1. Quiñe peñi cam quiñe lamngen ngillatufile Jehová ñi quellungeal, ¿chumngechi quelluquefi?

 QUIÑE peñi cam quiñe lamngen ngillatule tañi quellungeal, fei Jehová adnieafeiñmu iñchiñ taiñ quelluafiel. Loncolelu, quelluquelu, precursor cam publicadorngefuliyiñ rume, füchache, hueche, peñi cam lamngen, com iñchiñ quelluafuiñ ta caquelu. Feimu quiñe peñi cam quiñe lamngen duamle tañi quellungeal, fei Jehová pünequefi pu loncolelu ca ti trahunche tañi yafültucuafiel (Col. 4:11). Fei rupayahun mu quiñe huesa cutran, ruparumele quiñe fütra huesa dungu cam inacangele taiñ pu peñi ca pu lamngen, iñchiñ müna ayüucüleiñ taiñ quelluafiel engün.

2. Rupan mu quiñe huesa cutran, ¿chumngelu cüdautuafuiñ taiñ quelluhual?

² Rupan mu quiñe huesa cutran, cüdautuafuiñ taiñ quelluhual. Ayüliyiñ rume taiñ pemeafiel pu peñi ca pu lamngen cam taiñ mangelafiel taiñ ruca mu, cuñihun-ngeafui taiñ femal. Ayüafuiñ chi taiñ quelluafiel engün, huelu taiñ pu che ca cutrancüleafui. Femfule rume, huelu Jehová rume ayüuquei taiñ quellufiel mu taiñ pu peñi ca pu lamngen (Prov. 3:27; 19:17). Feimu, ¿chumngechi quelluafuiñ?

3. ¿Chem quimeltueiñmu tañi femün pu loncolelu Desi tañi trahunche mu? (Jeremías 23:4).

³ ¿Chumafui pu loncolelu? Eimi loncolelmi, cüme quimafimi pu peñi ca pu lamngen (papeltunge Jeremías 23:4). Rupachi troquiñ mu, inaduamiyiñ Desi ñi rupan. Quisu nütramcai chumquen pu loncolelu mülelu tañi troquiñche amuldunguquelu (grupo de predicación). Quisu feipi: “Pu loncolelu caque quiñeque iñchiñ compañqueiñmu taiñ amuldungual. Ca trahuqueiñ taiñ  cüme rupayal”. b Desi lai quiñeque ñi pu che ti pandemia ñi duam mu. Huelu ñi femün ti loncolelu petu ñi acunon ti pandemia, fei müte cüdautulaingün tañi quelluafiel ta Desi.

4. Pu loncolelu, ¿chumngechi quellufingün ta Desi? Fei, ¿chumafui pu loncolelu?

⁴ Desi feipi: “Pu loncolelu deu hueniyeuyequefiñ, feimu cüdautulan tañi feipiafiel tañi chumlen ca chem tañi duamnieel”. Fei eimün pu loncolelu, ¿chumafuimün? Cuidanieafimün ca hueniyeafimün pu peñi ca pu lamngen petu ñi rupanon quiñe huesa dungu. Acurumele quiñe huesa cutran, pepi pemelayafuimün chi pu peñi ca pu lamngen ñi ruca mu, huelu quintumün chumngechi tamün nütramcayafiel. Desi feipi: “Pu loncolelu mütrümqueneu, mandalqueneu mensaje, pengelelqueneu quiñeque texto mülelu Biblia mu. Cüme quimfilu rume feitachi texto, puhui ñi piuque mu”.

5. Pu loncolelu, ¿chumngechi quimafuingün chem ñi duamnieel pu peñi ca lamngen? Ca, ¿chumngechi quelluafuingün?

⁵ Eimün pu loncolelu, ¿chumafuimün tamün quimal chem duamniei pu peñi ca pu lamngen? Ramtuafimün quiñeque dungu, huelu yehuelcalayafimün (Prov. 20:5). Pu peñi, pu lamngen, ¿niepeingün mai iyael, lahuen ca chem tañi duamnieel? Quiñeque niehuelaingün chi ta cüdau, nielaingün chi ta plata tañi cullial tañi arriendo. Quiñeque duamnieingün chi ñi quellungeal, femngechi ñi quelluaeteu pu gobierno. Huesa rupalu Desi, tañi pu lamngen elueyu chem tañi duamnieel. Pu loncolelu ca quellueyu ñi fülconcüleal Jehová mu ca pengeleleyu tañi piuqueyenieteu engün. Desi feipi: “Pu loncolelu ngillatuquei iñche mu. Acordaquelan com tañi feipiel engün, huelu rume cüme duameleneu engün. Jehová feipieneu reque tañi quisulenon” (Is. 41:10, 13).

6. ¿Chumafui tati trahunche ñi quelluafiel pu peñi ca pu lamngen? (Inaduamnge ti adentun).

⁶ ¿Chumafui ti trahunche? Iñchiñ quimnieiñ tati pu loncolelu hunelu mu quelluquefingün tati pu peñi ca lamngen. Huelu Jehová feipiqueiñmu com taiñ quelluntucual ñi yafültucuafiel taiñ pu peñi, pu lamngen (Gál. 6:10). Pichin dungu mu rume quellufiliyiñ engün, rume yafültucuafuiñ. Tati pichiqueche  deumayafui chi quiñeque pichique dibujo tañi eluafiel. Pu huecheque che ca amuafui ñi ngillacalelmeafiel cam quelluntucuaingün ruca mu engün. Quiñeque deumalelafuingün chi iyael quiñe peñi, lamngen cutrancülelu ca elelmeafi tañi ruca mu. Rupan mu huesaque cutran mu, com duamnieiñ ñi yafültucungeal. Feimu doi cümeafui taiñ alüñmayal trahunhue ruca mu cam internet mu, femngechi taiñ doi nütramcahual taiñ pu peñi, pu lamngen iñchiñ. Tati pu loncolelu ca duamniefui tañi yafültucungeal engün. Mülen mu pandemia doi cüdau niequeingün, feimu quiñeque peñi, lamngen mandalelfingün pichique carta ñi mañumtuafiel. Feimu rume cümei taiñ ‘yafültucuniehual ca hueluquentu nehuentucuhual’ (1 Tes. 5:11).

7. Ruparumele quiñe huesa dungu, ¿chem rupayafui?

⁷ Ruparumele quiñe huesa dungu, huesalcaletuafui pu che ñi mongen. Ñamümafui chi tañi ruca ca com tañi nieel, ca layafui chi tañi pu che. Feitachi huesa dungu mu ca rupayafui taiñ pu peñi, pu lamngen. ¿Chumngechi quelluafuiñ?

8. ¿Chumafui pu loncolelu ca tati pu chau petu ñi rupanon quiñe huesa dungu?

⁸ ¿Chumafui pu loncolelu? Eimün pu loncolelu, quelluafuimün pu peñi pu lamngen ñi pepicaucüleal ruparumele quiñe huesa dungu. Ti trahunche mülei ñi quimal chem ñi chumal ruparumele quiñe huesa dungu, fei ñi cuñiutucuhual engün ca chumngechi ñi avisayafiel pu loncolelu. Taiñ lamngen Margaret taiñ nütramcapeel rupachi troquiñ mu, feipi: “Quiñe loncolelu hueupilu ti troquiñ chem duamniei taiñ trahunche feipi taiñ pepicaucüleal lüpümtucungerumele chi mapu. Rume cuñihun-ngefule cam feipieliyiñmu pu autoridad taiñ tripayal, pürüm femaimün llemai pi tati loncolelu”. Feitachi hueupin rume quellufi ti trahunche. Quechu semana mu müten lüpümtucungei cheu ñi mülen engün. Eimün pu chau, pu ñuque, quiñentrür estudialmün, feipiafimün tamün pu che ñi chumal engün ruparumele quiñe huesa dungu. Femngechi pepicaucülelmün, tüngcüleafuimün.

9. ¿Chumafui pu loncolelu petu ñi rupanon quiñe huesa dungu ca deu rupale?

⁹ Eimi loncolelmi quiñe troquiñche mu amuldunguquelu, petu ñi rupanon quiñe huesa dungu mülei tami huirintucual cheu ñi mülen pu peñi, pu lamngen ca tañi numero de telefono. Ca alün tiempo rupafule, ca ramtuafimi engün. Fei huesa dungu ruparumele, mütrümafuimi tañi telefono mu cam pemeafimi tañi ruca mu, femngechi tami quimal chem ñi duamnieel engün. Ca pürüm feipiafimi tati adcünuquelu ti troquiñ loncolelu (coordinador del cuerpo de ancianos), quisu fei ta feipiafi tati huitran-ngepaquechi loncolelu. Lüpümtucungelu cheu ñi mülen taiñ lamngen Margaret, 450 pu peñi pu lamngen lefmahuingün tañi ruca mu. Feimu ti huitran-ngepaquechi loncolelu 36 hora mu umautulai. Pepicamequefi com tati pu loncolelu, femngechi tañi quintuafiel pu peñi ca lamngen ca ñi quelluafiel (2 Cor. 11:27). Femngechi com quellungeingün ca niefuingün cheu tañi umautual engün.

10. ¿Chemu fente falin-ngei pu loncolelu ñi quelluafiel pu peñi, pu lamngen? (Juan 21:15).

¹⁰ Tati pu loncolelu mülei ñi yafültucuafiel pu peñi, pu lamngen Biblia mu. Ca mülei ñi quelluafiel pu huesa duamcülelu (1 Ped. 5:2). Rupale quiñe huesa  dungu, pu loncolelu mülei ñi quimal ñi chumlen pu peñi ca lamngen, ñi nien iyael, tacun ca cheu ñi müleam engün. Huelu alün tiempo rume rupafule, duamnieai engün tañi quelluniengeal ca ñi yafültucungeal Biblia mu (papeltunge Juan 21:15). Quiñe peñi coneltulelu ti Troquiñche Adcünuquelu Betel Harold pingei, fei nütramcaquefui pu rupalu huesaque dungu mu, quisu feipi: “Quiñeque peñi, lamngen ngoimanentuquelai huesaque dungu mu ñi rupael engün. Quiñeque mu, doi cüme felequetufuingün. Huelu acordarumequeingün lan mu tañi pu che, quiñeque falin chemcün tañi ñamümel engün cam cuñihun-ngechi dungu tañi rupan engün, feimu ca huesa duamquetuingün. Maneluucülefule rume Jehová mu, cüdautuafuingün ñi acordahuenoafiel ñi huesa rupan”.

11. ¿Chumngechi mülei ñi quellungeal pu familia?

¹¹ Eimün pu loncolelu, rume falin-ngei tamün inayal ñi feipin Biblia: “Inaye ngümayaimün tati pu ngümaquelu engün” (Rom. 12:15). Tati pu rupalu quiñe huesa dungu mu ayünieingün ñi quimal Jehová tañi piuqueyenieteu ca tañi pu peñi, pu lamngen. Pu loncolelu ca quellunieafingün tati pu familia ñi llellipunieal engün, papeltuafiel ta Biblia, amual trahun mu ca amuldungual engün. Ca quelluafuingün tati pu chau ñi quellunieafiel tañi pu yall, femngechi ñi raquiduamhuenoal ñi huesa rupan mu müten. Eimün pu chau feipiafimün tamün pu yall: “Jehová rumel hueniyeaimünmeu ca rumel quellunieaimünmeu. Pu peñi, pu lamngen ca rumel quellunieaimünmu” (1 Ped. 2:17).

12. ¿Chumafui tati trahunche ñi quelluntucual? (Inaduamnge ti adentun).

¹² ¿Chumafui ti trahunche? Ruparumele quiñe huesa dungu taiñ lof mu, ramtuafuiñ pu loncolelu chumngechi taiñ quelluntucuafel. Quiñeque peñi ca lamngen lefmahuingün tañi ruca mu, fei umañelafuiñ taiñ ruca mu. Ca femngechi femafuiñ tati cüpalu ñi quelluntucual. Eluafuiñ iyael ca tañi duamnieel engün. ¿Ca chumngechi quelluntucuafuiñ camapu rupale feitachi huesa dungu? Llellipuleafuiñ tati pu rupalu huesa dungu mu. Ca quelluntucuafuiñ plata mu (2 Cor. 1:8-11; 8:2-5). Ayüfulmi tami quellumeal, ramtuafuimi pu loncolelu tami chumal. Mangelngelmi tami amual, cüme pepicangeaimi chumngechi tami quelluntucual.

13. Inantucungen mu pu peñi ca pu lamngen, ¿chem cüdaungechi dungu mu rupaqueingün?

¹³ Inantucungen mu taiñ pu peñi, pu lamngen cüdaungechi dungu mu rupaqueingün. Nielaingün chi ta plata, cutranafuingün chi ca lai chi quiñeque tañi pu che. Huelu elungequenolu am ñi trahuluhual, pu loncolelu pepi amulayafuingün chi tañi pemeaeteu, feimu pepi nütramcahuelafuingün tañi yafültucuafiel. Femngechi dungu mu rupai taiñ peñi Andréi taiñ nütramcapeel rupachi troquiñ mu. Quiñe lamngen mülelu tañi troquiñche amuldunguquelu huesaque dungu mu rupai, niequelafui plata ca quiñe antü niefui quiñe accidente. Mufüquechi operangefui, pepi cüdauhuequelafui. Inacangelu rume ca mülefulu rume feitachi pandemia, pu peñi ca pu lamngen eluhuingün tañi quelluaeteu. Jehová peniefui com tañi rupamequen.

14. Pu loncolelu, ¿chumqueingün tañi maneluucülen Jehová mu?

¹⁴ ¿Chumafui pu loncolelu? ¿Chumi Andréi ñi quelluafiel tati lamngen? Andréi llellipufi ta Jehová, fei chumi rume tañi quellual. Fei, ¿chem rupai? Fentren pu peñi, pu lamngen quellufi taiñ lamngen. Quiñeque yequefui taiñ lamngen doctor mu, caquelu quelluntucufi plata mu. Jehová nengümelfi reque ñi piuque engün ñi quelluafiel tati lamngen (Heb. 13:16). Eimün pu loncolelu, caiñetungelmün cheu tamün mülen, feipiafimün caquelu ñi quelluafiel pu duamnielu quellu (Jer. 36:5, 6). Doi mai, eluhuaimün ñi maneluhual Jehová mu. Jehová quelluaimünmeu ñi cuidayafiel ti trahunche.

15. ¿Chumngechi quiñeucüleafuiñ inacangeliyiñ rume?

¹⁵ ¿Chumafui ti trahunche? Inacangerumeliyiñ, pichiquen troquiñ trahuluhuafuiñ. Feimu rume falin-ngei taiñ cüme yeucüleal taiñ pu peñi ca lamngen iñchiñ. Iñchiñ famentuafiyiñ llemai tati Huecüfü, huelu femlayafiyiñ taiñ pu peñi ca pu lamngen. Perdonayafiyiñ huelulcaule engün. Cafei pürüm cümelcautuaiñ (Prov. 19:11; Efes. 4:26). Eluucüleaiñ taiñ huelucontu quelluhual (Tito 3:14). Andréi ca tañi troquiñche amuldunguquelu ñi quellufiel mu tati lamngen, feimu doi quiñeucületuingün quiñe familia reque (Sal. 133:1).

16. ¿Chumngechi quelluafuiñ pu peñi ca lamngen inacangelu? (Colosenses 4:3, 18).

 ¹⁶ Fentren taiñ pu peñi, pu lamngen cüdahuelniefi Jehová tati pu gobierno catrütufeliyu rume ñi femal engün. Quiñeque presuleingün. Ngillatuleaiñ quisu engün mu ca tañi familia mu. Ca ngillatuleaiñ pu peñi, pu lamngen quelluquefilu pu presulechi peñi ca lamngen. Cuñihun-ngefulu rume, quisu engün quelluquefingün tañi maneluucüleal Jehová mu, eluquefi tañi duamnieel engün ca incaquefingün tañi juicio mu (papeltunge Colosenses 4:3, 18). c Ngoimanentulayaiñ taiñ ngillatulen ta quisu engün mu, rume quelluafeyu engün (2 Tes. 3:1, 2; 1 Tim. 2:1, 2).

17. ¿Chumngechi pepicaucüleafuiñ inacangerumeliyiñ?

¹⁷ Eimi tami familia eimün pepicaucüleafuimün inacangerumelmün (Hech. 14:22). Raquiduamcülelayaimün huesaque dungu tamün rupayafel. Doi mai, fülconcüleaimün Jehová mu ca quelluafimün tamün pu yall ca femngechi ñi femal engün. Fill raquiduamcülelmün, feipiafimün Jehová tamün chum duamcülen (Sal. 62:7, 8). Nütramcahuaimün tamün familiahuen-ngen chemu tamün maneluucüleal Jehová mu. d Pu chau, rume falin-ngei tamün pepicaucüleal ca maneluhual Jehová mu inacangerumelmün. Femngechi tamün pu yall nehuentuleaingün ca tüngcüleaingün.

18. ¿Chem cümeque dungu fülcülepai?

¹⁸ Jehová ñi tüngün cuñiutucuqueiñmu (Filip. 4:6, 7). Rupan mu huesaque cutran, quiñe fütra huesa dungu cam inacangerumeliyiñ, Jehová tüngduamelqueiñmu. Jehová cuñiutucuqueiñmu tati pu loncolelu meu. Ca nengümelqueiñmu taiñ piuque taiñ huelucontu quelluhual. Tüngcüleliyiñ, doi cüme pepicaucüleafuiñ taiñ chaftuafiel doi huesaque dungu ca tati “fütra cutrancahun” (Mat. 24:21). Acule ti fütra cutrancahun, mülei taiñ tüngcüleal ca feipiafiel ta caquelu ca femngechi ñi feleal. Deu rupale ti fütra cutrancahun, chem huesaque dungu mu rume rupahuelayaiñ. Acuai chi antü taiñ rumel tüngcületual chumngechi ñi ayüqueel Jehová (Is. 26:3, 4).