1. Taiñ cüme cristianongerpual, ¿chem mülei taiñ femal?

 PICHIQUECHE chumngequelai rume, fei quisutu tremqueingün, quimlaiñ rume chumngechi tañi tremquen engün. ¿Ca femngechi femquepeiñ mai taiñ cüme cristianongerpual? Femlai. Taiñ femngechi chengerpual mülei taiñ cüdahual (1 Cor. 13:11; Heb. 6:1). b ¿Chem mülei taiñ femal? Mülei taiñ cüme hueniyeafiel ta Jehová. Ca duamnieiñ Jehová taiñ eluaeteu ñi nehuen, femngechi taiñ cüme cristianongeal, taiñ doi adümuhual ca taiñ pepicaucüleal mongen meu (Prov. 1:5).

2. 1) ¿Chem quimeltueiñmu ñi feipin Génesis 1:27? 2) ¿Chem ngüneduamaiñ tüfachi troquiñ mu?

² Jehová deumafi tati huentru ca tati domo (papeltunge Génesis 1:27). Ti huentru ca ti domo trürlaingu. Por ejemplo, Jehová eluyefi engün caquerumen cüdau, feimu caquerumei ñi adümuhun engün tañi huechunentuafiel (Gén. 2:18). Tüfachi troquiñ mu, ngüneduamafiyiñ pu huecheque lamngen chumafuingün tañi doi cüme cristianangerpual. Ca troquiñ mu, ngüneduamaiñ ñi chumal pu huecheque peñi.

3, 4. Pu üllchaque domo, ¿inei engün am inayentuafuingün? (Ca inaduamnge ti adentun).

³ Biblia nütramcai fentrenque domo mu, piuqueyefilu Jehová ca serfiquefilu (inaduamnge ti troquiñ jw.org mu  feipilelu “¿Qué aprendemos de las mujeres de la Biblia?”). Chumngechi ñi feipin ti texto tüfachi troquiñ mu, fei engün quim ngünenieuquefuingün ca feyentuquefingün ta Chau Dios. Trahunche mu ca mülei fentren lamngen cüme hueniyequefilu Jehová ca inayentufalngelu.

⁴ Eimi hueche lamngen, ¿quimfimi cai quiñeque domo cüme hueniyequefilu Jehová? Ngüneduamafimi ñi chumngen engün, fei eluunge tami ca femngechi chengerpual. Feula ngüneduamaiñ ñi chumngechi chengeal pu üllchaque lamngen, femngechi ñi cüme cristianangerpual.

5. Quiñe domo ñi cüme cristianangerpual, ¿chumngelu mülei ñi ñom piuquengeal?

⁵ Mülei ñi ñom piuquengeal. Ñom piuquengechi domo cüme hueniyequefi ta Jehová, ca cüme yeuquei caquelu che engün (Sant. 4:6). Ti domo piuqueyefile Jehová, ñom piuque mu cüme inayafi ñi feipin 1 Corintios 11:3. Tüfa mu feipi Jehová inei engün am elufi autoridad trahunche ca ti familia mu. c

6. Üllchaque domo, ¿chem quimeltuafeyu ta Rebeca?

⁶ Nütramcayaiñ ñi chumngequefel ta Rebeca. Tüfachi domo quim domongequefui, nehuen piuquengequefui, ca quimquefui tañi chumal (Gén. 24:58; 27:5-17). Cafei Rebeca yamchequefui ca eluucülefui ñi inayal tañi huercüngeel (Gén. 24:17, 18, 65). Eimi üllcha domo, Rebeca reque femülmi, ñom piuquengelmi ca inafilmi ñi feipin pu nielu autoridad, inayentufalngeaimi tami familia mu ca ti trahunche mu.

7. Üllchaque lamngen, ¿chumngechi inayentuafuingün Ester?

⁷ Inei rume ayüle ñi cüme cristianongerpual mülei ñi ñom piuquengeal. Biblia feipi: “Tati pu ñom chengelu niequeingün quimün” (Prov. 11:2). Ester ñom piuquengefui. Reinacünungelu, mallmaulai.  Quisu allcütuquefui ca inaquefui ti ngülam ñi elueteu tañi primo Mardoqueo pingelu (Est. 2:10, 20, 22). Eimi üllcha domo, Ester reque femaimi, fei eluhuaimi tami ngülamtuaeteu caquelu che ca cüme allcütuafimi (Tito 2:3-5).

8. Ñi feipin 1 Timoteo 2:9, 10, ¿chumngechi quelluafeyu pu lamngen ñi cüme tucutuhual?

⁸ Ester, ¿ca chumngechi pengeli tañi ñom piuquengen? Quisu elangechi domo fel. Femfulu rume, ngüneltumuchi iñche ta doi cüme adngen piquelafui (Est. 2:7, 15). Ti pu üllchaque domo, ¿chumngechi inayentuafui ta Ester? Inayafuingün ñi feipin 1 Timoteo 2:9, 10 (papeltunge). Tüfa mu, Pablo feipifi pu domo tañi tucutuucülen mu quimfalngepe ñi mallmangenon ca ñi nien cüme raquiduam. Tañi feipin Pablo griego quehun mu pengeli pu domo mülei ñi rumel cüme tucutuucüleal ca mülei ñi raquiduamal chem piquei caquelu pu che tañi tucutuucülen mu. Saquihuiyiñ eimün pu lamngen tamün cüme tucutuuquen.

9. ¿Chem quimeltuafeiñmu ñi femün ta Abigaíl?

⁹ Ñi cüme cristianangerpual pu domo ca mülei ñi quim raquiduamal. Cüme raquiduamle engün, fei quimaingün chem ñi cümen ca chem ñi cümenon, ca inayafingün tati cümelu. Ngüneduamaiñ ñi femün ta Abigaíl. Tañi füta huesa raquiduamniefui, ayüfui ñi huesa femal. Femfule, com tañi pu che contuafeyu huesaque dungu. Fei, ¿chumi Abigaíl? Abigaíl cüme quimniefui chem ñi cümen. Fei tüfa ta femi, femngechi montulfi fentren che (1 Sam. 25:14-23, 32-35). Cafei cüme raquiduamliyiñ, quimaiñ chumül taiñ dungual ca chumül taiñ ñücüfnagal. Cafei duamtuafiyiñ caquelu pu che, huelu rume conlayaiñ fei engün ñi dungu mu, femngechi taiñ huesa duamelnoafiel (1 Tes. 4:11).

10, 11. Cüme papeltulmi ca cüme huirintuculmi, ¿chumngechi quelluafeimu? (Ca inaduamnge ti adentun).

¹⁰ Cümei tati huecheque lamngen ñi adümuhual fillque dungu mu. Pichicalu eimi adümuulimi fillque dungu mu, fei quelluafeimu com tami mongen mu. Peaiñ quiñeque dungu.

¹¹ Quim cüme papeltuaimi ca cüme huiriaimi. Quiñeque mapu mu, falintungequelafui ti domo ñi cüme papeltual ca ñi cüme huirial. Huelu müna cümefui tañi femal pu cristiana (1 Tim. 4:13). d Feimu cüdaungefule rume, quimcantuaimi  tami cüme papeltual ca tami cüme huirial. Femlimi, peafuimi quiñe cüdau tami mongeluhuam, cafei doi cüdautulayaimi tami papeltual Biblia ca tami enseñalelafiel caquelu. Fei tami cüme papeltufiel mu Biblia, doi fülconafuimi taiñ Huenu Chau Jehová (Jos. 1:8; 1 Tim. 4:15).

12. ¿Chem quimeltueiñmu Proverbios 31:26?

¹² Cüme allcütuaimi ca piuqueyenquechi dunguaimi. Tati pu cristiano müna falin-ngefui tañi femngechi femal engün. Biblia feipieiñmu: “Com eimün eluucülemün tamün allcütual, matucaulayaimün tamün dungual” (Sant. 1:19). Quiñe che dunguelmu, eimi cüme allcütufilmi, pengelaimi tami duamtuniefiel (1 Ped. 3:8). Eimi pepilnofilmi tañi chem pin ti che cam ñi chum duamcülen, ramtuafimi quiñeque dungu tami quimal, fei cüme raquiduamaimi tami chem piafiel (Prov. 15:28). Quisutu ramtuhuaimi: “¿Yafültucupeafiñ mai tañi feipifiel mu? ¿Cümepeai mai tañi feipifiel? ¿Yamün mu ca piuqueyen mu entuafun tañi feipin?”. Eimi inayentuafuimi pu lamngen cüme allcütuquelu ca piuqueyenquechi dunguquelu (papeltunge Proverbios 31:26). Inaduamafimi chem tañi feipiquen engün ca chumngechi ñi entuquen ñi feipin. Femngechi femülmi, doi cüme yeucüleaimi caquelu che mu.

13. ¿Chumngechi cüdaufengeafuimi ruca mu? (Ca inaduamnge ti adentun).

¹³ Cüdaufengeaimi tami ruca meu. Quiñeque mapu mu ti domo com cüdau reque femquei ruca mu. Tami ñuque cam caquelu lamngen quelluafeimu chumngechi tami cüdahual ruca mu. Quiñe lamngen Cindy pingelu feipi: “Tañi ñuque feipiquefeneu: ‘Quiñe domo cüme femle tañi cüdau, ayüucüleafui. Fei enseñaeneu tañi chumngechi deumaiyaelal, tañi liftuafiel ti ruca, ñi ñüdüfcayal, ca tañi quim ngillacayal. Tüfa rume quellueneu tañi mongen mu ca tañi doi cüdahuelafiel ta Jehová. Tañi ñuque ca quimeltueneu tañi cüme llohuafiel itrocom pu che. Femngechi quimfiñ fentrenque pu lamngen inayentufalngelu” (Prov. 31:15, 21, 22). Pu domo cüdaufengelu ruca mu ca cüme yeuquefilu itrocom pu che, rume falin-ngei tañi familia mu ca ti trahunche mu (Prov. 31:13, 17, 27; Hech. 16:15).

14. Tañi femün ta Crystal, ¿chem enseñaleimu ta eimi?

¹⁴ Adümcantuaimi quiñe cüdau tami mongeluhuam. Müna falin-ngei com pu cristiano ñi femal tüfa (2 Tes. 3:7, 8). Quiñe lamngen Crystal pingelu feipi: “Liceo mu mülefulu iñche, tañi pu chau ngülamtuquefeneu tañi amual quiñe clase mu enseñalngequelu contabilidad, feita quellueneu llemai tañi mongen mu”.  Re quintulayaimi müten quiñe cüdau tami huehual plata, ca femngechi cüme raquiduamnge chumngechi tami püneafiel (Prov. 31:16, 18). Eimi ayüucülelmi chumte tami nieel mu ca defecaunolmi, doi cüme serfiafuimi ta Jehová (1 Tim. 6:8).

15, 16. ¿Chumngelu am fente falin-ngei tati pu domo fütangenolu? (Marcos 10:29, 30).

¹⁵ Eimi cüme cristianangelmi ca adümuhulmi fillque dungu mu, quelluaimu tami femal fillque dungu tami mongen mu. Ngüneduamaiñ quiñeque dungu.

¹⁶ Cüpa fütangelaimi chi. Chumngechi ñi feipin Jesús, quiñeque domo eluucülequei tañi fütangenoal, tañi pu che ngüchaltucufelieyu rume tañi femal (Mat. 19:10-12). Caquelu lamngen, fillque dungu mu fütangequelai. Raquiduamlayaimi tañi fütangenon mu Jehová ca Jesús falintuquelaeneu pilayaimi. Tati pu domo fütangenolu, rume inayentufalngeingün trahunche mu. Quisu engün rume piuqueyechequeingün ca duamtuchequeingün, feimu ñuque reque, lamngen reque troquingequeingün (papeltunge Marcos 10:29, 30; 1 Tim. 5:2).

17. Üllchaque lamngen, ¿chumngechi pepicahuafuingün tañi cüdahuelafiel ta Jehová fill antü?

¹⁷ Fill antü cüdahuelafuimi ta Jehová. Com mapu püle, pu lamngen doi cüdauquei amuldungun mu (Sal. 68:11). ¿Ayüafuimi tami doi cüdahuelafiel ta Jehová? Precursorangeafuimi, cüdahuafuimi deumarucan mu cam Betel mu. Llellipuafimi ta Jehová tami femal. Nütramcayafimi caquelu peñi, lamngen deu conlu cam hue conlu feitachi cüdau mu. Quisu engün feipiafeimu chumngechi tami pepicahual. Rupan nütramcafilmi, raquiduamaimi chumngechi tami huechunenturpual. Acule feichi antü tami fill antü cüdahuelafiel ta Jehová, fei fillque dungu femafuimi Jehová ñi troquiñche mu.

18. Quiñe domo, ¿chumngelu am cuñiutucuhuafui inei tañi fütayeafiel? (Ca inaduamnge ti adentun).

¹⁸ Fütangeafuimi. Cüme cristianangelmi ca adümuhulmi fillque dungu mu, cüme domongeafuimi tami füta mu. Acordanienge, ayülmi tami fütangeal, cüme dulliaimi inei tami fütayeafiel. Tüfa ta pecan dungu no. Ti huentru tami fütayeafiel loncoleai eimi mu (Rom. 7:2; Efes. 5:23, 33). Fei fütayeafilmi quiñe huentru, hune ramtuhuafuimi: “¿Inayentuquepefi  mai ta Jesús? ¿Hunelu mu mai quintuquepefi tañi poyeafiel ta Jehová? ¿Cüme femquepei mai tañi mongen mu? ¿Huesa femün mu huelulcahun tati piquepei mai? ¿Yamquefi tati pu domo? ¿Quelluafeneu tañi doi hueniyeafiel ta Jehová? ¿Elupeafeneu mai com tañi duamnieel? ¿Cüme hueningepeafui mai iñche mu? Elungele quiñe cüdau, ¿com huechunentuquepefi mai? Trahunche mu, ¿elungequepei mai cüdau? ¿Cüme huechunentuquepefi mai?” (Luc. 16:10; 1 Tim. 5:8). Loncontucuaimi, ayünielmi tami peal quiñe cüme füta, eimi ca cüme domongeaimi.

19. Quiñe domo quelluntucuquelu tañi füta, ¿chumngelu am falin-ngei?

¹⁹ Biblia feipi quiñe cüme domo quelluntucuquei tañi füta (Gén. 2:18). Feimu mai, ¿feipipeafuiñ ti domo ñi müte falinon? Femlai llemai, rume falin-ngei. Biblia mu Jehová cütu ca feipingequei taiñ quelluqueteu (Sal. 54:4; Heb. 13:6). Quiñe cüme domo, ¿chumngechi quelluquefi tañi füta? Por ejemplo, ti füta ayüle ñi femal quiñe falin dungu ti familia mu, tañi domo quelluafeyu tañi cüme tripayal. Ca ti domo am piuqueyefilu Jehová, feimu quelluquei ñi cüme nütramcayal ta che tañi füta mu (Prov. 31:11, 12; 1 Tim. 3:11). Ayülmi tami fütangeal, pepicahuaimi ta fachantü. Doi piuqueyeafimi Jehová, quelluntucuaimi tami ruca mu ca ti trahunche mu.

20. Cüme ñuquengelmi, ¿chumngechi quelluafuimi tami familia?

²⁰ Ñuquengeafuimi. Fütangelmi, nierpuafuimu pichiqueche (Sal. 127:3). Feimu raquiduamafuimi chumngechi cüme ñuquengeafuimi. Com taiñ inaduamel tüfachi troquiñ mu quelluafeimu tami cüme domongeafel ca cüme ñuquengeafel. Eimi piuqueyefilmi tami familia ca nielfilmi paciencia engün, fei ayüucüleaingün ca tami pu pichiqueche cüme tremaingün ca piuqueyengelu troquihuaingün (Prov. 24:3).

21. ¿Chem raquiduamqueiñ taiñ pu lamngen mu, ca chumngelu? (Inaduamnge ti adentun hunen pagina mu).

²¹ Saquin pu lamngen, rume piuqueyehuiyiñ com tamün femquen Jehová ca tañi troquiñche mu (Heb. 6:10). Eluucüleimün tamün doi cüme cristianangerpual, cafei adümuuqueimün fillque dungu mu quisutu tamün cümelcahual ca tamün cümelcayafiel caquelu. Ca pepicaumequeimün tamün femal fillque dungu cüpalechi antü mu. Eimün ta müna falimün Jehová tañi troquiñche mu.