1. ¿Chem enseñalngeimi Jehová mu?

TAMI chau ca tami ñuque poyefile Jehová, enseñalpelaeimu Jehová mu petu pichicalu eimi. Enseñalngepelaimi com ñi deumael ta Jehová ca ñi cüme elcünutuafiel ti Mapu. Ca feipingepelaimi ñi chumngen ta Jehová (Gén. 1:1; Hech. 17:24-27).

2. Quiñeque che, ¿chem raquiduamquei pu feyentulelu Chau Dios mu?

² Pütrüquen che feyentuquelai Chau Dios mu ca ñi deumafiel com ti mülelu. Doi mai, quisu engün feyentuquei evolucion mu. Feipiqueingün ñi quisutu triparumen ta che ca ñi tripalerpuquen hueque mongen. Tüfachi pu che niefui alüquen educacion. Quiñeque engün feipiqueingün ñi huelulcaucülen ta Biblia, ca feipiqueingün pu nienolu educacion müten feyentuquei Chau Dios ñi deumafiel com mülelu.

3. ¿Chumngelu fente falin-ngei taiñ nehuentu feyentuleal Jehová mu?

³ Ñi feipiquen feitachi pu che hueluraquiduamelafeiñmu. Huelu nehuencüleliyiñ taiñ feyentulen Chau Dios mu, chem no rume hueluraquiduamel-layaiñmu. Fei raquiduamnge, ¿eimi feyentuqueimi Chau Dios mu tami feipingeel mu müten? Cam ¿quisutu eluhuimi tami ngüneduamal ñi rüf mülepen mai ta Chau Dios? (1 Cor. 3:12-15). Chumten tripantu yeniefuliyiñ rume taiñ Dunguquelu Ineingen Jehovángen, com iñchiñ duamnieiñ taiñ nehuentu feyentuleal Chau Dios mu. Femliyiñ encañalayaiñmu feichi pu che feipiquelu ñi huelulcaucülen ta Biblia (Col. 2:8; Heb. 11:6). Feimu feitachi troquiñ mu ngüneduamaiñ cüla dungu. Quiñe, chemu quiñeque che feyentuquelai taiñ deumaeteu Chau Dios. Epu, chumafuiñ taiñ doi feyentual Jehová taiñ deumaeteu mu. Ca cüla, chumafuiñ ñi  nehuencülerpual taiñ feyentulen Jehová mu.

4. Pu feyentuquelu Chau Dios mu, ¿chumngelu feyentuqueingün ñi mülen? (Hebreos 11:1).

⁴ Quiñeque che feipiquei pu feyentuquelu Chau Dios mu feyentuqueingün tañi feipingeel meu müten. “Müte quimlaingün” piqueingün. Huelu femngechi femquelai pu rüf feyentuquelu Ngünechen mu (papeltunge Hebreos 11:1, TNM). Biblia feipi pu feyentuquelu Chau Dios mu fente cüme quimnieingün ñi mülen ta Jehová, Jesús ca Chau Dios tañi Gobierno, pengequenolu rume (Heb. 11:3, TNM). Quiñe cientifico testigongerpulu, feipi: “Iñchiñ pu poyequefilu ta Jehová, feyentuquelaiñ Jehová mu taiñ feipingeel mu müten ca ngüneduamqueiñ ñi feipin tati ciencia”.

5. ¿Chumngelu fentren che feyentuquelai Chau Dios taiñ deumaeteu?

⁵ Fillque dungu ñi mülen cüme quimfalcünui Jehová ñi deumafiel com mülelu. Felefulu rume, ¿chumngelu fentren che feyentuquelai Chau Dios mu? Quisu engün am cüme ngüneduamnofilu Jehová tañi deumael ca Biblia ñi feipin no rume. Inaduamaiñ ñi feipin taiñ peñi Roberto. Fei feipi: “Colegio mu turpu enseñalngequelafuiñ Chau Dios ñi deumafiel com tati mülelu, feimu iñche feyentuquelafun. 20 tripantu nielu hula iñche, nütramcaeneu epu Dunguquelu Ineingen Jehová. Fei hula quimürpun Biblia ñi feipiel Jehová ñi deumafiel com tati mülelu” * (inaduamnge ti huichulechi dungu “ Quiñe falin dungu ñi loncontucual tati pu chau”).

6. ¿Chemu quiñeque che feyentuquelai Chau Dios taiñ deumaeteu?

 ⁶ Quiñeque che feipiquei: “Iñche feyentuquen tañi pequeel meu müten, feimu feyentuquelan Chau Dios mu”. Felefulu rume, quiñeque mu feyentuqueingün tañi pequenoel engün. Por ejemplo, feyentuqueingün tati cürüf meu. Pengequelafui rume, huelu quimfali ñi mülen. Fei ca femngechi pu feyentuquelu Ngünechen mu maneluuquei ñi mülen ta Dios. ¿Chumngelu? Pengenolu rume ta Chau Dios, quimfali tañi mülen (Heb. 11:1). Duamnieiñ tiempo taiñ quisutu ngüneduamal ñi rüf mülepen mai ta Chau Dios. Huelu pütrüquen che cüdautuquei ñi femal tüfa. Quiñe che ngüneduamnole ñi rüf mülepen mai ta Chau Dios, turpu feyentulayai.

7. ¿Com pu che nielu educacion feyentuquelai ñi mülen Chau Dios? ¿Chumngelu?

⁷ Quiñeque cientifico ngüneduamingün Chau Dios ñi deumael ca Biblia ñi feipin,  fei feyenturpuingün. * Roberto reque, quiñeque cientifico universidad mu enseñangequelafuingün Chau Dios ñi deumafiel com ti mülelu, feimu feyentuquelafuingün. Femfulu rume, fentren cientifico quimürpufingün ca piuqueyerpufingün ta Jehová. Chumten educacion niefuliyiñ rume, feitachi pu cientifico reque iñchiñ ca duamnieiñ taiñ doi nehuentuleal taiñ feyentulen ta Jehová mu. Inei no rume femlayafui tüfa iñchiñ mu.

8, 9. 1) ¿Chem ramtun inaduamaiñ? 2) Ngüneduamfilmi ta Jehová tañi deumael, ¿chumngechi quelluafeimu?

⁸ ¿Chumafuimi tami nehuentuleal eimi tami feyentulen ta Jehová mu? Peafiyiñ meli dungu.

⁹ Estudiayafimi Jehová tañi deumael. Eimi cüme ngüneduamfilmi tati pu culliñ, ti anümca ca pu huangülen, doi nehuentuleaimi tami feyentulen Chau Dios mu (Sal. 19:1; Is. 40:26). Doi estudiafilmi, doi maneluhuaimi Jehová taiñ deumaeteu. Taiñ fillque publicacion mu, quiñeque mu ngüneduamngequei Jehová tañi deumael. Huelu “feitachi publicacion nehue entendequelafiñ” piafuimi chi. Cüdaungefule rume, eluunge tami papeltuafiel tami doi quimürpual. ¿Ca chumafuimi? Rupachi tripantu mu taiñ fütraque trahun mu, tripai fillque video nütramcalu Jehová ñi deumael mu. Eimi huiño petuafuimi feitachi video taiñ pagina jw.org mu.

10. ¿Chemu feipiafuiñ Chau Dios ñi deumafiel com ti mülelu? (Romanos 1:20).

¹⁰ Ngüneduamfilmi com ñi deumael ta Jehová, raquiduamnge chem quimeltuafeimu Jehová ñi chumngen mu (papeltunge Romanos 1:20). Por ejemplo, tati antü cüdetuqueiñmu ca eñumalqueiñmu feimu mülei ta mongen ta Mapu meu. Huelu tati antü meu ca tripaquei rayos ultravioleta. Tüfa huesalcayafeiñmu. Cuñihun-ngefule rume, huelu cuñiutucungequeiñ. ¿Chumngechi? Tati Mapu hualloñmanieyu tati capa de ozono, tüfa quiñe escudo reque felei. Feimu tati rayos ultravioleta doi alün-ngerpule, ca femngechi tati gas ozono pingelu doi alün-ngerpuquei, femngechi taiñ cuñiutucuaeteu. ¡Afmatufali! Fei ¿chem pimi cai? ¿Mülepei mai quiñe Ngünechen taiñ deumaeteu müna piuqueyechefengelu ca fütra quimün nielu?

11. ¿Cheu peafuimi fillque publicacion nütramcalu Jehová ñi deumael mu? (Inaduamnge ti huichulechi dungu “ Fillque quellu tami doi feyentual Chau Dios mu”).

¹¹ Taiñ pagina internet jw.org mu, peafuimi fillque publicacion ca video nütramcalu Jehová ñi deumael mu. Com fei ta nehuentucuqueiñmu taiñ feyentuleal Jehová mu. Peafuimi tati troquiñ feipilelu “Fillque mongen deumangelu”. Fei mu peaimi mufüque video nütramcalu Jehová ñi deumael mu (amunge ta CHEM TAIÑ ENTUEL > FILLQUE VIDEO > TATI BIBLIA). Ca peafuimi quiñe troquiñ tripalu ¡Tami quimafel! pingechi revista mu septiembre 2006 tripantu mu. Feichi troquiñ feipilei “¿Chem quimeltuqueiñmu pu culliñ ca pu üñüm?” (amunge ta CHEM TAIÑ ENTUEL > FILLQUE CHILLCA). Fei mu peaimi chumngechi pu cientifico inayentuquefi Jehová ñi deumael mu.

12. Estudiamequefilmi ta Biblia, ¿chumafuimi?

¹² Papeltuafuimi ta Biblia. Feichi cientifico taiñ nütramcapeel parrafo 4 mu,  pürüm feyentufemlai ñi mülen quiñe Ngünechen. Huelu rupachi antü mu, feyenturpui Jehová mu. Fei feipi: “Iñche feyenturpulan tañi estudiafiel mu ta ciencia müten, huelu mai tañi papeltufiel mu ta Biblia” pi. Eimi deu quimniepelafimi ñi chem pin ta Biblia. Huelu mülei tami papeltunierpuafiel müten, femngechi tami doi feyentuleal Jehová mu (Jos. 1:8; Sal. 119:97). Feimu estudiamequefilmi ta Biblia, ¿chumafuimi? Raquiduamnge chumngechi ta Biblia mu cüme huirintucucünungei com ñi rupan fütra cuifi mu. Ca raquiduamnge com ñi feipicünungeel Biblia mu huechutriparpui. Ca inaduamafuimi com pu huirintuculu ta Biblia quiñeucülefuingün tañi feipin mu. Femülmi com tüfa, doi maneluhuaimi Jehová mu ca doi feyentuleaimi Biblia ñi cüpan Chau Dios mu * (2 Tim. 3:14; 2 Ped. 1:21).

13. ¿Chumngelu feipiafuiñ Biblia mu mülei cümeque ngülam?

¹³ Papeltufiel mu ta Biblia, inaduamnge fente falin-ngei tañi cümeque ngülam. Por ejemplo, fütra cuifi meu Biblia feipi iñchiñ diñmatufiliyiñ ta plata, müna cutrancayafeiñmu (1 Tim. 6:9, 10; Prov. 28:20; Mat. 6:24). Fantepu mu, ¿rüfngepei mai Biblia ñi feipin? Quiñe lifru nütramcalu ñi chumlen ta pu che ta fachantü feipi: “Epe com pu che feipiquelu ‘rume falin-ngei nieal ta plata’ rume hueñancülequeingün. Cafei pu doyümfilu plata tañi mongen mu, rüf ayüucülelaingün ca contupaqueyu fill cutran”. Feimu Biblia tañi ngülam cümei llemai. Eimi ca raquiduamafuimi caquelu cümeque ngülam Biblia tami quellueteu. Doi falintufiliyiñ Biblia tañi ngülam, doi maneluhuaiñ Jehová tañi fütra quimün meu (Sant. 1:5). Ca femngechi doi ayüucüleaiñ (Is. 48:17, 18).

14. Estudiafilmi ta Biblia, ¿chem quimafuimi Jehová mu?

¹⁴ Chillcatuafimi ta Biblia tami doi quimafiel ta Jehová (Juan 17:3). Femngechi quimürpuaimi Jehová ñi chumngen. Tüfa quelluaimu tami quimal ñi rüf mülen ta Chau Dios (Éx. 34:6, 7; Sal. 145:8, 9). Doi quimürpufilmi ta Jehová, doi feyentuleaimi ta quisu meu, doi piuqueyerpuafimi ca doi cüme hueniyerpuafimi.

15. Nütramcafilmi Biblia caquelu che engün, ¿chumngechi quelluafeimu?

¹⁵ Nütramcayafimi ta caquelu pu che tami quimürpuel Biblia mu, femngechi doi feyentuleaimi Chau Dios mu. Huelu quiñe che feipiafeimu: “Iñche feyentuquelan Chau Dios mu”, fei quimlayafuimi chi chumngechi tami lloudunguafiel. Fei ¿chumafuimi? Cüme pepicahuaimi, fei inaduamafuimi ñi chem pin taiñ fillque publicacion (1 Ped. 3:15). Ca quintuafuimi caquelu peñi cam lamngen tami quelluaeteu, fei hula nütramcayafuimi tati che. Cüme allcütunoelmu rume tati che, eimi doi cüme pepicaucülerpuaimi. Cafei doi feyentuleaimi Jehová mu ca hueluraquiduamel-layaimu ñi feipin tati pu che feyentuquenolu Chau Dios mu.

16. Nehuentu feyentunoliyiñ Jehová mu, ¿chem dungu mu rupayafuiñ?

¹⁶ Tunten tripantu yenieliyiñ rume taiñ cüdahuelquefiel ta Jehová, com iñchiñ mülei taiñ nehuentu feyentuleal Chau Jehová mu. ¿Chumngelu? Cuñiutucuunoliyiñ, taiñ feyentun nehuen-ngehuelayafui.  Iñchiñ fente cüme quimnieiñ ñi mülen ta Chau Dios, feimu feyentuleiñ quisu mu, pengenole rume. Huelu loncontucuaiñ, taiñ pequenofiel pürüm ngoimayafuiñ. Feimu tati apostol Pablo feipi iñchiñ feyentufemhuelayafuiñ Chau Dios mu (Heb. 12:1, TNM). Feimu, ¿chem mülei taiñ femal taiñ nehuentu maneluucüleal Jehová mu? Peafiyiñ (2 Tes. 1:3).

17. ¿Chem quelluafeiñmu taiñ nehuentu feyentuleal Jehová mu?

¹⁷ Quiñe, müchaique llellipuafiyiñ Jehová taiñ eluaeteu ñi nehuen. ¿Chumngelu? Jehová tañi nehuen quelluaiñmu taiñ doi feyentuleal quisu meu (Gál. 5:22, 23, TNM). Nienoliyiñ Jehová tañi nehuen, nehuentu feyentulayafuiñ Dios mu. Fentecünunoliyiñ taiñ llellipufiel, Jehová elunieaiñmu tañi nehuen (Luc. 11:13). Feipiafuiñ ta Jehová: ‘Elumuiñ taiñ doi feyentuleal’ (Luc. 17:5).

18. Ñi feipin Salmo 1:2, 3, ¿chem cüme yehun am llohuiyiñ?

¹⁸ Epu, fill antü papeltuafiyiñ ca chillcatuafiyiñ Biblia (papeltunge Salmo 1:2, 3). Huirintucungelu tüfachi salmo, pichin israelita müten niequefuingün tati ley ñi papeltuafiel. Huelu ti pu reyes ca pu sacerdote niefuingün tati ley ñi papeltuafiel. Regleque tripantu mu, “pu huentru, pu domo, pu pichiqueche ca tati catripanche” mülelu Israel mu trahuluuquefuingün ñi allcütuafiel ti papeltun ti ley dungu (Deut. 31:10-12). Jesús ñi antü meu pichin che müten niequefui Chau Dios ñi huirintucuel. Caquelu huirintucun ellcalefui tati sinagoga meu. Huelu fachantü epe com pu che papeltuafui quiñeque troquiñ Biblia mu cam com rume. Tüfa ta rume falin-ngechi yehun.

19. ¿Chumafuiñ taiñ nehuentu feyentuleal Jehová mu?

¹⁹ Fill antü papeltufiliyiñ Biblia, pengelaiñ fente taiñ falintufiel. Mülei taiñ adcünual taiñ tiempo taiñ papeltuafiel ca estudiayafiel Biblia. “Nieli tiempo müten papeltuafiñ” pilayaiñ. Fentecünunoliyiñ taiñ papeltuafiel Biblia, nehuentu feyentuleaiñ Jehová mu.

20. ¿Chem eluucüleaiñ taiñ femal?

²⁰ Iñchiñ trürcülelaiñ tati “pu mallmangelu ca quimcahun-ngelu” (Mat. 11:25, 26). Doi mai, iñchiñ nieiñ ta feyentun Jehová mu, Biblia ñi quellun meu. Biblia quimeltuqueiñmu chumngelu am fente ñi huesalcalen ti dungu Mapu mu ca quimeltuqueiñmu chem ñi femal ta Jehová cüpalechi antü meu. Feimu eluucüleaiñ taiñ nehuentu feyentuleal Jehová mu. Ca femngechi quelluafiyiñ fentrenque che ñi feyentulerpual Jehová taiñ deumaeteu mu (1 Tim. 2:3, 4). Raquiduamcüleaiñ com ti cümeque dungu ñi rupayal cüpalechi antü meu. Com pu che mülealu Mapu mu püramyeafingün ta Jehová ca feipiafingün: ‘¡Felei tami llohual com cüme püramyen, eimi am deumafilu ta com tati mülelu!’ (Apoc. 4:11).