1. Epe puulu ñi layal Jesús, ¿chem feipifi ti huentru? (Lucas 23:39-43).

 RAQUIDUAMNGE chem ñi rupan feichi pun ñi lan Jesús. Jesús clafantucungei orcon mamüll mu epu hueñefe engün, rume cutrancahuingün (Luc. 23:32, 33). Feitachi epu huentru lucatufingu ta Jesús, fei quimfali tañi inaquenofiel (Mat. 27:44; Mar. 15:32). Huelu quiñe tüfa cacünutui ñi raquiduam, feipi: “Jesús, ngünenietulmi mapu, acordayaen”. Fei Jesús feipieyu: “Fachantü llemai rüf feipicünueyu: trür müleayu ayüfalchi mapu meu” (papeltunge Lucas 23:39-43). Jesús quimeltui huenu mu Chau Dios ñi ngünenieafiel ta mapu. Huelu Jesús feipilafi ti huentru ñi müleal huenu mu Chau Dios engu, feipifi ñi müleal mapu mu (Mat. 4:17; 5:3, nota).

2. ¿Chumngelu feipiafuiñ ti hueñefe huentru ñi judiongen?

² Feitachi hueñefe, ¿judiongepelai? ¿Chumngelu feipiafuiñ? Clafantucungelu orcon mamüll mu, feiti hueñefe feipifi ti cangelu huentru: “¿Turpu yamquelafimi ta Chau Ngünechen?” (Lucas 23:40). Pu judio feyentuquefingün quiñe Ngünechen müten. Huelu caquelu troquiñche fentren dios feyentuquefingün (Éx. 20:2, 3; 1 Cor. 8:5, 6). Judiongenofule feitachi huentru, fei ramtuafui: “¿Turpu yamquelafimi pu dios?”. Cafei Jesús huercüngei ñi quelluafiel pu Israel che müten ñamquiyauchi ufisa reque felelu (Mat. 15:24). Ca femngechi Chau Dios feipifui pu Israel che tañi huiñomongeltuafiel pu layelu.  Feiti hueñefe huentru quimtucuniepelafui tañi feipicünun ta Chau Dios. Feimu quimniefui chi Jehová ñi huiñomongeltuafiel ta Jesús tañi ngünenieal. Ca ¿maneluucülepelafui ti huentru Chau Dios ñi huiñomongeltuaeteu?

3. Allcütufilu ta Jesús, ¿chem raquiduami chi ti huentru? (Génesis 2:15).

³ Ñi judio huentrungen mu peno feimu quimniefui Chau Dios ñi elcünufiel Adán engu Eva ti cüme mapu mu. Feimu ñi feipin mu Jesús, tüfachi huentru raquiduampelafui tañi ayüfalngetual ta mapu (papeltunge Génesis 2:15).

4. Jesús tañi feipin, ¿chem raquiduamelafeiñmu?

⁴ Jesús ñi feipin mu raquiduamafuiñ ñi chumletual taiñ mongen ayüfalngetule mapu. ¿Chem quelluaiñmu? Raquiduamafuiñ fente ñi cüme felequefel pu che feichi ngünenielu ta Salomón. Biblia feipi Jesús ñi doicülen Salomón mu. Feimu maneluhuafuiñ Jesús ca tañi pu quellu ñi cüme ayüfalcünutuafiel ti mapu engün (Mat. 12:42). Feimu ti “caquelu ufisa” mülei ñi quimtucual chem tañi femal fei ñi müleal ayüfalngechi mapu mu (Juan 10:16).

5. ¿Chumletuai taiñ mongen ayüfalngetule mapu?

⁵ ¿Raquiduamquefuimi chumletual ta mongen ti ayüfal mapu mu? Raquiduamqueimi chi ñi müleal anümca ca cümeque flor ti jardin de Edén reque (Gén. 2:7-9). ¿Ca acordaniepelaimi ñi feipin Biblia? Chau Dios ñi pu che “anücünuhuaingün miñche quisuque ñi anüm ofad meu, ca miñche ñi higuera engün” (Miq. 4:3, 4). Ca raquiduamafuimi ñi müleal fentren iyael (Sal. 72:16; Is. 65:21, 22). Afmatufalai taiñ müleal taiñ pu hueni iñchiñ. Quiñentrür iyaiñ fillque cümeque iyael ca quiñeque taiñ pu hueni ca familia huiñomongetule quiñentrür müleaiñ fei engün. Cheu püle rume adquintuliyiñ com ti mapu ayüfalngeai. Tüfa ta peuma no tati, rüfngeai ñi huechutriparpual. Huelu ca müleai cümeque cüdau taiñ femal. Peafiyiñ tüfa.

6. ¿Chem ayüfal cüdau nieaiñ ti ayüfal mapu mu? (Pefinge ti adentun).

⁶ Jehová deumaeiñmu taiñ ayühunquechi cüdahual (Ecl. 2:24). Feichi huaranca tripantu ngüneniele Jesús, nieaiñ fentren cüdau. ¿Chumngelu? Com iñchiñ pu mongetripalu ti fütra cutrancahun mu ca pu huiñomongetualu duamnieaiñ ropa, iyael ca duamnieaiñ ruca cheu taiñ müleam. Feimu rume cüdahuaiñ taiñ nieal com tüfa, huelu ayühuelaiñmu. Chumngechi ñi feipingen Adán engu Eva, iñchiñ  ca cüdahuaiñ taiñ ayüfalcünutuafiel ti mapu. Cafei com pu quimnofilu Jehová huiñomongetule, quimelelafiyiñ engün Jehová mu. Ca com ti pu poyequefilu Jehová petu ñi mülepanon Jesús, iñchiñ ca quimelelafiyiñ chem dungu ñi rupayen. Rume ayühuelaiñmu taiñ femal com tüfa.

7. ¿Chem mu maneluhuafuiñ? ¿Chumngelu?

⁷ Maneluucüleafuiñ ti ayüfal mapu mu tüngcüleaiñ, nieaiñ com taiñ duamnieel ca com cüme adcünungeai. Taiñ doi quimal tüfa, ngüneduamaiñ ñi chumlequefel ti mongen feichi ngünenielu ta Salomón.

8. Ñi feipin Salmo 37:10, 11, 29, ¿chumngechi huechutripai cuifi mu? (Inaduamnge ti troquiñ “Pu papeltuquelu ñi ramtuqueel” mülelu tüfachi revista meu).

⁸ Jehová David elufi nehuen ñi huirintucual cüpalechi antü mu ñi ngünenietual quiñe cüme rey, fei com che ñi cüme feletual (papeltunge Salmo 37:10, 11, 29). Ñi feipin Salmo 37:11 huechurpuai cüpalechi antü mu ayüfalngetule mapu. ¿Chumngechi quimfiyiñ tüfa? Jesús nütramcai tüfachi texto hueupilu quiñe huincul mu ca feipi ñi huechutripayal cüpalechi antü mu (Mat. 5:5). Huelu ñi feipin Salmo ca femngechi tripai cuifi mu. ¿Chumngelu feipiafuiñ? Salomón ñi ngünenieel mu pu che ca cümelcalequefui. Feichi mu Jehová ñi pu che ayühunquechi mongen niequefuingün ca mülequefuingün quiñe cüme mapu mu “hulquelu lichi ca miel”. Jehová feipi: ‘Amulelmün iñche ñi ley dungu mu, iñche ñi duam mu, tüngcüleai ti mapu, eimün cudulelmün inei no rume llicalcalayaimu’ (Lev. 20:24; 26:3, 6). Ngünenielu Salomón com femngechi tripai (1 Crón. 22:9; 29:26-28). Ca Jehová feichi mu feipicünui com pu huesaque che “ngehuetulayai engün” (Sal. 37:10). Feimu llemai ñi feipin Salmo 37:10, 11, 29 huechutripai  Salomón ñi antü mu ca femngechi huechutripayai cüpalechi antü meu.

9. ¿Chem pi quiñe ülmen domo Salomón ñi ngünenieel mu?

⁹ Pu Israel che quimniengequefui ñi nien cüme mongen ca tüngün Salomón ñi ngünenieel mu. Quiñe ülmen domo Saba pingechi mapu mu quimürpui tüfa, fei alü camapu amui ñi pemeafiel ta Salomón (1 Rey. 10:1). Tüfachi domo nütramcafilu ta Salomón feipi: ‘Rüfcünu com feipingelan. ¡Ayüucülei pu huentru ca tami pu serfiqueteu. Eimi mu mülequeingün ca allcütunieñmaeimu tami quimün!’ (1 Rey. 10:6-8). Salomón ñi ngünenieel mu pu che cüme felequefui. Tüfa pengeli ngünenietule Jesús mapu mu ca cüme feletuai tati pu che.

10. Jesús, ¿chemu doicülei Salomón mu?

¹⁰ Jesús doicülei Salomón mu. ¿Chumngelu feipiafuiñ? Salomón culpafengefui, feimu tañi huelulcahun mu huesalcafi Chau Dios ñi pu che. Huelu Jesús nielai ta culpan ca huelulcauquelai (Luc. 1:32; Heb. 4:14, 15). Jesús püntütripalai Jehová mu Huecüfü ñi huelulcayafeteu rume. Jesús pengeli turpu ñi huelulcaunoal. Cafei ngünenietufile mapu, Jesús turpu huesalcalayafi Jehová ñi pu che. ¿Cümenoafulu am ñi ngünenieaeteu Jesús?

11. ¿Inei engün am ngünenieai Jesús?

¹¹ Jesús ngünenieai 144.000 che engün huenu mu. Quiñentrür cuidayafingün tati pu che ca femürpuaingün Jehová ñi ayüqueel mapu mu (Apoc. 14:1-3). Tüfachi 144.000 che ñi mülen mu mapu mu rupaingün fentren huesaque dungu mu. Feimu ngüneniele Jesús engün, cüme entendeñmayaiñmu taiñ rupan. Huelu, ¿chem cüdau nieai tüfachi pu che?

12. ¿Chem falin cüdau elufi Jehová pu 144.000 che?

¹² Jesús ca pu 144.000 doi fentren cüdau nieaingün Salomón ñi niequefel mu. Salomón ngüneniequefui quiñe troquiñ mapu müten, huelu Jesús ca pu 144.000 ngünenieaingün com huall mapu mu. Feimu pu 144.000 Jehová elueyu engün quiñe falin cüdau.

13. Pu ngüneniealu Jesús engün, ¿chem falin cüdau llohuaingün?

¹³ Jesús reque pu 144.000 lonco ülmen-ngeaingün ca sacerdotengeaingün (Apoc. 5:10). Cuifi mu, mülelu Moisés ñi ley pu sacerdote quelluquefui pu Israel che ñi cülfüncüleal ca ñi fülmanieafiel Jehová. Moisés ñi ley ‘quiñe llaufeñ reque felefui pengelquelu tati cüpayalu’. Feimu pu ngüneniealu Jesús engün ca femngechi quelluafingün Chau Dios ñi pu che ñi cülfüncüleal ca ñi fülmanieafiel ta Jehová (Heb. 10:1). Petu quimlaiñ pu 144.000 che chumngechi ñi dunguafiel tati pu che mülelu mapu mu. Huelu maneluucüleiñ Jehová ñi cüme adcünuafiel tañi pu che ayüfalngele ta mapu (Apoc. 21:3, 4).

14. ¿Chumngechi quiñeucülei ti “caquelu ufisa” ca tati “pichi troquiñche”?

¹⁴ Jesús nütramcai tañi ngünenieal engün “pichi troquiñche” pifi (Luc. 12:32). Ca nütramcai cangelu troquiñche mu, “caquelu ufisa” pifi. Tüfachi epu troquiñche quiñe quechan ufisacünuhui (Juan 10:16). Ca quiñentrür cüdaucüleingün. Ca femngechi quiñentrür cüdaucüleaingün ayüfalngetule ta mapu.  Feichi antü meu tati “pichi troquiñche” müleai huenu mu, “caquelu ufisa” müleaingün mapu mu. Huelu, ¿chem mülei ñi femal ti “caquelu ufisa” ñi rumel müleal mapu mu?

15. 1) Iñchiñ “caquelu ufisa”, ¿chumngechi quelluafiyiñ pu dullin cristiano? 2) ¿Chumngechi inayentuafuiñ ti peñi tripalu ti adentun mu? (Inaduamnge ti adentun).

¹⁵ Ti hueñefe repentiulu pepi pengel-lai ñi mañumtuafiel ta Jesús. Huelu iñchiñ taiñ ‘caquelu ufisangen’ pengelafuiñ taiñ mañumcülen. ¿Chumngechi femafuiñ? Cüme duamtufiliyiñ tati pu dullinche. Loncontucuaiñ tüfa: Jesús juzgayaiñmu chumngechi taiñ troquitufiel pu dullinche (Mat. 25:31-40). Com taiñ nehuen mu amuldunguliyiñ ca quimeltucheliyiñ, femngechi quelluafiyiñ tati pu dullin cristiano (Mat. 28:18-20). Taiñ femal püneafiyiñ ti fillque quellu taiñ elungeel. Quiñe tüfa ti lifru ¡Rumel ayüucüleaimi! pingelu. Eimi petu nienolmi quiñe che tami chillcatulquefiel Biblia, eluunge tami feipiafiel tati pu che: “Chillcatuaimi Biblia, iñche quelluayu”.

16. ¿Chem mülei taiñ femal feula taiñ rumel müleal tüfachi mapu mu?

¹⁶ Jehová ayüquei taiñ cüme chengeal femngechi taiñ rumel müleal mapu mu. ¿Chem mülei taiñ femal? Mülei taiñ nor chengeal ca quim ngünehual. Cafei püntütripalayaiñ Jehová mu, taiñ afcadi ca taiñ pu peñi ca pu lamngen mu. Femliyiñ com tüfa fachantü, fei cüdautulayaiñ taiñ femal cüpalechi antü mu ayüfalngetule mapu mu. Ca femngechi pepiluucüleafuiñ fachantü taiñ femal fillque cüdau ca taiñ doi cüme chengerpual. Femngechi pepicaucüleaiñ taiñ rumel müleal tüfachi mapu mu. Pefinge ti troquiñ “¿Pepicaucüleimi rumel mongeleal mapu mu?” mülelu tüfachi revista meu.

17. Taiñ culpan mu rume cuifi, ¿chumngelu rumel huesa duamcülelayaiñ?

¹⁷ Culpaliyiñ cuifi huelu repentiuliyiñ, ngelai taiñ huesa duamcüleal taiñ culpan mu. Jesús ñi lan mu iñchiñ perdonangeiñ.  Tunte felefulu rume, iñchiñ culpalayaiñ “quisu taiñ pin mu” (Heb. 10:26-31). Doi mai culpaliyiñ huelu rüf repentiuliyiñ ca eluuliyiñ taiñ quelluaeteu pu loncolelu ca Jehová, quimnieiñ Jehová taiñ perdonayaeteu (Is. 55:7; Hech. 3:19). Loncontucuaiñ Jesús ñi feipifiel pu fariseo: “Iñche cüpan pu culpafe ñi nor raquiduamtual engün, huelu pu nor che troquiuquelu no” (Mat. 9:13). Felei llemai, Jesús ñi lan mu com iñchiñ perdonangeafuiñ taiñ culpan.

18. ¿Chem ayüafuimi tami nütramcayafiel ti hueñefe?

¹⁸ Raquiduamnge tami mülen ti ayüfal mapu mu. Fei nütramcafimi tati hueñefe taiñ nütramcapeel, ¿chem feipiafuimi? ¿Mür eimu feipipelayafuimu fente tamu mañumcülen Jesús tañi lan mu? Ca ramtuafuimi chi chem rupan epe puulu ñi layal Jesús. Ca ramtuafuimi: “Allcütulu eimi tami feipieteu Jesús, ¿chum duamimi?”. Fei ti hueñefe ca ramtuafeimu: “¿Chumlerpui tami mongen ti afaelchi antü?”. Rume ayühun-ngeai taiñ quiñentrür chillcatual Biblia ayüfalngetule mapu (Efes. 4:22-24).

19. ¿Chumngelu ayün-ngeai taiñ mongen ayüfalngetule mapu? (Inaduamnge ti adentun).

¹⁹ Ayüfalngetule mapu, rume ayühun-ngeai taiñ mongen. Quimürpuafiyiñ fentren che, fei cümeque nütram entuaiñ. Cafei cümeque cüdau nieaiñ. Ca femngechi rume ayühun-ngeai taiñ doi quimürpuafiel Jehová ca com taiñ eluaeteu. Turpu fentecünulayaiñ taiñ quimal Chau Jehová mu ca tañi deumael mu. Doi alün tripantu mongeleliyiñ doi piuqueyerpuafiyiñ Jehová. Rume ayühun-ngei taiñ rumel mongeleal ayüfalngetule mapu. Müna mañumcülequeiñ Jehová ca Jesús mu taiñ elueteu maneluhun.