¿Quimquefuimi tüfa?
David ñi pu hueichafe mu, ¿chumngelu mülefui huentru judiongenolu?
DAVID tañi pu hueichafe mu ca coneltuquefui caquelu huentru judiongenolu. Quiñeque tüfa: Zélec Ammón mu tuhui, Urías Het mu tuhui, Itmá Moab mu tuhui (1 Crón. 11:39, 41, 46). a Ca mülefui pu keretita che, pu peletita che ca pu Gat che (2 Sam. 15:18). Pu keretita che ca pu peletita che, ¿pu Filistea che mu nüucülepelafui engün? (Ezeq. 25:16). Ca pu guitita che Gat huaria mu cüpai peno (Jos. 13:2, 3; 1 Sam. 6:17, 18).
¿Chumngelu coneltulefui David ñi pu hueichafe mu? David quimniefui ñi quisucünunoaeteu engün, cafei püntütripalayafuingün Jehová mu. Quiñe lifru feipi pu keretita che ca pu peletita che quelluntucufingün ta David. Tati doi huesaque dungu ñi rupan petu ngünenielu, elcünulafingün. ¿Chem dungu pengeli tüfa? Quiñe rupa com pu Israel che inafingün quiñe huentru pofolcachequelu, Seba pingelu. Huelu pu keretita che ca pu peletita che quisucünulafingün ta David, fei quellufingün ñi fentecünual ti pofolcahun (2 Sam. 20:1, 2, 7). Ca rupa, David tañi fotüm, Adonías pingelu, cüpa müntuñmafi tañi chau ñi ngünenieel, huelu pu keretita che ca pu peletita che püntütripalaingün David mu, femngechi quelluntucuingün ta Salomón ñi lonco ülmen-ngerpual, quimniefuingün Jehová ñi dullifiel (1 Rey. 1:24-27, 38, 39).
Ca quiñe huentru judiongenolu fülmaucülelu David mu fei ta Ittái, Gat mu tuhui. David tañi fotüm Absalón caiñetueyu, fei rulpaduamelfi ñi piuque pu Israel huentru ñi lonco ülmen-ngerpual. Feichi mu Ittái ca tañi 600 hueichafe quelluntucufingün ta David. “Eimi ta judiongelaimi, feimu ngelai tami coneltual tüfachi dungu” pieyu David. Huelu Ittái huiñoldungueyu: “¡Tati mongelechi Chau Jehová ñi üi mu ca tati mongelechi lonco ülmen ñi üi mu, iñche tañi ñidol, rüf feipicünueyu: cheu rume mülele tañi ñidol, tati lonco ülmen, tiye mu müleai tami cüdaufe mongeleli cam lali rume!” (2 Sam. 15:6, 18-21).
Ittái püntütripalai David mu, ti lonco ülmen Jehová ñi dullifiel.
Pu keretita che, pu peletita che ca pu guitita judiongenolu rume engün, feyentuquefingün ñi rüf Ngünechen ngen ta Jehová, ca maneluucülefuingün Jehová ñi dullifiel ta David, feimu yamquefingün. Rüfcünu mai, David mañumquefui ñi nieel tüfachi manelfal huentru tañi compañaeteu.
a Ñi feipin Deuteronomio 23:3-6, Moisés ñi ley feipi quiñe Ammón che no rume ca quiñe Moab che no rume conlayafui Chau Jehová tañi trahunche mu. Fei engün Israel che troquingequelafui, fei lloulayafuingün com ñi nieel pu Israel che. Huelu trahuluhuafui ca müleafui pu Israel che engün. Inaduamnge ti lifru Perspicacia para comprender las Escrituras, volumen 1, quintunge “Ammonitas”, fei hula ti troquiñ “Se casan con israelitas”.
