1. Iñchiñ pefiel mu com ñi deumael ta Jehová, ¿chumngechi troquihuafuiñ?

DAVID pefilu com ñi deumael ta Jehová, ngillatufi. Feipifi: “Adquintufiel mu tami callfü huenu, ñi deumael tami changüll cuhu mu, ti cüyen ca tati pu huangülen tami pepicael, ¿tunte fali quiñe che femngechi tami raquiduamtucunieafiel? Ca ¿tunte fali tati huentru ñi cüpanche femngechi tami cuñiutucunieafiel?” (Sal. 8:3, 4). Iñchiñ pefiel mu com tañi deumael ta Jehová, David reque troquiupelayafuiñ. Quiñe pichi piru reque felelu troquihuafuiñ, Jehová ñi adquiñ mu. Cafei afmatulehuequeiñ taiñ duamtueteu mu ta Jehová. Huelu Jehová re duamtuquelaeiñmu müten, huelu mai tañi familia troquinieiñmu. Femngechi femfi ta Adán engu Eva, peaiñ.

2. Jehová, ¿chem ayüfui ñi femal Adán engu Eva?

² Adán engu Eva fei tati hunen epu che ñi deumael ta Jehová. Quisu elufi quiñe falin cüdau ñi femal engu, feimu feipifi ñi pütrün nieal püñeñ ca ñi cuidayafiel ti Mapu (Gén. 1:28). Adán engu Eva feyentufule ta Jehová, quisu engu ca tañi cüpanche petu coneltuleafui Jehová tañi fütra familia mu.

3. ¿Chumngelu feipiafuiñ Jehová ñi elufiel ta Adán engu Eva quiñe cüme mongen?

³ Jehová elufi ta Adán engu Eva ñi müleal quisu tañi fütra familia mu, feimu rume cümelcafi. Ti Salmo 8:5 mu David feipi chumngechi ñi deumafiel Jehová tati huentru, fei feipi: “Pichi cacünufimi tati che tati pu cümeque püllü mu, ca elufimi ñi püramyengeal ca ñi saquingeal engün”. Tati pu che fente nehuen-ngelai ca fente  adümuhun-ngelai tati pu püllü reque (Sal. 103:20). Fentren nehuen-ngefulu rume, pu cümeque püllü pichi doicüleingün iñchiñ mu. ¡Afmatufali! Jehová deumafilu ta Adán engu Eva elufi quiñe cüme mongen.

4. 1) ¿Chumingu Adán engu Eva? 2) ¿Chem inaduamaiñ tüfachi troquiñ mu?

⁴ Adán Eva engu huesacünuingu, feyentulafingu Jehová. Feimu coneltulehuelaingu Jehová ñi pu che mu. Ñi femün mu engu re huesaque dungu contupaeyu tañi pu cüpanche. Femfulu rume engu, Jehová ayüniei com pu che quisu tañi familia mu müleal engün. Feitachi troquiñ mu peaiñ chumngechi Jehová falintuniequeiñmu ca peaiñ chumngechi pengelafuiñ ñi coneltuleal Jehová tañi pu che mu. Af meu, peaiñ chem cümeque dungu llohuai Jehová tañi pu che mülelu Mapu mu.

5. Jehová elueiñmu taiñ inayentuafiel, ¿chumngechi pengelafuiñ taiñ mañumcülen?

⁵ Jehová deumaeiñmu taiñ inayentuafiel, feimu falintuqueiñmu (Gén. 1:26, 27). Iñchiñ pengelafuiñ taiñ piuqueyechefengen, taiñ duamtuchequen, taiñ nor piuqueyechequen ca nor dungu femafuiñ Jehová reque (Sal. 86:15; 145:17). Femün mu ta tüfa, püramyequefiyiñ ta Jehová ca pengelelquefiyiñ taiñ mañumcülen (1 Ped. 1:14-16). Cafei cümeque dungu femliyiñ fei ayühulfiliyiñ Jehová, cüme duamcüleaiñ ca ayüucüleaiñ. Cafei inafiliyiñ Jehová tañi chumngen, coneltuafuiñ quisu tañi fütra familia mu.

6. Jehová deumafilu tati Mapu, ¿chumngechi pengeli ñi falintufiel tati pu che?

⁶ Jehová pepicafi ti Mapu cheu taiñ müleal. Jehová petu ñi deumanofiel ta Adán, hune deumafi tati Mapu (Job 38:4-6; Jer. 10:12). Fei Jehová fente tañi cüme piuquengen mu deumafi itrofillem iñchiñ taiñ ayühulaeteu (Sal. 104:14, 15, 24). Petu deumafilu ti Mapu huitracünuupelai ñi raquiduamal tañi deumael mu, fei “rume cümelcalei tañi deumael” pi (Gén. 1:10, 12, 31). Jehová, ¿ca chumngechi pengelelfi tati pu che ñi falintufiel? Elufi engün tañi cuidayafiel com tañi deumael (Sal. 8:6). Jehová ayüfui tati pu che ñi rumel ayühunquechi cuidanieafiel com tañi deumael. ¿Mañumtuquepefiyiñ mai ta Jehová?

7. Josué 24:15, ¿chumngechi pengeli feitachi texto Jehová taiñ elueteu quisu taiñ dullial?

⁷ Chau Jehová elueiñmu taiñ quisutu dullial. Feimu dulliafuiñ chem femal taiñ mongen mu (papeltunge Josué 24:15). Dullin mu iñchiñ taiñ poyeafiel ta Jehová, quisu ayüuquei (Sal. 84:11; Prov. 27:11). Jehová am elueteu quisu taiñ dullial, cüme püneafiyiñ taiñ femal cümeque dungu. Femngechi femi Jesús, fei inaduamafiyiñ.

8. ¿Chumi Jesús?

⁸ Jesús reque, iñchiñ mu müten raquiduamuulayaiñ, huelu mai raquiduamaiñ caquelu che mu. Quiñe rupa Jesús ca tañi pu discipulo rume cansalefuingün, fei amuingün cheu tañi cansatual engün. Huelu pepi cansatulaingün, fentren che peeyu engün fei ayüfuingün ñi quimeltuaeteu ta Jesús. Huelu Jesús illculai, doi mai cutranpiuqueyefi engün. Fei ¿chumi Jesús? “Eluhui tañi quimeltuafiel fentren dungu” (Mar. 6:30-34). Jesús reque femliyiñ, fei elcünuliyiñ taiñ tiempo ca taiñ nehuen taiñ quelluafiel ta caquelu che, fampüramyeafiyiñ  ta Jehová (Mat. 5:14-16). Femngechi pengelelafiyiñ Jehová quisu tañi troquiñche mu taiñ müleal.

9. Jehová ¿chem elufi tati pu chau?

⁹ Jehová elufi tati pu che ñi nieal ta pichiqueche ca elufi ñi enseñayafiel ñi poyerpuafiel ta Jehová. Jehová elufi tati pu cümeque püllü ñi femal fillque dungu, huelu elulafi ñi nieal ta yall. Pu chau mai elufi ñi nieal ta pichiqueche. Fei eimi chau, ñuque, ¿chemu mañumcülenoafulu eimi? Cafei pu chau elfalcünungei ñi cüme tremümafiel tañi pu pichiqueche chumngechi ñi ayünieel ta Jehová (Efes. 6:4; Deut. 6:5-7; Sal. 127:3). Ñi quellungeal tati pu chau, Jehová tañi troquiñche entuquei fillque papel, video, ülcantun ca quiñeque troquiñ mülelu taiñ pagina internet mu. Com tüfa tuhui Biblia mu. Quimfali llemai Jehová ca Jesús piuqueyequefi tati pu pichiqueche (Luc. 18:15-17). Pu chau maneluule Jehová tañi ngülam mu, fei cüme tremümfile tañi pu pichiqueche, Jehová rume ayühuai. Femngechi femle pu chau, quelluafingün tañi pu pichiqueche ñi rumel coneltuleal Jehová tañi fütra familia mu.

10, 11. Jesús ñi duam mu, ¿chumi Jehová com pu che mu?

¹⁰ Jehová huli ñi saquin Fotüm ñi layal iñchiñ mu, femngechi iñchiñ coneltuleafuiñ Jehová ñi fütra familia mu. Culpalu Adán Eva engu, quisu engu ca tañi pu cüpanche coneltulehuelai Jehová ñi fütra familia mu (Rom. 5:12). Adán engu Eva quisu tañi duam mu famentuhuingu Jehová mu, feimu mülefui ñi quechanentungeal Jehová ñi familia mu. Huelu ¿iñchiñ cai? Jehová fente taiñ piuqueyeteu mu, huli tañi saquin Fotüm ñi layal iñchiñ mu. Femngechi com pu feyentuquefilu ta Jehová, coneltuafui Jehová ñi fütra familia mu (Juan 3:16; Rom. 5:19). Jesús tañi duam mu, Jehová fotüm ca ñahue reque llohuafui ta 144.000 che (Rom. 8:15-17; Apoc. 14:1).

¹¹ Cafei famülque mu, fentrenque che poyeniequefi ta Jehová. Fei engün maneluucüleingün ñi yallyeaeteu Jehová afle ti huaranca tripantu ñi ngünenieel Jesús (Sal. 25:14; Rom. 8:20, 21). Fente tañi maneluucülen engün ñi coneltulerpual Jehová ñi familia mu, fachantü “Chau” piquefingün ta Jehová (Mat. 6:9). Cafei tati pu huiñomongetulu ca quimürpuafuingün ta Jehová. Fei cüme lloufile Jehová tañi dungu, ca coneltuleafuingün Jehová tañi familia mu.

12. ¿Chem ramtun inaduamaiñ?

¹² Felei llemai, Jehová fillque dungu mu pengeli ñi falintuquefiel tati pu che. Jehová yall reque dullineuyefi tati pu dullinque cristiano. Cafei tati pu che mülealu Mapu mu ca femngechi Jehová tañi yallngerpuafuingün (Apoc. 7:9). Huelu, ¿chumngechi pengelcünuafuiñ taiñ rumel müleal Jehová ñi fütra familia mu? Peafiyiñ.

13. ¿Chumafuiñ taiñ rumel müleal Jehová tañi familia mu? (Marcos 12:30).

¹³ Serfiafiyiñ Jehová com taiñ piuque mu (papeltunge Marcos 12:30). Jehová elueiñmu quiñe rume falin dungu: elueiñmu taiñ poyeafiel. ¿Chumngechi pengelafuiñ taiñ cüpa serfifiel ta Jehová? Inayaiñ taiñ chem pieteu ta Jehová, femngechi ca pengelaiñ taiñ piuqueyefiel (1 Juan 5:3). ¿Chem feipieiñmu Jehová taiñ femal?  Enseñayafiel tati pu che Jehová ñi dungu ca quelluafiel ñi fautizahual engün (Mat. 28:19). Ca feipieiñmu taiñ huelucontu piuqueyehual (Juan 13:35). Iñchiñ inafiliyiñ taiñ chem pieteu Jehová, eluaiñmu taiñ rumel müleal quisu tañi fütra familia mu (Sal. 15:1, 2).

14. ¿Chumngechi pengelafuiñ taiñ piuqueyechefengen? (Mateo 9:36-38; Romanos 12:10).

¹⁴ Piuqueyecheaiñ. Chau Dios doi quimfalngequei tañi piuqueyechen mu (1 Juan 4:8). Petu taiñ quimnofiel mu, Chau Jehová piuqueyenieuyequeiñmu (1 Juan 4:9, 10). ¿Chumngechi inayentuafuiñ ta Jehová? Piuqueyeafiyiñ ta caquelu pu che (Efes. 5:1). Quellufiliyiñ pu che ñi quimafiel ta Jehová, pengelaiñ taiñ piuqueyechefengen. Femngechi quellufiliyiñ pu che, quisu engün ca coneltulerpuafuingün Jehová ñi fütra familia mu (papeltunge Mateo 9:36-38). Fautizaule quiñe che, amuleaiñ taiñ piuqueyenierpuafiel ca taiñ respetanierpuafiel (1 Juan 4:20, 21). ¿Chumngechi femafuiñ? Feichi che huesa duameleliyiñmu, huesa raquiduamtuculayaiñ quisu mu. Huelu mai pengelaiñ taiñ falintuniefiel, fei doicülelu troquiulayaiñ quisu mu (papeltunge Romanos 12:10; Filip. 2:3).

15. ¿Inei cutranpiuqueyeafiyiñ?

¹⁵ Cutranpiuqueyeafiyiñ com pu che. Ayüliyiñ taiñ rumel coneltual Jehová tañi fütra familia mu, inayafiyiñ Biblia tañi ngülam taiñ mongen mu. Jesús enseñaeiñmu taiñ cutranpiuqueyeafiel com pu che, taiñ pu caiñetuqueteu cütu (Luc. 6:32-36). Huelu quiñeque mu cüdaungeafui taiñ femal, fei ¿chem quelluafeiñmu? Eluhuaiñ taiñ raquiduamal Jesús reque ca inayentuafiyiñ tañi cüme femün. Inafiliyiñ Jehová tañi feipin ca inayentufiliyiñ ta Jesús, pengelcünuaiñ taiñ rumel müleal Jehová tañi familia mu.

16. ¿Chumafuiñ ñi huesa dunguyengenoal Jehová tañi pu che?

¹⁶ Cuñiutucuhuaiñ ñi huesa dunguyengenoal Jehová tañi pu che. Quiñeque mu, tati pu pichiqueche inayentuquefi tañi femquen tañi hunen peñi. Ti peñi inafile Jehová tañi ngülam tañi mongen mu, tañi pichi peñi ca inayentuafeyu. Huelu ti peñi conle huesaque dungu mu, tañi pichi peñi ca inayentuafeyu tañi huesa femün. Ca femngechi dungu rupayafui Jehová tañi troquiñche mu. Quiñe peñi cam quiñe lamngen apostatangerpule cam conle huesaque dungu mu, caquelu peñi, lamngen inayentuafeyu ñi huesa femün. Tañi femün mu engün, huesa dunguyengequei Jehová ñi pu che (1 Tes. 4:3-8). Feimu inayentulayafiyiñ ñi huesa femün caquelu pu che ca eluulayaiñ chem no rume taiñ famentunoaeteu Jehová ñi troquiñche mu.

17. ¿Chem mu ngelai taiñ maneluhual? ¿Chumngelu am?

¹⁷ Maneluulayaiñ ti plata mu, Jehová mu llemai. Doyümfiliyiñ taiñ cüdahuelquefiel ta Jehová, quisu cuidanieaiñmu ca eluaiñmu com taiñ duamnieel (Sal. 55:22; Mat. 6:33). Maneluuliyiñ Jehová taiñ cuidayaeteu, maneluulayaiñ ti plata mu ca raquiduamlayaiñ rume taiñ rüf ayühulafeteu. Iñchiñ quimnieiñ cüdahuelfiliyiñ ta Jehová, rüf ayüucüleaiñ (Filip. 4:6, 7). Quiñeque iñchiñ nieiñ chi ta plata, fei ngillayafuiñ fillque chemcün. Huelu ramtuhuafuiñ: “¿Rume niepefiñ mai piuque mu feitachi chemcün?”. Cafei petu taiñ ngillanofiel quiñe  chemcün, ramtuhuafuiñ: “¿Rüf niepen mai ta tiempo tañi püneafiel?”. Acordayaiñ Jehová taiñ elueteu quiñe falin cüdau quisu ñi trahunche mu. Feimu eluhuaiñ chem no rume taiñ catrütunoaeteu taiñ femal tüfachi cüdau. Inayentulayafiyiñ ñi femün ti ricu huentru ñi nütramcael Biblia. Fei rume falintufi tañi nieel feimu inalafi ta Jesús. Tañi femün mu, coneltulai Jehová tañi fütra familia mu. ¡Müna huesa! (Mar. 10:17-22).

18. Cüpalechi antü meu, ¿chumaingün pu poyequefilu ta Jehová?

¹⁸ Com pu nor piuqueyefilu ta Jehová rumel ayühunquechi poyenierpuafingün. Com pu mülealu Mapu mu ayühunquechi cuidayafingün tati Mapu, Jehová tañi deumael. Pichiñma mu Jehová tañi Gobierno mu, com cüme elcünungetuai ti Mapu ca huiño cüme feletuai chumlequefel ellaca mu. Jesús com cüme elcünutuai ñi huesa femel Adán Eva engu. Jehová huiñomongeltuafi pu layelu ca eluafi ñi cüme feletual engün, fei chumcaunorume ñi lahuenoal engün (Luc. 23:42; 23:43, TNM). Com tati pu poyequefilu ta Jehová culpafe ngehuenole, elungeaingün “ñi püramyengeal ca ñi saquingeal” chumngechi ñi feipin ta David (Sal. 8:5).

19. ¿Chem loncontucuaiñ?

¹⁹ Loncontucuaiñ taiñ nieel cüme maneluhun. Ca loncontucuaiñ Jehová taiñ piuqueyenieteu ca ayüniei taiñ coneltual tañi fütra familia mu. Feimu chumaiñ rume taiñ ayühulafiel ta Jehová. Fill antü piuquentucunieafiyiñ Jehová tañi feipicünuel. Falintuafiyiñ taiñ poyeafiel Jehová fachantü ca cüpalechi antü meu.