1. Nütramcaliyiñ chumngechi taiñ poyerpufiel Jehová, ¿chumngechi quelluafeiñmu?

 ¿CHUMNGECHI am ta Dunguquelu Ineingen Jehová ngerpuimi? Femngechi ramtuquefiyiñ taiñ pu peñi ca pu lamngen taiñ doi cüme quimafiel. Iñchiñ ayüuqueiñ tañi nütramcaeteu engün chumngechi ñi quimürpufiel ca piuqueyerpufiel ta Jehová. Ca iñchiñ nütramcaquefiyiñ chumngelu taiñ falintuquefiel taiñ Dunguquelu Ineingen Jehová (Rom. 1:11). Femngechi nütramcan mu quelluqueiñmu taiñ doi falintuafiel Dunguquelu Ineingen Jehová ngeal. Tüfa ca quelluqueiñmu taiñ cüme yenieal taiñ mongen chumngechi ñi ayüqueel Jehová, femngechi taiñ cüme hueniyeafiel (3 Juan 4).

2. ¿Chem peaiñ tüfachi troquiñ mu?

² Tüfachi troquiñ mu peaiñ chemu fente falintuquefiyiñ Biblia ñi rüf dungu. Ca peaiñ chumngechi pengelafuiñ taiñ falintuniefiel. Tüfachi troquiñ ca quelluaiñmu taiñ doi mañumtunieafiel ta Jehová taiñ cüpaleteu quisu ñi troquiñche mu (Juan 6:44). Cafei doi eluucüleaiñ taiñ quimeltucheal Biblia ñi rüf dungu.

3. ¿Chumngelu fente falintuquefiyiñ Biblia ñi rüf dungu?

³ Jehová mu cüpai ti rüf dungu. Iñchiñ piuqueyequefiyiñ ta Jehová, feimu fente falintuquefiyiñ ti rüf dungu.  Biblia mu quimürpuiñ ta Chau Jehová fei tati com nehuen nielu, deumalu ta huenu ca ti mapu. Huelu ca femngechi quimürpuiñ Chau Jehová duamtuqueiñmu quiñe cüme Chau reque (1 Ped. 5:7). Ca quimürpuiñ Chau Dios ‘cutranduamyechequei, cutranpiuqueyechequei, lladcüfemquelai, rume piuqueyechequei ca rüfngei’ (Éx. 34:6). Jehová ca norngei (Is. 61:8). Ca quimiyiñ peeteu mu taiñ cutrancauquen, Jehová ca cutrancauquei. Quisu rume ayüniefui ñi acual feichi antü tañi apümcayafiel com taiñ cutrancaqueteu (Jer. 29:11). Ca femngechi esperaniefiyiñ ñi acual feichi antü, feimu ta fente piuqueyequefiyiñ ta Jehová.

4, 5. ¿Chumngelu am ti apostol Pablo trürümfi taiñ maneluhun quiñe ancla mu?

⁴ Biblia ñi rüf dungu cümelcaqueiñmu, feimu rume falintuquefiyiñ. Biblia ñi rüf dungu eluqueiñmu maneluhun. Ti apostol Pablo feipi feitachi maneluhun müna fali. Quisu feipi: “Fei tüfachi maneluhun elueiñmeu nehuen taiñ mongen meu, chumngechi tati fane fütra fieru queltahuengelu ti farcu tañi amuconnoal” (Heb. 6:19). Quiñe farcu nülcücunungequei quiñe ancla mu ñi amunoal cañpüle. Taiñ maneluhun taiñ eluqueteu Biblia, feitachi ancla reque felei. Rupaliyiñ huesaque dungu mu, taiñ maneluhun quelluqueiñmu taiñ tüngcüleal.

⁵ Tüfa mu Pablo nütramcai ti maneluhun ñi nieel pu dullin cristiano tañi amual huenu mu. Huelu caquelu pu cristiano nielu ti maneluhun ñi rumel müleal mapu mu ca yafültucuafeyu ñi feipin Pablo (Juan 3:16). Feitachi maneluhun quelluqueiñmu taiñ ayüucüleal famülque mu.

6, 7. Yvonne, ¿chumngechi quellueyu ñi quimürpufiel Biblia ñi rüf dungu?

⁶ Peaiñ ñi rupan quiñe lamngen Yvonne pingelu. Pichicalu taiñ lamngen llicaquefui tañi layal. Tañi chau ca ñi ñuque testigongelafui, feimu quimeltuquelafeyu ti rüf dungu. Quiñe rupa, taiñ lamngen papeltui quiñe dungu huirintuculelu feipilelu: “Quiñe antü mu ngehuelayai mongen”. Taiñ lamngen feipi: “Feitachi dungu tañi peel umautulhuequelaeneu. Re raquiduamcülequefun chem ñi rupayal cüpalechi antü meu. Iñche ramtuuquefun: ‘¿Chumngelu am elungeiñ mongen? ¿Taiñ mongeleal pichin müten?’. Iñche ayüquelafun tañi layal”.

⁷ Rupachi antü mu, huechengelu ta Yvonne, quimfi tati pu Dunguquelu Ineingen Jehová. Quisu feipi: “Feyenturpun tañi afnoachi mongen ñi nierpual”. Taiñ lamngen, ¿chumngechi quellueyu tañi quimürpufiel Biblia ñi quimeltun? Fei feipi: “Raquiduamcülehuelan chem ñi rupayal ta cüpalechi antü meu ca llicalehuequelan tañi layal, fei doi cüme umautuquen”. Taiñ lamngen rume falintuquefi Biblia ñi rüf dungu ca ayühunquechi dunguquefi ta caquelu ti maneluhun-ngechi dungu mülelu Biblia mu (1 Tim. 4:16).

8, 9. 1) Ti huentru ñi feipiel ta Jesús, ¿tunte falintufi ti falin chemcün ñi peel? 2) ¿Iñchiñ cai? ¿Tunte falintuquefiyiñ Biblia ñi rüf dungu?

⁸ Biblia ca nütramcai Chau Dios ñi Gobierno mu. Jesús trürümfi Chau Dios ñi ngünenietual mapu ta quiñe falin chemcün reque lelfün meu ellcalelu. Jesús feipi: ‘Chau Dios ñi Gobierno quiñe ellcalechi falin chemcün reque felei mülelu quiñe lelfün meu. Quiñe huentru pei tati ellcalechi falin chemcün,  ca ellcacünutufi ca tüfei meu. Fei rume ayühunquechi amutui ca fendei com tañi nieel, fei ngillafi tati mapu’ (Mat. 13:44). Ti huentru quintuyahulquelafui feitachi falin chemcün, perumefi. Huelu pefilu, eli com tañi niefel tañi ngillayafiel. Quimniefui tañi rume falin-ngen. Ti huentru mu feitachi falin chemcün chem mu no rume trürümfal-lai.

⁹ Iñchiñ ca falintuquefiyiñ Biblia tañi rüf dungu. Iñchiñ rume ayüucüleiñ taiñ serfiquefiel Jehová fachantü ca taiñ nieal rumel mongen ngünenietule ta Chau Dios ti mapu. Chem no rume trürümfal-lafui ta tüfa mu. Cafei taiñ hueniyefiel Jehová chem dungu mu rume trürümfal-lai taiñ elcünuel. Iñchiñ cüpa ayühuelquefiyiñ ta Jehová com dungu meu (Col. 1:10).

10, 11. Taiñ peñi Michael, ¿chumngelu cüme elcünutui ñi mongen?

¹⁰ Fentrenque iñchiñ elcünuquefiyiñ ti dungu taiñ ayüquefel, doyümfiyiñ taiñ hueniyerpuafiel Jehová. Quiñeque iñchiñ elcünuiñ ti universidad. Ca quiñeque iñchiñ quintuyahulhuelafiyiñ fentren plata taiñ nieal. Cafei quiñeque iñchiñ quimürpufilu Jehová ñi dungu cüme elcünutuiñ taiñ mongen. Femngechi femi taiñ peñi Michael. Pichicalu, tañi chau ca ñi ñuque testigongelafui. Huechengelu pepicangei tañi quehuatufengeal. Taiñ peñi rume nehuen-ngechi huentru troquiuquefui, feimu mallmauquefui tañi femngen. Raquiduamquefui turpu tañi hueungenoal. Huelu enseñalngelu Biblia ñi feipin, quimürpui Jehová üdequefi com tati ayüquelu ti quehuatun dungu (Sal. 11:5). Michael feipi: “Pu testigo tañi enseñaleteu Biblia turpu feipiquelaeneu tañi coneltuhuenoal quehuatun dungu mu, huelu mai quimeltuqueneu müten Biblia tañi rüf dungu”. 

¹¹ Michael doi quimfilu ta Jehová, doi piuqueyerpufi. Ngüneduami Jehová ñi cutranpiuqueyefiel tañi pu che, tüfa puhui ñi piuque mu. Rupachi antü mu, fei Michael quimürpui tañi cüme elcünutual tañi mongen. Michael feipi: “Duamniefun tañi coneltuhuenoal quehuatun dungu mu. Rume cüdaungeafui tañi femal, huelu femli ayühuelafiñ Jehová. Tañi serfiafiel Jehová doi cüme dungu tañi femal”. Michael falinturpufi Biblia ñi rüf dungu, feimu cüme elcünutui tañi mongen (Sant. 1:25).

12, 13. Mayli, ¿chumngechi quellueyu Biblia ñi rüf dungu?

¹² Biblia ñi rüf dungu rume falin-ngei, feimu trürümngei quiñe cüdetuhue mu huilüfcülelu dumiñ mu (Sal. 119:105; Efes. 5:8). Taiñ lamngen Mayli, mülelu Azerbaiyán mapu mu, rume falintufi Biblia ñi feipin. Tañi chau musulman-ngefui ca tañi ñuque judiangefui. Mayli feipi: “Rumel feyentuquefun tañi mülen ta Chau Dios, huelu ramtuuquefun: ‘¿Chumngelu am ta deumaeiñmu? ¿Felepei mai taiñ cutrancaucüleal com taiñ mongen mu ca taiñ doi sufrial infierno mu?’. Pu che feipiquei Chau Dios ñi duam mu ruparupangei huesaque dungu, feimu ramtuuquefun: ‘Chau Dios, ¿ngüneniepefi mai com pu che ca ayüquepei mai taiñ cutrancaucüleal?’”.

¹³ Mayli ayüfui ñi huiñoldungungeal com tañi ramtuuqueel. Rupachi antü mu eluhui ñi enseñalngeal Biblia ca Dunguquelu Ineingen Jehová ngerpui. Taiñ lamngen feipi: “Biblia ñi feipin quelluqueneu tañi cüme feleal”. Mayli reque,  iñchiñ püramyequefiyiñ ta Chau Jehová. Quisu mangeleiñmu taiñ ‘tripatual dumiñ meu femngechi taiñ mületual quisu ñi afmatufal pelon meu’ (1 Ped. 2:9).

14. ¿Chumafuimi tami doi falinturpuafiel Biblia ñi rüf dungu? (Inaduamnge ti huichulechi dungu “ ¿Ca chem mu trürümngeafui Biblia ñi rüf dungu?”).

¹⁴ Felei llemai, chumngechi ñi trürümngeel Biblia ñi rüf dungu pengeli ñi fente falin-ngen. ¿Chumafuimi tami doi falinturpuafiel Biblia ñi rüf dungu? Quisu papeltulmi Biblia tami ruca mu, raquiduamafuimi chem pengeli fente falin-ngen Biblia ñi rüf dungu. Doi falintufilmi Biblia ñi rüf dungu, tami femün meu quimfalcünungeai tüfa.

15. ¿Chumngechi pengelafuiñ taiñ falintuniefiel Biblia ñi rüf dungu?

¹⁵ Fill antü papeltuliyiñ Biblia ca taiñ fillque publicacion, pengelaiñ taiñ falintuquefiel Biblia ñi rüf dungu. Com iñchiñ doi quimürpuqueiñ Biblia ñi rüf dungu, tunten tripantu yenieliyiñ rume taiñ testigongen. Fütra cuifi mu, tüfachi revista feipi: “Fentren coilaque dungu mülei tüfachi mapu mu, feimu cüdautuafuiñ  taiñ quimal ti rüf dungu. Ayüliyiñ taiñ quimafiel, mülei taiñ rume cüdahual. Rumel eluucüleaiñ taiñ doi cüme quimafiel ti rüf dungu”. Cüdaungeafui taiñ estudiayal Biblia, huelu femliyiñ müna quelluafeiñmu.

16. Eimi, ¿chumngechi papeltuqueimi Biblia ca chumngechi quelluqueimu? (Proverbios 2:4-6).

¹⁶ Com che ayüquelai tañi papeltual, huelu Jehová mangeleiñmu taiñ quintunieafiel ti rüf dungu Biblia mu mülelu (papeltunge Proverbios 2:4-6). Femliyiñ tüfa, cümelcayaiñmu. Peafiyiñ ñi femquen quiñe peñi Corey pingelu. Papeltun mu Biblia, taiñ peñi cüme ngüneduamquefi caque quiñeque versiculo. Taiñ peñi feipi: “Com papeltuquefiñ ti pichique nota tripalu ca cüme papeltuquefiñ caquelu texto nüucülelu feichi versiculo mu. Femngechi quimeltuqueneu fentren cümeque dungu tañi papeltun mu”. Elcünuliyiñ tiempo taiñ cüme papeltuafiel Biblia, pengelaiñ taiñ falintuquefiel ti rüf dungu Biblia mu mülelu (Sal. 1:1-3).

17. ¿Chumngechi quimtucunieafuiñ taiñ inaniefiel ti rüf dungu? (Santiago 1:25).

¹⁷ Re papeltulayafiyiñ müten ti rüf dungu Biblia mu mülelu, ca mülei taiñ inayafiel. Femliyiñ, doi quelluaiñmu ca doi ayühuelaiñmu (papeltunge Santiago 1:25). ¿Chumngechi quimtucunieafuiñ taiñ inanieafiel ti rüf dungu? Mülei taiñ ramtuhual: “Tañi quimürpuel Biblia mu, ¿inaniepefiñ mai tañi mongen mu? ¿Doi cüme inapeafun mai Biblia ñi feipin?”. Apostol Pablo feipi: ‘Mülei taiñ inayafiel taiñ mongen meu ti rüfngechi dungu taiñ deu adümel’ (Filip. 3:16).

18. ¿Chumngelu eluucüleiñ taiñ miyahual ti rüf dungu meu?

¹⁸ Iñchiñ com taiñ nehuen mu cüdaucüleaiñ taiñ miyahual ti rüfngechi dungu mu. Femngechi femliyiñ, ayüucüleaiñ ca femngechi ayühuelmayafiyiñ ñi piuque ta Jehová ca taiñ pu peñi ca pu lamngen (Prov. 27:11; 3 Juan 4). Feimu, rume falintuquefiyiñ taiñ Dunguquelu Ineingen Jehová ngeal ca inaniefiyiñ ti rüf dungu Biblia mu mülelu.