JEHOVÁ eluqueiñmu fillque cümeque regalo, ca elueiñmu quisu taiñ dullial chumngechi püneafiel. Quiñe tüfa tati pulcu. Biblia feipi: “Tati cofque deumangequei taiñ ayühuelaeteu, ca ti pulcu ayühuelmaqueiñmu taiñ mongen” (Ecl. 10:19; Sal. 104:15). Huelu quiñeque mu, ti pulcu rume huesalcaquefi tati pu che. Cafei caquerumei ñi raquiduam pu che pulcu mu. Feimu, ¿chumngechi dulliafui pu cristiano tunte tañi putual engün?

Taiñ cüme dullial chem taiñ chumal, inalayaiñ tati pu che ñi raquiduam cheu taiñ mülen. Doyelchi mai mülei taiñ inayal Chau Dios ñi raquiduam putun dungu meu, femngechi doi ayüucüleaiñ.

Fentren che rume putuquei. Quiñeque che putuquei ñi tüngduamcüleal. Caquelu ñi ngoimanentual tañi huesaque rupan. Ca quiñeque che raquiduamquei: “Doi nehuentucuqueneu ta pulcu, doi nieafun ta valor tañi dungual” piqueingün

Huelu pu cristiano inaqueiñ cümeque ngülam taiñ elueteu taiñ Chau Dios. Biblia feipieiñmu ngolliconcüleliyiñ, conafuiñ huesaque dungu mu. Proverbios 23:29-35 feipi quiñe che fütra ngollicaulu, fei fillque huesaque dungu mu coni. a Europa mapu mu, quiñe loncolelu Daniel pingelu, petu ñi testigongenon ngollifengefui. Fei feipi: “Tañi putufengen mu, rume huesa dullin tañi chem chumal. Cafei rume huesa rupan, fei tüfa petu cutrantupiuquelqueneu”.

¿Chumngechi cüme dulliafuiñ tunte taiñ putual? Ca, ¿chem quelluafeiñmu taiñ connoal huesaque dungu mu? Eluhuaiñ taiñ adnieaeteu Chau Dios ñi raquiduam.

Peaiñ chem pin Biblia putun dungu meu ca chem yequeyu che ñi putual.

Biblia catrütuquelafi ta che ñi putunoal pulcu. Doi mai pengeli putun mu pulcu ayühuelpiuquequei ta che. Biblia feipi: “Iñmunge tami iyael ayühun mu, ca putuñmunge tami pulcu cüme duam mu” (Ecl. 9:7). Cafei Jesús ca caquelu poyequefilu ta Jehová putuquefuingün pulcu (Mat. 26:27-29; Luc. 7:34; 1 Tim. 5:23).

Biblia feipiquelaeiñmu taiñ putunoal pulcu, doi mai taiñ ngollicaunoal. Biblia ngülamtuqueiñmu: “Ngollicauquelayaimün” (Efes. 5:18). Cafei feipi ‘pu ngollife conlayaingün Chau Ngünechen ngünenietule ta mapu’ (1 Cor. 6:10). Jehová ayüquelafi tati pu che ngollicauquelu ca pu rume putuquelu. Feimu inalayaiñ ñi chem pin tati pu che taiñ lof mu mülelu, doi mai inayaiñ Jehová ñi raquiduam.

Quiñeque che feipi: “Iñche pütocoquen alün pulcu, huelu ngolliquelan”. Cuñihun-ngei feichi raquiduam. Biblia cüme feipi pu che “putufengelu” conqueingün rume huesaque dungu, ca hueniyehuelayafi ta Chau Jehová (Tito 2:3; Prov. 20:1). Jesús ca feipi putucauquelu conlayaingün tati hue mapu (Luc. 21:34-36).  Ti putun huesalcaquefi ta che, ¿chumafui pu cristiano ñi connoal feichi huesa dungu mu?

Cuñihun-ngeafui inayentuafiel tati pu che taiñ lof mu, tunte taiñ putual cam putunoal. Feimu inaqueiñ ñi chem pin Jehová chem taiñ iyal ca taiñ putual. Biblia feipi: “Ilmün, pütocolmün, chem rume femülmün, itrocom femqueaimün ñi püramyengeal ta Chau Ngünechen” (1 Cor. 10:31). Taiñ raquiduamal tunte taiñ putual ngüneduamafiyiñ quiñeque ramtun ca ngülam Biblia mu mülelu.

¿Putuquen mai tañi tuteafiel ta caquelu che? Éxodo 23:2 feipi: ‘Inayentuquilnge ñi femqueel epe com pu che’. Jehová ngülamtufi pu Israel che ñi inayentunoafiel pu femquelu huesaque dungu. Pu cristiano ca mülei ñi inayal feitachi ngülam. Inayentuliyiñ caquelu che ñi raquiduam ca tañi femün, huesa femafuiñ ca püntütripayafuiñ Jehová mu (Rom. 12:2).

¿Putuquen tañi nehuen che ñi troquingeal? Quiñeque lof mu, pu che rumel alün pulcutuquei, fei tüfa huesa dungu troquingelai (1 Ped. 4:3). Huelu 1 Corintios 16:13 feipi: “Trepeluucülemün, nehuentulepe tamün feyentun, nehuen piuquecünuumün, yafüluucülemün”. Quiñe che putufengelu, cüme raquiduamquelai ca huesa dulliquei. Feita nehuen-ngechi che no tati, doi mai pengeli ñi quimchengenon. Isaías 28:7 feipi pu rume putuquelu tampauquiyauquei ca huelulcauquei.

Taiñ cüme femal, recüluuqueaiñ Chau Jehová mu. Ca mülei taiñ trepeluucüleal ca nehuentuleal taiñ feyentun (Sal. 18:32). ¿Chumngechi femafuiñ? Cuñiutucuhuaiñ ca famentuafiyiñ chem dungu rume taiñ püntünentuaeteu Chau Jehová mu. Femngechi femi Jesús mülepalu mapu mu, pengeli ñi nehuen  piuquengen ca yafüluhui ñi femal cümeque dungu, feimu fentren che yamquefeyu.

¿Putuquepen mai tañi fill raquiduamnoal? Ti salmista feipifi ta Jehová: “Rume fentrelu iñche meu tañi fill raquiduamcülen, eimi nehuentuen ca yafüduamelen” (Sal. 94:19). Huesa duamcülelmi, ngelai tami putual, doi mai recüluunge Jehová mu. Quelluafeimu tami doi llellipuafiel ta Chau Jehová. Eluunge tami ngülamtueteu quiñe quim peñi, lamngen trahunche mu. Quiñe che putule ñi famentuafiel huesaque dungu ñi rupan, nehuen-ngehuelayai tañi cüme femal (Os. 4:11). Deu nütramcaiñ taiñ peñi Daniel, fei feipi: “Cutrantupiuquelefun ca huesa duamcülefun tañi culpan mu, feimu pulcutuquefun tañi raquiduamnoal. Huelu doi huesaque dungu conquefun, elcünueneu tañi pu hueni ca quisu yamuuhuelan”. ¿Chem quellueyu taiñ peñi? Quisu feipi: “Ngüneduamün ñi duamniefiel Chau Jehová ñi quellu. Ti pulcu quellulayafeneu. Jehová ñi quellun mu chaftufiñ tañi huesa rupan”. Cüme elcünulayaiñ taiñ huesa rupan troquihuafuiñ, huelu ngoimalayaiñ Chau Jehová eluucülequei taiñ quelluaeteu (Filip. 4:6, 7; 1 Ped. 5:7).

Pulcutulmi, ngüneduamuhuafuimi. Ramtuhuafuimi: “¿Feipingequen fente tañi pulcutumequen?”. Femngechi feipielmu quiñe tami pu che cam hueni, pengelaimu chi tami fente putumequen. “Fantepu mu, ¿doi pulcutumequen?”. Putufengelaimi, huelu doi pulcutumequelmi, ñochiquechi putufengerpuafuimi. “Pulcutunoli quiñeque antü, ¿huesa duamquepen mai?”. Cüdautulmi ñi pulcutunoal quiñeque antü, epe conimi putun dungu meu, fei ¿duamniepelaimi quiñe doctor tami quelluaeteu?

 Ñi rupanoal huesa dungu, quiñeque cristiano putuquelai chem pulcu no rume. Caquelu ayüquelafi ti pulcu. Yamqueafiyiñ feichi pu che pulcutuquenolu, huesa piquelayafiyiñ, femngechi pengelaiñ taiñ duamtuchequen.

Cümeafui tami raquiduamal tunte tami pulcutual, fei quisutu ngünehuaimi. Raquiduamafuimi chumül pulcutuaimi. Quiñeque che quiñe rupa müten semana mu pulcutuquei, caquelu pichi pulcutuquei in mu. Ca dulliafuimi chem tami putual cam putunoal. Quiñeque che putuquei pichi pulcu, cerveza, co manzana, huelu putuquelai doi fuertengechi pulcu, reyülelu cochi co engu rume. Cüme raquiduamliyiñ tunte ca chem pütocoal, doi ngüneucüleaiñ. Quiñe cristiano quimchengelu cüme raquiduami tañi chem chumal putun dungu mu ca ngüneuquei, huesa duamcülelayai ñi chem pieteu caquelu che.

Cafei duamtuqueafiyiñ ta caquelu che. Romanos 14:21 feipi: “Doi cümei tami inoal ilo, pulcutunoal ca femnoal chem no rume, femngechi tami huelulcanoafiel tami peñi”. Feimu duamtuchequeaiñ ca piuqueyechequeaiñ. Huesa duamelfiliyiñ quiñe peñi, lamngen pulcutuliyiñ, fei pulcutulayaiñ. Femngechi pengelaiñ taiñ yamchefengen ca piuqueyechefengen, inalayaiñ taiñ quisu cümelcaleal müten no, caquelu che ñi cümelcaleal llemai (1 Cor. 10:24).

Pu cristiano mülei ñi inayal ñi chem pin pu gobierno pulcu dungu mu. Quiñeque gobierno feipiquei tunten tripantu niei ta che fei ñi pulcutual, cafei feipiafui pu manejaquelu auto cam caquelu maquina ngelai ñi putual. Pu cristiano mülei ñi inayal ñi chem pin pu gobierno (Rom. 13:1-5).

Jehová eluqueiñmu quisu taiñ dullial chumngechi püneafiel fillque regalo taiñ elueteu. Feimu com iñchiñ dulliafuiñ chem taiñ iyal ca pütocoal. Cüme dulliaiñ mai, fei pengelaiñ taiñ cüpa ayühuelafiel taiñ Huenu Chau Jehová.