Pu papeltuquelu ñi ramtuqueel
Salmo 61:8 mu David feipi ñi püramyeafiel Chau Dios ñi üi “rumel mu”, ¿raquiduampei mai David turpu tañi lanoal?
Femngechi raquiduamlai ta David, ñi feipin rüfngei.
Peafiyiñ ñi huirintucuel David tüfachi texto mu ca caquelu mu: “Ülcantun mu püramyeafiñ tami üi rumel mu, tañi femürpual ñi eldungucünuel fill antü”, “fampüramqueyu com tañi piuque mu, ahuem Chau Jehová. Com tañi mongen mu püramyeñmayayu tami üi”, “püramyeñmayayu tami üi rumel mu” (Sal. 61:8; 86:12; 145:1, 2).
David raquiduamlai turpu tañi lanoal. David quimniefui pu che laquei ñi culpan chengen mu, quisu ca culpafe chengefui (Gén. 3:3, 17-19; Sal. 51:4, 5). Ca quimniefui quiñeque huentru ñi poyequefiel Chau Dios ca larpuingün, quiñeque tüfa Abrahán, Isaac, Jacob. Feimu David quimniefui chem antü mu rume tañi larumeafel (Sal. 37:25; 39:4). Huelu David ñi feipin Salmo 61:8 pengeli com ñi mongen mu ñi püramyeafiel Chau Dios, lale hula ñi femhuenoal (2 Sam. 7:12).
Ti Salmo 18, 51 ca 52 mu, David nütramcai com tañi rupan ñi mongen mu. Ti Salmo 23 mu, David feipi Jehová mu quiñe camañfe reque adniequefi ca cuidaquei tañi pu che, feimu ayülefui ñi cüdahuelafiel ta Jehová “com tañi mongen meu” (Sal. 23:6).
Loncontucunieaiñ Jehová elufi ñi nehuen ta David com feichi dungu ñi huirintucuafiel. Quiñeque dungu ñi huirintucuel ta David, profeciangerpui. Ti Salmo 110 mu, David feipi ti Ñidol ñi anücünuhual Chau Dios ñi man püle huenu mu ca ñi elungeal fentren nehuen. ¿Chumal tüfa? Tañi apümafiel com caiñetuquefilu ta Chau Dios. Tüfachi Ñidol, Jesús, tuhui David mu, rumel ñi ngünenieafiel ti mapu ca ñi sacerdotengeal (Sal. 110:1-6). Jesús nütramcai tüfachi profecia mu Salmo 110 ca feipi ñi femtripayal cüpalechi antü mu (Mat. 22:41-45).
Felei llemai, Jehová adcünufi ta David ñi huirintucual chem ñi rupamequen ca ñi rupayal cüpalechi antü meu. David huiñomongetule, rumel püramyeafi ta Jehová. Feimu ti Salmo 37:10, 11 ca 29 deu femtripai Israel che ñi antü mu, ca femngechi femtripayai Jehová femle tañi feipicünuel cüpalechi antü meu (pefinge parrafo 8 ti troquiñ “Trür müleayu ayüfalchi mapu meu” tüfachi revista mu).
Ti Salmo 61:8 ca caquelu versiculo pengeli David ayüniefui tañi püramyeafiel ta Jehová tunte puulu tañi mongen. Ca femngechi pengeli David ñi püramyeafiel ta Jehová huiñomongetule cüpalechi antü meu.
