Ellaca mu, Jehová feipifi pu che “apolfimün ta mapu ca quisu ngünetunieafimün”. Tüfa pengeli com mapu ñi ayüfal mapungeal (Gén. 1:28). Com che rumel mülele tüfachi mapu mu, mülei ñi fementurpual ñi feipicünuel ta Jehová. Feula ñamün mu ti jardin de Edén, müleai fütra cüdau ñi cüme elngetual ta mapu. Deu rupale Armagedón, fütra cüdau müleai ñi liftungetual com mapu. ¡Fentren cüdau müleai!

Ca femngechi pu Israel che huiñomelu Babilonia mu, 70 tripantu huellilehuelu ñi mapu engün, fütra cüdau eluhuingün ñi liftuafiel tañi mapu Jerusalén huaria mu. Huelu Jehová quellueyu engün. Isaías feipicünui Jehová “tañi huellin mapu Edén reque elcünutuafi ca tañi laf mapu Jehová ñi jardin reque feletuai” (Is. 51:3).  Pu Israel che adelcacünutui tañi mapu, ca femngechi Jehová quelluafi pu che mülealu mapu mu ñi cüme adelcacünutuafiel ti mapu. Huelu famülque mu, pengelcünuafuiñ taiñ eluucülen ñi cüdahual. ¿Chumngechi femafuiñ?

Femafuiñ fillque cüdau: liftuaiñ quisu taiñ ruca ca taiñ huallontu taiñ pu carucatu femquenole rume. Quelluntucuafuiñ ñi liftungeal ca cüme elcünutual ti Trahunhue Ruca ca Fütraque Trahunhue Ruca, ca quelluntucuafuiñ taiñ pu peñi, pu lamngen huesaque dungu mu rupaquelu. Femngechi pengelaiñ taiñ ayüuquen quelluntucual pu duamnielu quellu. Eimi adümafuimi chi quiñeque falin cüdau femngechi tami quelluconal elungelmi tami rumel mongeleal mapu meu.

Jesús huiñomongeltufilu Jairo ñi ñahue feipi elungepe iyael tati pichi malen (Mar. 5:42, 43). Müte cüdaungelai ñi dapingeal mari epu tripantungechi pichi malen, huelu fütra cüdau nieaiñ Jesús huiñomongeltufile “com tati pu che mülelu rüngan eltun mu” (Juan 5:28, 29). Biblia com feipilai ñi chumleal ti dungu, huelu duamniengeai iyael, ruca ca tacun com tati huiñomongetulu. ¿Chumngechi pengelafuimi feula tami eluucülen ñi quelluconal? Peafiyiñ.

Tami Trahunhue Ruca mu cüpale ti huitran-ngepaquechi loncolelu, eimi ¿mangelquefimi tami ruca mu? Cheu tami mülen, quiñe betelita fentepuule ñi cüdau Betel mu cam tati huitran-ngepaquechi loncolelu fentepuule ñi cüdau, eimi ¿quelluafuimi ñi quintual ruca ñi müleam? Ca mülele quiñe fütra trahun cheu tami mülen mu, ¿ayüleafuimi tami quelluconal petu ñi mülenon ca deu ñi mülemum? ¿Llohuafuimi cañpüle cüpachi huitran? Femngechi femülmi, pengelaimi tami pepicaucülen ñi quellual ti hue mapu mu.

Ñi feipin Hechos 24:15, fentren millonqueche huiñomongetuai. Fentren engün quimlafingün ta Jehová petu ñi lanon, hue mapu mu hula quimafingün ta Chau Ngünechen. a ¿Inei engün am quimeltuaeyu engün? Fentren tripantu yenielu ñi serfiquefiel Jehová (Is. 11:9). Quiñe lamngen Charlotte pingelu, amuldunguquefui fentren mapu mu: Europa, Sudamérica ca África mapu mu. Quisu ayülen mu feipi: “Rume ayüucülen ñi quimeltuafiel pu mongetualu. Papeltufiyum cuifique che ñi mongen, doi cümeafui quimquefile Jehová engün. Iñche rume ayüucülen ñi nütramcalelafiel Jehová mu engün, femngechi ñi doi cüme mongen nietual engün”.

Cuifique poyequefilu Jehová petu ñi acunon Jesús mapu mu ca müleai ñi quimeltungeal engün. Rume afmatufalai ñi nütramcangeal ta Daniel. Rume ayühun-ngeai feipiafiel chumngechi ñi huechurpun tañi huirintucuelchi profecia (Dan. 12:8). Ca mülei ñi quimeltungeal Noemí engu Rut quisu engu mu ñi tuhun ti Mesías. Rume ayühun-ngeai quimeltulelafiel pu che huall mapu mu Jehová ñi cüpachi cümeque dungu. Feichi mu, ngehuelayai huesaque dungu, feimu ayühunquechi quimeltuafiyiñ com pu che.

¿Chumngechi pengelcünuaiñ taiñ pepicaucülen ñi quimeltulelafiel pu huiñomongetulu? Feula eluhuaiñ taiñ doi cüme quimeltuchefengeal ca taiñ amuldungual (Mat. 24:14). Huelu eimi füchanlehueimi chi cam cutranchengehueimi chi cam rupaqueimi chi fill huesaque dungu mu, feimu fente amuldunguhuelaimi. Huelu com piuque mu amuldungulmi feula, pengelaimi tami pepicaucülen ñi quimeltulelafiel pu huiñomongetulu.

¿Rüf ayüleimi tami rumel mongeleal tüfachi mapu meu? ¿Ayülimi tami cüme adcületual tüfachi mapu? ¿Eluucüleimi tami quelluafiel ca quimeltuafiel com pu huiñomongetulu? Feula eluucüleaiñ taiñ cüdahual, femngechi pengelaiñ taiñ pepicaucülen ñi rumel mongeleal.