1. ¿Chumngelu am fente falin-ngei taiñ huiñoldungual trahun mu?

 ¿CHUMNGELU am amuqueiñ trahun mu? Taiñ püramyeafiel ta Jehová (Sal. 26:12; 111:1). Ca femngechi taiñ hueluconque yafültucuhual (1 Tes. 5:11). Taiñ femngechi femal rume falin-ngei taiñ huiñoldungual trahun mu.

2. ¿Chem troquiñ mu huiñoldunguafuiñ?

² Fill semana huiñoldunguafuiñ trahun mu. Afchi semana, huiñoldunguafuiñ chillcatungele Ti Huerquen. Ca rangiñ semana mu, huiñoldunguafuiñ ti troquiñ “Cüme quintuafiyiñ falinque dungu Biblia meu”, “Chillcatun Biblia Trahunche mu” cam caquelu troquiñ mu.

3. 1) ¿Chumngelu am cüdautuafuiñ taiñ huiñoldungual? 2) ¿Chumngechi quelluqueiñmu Hebreos 10:24, 25?

³ Com iñchiñ ayüqueiñ taiñ püramyeafiel ta Jehová ca taiñ yafültucuafiel taiñ pu peñi ca pu lamngen. Huelu quiñeque mu cüdautuafuiñ taiñ huiñoldungual, ¿chumngelu? Quiñeque iñchiñ yehuequeiñ taiñ huitrapüramal taiñ cuhu. Ca quiñeque iñchiñ ayüliyiñ rume taiñ huiñoldungual, elungequelaiñ ta comentario. Fei ¿chem quelluafeiñmu? Peafiyiñ Pablo ñi feipifiel pu hebreo che. Quisu feipi amule engün trahun mu, mülei ñi hueluconque yafültucuhual (papeltunge Hebreos 10:24, 25). Loncontucuaiñ: pichin  huiñoldungufuliyiñ rume, yafültucuafuiñ taiñ pu peñi ca pu lamngen. Cafei fente elungenoliyiñ rume taiñ huiñoldungual, ayüucüleafuiñ caquelu ñi huiñoldungual (1 Ped. 3:8).

4. ¿Chem peaiñ tüfachi troquiñ mu?

⁴ Iñchiñ taiñ comentario mu yafültucuafuiñ taiñ pu peñi ca pu lamngen müleliyiñ rume quiñe pichi trahunche mu cam quiñe fütra trahunche mu. Tüfachi troquiñ mu peaiñ chumngechi taiñ femal. Ca peaiñ mülei taiñ cüme ngüneduamal chem taiñ feipial, femngechi taiñ yafültucuafiel pu peñi ca pu lamngen.

5. Trahunche mu pichileliyiñ, ¿chumafuiñ taiñ hueluconque yafültucuhual?

⁵ Quiñe pichi trahunche mu, pichin che müten huiñoldunguquei. Fei inei no rume huitrañpüramnole tañi cuhu, huesa duamafuiñ. Fei ¿chumafuiñ? Eluucüleaiñ taiñ huitrañpüramal taiñ cuhu taiñ huiñoldungual, femliyiñ caquelu ca femafui.

6, 7. ¿Chumafuimi tami llicalenoal tami huiñoldungual?

⁶ Quiñeque peñi ca quiñeque lamngen raquiduamün mu müten tañi huiñoldungual llicaqueingün. ¿Eimi cai? ¿Ca llicaqueimi? ¿Ayüafuimi tami yafültucuafiel pu peñi ca pu lamngen tami comentario mu? Tüfa tami femafel.

⁷ Inayafuimi cümeque ngülam mülelu Ti Huerquen. b ¿Chem ngülam am chi? Hune, cüme pepicaunge (Prov. 21:5). Cüme entendefilmi ñi inaduamngeal trahun mu, doi cüdautulayaimi tami huiñoldungual. ¿Ca chumafuimi? Fentre amul-layaimi tami huiñoldungun (Prov. 15:23; 17:27). Pichiñmale tami huiñoldungun, müte llicalelayaimi ca pu peñi ca pu lamngen cüdautulayai tami entendeaeteu tami chem pin. Pichin dungun mu huiñoldungulmi, huelu piuque mu tripale pengelaimi tami cüme pepicaucülen ca tami cüme adümniefiel chi dungu.

8. Taiñ huiñoldungun mu, ¿chumquei ñi piuque ta Jehová?

⁸ Inafulmi rume feitachi cümeque ngülam, huelu petu llicalelmi, quiñe cam epu rupa müten huiñoldungulmi, ¿chumafuimi? Loncontucuaimi Jehová falintuñmaqueimu tami femquen (Luc. 21:1-4). Jehová feipilayaimu tami femal tami pepilnoelchi dungu (Filip. 4:5). Feimu raquiduamnge chem tami femafel, fei ngillatufinge Jehová tami tüngduamelaeteu. Ellaca mu, quiñechi müten chi pichi huiñoldunguafuimi.

9. Quiñe fütra trahunche mu, ¿chumngelu cüdautuafuiñ taiñ huiñoldungual?

⁹ Mülelmi quiñe fütra trahunche mu, elungelayafuimi ta comentario, fentren che am huitrañpüramquelu tañi cuhu. Peafiyiñ ñi rupan quiñe lamngen. Taiñ lamngen rume falintuquefi tañi huiñoldungual trahun mu, femngechi püramyequefi ta Jehová, yafültucuquefi pu peñi ca pu lamngen ca cüme loncontucuquei com tañi quimürpuel  Biblia mu. Taiñ lamngen cuifi mülequefulu quiñe pichi trahunche mu, fentren rupa huiñoldunguquefui. Huelu mülepulu quiñe fütra trahunche mu, fente elungequelafui ta comentario, quiñeque mu quiñechi rume elungequelafui. Quisu feipi: “Rume huesa duamquefun, müntüñmangelu tañi comentario troquiuquefun, re ngünencaqueteu engün troquiufun pu lamngen hulquelu comentario”.

10. ¿Chumafuimi tami doi huiñoldungual?

¹⁰ ¿Rupaqueimi chumngechi ñi rupan taiñ lamngen? Raquiduamürpuimi chi tami huitrañpüramhuenoal tami cuhu, fei tami allcütual müten. Huelu fentecünulayaimi. ¿Chumafuimi tami doi huiñoldungual? Müfüquen comentario pepicayaimi fill trahun mu. Femngechi pürüm elungenolmi comentario hunenque parrafo mu, cüpalelu mu elungeafuimi. Papeltumequelmi Ti Huerquen, cüme ngüneduamnge caque quiñeque parrafo, fei ramtunge: “Tüfachi parrafo, ¿chumngechi nüucülei tañi papeltumequen mu?”. Femngechi chem parrafo mu rume huiñoldunguafuimi. Quiñeque parrafo nütramcai falinque quimeltun doi cüdaungei tañi adümngeal, feimu cüdaungei tañi huiñoldungungeal, feimu feitachi parrafo cüme pepicayafimi (1 Cor. 2:10). Inaniefulmi rume feitachi cümeque ngülam, ca elungelayafuimi ta comentario. ¿Ca chumafuimi? Petu ñi connon ti trahun, feipiafuimi tati peñi chem parrafo mu tami huiñoldungual.

11. Ñi feipin Filipenses 2:4, ¿chem mülei taiñ femal?

¹¹ (Papeltunge Filipenses 2:4). Chau Dios ñi duam mu Pablo feipifi pu cristiano ñi duamnieafiel pu peñi ca pu lamngen. ¿Chumngechi inayafuiñ feitachi ngülam trahun mu? Loncontucuaiñ iñchiñ reque taiñ pu peñi ca pu lamngen ca ayüqueingün tañi huiñoldungual.

12. ¿Chumafuiñ taiñ pu peñi ca pu lamngen ñi ayüucüleal trahun mu? (Ca inaduamnge ti adentun).

 ¹² Raquiduamnge, nütramcahun mu eimi tami pu hueni eimün, eimi müten nütramcaquelaimi, ca eluquefimi tami nütramcayal engün. Ca femngechi trahun mu iñchiñ ayüqueiñ taiñ pu peñi ca pu lamngen com ñi huiñoldungual engün, femngechi ayühuaingün (1 Cor. 10:24). Fei, ¿chem mülefui tañi femal iñchiñ?

13. ¿Chumafuiñ caquelu peñi ca lamngen ñi doi huiñoldungual?

¹³ Fentre amul-layaiñ taiñ huiñoldungun, femngechi caquelu peñi ca lamngen ca huiñoldunguafui trahun mu. Doyelchi mai pu loncolelu ca pu quimque cristiano mülei ñi femal tüfa. Fei müten no, cafei com feipilayaiñ ñi mülen ti parrafo mu. Com feipiliyiñ, caquelu nielayai chem tañi feipial engün. ¿Chumngechi inayafuimi feichi epu ngülam tüfachi parrafo mu? Huitrañpüramülmi tami cuhu, feipiafuimi ti hunen ngülam, fei quiñe peñi cam quiñe lamngen feipiafui cangelu ngülam.

14. ¿Chem raquiduamafuiñ huiñoldunguliyiñ? (Ca inaduamnge ti adentun).

¹⁴ Müchaique huitrañpüramfiliyiñ taiñ cuhu, fei ti peñi plataforma mu doi comentario eluafeiñmu taiñ huesa duamelnoaeteu. Caquelu peñi ca lamngen huesa duamafuingün tañi elungenon ta comentario, fei huitrañpüramhuelayafui ñi cuhu (Ecl. 3:7). Feimu cüme raquiduamaiñ tunten rupa taiñ huitrapüramal taiñ cuhu.

15. 1) Elungenoliyiñ comentario, ¿chem ngelai taiñ femal? 2) Ti peñi hulquelu comentario, ¿chem mülei ñi femal? (Inaduamnge ti huichulechi dungu “ ¿Chem mülei ñi femal ti hulquelu huiñoldungun?”).

¹⁵ Trahun mu fentren peñi ca lamngen huitrañpüramle tañi cuhu engün,  fei iñchiñ huiñoldungulayafuiñ tunte taiñ ayüfel. Quiñeque mu quiñe rupa no rume huiñoldungulayafuiñ, fei huesa duamafuiñ. Huelu illculayaiñ elungenoliyiñ ta comentario (Ecl. 7:9).

16. ¿Chumngechi yafültucuafuiñ com tati huiñoldungulu?

¹⁶ Elungenoliyiñ ta comentario fente taiñ ayüniefel, cüme allcütuafiyiñ tati huiñoldunguquelu ca feipiafiyiñ tañi cüme tripan tañi huiñoldungun. Femngechi ca yafültucuafiyiñ huiñoldungunofuliyiñ rume (Prov. 10:21). Saquifiliyiñ ta caquelu, femngechi huelucontu yafüluhuafuiñ.

17. 1) ¿Chumafui tati pu chau? 2) Ñi feipin mu ti video, ¿chem meli dungu femaiñ taiñ cüme pepicayal quiñe comentario? (Inaduamnge ti quimal dungu).

¹⁷ ¿Ca chumafuiñ taiñ huelucontu yafültucuhual trahun mu? Eimi chau, ñuque, nielmi pichiqueche pepicayafimi engün ñi huiñoldungual trahun mu (Mat. 21:16). Quiñeque chillcatun mu nütramcangequei curehuen dungu cam taiñ connoal pod cudumuhun mu, fei pu pichiqueche quimlayafuingün chi tañi chem pial. Huelu müleafui chi quiñe cam epu parrafo tañi huiñoldungual  engün. Ca nütramcayafimi tami pichiqueche chemu tañi pürüm elufemngenoal ta comentario, femngechi tami pichiqueche huesa duamlayai elungenole tañi huiñoldungual (1 Tim. 6:18). c

18. Huiñoldunguliyiñ, ¿chumafuiñ taiñ quisutu saquiunoal? (Proverbios 27:2).

¹⁸ Com iñchiñ taiñ huiñoldungun mu püramyeafuiñ ta Jehová ca yafültucuafuiñ taiñ pu peñi ca pu lamngen (Prov. 25:11). Quiñeque mu pichi nütramcayafuiñ quisu iñchiñ taiñ rupan mu, huelu cuñiutucuhuaiñ iñchiñ mu müten taiñ nütramcanoal (papeltunge Proverbios 27:2; 2 Cor. 10:18). Huelu mai taiñ comentario mu doi nütramcayaiñ Jehová mu, Biblia mu ca Jehová tañi troquiñche mu (Apoc. 4:11). Huelu quiñe parrafo mu ramtungeliyiñ chem taiñ raquiduamqueel iñchiñ cam taiñ rupan mu, feipiaiñ müten. Cüpalechi parrafo mu huiñoldunguafuiñ chemu ayüqueiñ taiñ comentayal trahun mu.

19. 1) Trahun mu raquiduamliyiñ taiñ pu peñi ca pu lamngen mu, ¿chem rupayai? (Romanos 1:11, 12). 2) ¿Chumngelu ayüqueimi tami huiñoldungual trahun mu?

¹⁹ Com iñchiñ yafültucuhuafuiñ trahun mu, ¿chumngechi femafuiñ? Pu peñi ca pu lamngen müte huiñoldungunolu, doi huiñoldunguafuingün. Cafei pu peñi ca pu lamngen ayüquelu tañi huiñoldungual, müte elungenofule rume tañi huiñoldungual, ca ayüucüleafuingün. Ca ayüucüleafuingün caquelu tañi huiñoldungun mu. Trahun mu raquiduamliyiñ taiñ pu peñi ca pu lamngen mu, femngechi “hueluquentu yafültucuhuaiñ” (papeltunge Romanos 1:11, 12).