1. Ñi ngüneduamfiel Abrahán ñi feyentun, ¿chem ramtuhuafuiñ?

 FENTREN che allcütuquei Abrahán mu, huelu rüf quimnielafingün. Iñchiñ fentren dungu quimnieiñ Abrahán mu. Quiñe dungu tüfa, Biblia feipi Abrahán fotümyefi tati pu feyentulelu fei reque (Rom. 4:11). Feimu ramtuhuafuiñ: “¿Inayentuafuiñ Abrahán? ¿Feyentuafuiñ Jehová fei reque?”. Femafuiñ llemai. ¿Chumngechi cai? Peafiyiñ.

2. Inaduamliyiñ Abrahán tañi femün, ¿chumngechi quelluaiñmu? (Santiago 2:22, 23).

² Inaduamliyiñ ñi femün Abrahán, feyentuafuiñ fei reque. Abrahán rumel inaquefui chem tañi feipieteu ta Chau Dios. Feimu fütra camapu huiñamtuhui, tolto ruca mu mülequefui ca eluhui ñi chalintucuafiel tañi fotüm Isaac. Femngechi quimfalcünui tañi rume feyentulen. Tañi feyentun ca tañi cümeque femün mu, Abrahán ayühuelfi ta Jehová ca hueniyerpufi (papeltunge Santiago 2:22, 23). Jehová ca ayüquei iñchiñ taiñ ayühuelafiel ca taiñ hueniyeafiel. Feimu adcünufi Pablo engu Santiago ñi huirintucual Abrahán tañi rupan. Peaiñ Romanos capitulo 4 ca Santiago capitulo 2 ñi chem pin Abrahán meu.

3. Pablo engu Santiago, ¿chem versiculo mu nütramcaingu?

³ Pablo engu Santiago feipingu chem tañi huiriconcülen Génesis 15:6 mu. Feipi: “Abrán feyentufi ta Jehová, feimu nor huentru troquieyu”. Jehová feichi che tañi ayühueleteu norngechi che troquiquefi. Raquiduamnge:  quiñe che culpan chengelu rume, Jehová nor che troquiafeyu. Afmatufali. Iñchiñ, ¿ca femngechi ayüpelayafuiñ taiñ nor che piaeteu ta Jehová? Feimu, ¿chem mülei taiñ femal? Taiñ quimal, peafiyiñ chumngelu Jehová nor che feipifi ta Abrahán.

4. Iñchiñ taiñ duam mu, ¿chumngelu am nor chengelayafuiñ?

⁴ Pablo feipi “com che culpaquei”, feimu iñchiñ taiñ duam mu nor chengelayafuiñ (Rom. 3:23). Fei Jehová ñi adquiñ mu, ¿chumngechi am nor che troquingeafuiñ? Ca, ¿chumngechi ayühuelafuiñ? Taiñ quimal, peafiyiñ ñi feipin Pablo Abrahán mu.

5. ¿Chumngelu Jehová nor che feipifi ta Abrahán? (Romanos 4:2-4).

⁵ Canaán mapu mülelu Abrahán, nor che pieyu Jehová. ¿Chumngelu am nor che pingei Abrahán? ¿Ñi cüme inaniefiel Moisés ñi ley pemai? Femlai (Rom. 4:13). Feichi mu, ngelafui feichi ley, 400 tripantu rupalu hula hulngei tüfachi ley. Fei, ¿chumngelu Jehová nor che feipifi ta Abrahán? Cutranpiuqueyefi ca inaduamüñmafi tañi feyentulen (papeltunge Romanos 4:2-4).

6. Quiñe culpachi che, ¿chumngelu am nor che piafeyu Jehová?

⁶ Ti apostol Pablo feipi quiñe che “feyentufile ta Chau Dios, nor che pingeai culpale rume” (Rom. 4:5). Ca feipi: “Quiñe huentru cüme inanofile rume ti ley, Chau Ngünechen nor che troquiaeyu, feimu ayüuquei. David nütramcai feichi dungu, feimu feipi: ‘Ayühun niei feiti che rulpacünuñmangelu ñi huesa femün, ca tati pu ngoimanentungelu ñi culpan. Ayühun niei ti huentru, Chau Jehová raquinieñmalayafi ñi culpan’” (Rom. 4:6-8; Sal. 32:1, 2). Jehová rulpacünuñmaquefi ñi culpan com tañi pu feyentuqueteu, feimu tañi feyentulen mu engün culpanolu reque felei Jehová ñi adquiñ mu.

7. Cuifi pu serfiquefilu Jehová, ¿chumngelu nor che pingefuingün?

⁷ Abrahán, David ca caquelu che nor che pingefuingün rume, huelu culpafengefuingün. Huelu tañi feyentun mu engün, doicülefuingün pu feyentulenolu meu. Culpan-ngenolu troquinieyu Jehová (Efes. 2:12). Pablo huirintuculelfilu pu Roma che cüme quimfalcünui tüfa: ayüliyiñ taiñ hueniyeaeteu Jehová, mülei taiñ feyentual quisu meu. Abrahán engu David hueniyequefuingu Jehová tañi feyentun mu. Iñchiñ ca femngechi femafuiñ.

8, 9. ¿Chem piquei quiñeque che ñi huirintucuel Pablo engu Santiago? Ca, ¿chumngelu feipiqueingün?

⁸ Fentren tripantu mu, quiñeque religioso doi falintuquefingün taiñ feyentual, caquelu doi falintuquefingün tañi femal cümeque dungu. Cuifi mu, pu religioso quimeltuqueingün taiñ montulngeal mülei taiñ feyentual Jesús mu. Quiñeque religioso feipiqueingün: “Feyentulelmi Jesús mu, montuaimi”. Ca quiñeque feipiquei Pablo quimeltui ta Chau Dios nor che troquiafui quiñe che, huelu inaduamquelai tañi femquen (Rom. 4:6). Huelu ¿chem quimeltuquei caquelu religioso? Feipiqueingün  amuliyiñ yamfalngechi mülehue mu ca cümeque dungu femliyiñ, femngechi müten montuaiñ piqueingün. Feipiafuingün chi ñi feipilen ta Santiago 2:24: “Nor che troquingei ta che tañi femün mu, feyentun meu müten no”.

⁹ Mülen mu caquerume raquiduam, feimu quiñeque adümuhun-ngechi che feipiqueingün ñi feipin Pablo ca Santiago quiñeucülelai. Feimu quimngelai chumngechi ñi tutengeal ta Ngünechen piqueingün. Ca feipiafuingün Pablo ñi feipin mu re duamfali taiñ feyentual Chau Dios mu, femngechi taiñ tuteafiel. Huelu Santiago feipi re duamfali taiñ femal cümeque dungu, femngechi taiñ tuteafiel Jehová. Quiñe quimeltufe quimeltuquelu religion mu feipi: “Santiago quimtuculafui chumngelu Pablo feipiquefui re taiñ feyentual müten duamfali” pi tati quimeltufe. Quiñeucülelai ñi feipin Pablo engu Santiago piafuiñ, huelu Jehová tuculelfi ñi raquiduam ñi huirintucual engu (2 Tim. 3:16). Feimu, ¿chumngelu caquerumei ñi huirintucuel engu? Inaduamafiyiñ caquelu dungu ñi feipin engu, femngechi taiñ doi cüme adümafiel tüfa.

10. ¿Chem dungu mu nütramcai Pablo? (Romanos 3:21, 28; ca inaduamnge ti adentun).

¹⁰ Doi quimafiyiñ ñi feipin ta Pablo. Romanos 3 ca 4 Pablo nütramcai Moisés tañi ley mu (papeltunge Romanos 3:21, 28). Pablo ñi antü mu, quiñeque judio rume falintuquefuingün Moisés ñi ley, feimu petu mülei ñi inangeal piquefuingün. Feimu Pablo nütramcalelfi engün Abrahán ñi femün mu. Quimeltui ñi nor chengeal quiñe che, duamfal-lai ñi inayafiel Moisés ñi ley, huelu mai  tañi feyentual Jehová mu. ¿Chem quimeltuqueiñmu iñchiñ tüfa? Taiñ nor che piaeteu Jehová, mülei taiñ feyentual quisu meu ca Jesús mu.

11. ¿Chem nütramcai Santiago?

¹¹ Doi ngüneduamafiyiñ ñi feipin ta Santiago. Santiago capitulo 2 nütramcalai ti ley dungu mu Pablo reque, feimu Santiago feipilu “nor che troquingei ta che tañi femün mu”, ¿chem cüpa feipifui tüfa? Tüfa ta com ñi femquen quiñe cristiano tañi mongen mu. Ñi femqueel mu pengeli ñi rüf feyentulen Jehová mu. ¿Chumngechi am? Peafiyiñ epu dungu ñi feipin ta Santiago.

12. ¿Chumngechi pengeli Santiago taiñ feyentual ca taiñ femal cümeque dungu? (Ca inaduamnge ti adentun).

¹² Hunelu mu, Santiago nütramcai taiñ dullichenoal. Fei Santiago adentucünui tüfa. Nütramcai quiñe huentru mu doyümfi quiñe ülmen che, huelu illamcafi quiñe pofre. Fei Santiago ca feipi feitachi huentru feipifule rume ñi feyentun Chau Jehová mu, huelu tañi femün mu pengeli tañi femquenon (Sant. 2:1-5, 9). Peaiñ ca quiñe dungu ñi feipin Santiago. Fei nütramcai quiñe che pefile quiñe peñi cam quiñe lamngen nienolu tacuhun ca iyael, fei quellunofile, ¿chem pengeli? Tunte feyentulen pifule rume, huelu tañi femün pengeli ñi feyentulenon. Feimu Santiago feipi: “Femnoliyiñ cümeque dungu, falilai taiñ feyentun” (Sant. 2:14-17).

13. ¿Inei mu nütramcai Santiago? Ca, ¿chem quimeleiñmu? (Santiago 2:25, 26).

¹³ Santiago nütramcai Rahab mu, quisu pengeli ñi feyentun tañi cüme femün mu (papeltunge Santiago 2:25, 26). Rahab  allcütuquefui Jehová mu, ca quimniefui Jehová ñi quelluquefiel pu Israel che (Jos. 2:9-11). Fei, ¿chumi? Ellcalfi epu lloftumapuyaulu ñi montual tañi mongen engu. Tañi femün mu, Rahab pengeli ñi feyentulen Jehová mu. Tüfachi domo culpafengefui ca inanielafui Moisés ñi ley, huelu Jehová nor che troquieyu, Abrahán reque. ¿Chem quimeltueiñmu ñi femün Rahab? Mülei taiñ pengelal taiñ feyentun taiñ cüme femquen mu.

14. ¿Chumngelu feipiafuiñ ñi feipin Pablo ca Santiago quiñeucülei?

¹⁴ Pablo ca Santiago caquerumei ñi nütramcan engu, huelu chaftuulaingu, quiñeucülei ñi quimeltuqueel feyentun mu ca cüme femün. Pablo feipifi pu cristiano judio tuhun-ngelu re inaniefile müten Moisés ñi ley, nor che pilayaeyu Jehová. Santiago feipi com pu cristiano mülei cümelcacheal, femngechi ñi pengelal ñi feyentun.

15. ¿Chem femafuiñ taiñ pengelal taiñ feyentun? (Ca inaduamnge ti adentun).

¹⁵ Taiñ nor chengeal Jehová tañi adquiñ mu, ¿mülei taiñ femal com ñi femün ta Abrahán? Feingelai, mülei caquelu cümeque dungu taiñ femal. Cüme llohuafuiñ com pu che amulu taiñ trahun mu, quelluafiyiñ pu peñi, pu lamngen chem ñi duamnieel, ca füreneafiyiñ taiñ pu che. Femliyiñ, Jehová ayüucüleai iñchiñ mu ca cümelcayaiñmu (Rom. 15:7; 1 Tim. 5:4, 8; 1 Juan 3:18). Cafei pengelqueiñ taiñ feyentun amuldungun mu, tüfa rume falin-ngei (1 Tim. 4:16). Com iñchiñ taiñ femquen mu pengelaiñ taiñ feyentulen Chau Jehová  mu, ca ñi maneluucülen com ñi feipicünuel Chau Jehová. Femngechi femliyiñ, Jehová nor che piaiñmu ca hueni piaiñmu.

16. ¿Chem mu maneluhui Abrahán?

¹⁶ Romanos capitulo 4 quimeltueiñmu mülei taiñ maneluhual ñi huechutriparpual chem taiñ feipicünueteu ta Jehová, Abrahán reque. Jehová feipifi ta Abrahán “fentren troquiñche” cümelcangeai quisu tañi duam meu. Afmatufali tüfa, ¿felelai am? (Gén. 12:3; 15:5; 17:4; Rom. 4:17). Huelu Abrahán 100 tripantu niefui, Sara 90 tripantu niefui, petu nielafuingu familia. Turpu nielayafuingu yall piafui pu che. Cüdaungefui Abrahán mu, huelu maneluhui müten. “Fei feyentui ñi chaungerpual fentren troquiñche meu” (Rom. 4:18, 19). Rupachi antü meu, huechutriparpui ñi üngümnieel, fei nierpui ti fotüm ñi feipicünueteu Chau Ngünechen (Rom. 4:20-22).

17. ¿Chumngelu quimnieiñ taiñ nor chengeal Jehová ñi adquiñ mu?

¹⁷ Abrahán reque, iñchiñ ca nor che troquiaiñmu Jehová ca tañi hueni piaiñmu. Feita quimeltui Pablo. Quisu feipi Abrahán “nor che pingetui”, huelu ‘Abrahán müten feipingelai’, com iñchiñ nor che pingeafuiñ, ¿chumngelu? Pablo feipi: “Com iñchiñ feyentuqueiñ Chau Ngünechen ñi huiñomongeltufiel taiñ Ñidol Jesús rangiñ tati pu la, feimu nor che pingeaiñ” (Rom. 4:23, 24). Abrahán reque, mülei taiñ feyentuleal Jehová mu, taiñ femal cümeque dungu ca taiñ maneluucüleal Jehová ñi huechuenturpual com ñi feipicünuel. Pablo amulei ñi nütramcan taiñ maneluhun Romanos capitulo 5 mu. Ca troquiñ mu, peafiyiñ.