1. Füchalefulu rume, ¿chumngelu maneluhui Abrahán ñi nieal quiñe fotüm?

 JEHOVÁ feipicünufi tañi hueni Abrahán ñi nieal quiñe fotüm. Ca feipi tañi fotüm ñi duam mu, com pu che llohuai cümelcan (Gén. 15:5; 22:18). Abrahán rume maneluuquefui Chau Dios mu, feimu quimniefui ñi femtripayal tañi feipin. Abrahán puhul-lu 100 tripantu, ca tañi domo 90 tripantu, petu nielafui yall (Gén. 21:1-7). Huelu Biblia feipi: “Abrahán maneluhui. Fei feyentui ñi chaungerpual fentren troquiñche meu, chumngechi feipicünungei: ‘Alün-ngeai tami cüpanche’” (Rom. 4:18). Fei femtripai tañi feipicünungeel, chaungerpui tañi fotüm Isaac mu. ¿Chumngelu chi cai fente maneluucülefui ñi feipicünueteu Chau Jehová?

2. Abrahán, ¿chumngelu maneluhui Jehová ñi femtripayal tañi feipicünuel?

² Abrahán cüme quimnierquefui ta Jehová, feimu “rume maneluhui Chau Ngünechen ñi femürpual tañi feipicünuel” (Rom. 4:21). Abrahán ayühuelfi ta Jehová tañi feyentulen mu, feimu Jehová nor che troquieyu (Sant. 2:23). Romanos 4:18 feipi Abrahán maneluhui ca feyentui. Ngüneduamaiñ ñi feipin Pablo Romanos capitulo 5 mu maneluhun dungu meu.

3. ¿Chem feipi Pablo?

 ³ Pablo feipi chumngelu taiñ “maneluhun huesa duamelquelaeiñmeu” (Rom. 5:5). Ca feipi chumngechi doi maneluhuafuiñ. Ngüneduamaiñ Romanos 5:1-5. Ca raquiduamaiñ rupan mu ta tripantu, doi maneluuqueiñ ca chumngechi doi nehuencüleafui taiñ maneluucülen. Hune, ngüneduamaiñ chem maneluhun nütramcai Pablo ñi femtripayal cüpalechi antü mu.

4. ¿Chem feipilei Romanos 5:1, 2?

⁴ (Papeltunge Romanos 5:1, 2). Pablo huirintuculelfi tüfachi dungu pu peñi, pu lamngen Roma mu mülelu. Fei engün quimürpufi ta Jehová ca tañi fotüm Jesús. Tüfa engün feyenturpui ca cristianongerpuingün, feimu tañi feyentun mu “nor che” pieyu Jehová. Ca dullieyu engün quisu tañi nehuen mu, fei maneluhuingün ñi llohual tañi cullitu cüpalechi antü meu.

5. ¿Chem maneluuqueingün pu dullinque cristiano?

⁵ Pablo ca nütramcalelfi pu dullinque cristiano Éfeso mu ñi llohual cümelcan. Feipi Chau Dios ñi eluafiel “quiñe cullitu reque tati pu che dullicünungelu” (Efes. 1:18). Pablo ca feipifi pu Colosa che cheu ñi llohual feitachi cullitu. Feipi: “Maneluucüleimün tamün llohual ti cümelcan tamün elungeal huenu meu” (Col. 1:4, 5). Fei, ¿chem maneluuqueingün pu dullinque cristiano? Maneluucüleingün ñi huiñomongetual ca llohual afnoachi mongen huenu meu, tüfa mu ngünenietuai Jesús engün (1 Tes. 4:13-17; Apoc. 20:6).

6. ¿Chem feipi quiñe peñi dullin chengelu?

 ⁶ Pu dullin che rume falintuquefingün tañi maneluhun. Peafiyiñ ñi feipin peñi Frederick Franz 1991 tripantu mu. Feipi: “Chem taiñ maneluucülen rüf femtripayai. Com pu 144.000 dullin che llohuai tañi cümelcan. Ancapuulayai rume chem taiñ raquiduamün”. Fentren tripantu rupalu rume ñi serfiniefiel ta Jehová, ¿chem feipi taiñ peñi? ‘Falintuniefiyiñ chem taiñ maneluucülen. Rupan mu ta tripantu, doi mañumquefiyiñ taiñ maneluucülen. Eluucüleiñ taiñ üngümcüleal quiñe millon tripantu rupale rume. Feula doi piuquentucunien tañi maneluhun’.

7, 8. Epe com pu serfiquefilu Jehová, ¿chem maneluuqueingün? (Romanos 8:20, 21).

⁷ Fantepu mu, epe com pu che serfiquefilu Jehová maneluucülelai ñi amual huenu meu, doi mai maneluucülei ñi llohual rumel mongen mapu meu ngünenietule Chau Ngünechen. Abrahán ca femngechi maneluhun niequefui (Heb. 11:8-10, 13). Pablo ca nütramcai tüfachi maneluhun (papeltunge Romanos 8:20, 21). Hue quimlu eimi tati Biblia, quimimi chem ñi rupayal cüpalechi antü meu. ¿Chem am doi ayüfimi? ¿Tami culpan chengenoal pemai? ¿Ayüpelaimi ñi huiñomongetual tami pu che hue mapu mu? Ti maneluhun taiñ elueteu Chau Ngünechen, üngümnieiñ taiñ llohual fentren cümelcan.

⁸ Tati pu llohualu rumel mongen huenu meu ca ti mapu meu, com iñchiñ ayühuelqueiñmu taiñ maneluhun. ¿Chem quelluaiñmu taiñ doi maneluucüleal? Ngüneduamaiñ ñi feipin Pablo. Femngechi rüf femtripayai taiñ üngümnieel piafuiñ.

9, 10. Pablo reque, ¿chem dungu rupayaiñ? (Romanos 5:3; ca inaduamnge ti adentun).

⁹ (Papeltunge Romanos 5:3). Pablo feipi rupaliyiñ huesaque dungu mu, doi maneluhuafuiñ. Com pu cristiano quimiyiñ ñi rupayal huesaque dungu, Pablo feipifi pu Tesalónica che: “Quiñentrür mülelu iñchiñ, feipicünuhuiyiñ taiñ cutrancahual. Femngechi rupai tati” (1 Tes. 3:4). Ca feipifi pu Corinto che: ‘Cüpa nütrameluhuiyiñ chem taiñ rupan. Fütra huesa dungu mu rupaiñ, yafüngehuelaiñ, layaiñ pilefuiñ’ (2 Cor. 1:8; 11:23-27).

¹⁰ Fachantü ca quimnieiñ taiñ rupayal huesaque dungu (2 Tim. 3:12). Eluulu eimi tami inayafiel ta Jesús, ¿chem huesa dungu rupaimi? Ayentuqueimu chi tami pu hueni ca tami pu che. Tami nor chengen mu caiñetueimu chi tami jefe cam tami compañ cüdau (Heb. 13:18). ¿Inantucueimu mai ti gobierno ti amuldungun ñi duam mu? Chem huesaque dungu rume rupafuliyiñ, ayühuaimün pi Pablo. ¿Chumngelu cai?

11. ¿Chumngelu mülei taiñ nehuentuleal rupaliyiñ rume huesaque dungu?

¹¹ Rupaliyiñ rume huesaque dungu, ¿chumngelu ayüucüleafuiñ? Romanos 5:3 feipi: “Rupan mu iñchiñ huesaque dungu doi nehuentuqueiñ”. Com pu cristiano rupaqueiñ huesaque dungu mu, feimu eluucüleaiñ taiñ nehuentuleal. Yafüluucüleliyiñ ñi serfinieafiel Jehová llohuaiñ chem taiñ maneluuquen. Jesús nütramcai quiñeque che ayühun mu lloufemquei Chau Dios ñi dungu, huelu püntütripaquei rupan huesaque dungu mu. Fei trürümfi feichi pu che ti ‘fün quetran curantu mapu meu puulu’. Huelu iñchiñ femngechi chengelayaiñ (Mat. 13:5, 6, 20, 21). Inei no rume ayüquelai ñi rupayal huesaque dungu, huelu nehuencüleliyiñ ca serfiniefiliyiñ Jehová, entuaiñ cümeque dungu.

12. Nehuentuleliyiñ, ¿chumngechi quelluafeiñmu?

¹² Santiago feipi rupaliyiñ huesaque dungu mu, huelu nehuentuleliyiñ, quelluafeiñmu. Feipi: “Tamün nehuentulen mu cüme adümuucüleaimün, femngechi com dungu mu pepicaucüleaimün ca nielayaimün huelulcan chem dungu meu no rume” (Sant. 1:2-4). Nehuentuleliyiñ, ¿chumngechi quelluaiñmu? Doi nieaiñ ta paciencia, doi maneluucüleaiñ ca doi feyentuleaiñ Jehová mu. ¿Ca chem dungu mu quelluafeiñmu?

13, 14. Nehuencüleliyiñ rupan mu huesaque dungu mu, ¿chum duamelquefiyiñ Jehová? Ca, ¿chumngechi quelluqueiñmu? (Romanos 5:4).

¹³ (Papeltunge Romanos 5:4). Pablo feipi taiñ nehuentulen mu, “ayühuelquefiyiñ ta Chau Dios”. Iñchiñ feipilayafuiñ Jehová ñi ayüuquen taiñ rupan huesaque dungu mu, doi mai Jehová ayüuquei taiñ nehuentulen mu. Rume cümei taiñ ayühuelafiel Jehová taiñ femün mu (Sal. 5:12).

¹⁴ Raquiduamafiyiñ ta Abrahán. Abrahán rupafulu rume huesaque dungu mu, nehuencünuhui, feimu ayühuelmafi Jehová tañi piuque. Feimu Jehová tañi hueni troquieyu  ca nor che pieyu (Gén. 15:6; Rom. 4:13, 22). Iñchiñ cai, ¿chumngechi ayühuelafuiñ ta Jehová? ¿Taiñ nien fentren cüdau trahunche mu? Femlai. Doi mai, püntütripalayaiñ Jehová mu rupan mu huesaque dungu, femngechi ayühuelafiyiñ ta Jehová. Com iñchiñ nehuentuleafuiñ taiñ serfinieafiel Jehová. Tunten tripantu nieliyiñ rume, chem rupaliyiñ rume, ca tunte pepiluuliyiñ rume, com iñchiñ ayühuelafuiñ ta Jehová. Eimi rupamequeimi chi huesaque dungu fachantü, fei acordanienge: tami nehuentulen mu ayühuelquefimi ta Jehová. Quimnielu am ta iñchiñ Jehová ñi ayüucülen iñchiñ mu, feimu doi maneluhuaiñ taiñ cümelcayaeteu.

15. Pablo, ¿chem feipi Romanos 5:4, 5?

¹⁵ Apostol Pablo feipi nehuentuleliyiñ rupan mu huesaque dungu, ayühuelafiyiñ ta Jehová. Ca feipi: “Ayühuelfiliyiñ ta Chau Dios, maneluucüleaiñ. Ti maneluhun huesa duamelquelaeiñmeu” (Rom. 5:4, 5). Pablo deu feipifi pu cristiano: “Maneluuqueiñ taiñ saquieteu Chau Ngünechen” (Rom. 5:2). Feimu feitachi pu cristiano Roma mu mülelu deu maneluucülequefuingün. Huelu femafuingün quiñeque dungu tañi doi maneluhual engün.

16. ¿Chumngechi quiñe che doi maneluhuafui? (Ca inaduamnge ti adentun).

¹⁶ Hue feipingelu eimi tati pu che ñi rumel müleal mapu meu, ¿chem raquiduamimi? Rume cümefui ¿pipelaimi? ¿Rüfngei chi am? Huelu doi quimürpufilu ta Jehová ta eimi ca Biblia meu, doi maneluhuimi ñi rüf tripayal Biblia ñi feipin.

17. Deu fautizaulu eimi, ¿chumngechi doi maneluhuimi?

¹⁷ Rupan fautizaulu eimi, doi quimürpufimi  ta Jehová ca doi piuqueyefimi. Feimu doi maneluhuimi (Heb. 5:13–6:1). Rupaimi chi huesaque dungu mu, huelu quimnieimi Jehová ñi ayüucülen eimi mu, chumngechi ñi feipin Romanos 5:2-4. Jehová ayüucülelu eimi mu, fei doi maneluuqueimi tami cümelcayaeteu. Doi maneluucülelu am eimi, pengelqueimi tami chumquen mu, tami familia mu ca chumngechi pünequeimi tami tiempo.

18. Chau Dios ñi duam mu, ¿chem dungu mu maneluuqueiñ?

¹⁸ Pablo feipi ayühuelfiliyiñ ta Chau Dios, maneluucüleaiñ. Ca feipi Chau Dios ñi duam mu, rüf femtripayai taiñ maneluucülen. Feipi: “Ti maneluhun huesa duamelquelaeiñmeu. Chau Ngünechen eluqueiñmeu ñi nehuen, femngechi pengelquei fente taiñ piuqueyeteu” (Rom. 5:5). ¿Chem quimeltueiñmu? Taiñ maneluhun huesa duamelquelaeiñmeu, ¡rüf femtripayai llemai!

19. ¿Chem cüme quimnieiñ?

¹⁹ Jehová feipicünufi ta Abrahán ñi cümelcangeal. Tañi hueni troquifi ca rume ayüucülefui Abrahán mu. Rüf femtripai chem ñi maneluuquen ta Abrahán. Biblia feipi: “Abrahán tañi ñom piuquengen llohui chem tañi feipicünulelngeel” (Heb. 6:15; 11:9, 18; Rom. 4:20-22). Abrahán ñi maneluhun huesa duamel-laeyu, femtripai llemai. Iñchiñ ca femngechi llohuaiñ chem taiñ maneluuquen, püntütripanoliyiñ Jehová meu. Cüme quimnieiñ ñi huechurpual com taiñ feipicünueteu Jehová, feimu taiñ maneluhun ayühuelqueiñmu (Rom. 12:12). Pablo feipi: “Chau Ngünechen hulquei maneluhun. Eimün maneluuqueimün fei meu. Feimu llellipuquen tamün eluaeteu fentren ayühun ca cüme felen. Femngechi Chau Ngünechen ñi nehuen mu, com piuque meu maneluhuaimün” (Rom. 15:13).