1. ¿Chem raquiduamquefui quiñe pichi huentru ti huiñomongetun mu?

 QUIÑE pichi huentru regle tripantu nielu, Matthew pingelu, niefui quiñe huesa cutran, feimu mülefui ñi operangeal fentren rupa. Quiñe rupa quisu ca tañi familia pemequeingün ti JW Broadcasting^®. Tüfa mu tripai quiñe ülcantun nielu quiñe video. b Feita mu pengelngei quiñeque che ñi huiñomongetun. Aflu ti video, Matthew nüñmafi ñi cuhu tañi epu chau, fei feipifi: “Lali rume iñche huiñomongetuan, hueñancülequilmün”. Tüfachi pichi huentru rüf maneluucülefui ñi huiñomongetual. Tüfa ¿rume cümelcapelafi tañi epu chau?

2, 3. ¿Chumngelu cümei taiñ raquiduamal ñi huiñomongetual pu layelu?

² Cümei taiñ raquiduamal ñi feipin ta Biblia ñi huiñomongetual pu lachi che (Juan 5:28, 29). ¿Chumngelu am? Cüpalechi antü mu, conturumeafeiñmu quiñe huesa cutran cam larumeafui quiñe taiñ pu che (Ecl. 9:11; Sant. 4:13, 14). Rüf maneluucüleliyiñ ti huiñomongetun mu, chaftuafiyiñ feitachi huesaque dungu (1 Tes. 4:13). Biblia feipi Jehová cüme quimnieiñmu ca rume piuqueyenieiñmu (Luc. 12:7). Feimu laliyiñ rume, huelu Jehová huiñomongeltuaiñmu, femngechi chengeaiñ müten ca femngechi raquiduamnieaiñ müten. Ca Jehová elueiñmu quiñe cüme maneluhun: taiñ rumel mongeleal, laliyiñ rume huelu huiñomongeltuaiñmu.

³ Tüfachi troquiñ mu, peaiñ chumngelu maneluhuafuiñ ñi huiñomongetual lachi che. Ca ngüneduamaiñ Jesús feipifilu ta Marta: “Tami lamngen huiñomongetuai” (Juan  11:23). Ca peaiñ chumngechi doi maneluhuafuiñ ñi huiñomongetual pu layechi che.

4. Taiñ maneluhual quiñe che ñi feipin mu, ¿chem ramtuhuafuiñ? ¿Chumngechi adentucünuafuiñ?

⁴ Quiñe che feipieliyiñmu taiñ quelluaeteu, ¿chumngechi maneluhuafuiñ ñi feipin mu? Ramtuhuafuiñ: “¿Ti che rüf ayüniepei mai tañi quelluaeteu ca pepiluucülepei mai ñi femal?”. Raquiduamnge tüfa mu, teifücalei tami ruca quiñe cürüftucu mahun mu. Fei quiñe hueni feipieimu: “Iñche quelluayu cüme elcünungetual tami ruca”. Eimi quimnieimi tami hueni rüf ayüniei tami quelluaeteu. Ca femngechi tami hueni quim deumarucaquei, feimu niei herramienta ca pepiluucülei ñi femal ti cüdau. Feimu rüf maneluucüleimi tami feipieteu tami hueni. ¿Iñchiñ cai? ¿Maneluucülepeiñ mai ñi feipin ta Jehová ñi huiñomongetual pu layelu? Feimu ramtuhuafuiñ: “Jehová ¿rüf ayüniepei mai ñi huiñomongeltuafiel pu layelu? Ca ¿pepiluucülepei mai ñi femal?”.

5, 6. ¿Chumngelu maneluhuafuiñ Jehová ñi ayünien ñi huiñomongeltuafiel pu lachi che?

⁵ Jehová, ¿rüf ayüniepei mai ñi huiñomongeltuafiel pu layelu? Felei llemai. ¿Chumngechi quimiyiñ tüfa? Jehová adcünufi fentren huentru ñi huirintucual Biblia mu ñi huiñomongetual pu layelu (Is. 26:19; Os. 13:14; Apoc. 20:11-13). Ca com ñi feipicünuel ta Jehová huechutripaquei (Jos. 23:14).

⁶ Raquiduamnge Job ñi feipin mu. Job quimniefui ñi layal quiñe antü, huelu ca quimniefui Jehová rume ayüniei tañi huiñomongeltuaeteu (Job 14:14, 15). Jehová ca rume ayüniei tañi huiñomongeltuafiel com tañi pu serfiqueteu, femngechi ñi cüme mongen nieal ca ñi ayüucüleal engün. Huelu quiñe che quimnofilu Jehová lale, ¿ca ayüniepei mai Jehová ñi huiñomongeltuaeteu? Femi llemai (Hech. 24:15). Quisu ayüniei tañi hueniyeaeteu engün ca tañi rumel müleal mapu mu (Juan 3:16). Feimu cüme quimnieiñ Jehová ayüniei tañi huiñomongeltuafiel pu layelu.

7, 8. ¿Chumngechi maneluucüleafuiñ Jehová ñi pepiluucülen ñi huiñomongeltuafiel pu layelu?

⁷ Jehová, ¿niepei mai pepiluhun ñi huiñomongeltuafiel pu layelu? Felei llemai, Biblia feipi Jehová fei tati “Com Nehuen Nielu” (Apoc. 1:8). Jehová huehuafui chumngechi caiñe rume, ca femngechi huehuafi tati lan dungu (1 Cor. 15:26). Quimfiel mu tüfa yafültucuqueiñmu. Peafiyiñ ñi rupan lamngen Emma Arnold. Ti Segunda Guerra Mundial mu Emma ca tañi familia rupaingün fentren huesaque dungu mu. Fentren tañi piuqueyenieelchi che, tañi feyentun mu Jehová, langümeyu tati pu nazi. Fei Emma yafültucufi tañi püñeñ, feipifi: “Pu che lale huiñomongeltunoale, fei ti lan dungu doi nehuen-ngeafui ta Chau Dios mu, huelu felelai”. Jehová mai niei com nehuen chem no rume hueulayafeyu. Felei llemai, Jehová tati hulquelu mongen, ca huiño elutuafeiñmu mongen laliyiñ rume.

⁸ Ca quimnieiñ Jehová pepiluuquei ñi huiñomongeltuafiel pu che, fei com loncontucuniefilu. Com huangülen mütrümquefi tañi üi meu (Is. 40:26). Ca quimtucuniefi com pu layelu (Job 14:13; Luc. 20:37, 38). Jehová com quimniei ñi chumngechi chengen ñi  huiñomongeltuafiel, chumngechi ñi adngen, tañi chumquefel petu ñi mongelen, ca chem raquiduam ñi mülen tañi piuque mu.

9. ¿Chumngelu maneluucüleimi Jehová ñi huiñomongeltuafiel pu lachi che?

⁹ Quimnieiñ Jehová ñi ayülen ñi huiñomongeltuafiel pu layechi che. Ca niei pepiluhun tañi femal. Feimu maneluuqueiñ ñi huiñomongetual pu layelu. Ca quimnieiñ Jehová ñi huiñomongeltufiel pu lachi che cuifi mu. Biblia ñi antü meu, Jehová elufi nehuen quiñeque huentru ñi huiñomongeltuafiel quiñeque che lalu. Ngüneduamaiñ quiñe huiñomongetun ñi femün ta Jesús, tüfa mülei Juan capitulo 11 mu.

10. ¿Chem dungu rupai Jesús mülelu nometu Jordán leufü mu? Ca, ¿chumi Jesús? (Juan 11:1-3).

¹⁰ (Papeltunge Juan 11:1-3). Jesús niei quiñeque hueni Betania mu, Lázaro ca tañi epu lamngen, Marta ca María (Luc. 10:38-42). Fei epe aflu 32 tripantu mu, Lázaro cutrani, ñi epu lamngen fill raquiduamingu, fei mütrümfingu Jesús. Huelu Jesús camapu mülefui, nometu Jordán leufü mülefui (Juan 10:40). Fei Lázaro lai. Quimlu rume ñi lan tañi hueni, Jesús eluhui ñi mülenagal epu antü nometu Jordán. Fei hula amui Betania mu. Jesús ñi puhun Betania mu, Lázaro yeniei meli antü tañi lan mu. Huelu Jesús femai quiñe afmatufalchi dungu ñi quelluafiel tañi hueni ca ñi püramyengeal Chau Jehová (Juan 11:4, 6, 11, 17).

11. Jesús ñi femün, ¿chem quimeltueiñmu taiñ cüme hueningeal?

¹¹ ¿Chem quimeltueiñmu ñi femün ta Jesús taiñ nieal cümeque hueni? Marta ca María feipifalfingu ta Jesús ñi cutrancülen tañi hueni, huelu feipilafingu ñi amual ta Betania mu (Juan 11:3). Lázaro lalu, Jesús niefui nehuen ñi huiñomongeltuafiel camapu mülele rume, huelu eluhui ñi amual ta Betania ñi pemeafiel tañi hueni Marta ca María. Eimi ¿nieimi quiñe hueni tami quellueteu quelluen pinofilmi rume? Nielmi femngechi hueni, maneluucüleaimi tami quellufemaeteu “mülen mu hueñancün” (Prov. 17:17). Iñchiñ ca cüme hueningeaiñ Jesús reque. Huelu ¿ca chem dungu rupai? Peafiyiñ.

12. Jesús, ¿chem feipifi ta Marta? Ca, ¿chumngelu Marta maneluhuafui Jesús mu? (Juan 11:23-26).

¹² (Papeltunge Juan 11:23-26). Marta quimlu Jesús ñi mülepun Betania mapu mu amufemi ñi pemeafiel, feipifi: “Ñidol, mülefulmi tüfa meu, ñi lamngen lalayafui” (Juan 11:21). Jesús tremoltuafui Lázaro, huelu Jesús pepicangefui ñi femal doi afmatufalchi dungu, feipifi ta Marta: “Tami lamngen huiñomongetuai”. Ca feipi chumngelu ñi maneluhual tüfa mu. Feipifi: “Iñche tati huiñomongeltuchequelu ca tati hulquelu mongen”. Jehová elueyu nehuen ta Jesús ñi huiñomongeltuafiel pu che.  Deu huiñomongeltufi quiñe pichi domo pichin antü ñi lamum. Ca huiñomongeltufi quiñe hueche huentru feichi antü ñi lan mu peno (Luc. 7:11-15; 8:49-55). Huelu Lázaro yeniefui meli antü ñi lan mu, ¿ca nümülepelafui ñi cuerpo? Fei, ¿Jesús huiñomongeltupeafui mai Lázaro? Peafiyiñ.

13. Jesús pefilu ñi ngümangümangen María ca caquelu pu che, ¿chum duamnagi? (Juan 11:32-35; ca inaduamnge ti adentun).

¹³ (Papeltunge Juan 11:32-35). María ca puhui cheu ñi mülen Jesús, fei ca feipifi: “Ñidol, mülefulmi tüfa meu, ñi lamngen lalayafui”. Marta, María ca com pu che mülelu fei mu rume hueñancüleingün. Jesús pefilu ñi ngümangümangen engün, ca hueñancünagi. Fei fente ñi cutranpiuqueyeniefiel engün, trefcütripai ñi cülleñu. Jesús quimniefui ñi rume hueñancün-ngen tañi lan quiñe piuqueyen che. Jesús ayülelafui tañi hueñancüleal engün, feimu eluhui ñi femal quiñe afmatun dungu.

14. Jesús ñi femün, ¿chem quimeltueiñmu Jehová mu?

¹⁴ Jesús rume hueñancüi pefilu ñi ngümangümangen María, femngechi quimeltueiñmu Jehová tañi cutranpiuqueyechequen. ¿Chumngelu feipiyiñ tüfa? Taiñ pefiel mu ti hunen troquiñ, Jesús cüme inayentufi tañi Chau ñi raquiduamquen (Juan 12:45). Feimu Jesús cutranpiuqueyefiel mu tañi pu hueni layeluulu, tüfa pengeli Chau Jehová ca cutranpiuqueyequeiñmu iñchiñ pefiel mu taiñ ngümangümangen (Sal. 56:8). Tüfa doi fültucuqueiñmu Chau Jehová mu.

15. Jesús puulu ñi rüngalcülen Lázaro, ¿chem dungu rupai? (Juan 11:41-44; ca inaduamnge ti adentun).

¹⁵ (Papeltunge Juan 11:41-44). Jesús puhui cheu ñi rüngalcülen ta Lázaro, fei feipifi pu che: “Nentufimün ti cura”, fei Marta feipi: “Meli antü ñi rüngalcülen ¿deu huesa nümüpelai?”. Fei Jesús feipieyu: “Feyentulmi, peaimi Chau Ngünechen ñi pepiluhun, ¿feipipelaeyu ama?” (Juan 11:39, 40). Jesús ayüniefui ñi püramyengeal ta Jehová, feimu quintupürai  huenu fei nehuentu ngillatui, fei hula feipi: “¡Lázaro, tripapatunge!”. Fei Lázaro trecalen tripapai. Jesús femi quiñe afmatufalchi dungu inei no rume ñi femnoafel (inaduamnge ti nota de estudio mülelu Juan 11:17 huincadungun meu).

16. Ñi feipin Juan 11, ¿chumngechi quelluafeiñmu taiñ doi maneluhual ti huiñomongetun mu?

¹⁶ Ñi feipin Juan capitulo 11 doi eluqueiñmu maneluhun ñi huiñomongetual pu lachi che. ¿Chumngelu? Loncontucuaiñ Jesús ñi feipifiel ta Marta: “Tami lamngen huiñomongetuai” pifi (Juan 11:23). Jesús ayüniefui ca niefui ta pepiluhun ñi huiñomongeltuafiel ta Lázaro. Cafei Jesús tañi ngüman mu pengeli ñi ayülen ñi huiñomongeltuafiel com pu layelu ca ñi hueñancülehuenoal pu layeluulu. Cafei Lázaro trecalen tripapatulu ti rüngan mu, pengeli Jesús niei ta pepiluhun ñi huiñomongeltuafiel pu layelu. Feimu rüf maneluuqueiñ ñi huiñomongetual com pu layechi che. Ca raquiduamaiñ Jesús ñi feipifiel ta Marta: “Feyentulmi, peaimi Chau Ngünechen ñi pepiluhun, ¿feipipelaeyu ama?” (Juan 11:40). ¿Iñchiñ cai? ¿Chem mülei taiñ femal taiñ doi maneluhual tüfachi cüme maneluhun mu? Peafiyiñ.

17. Taiñ papeltufiel mu ti huiñomongetun, ¿chem mülei taiñ femal?

¹⁷ Papeltuaiñ ca raquiduamaiñ quiñeque che ñi huiñomongetun cuifi mu. Biblia mu huirintuculei ñi huiñomongetun pura che. c Fei cüme ngüneduamafuiñ caque quiñeque. Tüfa ta epeu no, rüfngechi che yem iñchiñ reque. Raquiduamaiñ chem dungu quimürpuafuiñ ca raquiduamaiñ Jehová ñi ayülen ca ñi nien ta pepiluhun ñi huiñomongeltuafiel pu layelu.  Ca ngüneduamaiñ ti doi falin-ngechi huiñomongetun, Jesús ñi huiñomongetun. Loncontucuaiñ fentren pu che peeyu ñi huiñomongetun. Jesús ñi huiñomongetun quelluqueiñmu taiñ doi maneluhual ñi huiñomongetual pu lachi che (1 Cor. 15:3-6, 20-22).

18. Fillque ülcantun dungulu huiñomongetun mu, ¿chumaiñ? (Inaduamnge ti quimal dungu).

¹⁸ Allcütuaiñ ca ülcantuaiñ fillque ül nütramcalu ti huiñomongetun mu ca raquiduamaiñ chem pin tati ül (Efes. 5:19). d Feitachi ülcantun quelluaiñmu taiñ doi maneluhual ti huiñomongetun mu. Adümcantuaiñ ti ül ca taiñ familia iñchiñ quiñentrür raquiduamaiñ chem pin ti ül, loncontucuafiyiñ ca piuquentucuafiyiñ ti ülcantun. Femngechi rupaliyiñ cuñihun-ngechi dungu mu cam layeluuliyiñ, Jehová quelluaiñmu taiñ acordayafiel feitachi ülcantun ca nehuentucuaiñmu.

19. ¿Chumngechi peucüleaiñ reque ti hue mapu mu? (Inaduamnge ti huichulechi dungu “ ¿Chem ramtuafuimi engün?”).

¹⁹ Penieafiyiñ reque tati hue mapu. Jehová elueiñmu quimün taiñ peniehual reque ti hue mapu mu. Quiñe lamngen feipi: “Rumel penieuquen ti hue mapu mu, nümünümütuquefiñ reque cümeque flor”. Iñchiñ ca femafuiñ. Raquiduamaiñ taiñ peafiel cuifique che poyequefulu Jehová, ¿inei am ayünieimi tami doi cüme quimafiel? ¿Chem ramtuafuimi? Ca raquiduamaiñ taiñ petuafiel com taiñ piuqueyen che huiñomongetule, ¿chem piafimi? ¿Fütra pancocapelayafimi? Ca rume ayühuaimi.

20. ¿Chem mülei taiñ femal?

²⁰ Rume mañumniefiyiñ Jehová ñi huiñomongeltuafiel pu layelu. Jehová ayüniei ca niei pepiluhun ñi huiñomongeltuafiel pu la, feimu maneluucüleiñ ñi femtriparpual ñi feipin. Jehová feipieiñmu reque caque quiñeque iñchiñ: “Huitrañpüramafiñ tami piuqueyenqueche lalu”. Amuleai taiñ doi maneluhun ti huiñomongetun mu, femliyiñ doi fülconaiñ Chau Jehová mu taiñ elueteu feitachi cüme maneluhun.