1. 1) ¿Chumngechi lloungequei Chau Dios ñi tüngün? 2) ¿Chumngechi quelluqueiñmu taiñ nieel Chau Dios ñi tüngün? (Filipenses 4:6, 7).

 PU CHE quimlafingün tati tüngün cüpalu Dios mu, tüfachi tüngün nieiñ taiñ hueniyefiel mu ta Dios. Nien mu tüngün ca nieiñ maneluhun (papeltunge Filipenses 4:6, 7). Ca hueniyeafuiñ caquelu che piuqueyeniefilu ta Chau Dios ca ayühulqueiñmu taiñ hueniyefiel ta Chau Dios, tañi hulquen mu tüngün (1 Tes. 5:23). Quimfiliyiñ ta Dios, maneluuliyiñ ca feyentufiliyiñ fei eluaiñmu tüngün, femngechi chaftuafiyiñ cüdaungechi dungu.

2. ¿Chumngechi quimnieiñ taiñ nieal Chau Dios ñi cüme tüngün?

² Acule quiñeque huesaque cutran, cutrancahun-ngechi dungu mu rupaliyiñ cam caiñetungeliyiñ, ¿rüf tüngcüleafuiñ? Cüdautuafuiñ taiñ tüngcüleal, huelu Jesús feipi: “Ngelai ñi hueñancüleal tamün piuque ca ñi llicaleal rume” (Juan 14:27). Fentrenque peñi ca lamngen inafingün Jesús tañi ngülam, Jehová quellueyu engün ñi tüngcüleal rupan mu rume huesaque dungu mu.

3. Quiñe pandemia cutran, ¿chumngechi huesalcayafeiñmu?

³ Acule quiñe huesa cutran huesacünuñmatuafeiñmu taiñ mongen. Raquiduamiyiñ chem dungu ñi rupan COVID-19 mu. Acun mu ti pandemia cutran, fentren che cüme umautuquelafuingün. Huelu fei müten no, ca fentren che trupeftrupefngefui, rume hueñancülefuingün ca quiñeque rume putuquefuingün ca drogatuquefuingün. Cafei quehuatuuquefui pu familia, ca quiñeque che ayüquefui ñi langümuhual. Acurumele quiñe huesa cutran  cheu tami mülen, ¿chumafuimi tami huesa duamcülenoal ca tami nieal Chau Dios ñi tüngün?

4. Ñi feipicünuel Jesús, ¿chumngechi eluqueiñmu tüngün?

⁴ Jesús feipicünui epe puule ñi afal huesaque dungu ‘fill püle müleai huesaque cutran’ (Luc. 21:11). Fei tüfachi dungu afmatufal-lai, deu quimnieiñ ñi rupayal tüfa. Ñi quimniefiel mu eluqueiñmu tüngün. Com ñi feipicünuel ta Jesús com femngechi tripalei, feimu Jesús feipieiñmu: “Ngelai tamün llicayal” (Mat. 24:6).

5. 1) Acun mu quiñe huesa cutran, ¿chem ngillatuafuiñ Jehová? (Filipenses 4:8, 9). 2) Tami allcütufiel mu ti papeltun Biblia audio mu, ¿chumngechi quelluafeimu?

⁵ Acule quiñe huesa cutran, fill raquiduamcüleafuiñ ca llicaleafuiñ. Ngüneduamafiyiñ ñi rupan quiñe lamngen Desi pingelu. b Tañi malle, tañi primo ca ñi doctor lai COVID-19 cutran mu. Lamngen Desi llicalefui ñi contuaeteu COVID-19 cutran, ca femngechi ñi cutranal tañi cushe ñuque, ca llicalefui ñi ñamümal ñi cüdau. Ca ramtuuquefui: “Ñamümli ñi cüdau, ¿cheu entuafun plata tañi nieal iyael ca culliafiel ti arriendo?”. Femngechi ñi raquiduamcülen mu, umautuquelafui rume. Huelu taiñ lamngen huiño tüngcületui, ¿chem quellueyu? Ngillatufi ta Jehová, feipifi ñi quelluaeteu tüngduamcüleal ca cüme raquiduamal (papeltunge Filipenses 4:8, 9). Ca allcütuquefui papeltun Biblia grabacion audio mu, femngechi allcütuquefui Jehová tañi chem pieteu. “Ñi cüme entun mu ñi dungun pu papeltuquelu Biblia fei tüngduamelqueneu, ca raquiduamelqueneu Jehová tañi duamtunieteu” pi (Sal. 94:19).

6. Amuliyiñ trahun meu, chillcatuliyiñ Biblia, ¿chumngechi quelluaiñmeu?

⁶ Acule quiñe huesa cutran cheu taiñ mülen, pepi fementulayafuiñ chi taiñ femquefel cuifi. Huelu elcünulayaiñ taiñ chillcatuafiel Biblia ca amual taiñ trahun mu. Taiñ publicacion ca fillque video pengelquei taiñ pu peñi ca pu lamngen tunte rupaingün rume huesaque dungu mu, yafüluucülequeingün tañi poyenieafiel Jehová (1 Ped. 5:9). Taiñ trahun quelluqueiñmeu taiñ nieal cümeque raquiduam. Ca fei mu yafültucuafuiñ taiñ pu peñi pu lamngen, quisu engün ca femngechi yafültucuqueiñmu iñchiñ (Rom. 1:11, 12). Quiñeque mu Jehová ñi pu che cutrancüleingün, llicaleingün ca quisulelu troquiuqueingün. Huelu raquiduamliyiñ Jehová chumngechi ñi quelluquefiel engün, maneluhuaiñ ca femngechi taiñ quelluaeteu.

7. Apostol Juan ñi femün, ¿chumngechi quelluafeiñmu tüfa?

 ⁷ Famentuucülelayaiñ taiñ pu peñi pu lamngen mu. Rupayahun mu quiñe huesa cutran, pepi peuquelaiñ taiñ pu peñi pu lamngen iñchiñ. Fei apostol Juan reque rupayafuiñ, pepi penofilu tañi hueni Gayo pingelu (3 Juan 13, 14). Ti apostol Juan pepi penofilu tañi hueni, huelu femnacümcünuulai, huirintuculelfi quiñe carta. ¿Chem quimeltueiñmu tüfa? Ca femngechi iñchiñ pepi peunoliyiñ taiñ pu peñi pu lamngen iñchiñ, femnacümcünuulayaiñ. Mütrümafuiñ telefono mu ca huirilelafuiñ quiñe mensaje. Famentuunoliyiñ taiñ pu peñi ca pu lamngen mu, quisulelu troquiulayaiñ ca tüngduamcüleaiñ. Huelu rupanole taiñ cutrantupiuquelen, nütramelafuiñ taiñ loncolelu ca eluhuaiñ taiñ quelluaeteu (Is. 32:1, 2).

8. Rupalmi fütra huesaque dungu mu, ¿chum duamcüleafuimi?

⁸ Eimi tami mülen mu rupai chi fütra nüyün, fütra mangiñ co cam lüfconi chi tami ruca, feimu layelimi chi quiñe familia cam quiñe hueni. Cam ñami tami com fillem duamniengeel, feimu müna huesa duamcülepelaimi. Tami huesa duamcülen mu feichi dungu mu cüpa feipilai tami maneluuquenon Jehová mu ca doi diñmatuquefiel plata. Femngechi rupalmi, caquelu pu che raquiduamafui tami huesa duamcüleal ca illculeal (Job 1:11). Huelu femngechi rupaliyiñ tüngduamcüleafuiñ, ¿chumngelu am? Peafiyiñ.

9. Jesús ñi feipin, ¿chumngechi quelluqueiñmu taiñ pepicaucüleal?

⁹ Quiñeque che raquiduamquei ñi turpu rupanoal fütra huesaque dungu mu. Huelu iñchiñ quimtucunieiñ ñi rupayal ca ñi doi müleal huesaque dungu. Jesús feipicünufi tañi pu discipulo afaelchi antü mu ñi müleal fütraque nüyün ca caquelu huesaque dungu (Luc. 21:11). Jesús ca feipicünui pu che ñi doi huesaque dungu entual. Famülque mu, rume mülei hueñefe, quehuatun dungu ca llican-ngechi dungu (Mat. 24:12). Jesús ñi feipiel com che ñi rupayal cutrancahun-ngechi dungu mu. Quiñeque poyequefilu ta Jehová ca femngechi cutrancauquei (Is. 57:1; 2 Cor. 11:25). Jehová catrütuñmalayaiñmu femngechi dungu mu taiñ rupanoal, huelu quelluaiñmu taiñ tüngcüleal.

10. Taiñ cüme pepicaucülen mu pengelqueiñ taiñ maneluucülen Jehová mu, ¿chumngelu feipiyiñ tüfa? (Proverbios 22:3).

¹⁰ Ruparumele quiñe fütra huesa dungu, mülei taiñ cüme pepicaucüleal, femngechi tüngcüleaiñ. Huelu, ¿chumngelu mülei taiñ pepicaucüleal? ¿Maneluucülelaiñ am Jehová mu? Felelai. Iñchiñ taiñ cüme pepicaucülen mu, pengelqueiñ taiñ maneluucülen Jehová mu fei taiñ quelluaeteu. ¿Chumngelu feipiyiñ tüfa? Biblia ngülamtuqueiñmu taiñ cuidahual cuñihun-ngechi dungu mu (papeltunge Proverbios 22:3). Ca femngechi trahun mu ca taiñ revista mu, Jehová ñi troquiñche ngülamtuqueiñmu taiñ cüme pepicaucüleal ruparumele quiñe fütra huesa dungu. c ¿Chumngechi pengelqueiñ taiñ maneluucülen Jehová mu? Inanieafiyiñ tüfachi ngülam fachantü petu ñi rupanon quiñe fütra huesa dungu.

11. ¿Chem quimeltueiñmu ñi femün ta Margaret?

 ¹¹ Peafiyiñ ñi rupan quiñe lamngen Margaret pingelu. Fei ñi inafül ruca, mülei quiñe fütra lüpümtucuhun. Fei pu autoridad feipieyu tañi tripayal ñi ruca mu, ñi amual cañpüle. Rume fentren che tripaingün tañi auto mu, fei pütrülelu am tati auto, carretera mu pepi rumen-ngelai. Rume fentren fitrun ñi mülen mu, fei Margaret pepi tripalai tañi auto mu. Fei Margaret nierquei quiñe mapa, fei ti mapa mülei cangelu rüpü, fei Margaret inafi feichi rüpü tañi tripayal. Taiñ lamngen deu miyauquerquefui feichi rüpü mu cuifi, feimu tañi cüme pepicahun mu montui ñi mongen.

12. ¿Chumngelu inaquefiyiñ taiñ feipiqueteu pu loncolelu?

¹² Famülque mu pu autoridad incañpequeiñmu. Quiñeque mu, rupale quiñe huesa dungu feipiafeiñmu taiñ tripanoal ruca mu, ca feipiafeiñmu taiñ amual cañpüle. Fentrenque che feyentuquelafi pu autoridad tañi feipieteu, ayüquelai tañi quisucünual ñi ruca engün. Iñchiñ taiñ pu cristianongen, ¿feyentuquefiyiñ taiñ feipieteu pu autoridad? Femqueiñ llemai. Biblia feipi: “Ñidol tañi duam mu eluucülemün tamün adnieaeteu com pu autoridad ñi elcünuel pu che, quiñe lonco ülmen doicülelu ta eimün meu cam pu gobernador” (1 Ped. 2:13, 14). Jehová tañi troquiñche ca eluqueiñmu ngülam taiñ cuñiutucuaeteu. Raquiduamnge, iñchiñ ngülamtungequeiñ taiñ eluafiel pu loncolelu taiñ numero de telefono, femngechi taiñ mütrümaeteu engün ruparumele quiñe huesa dungu. Ca femngechi feipingeafuiñ taiñ quintual quiñe cüme ellcaupeyüm, taiñ tripayal taiñ ruca mu cam pepicaucüleal fillque fillem mu. Ca feipingeafuiñ taiñ quelluafiel ta caquelu. Inanoliyiñ taiñ feipingeel cuñihun mu tucuafuiñ taiñ mongen ca pu loncolelu ñi mongen. Quimtucunieaiñ pu loncolelu cuidaqueiñmu (Heb. 13:17). Taiñ lamngen Margaret feipi: “Tañi inafiel mu tañi feipieteu pu loncolelu ca Jehová tañi troquiñche, femngechi montulün tañi mongen”.

13. Quiñeque peñi ca lamngen lefmaulu ñi mapu mu, ¿chumqueingün tañi ayüucüleal ca tüngcüleal?

¹³ Quiñeque pais mu rupaquei fütra huesaque dungu, hueichan dungu ca  rume pofolcauquei che, feimu taiñ pu peñi ca pu lamngen mülei ñi tripayal tañi ruca mu ñi amual cañpüle. Fei quisu engün eluucüleingün tañi huimtual cheu tañi puhun mu ca fentecünuquelaingün tañi serfiafiel Jehová. Taiñ pu peñi ca pu lamngen inayentuquefingün pu hunenque cristiano, fei engün lefmaulu rume tañi caiñetungen mu fentecünulaingün tañi amuldungual (Hech. 8:4). Amuldungun mu, taiñ pu peñi ca pu lamngen fente raquiduamcülequelai engün ti huesaque dungu tañi rupan mu, huelu mai tañi chumal Jehová cüpalechi antü meu. Femngechi ayüucüleingün ca tüngcüleingün.

14. Taiñ inacamequengen mu, ¿chumngelu cüdautuafuiñ taiñ ayüucüleal ca tüngcüleal?

¹⁴ Taiñ inacangen mu cüdautuqueiñ taiñ ayüucüleal ca tüngcüleal. Eluñmangequelaiñ taiñ trahuluhual pu peñi ca pu lamngen iñchiñ ca taiñ amuldungual. Ca femngechi llicaqueiñ taiñ tripayal, presungerumeafuiñ. Femngechi dungu mu rupaliyiñ, raquiduamcüleafuiñ chem dungu ñi rupayal cüpalechi antü mu. Huelu mülei taiñ cuñiutucuhual. Chumngechi ñi feipifiel Jesús tañi pu inanieteu, iñchiñ inacangeliyiñ elcünulayaiñ taiñ maneluucülen Jehová mu (Juan 16:1, 2). Fei, ¿chumngechi tüngcüleafuiñ taiñ inacamequengen mu?

15. Inacangeliyiñ rume, ¿chumngelu ngelai taiñ llicaleal? (Juan 15:20; 16:33).

¹⁵ Biblia feipiqueiñmu: “Caiñetungeai com pu inaniefilu ta Cristo Jesús ayünielu ñi püramyeafiel ta Chau Dios tañi mongen meu” (2 Tim. 3:12). Peafiyiñ ñi rupan quiñe peñi Andréi pingelu. Ti pais cheu ñi mülen taiñ peñi caiñetungei pu testigo, fei Andréi raquiduamquefui: “Fau mülei rume fentren testigo, fei com presungelayaiñ”. Huelu Andréi rume raquiduamcülefui. Caquelu peñi ca lamngen elcünuquefui ti dungu Jehová ñi cuhu mu. Iñche turpu presungelayan piquelafuingün. Fei engün rume raquiduamcülelafuingün Andréi reque, feimu ¿chumi Andréi? Cacünutui ñi raquiduam, maneluhui Jehová mu. Feula Andréi tüngcülei ca ayüucülei ñi rupan mu rume  huesaque dungu mu. Iñchiñ ca femngechi feleafuiñ. Quimnien mu rume taiñ inacangeal, huelu Jesús feipicünueiñmu taiñ püntütripanoal Jehová mu (papeltunge Juan 15:20; 16:33).

16. ¿Chem dungu taiñ feipingeel inayafiyiñ?

¹⁶ Taiñ pais mu eluñmangehuenole taiñ trahuluhual ca amuldungual, fei pu loncolelu ca Jehová ñi troquiñche feipiaiñmu taiñ chumal. Femngechi cuñiutucungeaiñ. Ca feipiaiñmu chumngechi taiñ llohuafiel Chau Jehová ñi ngülam ca chumngechi taiñ amuldunguleal. Fei, ¿chem mülei taiñ femal? Inayafiyiñ taiñ feipingeal, müte ayünofiliyiñ rume (Sant. 3:17). Ca turpu feipilayafiyiñ taiñ pu caiñe taiñ pu peñi ca pu lamngen ñi dungu, ca feipilayafiyiñ rume chem dungu ñi femquen ti trahunche (Ecl. 3:7).

17. Ti pu apostol reque, ¿chem mülei taiñ femal?

¹⁷ Iñchiñ taiñ pu cristianongen elfalcünungeiñ taiñ “huldungual Jesús meu”, feimu caiñetuqueiñmu ta Huecüfü (Apoc. 12:17). Eluñmaquefiliyiñ taiñ llicalcayaeteu ta Huecüfü ca tañi ngünenieelchi pu che. Inacangeliyiñ rume amuldunguleaiñ ca quimeltunieafiyiñ pu che, femngechi tüngcüleaiñ ca ayüucüleaiñ. Cuifi mu, quiñeque autoridad feipifingün pu apostol tañi amuldunguhuenoal engün. Huelu, ¿chem chumingün pu apostol? Feyentufingün ta Jehová, amuldunguleingün, femngechi ayüucüleingün (Hech. 5:27-29, 41, 42). Iñchiñ amuldunguhuelayaimi pingeliyiñ, huelu cuñihunquechi amuldunguleaiñ (Mat. 10:16). Femngechi ayühuelafiyiñ ta Jehová, fei tüngcüleaiñ.

18. ¿Chem duamnieiñ com iñchiñ?

¹⁸ Huesaque dungu rume rupaliyiñ, huelu iñchiñ tüngcüleafuiñ. Quimtucunieaiñ taiñ duamnieel Chau Dios ñi hulqueelchi tüngün. Rupayahun mu quiñe huesa cutran, ruparumele quiñe fütra huesa dungu cam inacangeliyiñ, recüluucüleaiñ Jehová mu. Turpu püntütripaquenoliyiñ Jehová ñi troquiñche mu ca raquiduamcüleaiñ cüpalechi antü mu taiñ cümelcaletual. Femliyiñ, Chau Jehová ñi cüme tüngün afcadinieaiñmu reque (Filip. 4:9). Huelu taiñ pu peñi ca pu lamngen rupamequele huesaque dungu mu, ¿chumngechi quelluafuiñ engün tañi tüngcüleal? Ca troquiñ mu peafiyiñ.