ca taiñ ñom piuquengen, feimu llohuaiñ taiñ feipicünungeel (Heb. 6:11, 12; Rom. 5:5).
ÜLCANTUN 139 Peyenieunge ti hue Mapu mu
a Fachantü fentren che feyentuquelai Jehová ñi feipicünuel ñi huecünutuafiel ti mapu, re peuma müten tüfa piqueingün. Huelu iñchiñ maneluucüleiñ com ñi feipicünuel ta Jehová femtripayai. Huelu ca duamnieiñ taiñ doi feyentuleal. ¿Chem quelluafeiñmu? Peafiyiñ.
b Tüfachi troquiñ mu, ca üi tuculelngei ta quiñeque che.
c Tami doi quimal ti profecia mülelu Biblia mu, amunge Índice de las publicaciones Watch Tower ca quintunge “Profecía”. Por ejemplo, peafuimi ti troquiñ “Lo que Jehová predice se cumple sin falta” tripalu Ti Huerquen 1 conchi enero 2008 tripantu mu.
