TROQUIÑ ÑI CHILLCATUNGEAL 48
ÜLCANTUN 97 Chau Dios ñi Dungu mongelniequeiñmu
Ñi femün Jesús cofque mu,¿chem quimeltueiñmu?
“Iñche tati cofque hulquelu rüfngechi mongen. Tuchi cüpalu iñche mu, ngüñühuelayai” (JUAN 6:35).
¿CHEM QUIMAIÑ?
Juan capitulo 6 nütrameleiñmu quiñe afmatun dungu ñi femün Jesús. Pichin cofque ca challhua mu entui fentren iyael, ¿chem quimeltueiñmu tüfa? Inaduamafiyiñ.
1. ¿Tunte falin-ngefui ti cofque cuifi mu?
TI COFQUE fei tati doi falin-ngechi iyael ñi niefel pu che cuifi mu (Gén. 14:18; Luc. 4:4). Fente ñi falin-ngen, ti Biblia üitufi “cofque” ta chem iyael rume (Mat. 6:11). Cafei Jesús femi epu afmatun dungu cofque mu (Mat. 16:9, 10). Quiñe tüfachi afmatun dungu inaduamafiyiñ, Juan capitulo 6 mu mülei, fei entuaiñ falinque quimeltun.
2. ¿Chumngelu fentren che duamniefui iyael?
2 Pu apostol rume amuldungufuingün, feimu ayüniefuingün ñi ürcütual. Fei püraingün quiñe farcu mu Galilea lafquen mu tañi amual camapu, Betsaida püle, tañi quisuleal engün (Mar. 6:7, 30-32; Luc. 9:10). Huelu müchai müten acui fentren che ñi pepayafiel Jesús. Fei cüme lloufi engün, piuqueyenquechi quimeltufi Chau Dios ñi ngünenietual ta mapu ca tremoltufi pu cutran. Petu nagantüi, feimu pu discipulo ramtuuquefuingün cheu peafuingün iyael com feichi pu che. Quiñeque engün yeniepelai roquiñ, huelu epe com engün mülefui ñi ngillameal iyael caque lof püle (Mat. 14:15; Juan 6:4, 5). ¿Chumi Jesús? Peafiyiñ.
AFMATUFALI CHUMNGECHI ÑI ELUFIEL COFQUE
3. Pefilu Jesús ñi ngüñülen fentren che, ¿chumi? (Ca inaduamnge ti adentun).
3 Jesús feipifi tañi pu apostol: “Ngelai ñi amutual engün. Eimün elufimün iyael” (Mat. 14:16). ¡Fütra dungu tüfa! Üye mu mülefui 5 mil huentru, ca raquifiliyiñ pu domo ca pu pichiqueche, doi 15 mil che peno duamniefui iyael (Mat. 14:21). Andrés feipi: “Fau mülei quiñe pichi huentru, niei quechu cahuella cofque ca epu pichique challhua. Huelu, ¿elupeafuiñ mai ñi iyal tüfachi fütra troquiñche?” (Juan 6:9). Pu che huimtulequefui ñi iyal feichi cahuella cofque, ca feichi pichique challhua, ¿ancülepelafui ca chadiñmalefui peno? Femfule rume, duamfalngefui fentren tüfa ñi iyal com feichi pu che.
Jesús elufi chem ñi duamnieel tati pu che ca quellufi engün ñi hueniyerpuafiel Chau Dios. (Inaduamnge parrafo 3).
4. ¿Chem quimeltueiñmu Juan 6:11-13? (Ca inaduamnge ti adentun).
4 Jesús piuqueyenquechi lloufi tati pu che, fei huercüfi ñi troquiñcünuhual engün ca ñi anüal cachu mu (Mar. 6:39, 40; papeltunge Juan 6:11-13). Biblia feipi Jesús ñi mañumfiel tañi Chau ñi elueteu ti cofque ca pichique challhua. Femngechi pengeli inei mu ñi cüpan feichi iyael. Inayentuafiyiñ ñi femün Jesús. Quisuleliyiñ cam compañngeliyiñ, petu taiñ inon mañumafiyiñ Chau Jehová. Fei hula, Jesús hudamcafi ti iyael, fei huedai com pu che. Sofrai iyael, Jesús ayülai ñi ngünamcangeal. Feimu feipi ñi trapümngeal, ¿ingepelayafui hula? Femngechi Jesús quimeltueiñmu taiñ ngünamcanoal taiñ nieel. Pu chau ca pu ñuque nütramelafui tüfa tañi pu pichiqueche, femngechi quimeltuafuingün ñi llellipual petu tañi inon, cüme lloucheal ca ayühunquechi hulal tañi nieel.
Ramtuunge: “¿Llellipuquen petu ñi inon Jesús reque?”. (Inaduamnge parrafo 4).
5. Pu che pefilu ti afmatun dungu ñi femün Jesús, ¿chumi? Ca, ¿chumi cai Jesús?
5 Allcütulu pu che chumngechi ñi quimeltuquen Jesús ca pefiel mu afmatun dungu ñi femün, afmatulehueingün. Quimniefuingün Chau Dios ñi feipicünufiel ta Moisés ñi dullial quiñe falin-ngechi huerquen, fei ramtuupelaingün “¿Jesús no am chi feiti huerquen peno?” (Deut. 18:15-18). ¿Raquiduampelaingün “Jesús cüme lonco ülmen-ngerpuafui, hulafui iyael com taiñ troquiñche”? Feimu peno pu che eluhui “ñi nüafiel ta Jesús, femngechi ñi lonco ülmencünuafiel” (Juan 6:14, 15). ¿Chumi Jesús? “Amui ti huincul mu”. ¿Chumngelu femi? Roma petu ngüneniemequefui pu judio, fei Jesús ayülai ñi conal pu judio ñi politico dungu meu. Dicümtucungelu rume, eluulai ñi femal. ¡Rume inayentufali ñi femün!
6. ¿Chumngechi inayentuafuiñ ñi femün Jesús? (Ca inaduamnge ti adentun).
6 Inei no rume feipilayaiñmu taiñ entual fentren iyael pichin cofque mu ca taiñ tremoltucheal, ca obligangelayaiñ taiñ lonco ülmen-ngeal. Huelu dicümtucungeafuiñ taiñ quelluntucuafiel quiñe candidato. Femngechi rupafuliyiñ, inayentuafiyiñ ta Jesús, fei eluulai ñi conal politico dungu mu. Doi mai feipi: “Iñche ñi ngünenietuafiel mapu trürlayai mapu müleyechi gobierno reque” (Juan 17:14; 18:36). Taiñ cristianongen mu, ayünieiñ Chau Dios müten ñi ngünenieal, feimu tüfa quimeltulelquefiyiñ pu che ca llellipuqueiñ ñi ngünenietual (Mat. 6:10). ¿Ca chem quimeltun entuafuiñ Jesús ñi femün tati cofque mu? Peafiyiñ.
Jesús coneltuquelai politico dungu mu, mülei taiñ inayentuafiel. (Inaduamnge parrafo 6).
“TI AFMATUN DUNGU ÑI FEMÜN TI COFQUE MU”
7. 1) ¿Ca chem afmatun dungu femi Jesús? (Juan 6:16-20). 2) ¿Chumingün pu apostol?
7 Elufilu hula iyael feichi fentren pu che, Jesús feipifi tañi pu apostol ñi huiñotual ta Capernaúm farcu mu, fei quisu huincul mu amui ñi lonco ülmencünungenoal (papeltunge Juan 6:16-20). Petu ñi amulen engün farcu mu, fütra cürüftucu mahuni. Fei Jesús namuntu amui huente co mu ca feipifi ta Pedro ñi ca femngechi trecayal (Mat. 14:22-31). Püralu Jesús farcu mu, tüngnagi ti cürüf. Fente ñi afmatulehuen pu discipulo, feipingün: “Rüfcünu llemai, eimi Chau Ngünechen ñi Fotümngeimi” (Mat. 14:33). a Huelu petu cüme adümlafuingün chumngechi nüucülefui tüfachi rupan ca ñi femün Jesús cofque mu. Petu quimlafuingün tunte puuquefui ñi nehuen ta Jesús. Biblia ca feipi pu apostol “ngüneduamlafingün chem ñi quimeltueteu ti afmatun dungu ñi femün ti cofque mu, pepi piuquentuculafingün”, feimu afmatulehueingün (Mar. 6:50-52). Pichiñma hula, Jesús ca huiño nütrameleyu engün ti afmatun dungu ñi femün cofque mu, fei ca quiñe quimeltun entuaiñ tüfa mu.
8, 9. ¿Chumngelu fentren che ca huiño quintumefi ta Jesús? (Juan 6:26, 27).
8 Fentren feichi pu che elungelu iyael re ayüniefuingün tañi ilelngeal müten. Ca antü mu, ti pu che quimtucui ñi amutun Jesús ca tañi pu apostol, fei püraingün quiñeque farcu mu Tiberíades mu cüpalu ñi quintumeafiel ta Jesús Capernaúm meu (Juan 6:22-24). ¿Ayüniepeingün mai ñi doi quimeltungeal Chau Dios tañi dungu? Femlai, re ayüniefuingün ñi elungeal cofque. ¿Chumngechi quimnieiñ tüfa?
9 Inaduamnge chem ñi rupan pefilu pu che ta Jesús. Fei feipifi tati pu che ñi re quintupaeteu tañi elungeal iyael. Feipifi: “Quintumun huedalu cai eimün tamün ifielchi cofque mu”, feichi “iyael funaquelu” pifi. Huelu mai yafültucufi engün ñi cüdahual tañi elungeal tati “iyael afquenolu ca hulquelu rumel mongen” (papeltunge Juan 6:26, 27). Ca feipifi Chau Jehová mu cüpai feichi iyael. Feipingelu engün ñi rumel mongeleafel iyael mu, ¿afmatulehuepelaingün? Ramtuupelaingün: “¿Chem iyael am ta feiti? ¿Cheu peafuiñ?”.
10. ¿Chem mülefui ñi femal pu che ñi nierpual rumel mongen?
10 Pu judio ramtuhuingün chem tañi femafel tañi elungeal feichi iyael, ¿raquiduampelaingün ñi inayafel Moisés tañi ley? Huelu Jesús huiñoldungueyu engün: “Tüfachi dungu ayüi ta Chau Dios: fei huercüeneu, feimu pengelaimün tamün feyentulen iñche mu” (Juan 6:28, 29). Ñi elungeal rumel mongen, mülefui ñi pengelal tañi feyentulen engün Chau Dios tañi Fotüm mu. Jesús fillque rupa quimeltui chumngechi nierpual rumel mongen (Juan 3:16-18, 36; 17:3).
11. Pu judio re ayüniefuingün ñi elungeal cofque, ¿chemu quimfali tüfa? (Éxodo 16:31).
11 Pu judio lloulaingün Jesús ñi quimeltuel, feyentulaingün Jesús mu. Feimu ramtufingün: “¿Chem afmatun dungu femaimi? Femngechi peaiñ ca feyentuaiñ” (Juan 6:30). Feipifingün tañi pu cuifiqueche yem ñi llohuel ti mana, cofque reque felelu (Neh. 9:15; papeltunge Éxodo 16:31). Quimfali, re ayüniefuingün iyal cofque müten. Jesús feipi ñi mülen “ti rüf cofque huenu mu cüpalu” ca hulquelu mongen, huelu ramtungelai chem no rume tüfa mu (Juan 6:32). Re loncontucuniefuingün tañi duamnieel müten, feimu rulpacünuingün falinque dungu ñi cüpa quimeltueteu Jesús. ¿Iñchiñ cai? ¿Chem quimeltun entuafuiñ tüfa mu? Ngüneduamafiyiñ.
¿CHEM DUNGU DOI FALIN-NGEI IÑCHIÑ MU?
12. Jesús, ¿chumngechi quimeltui chem am doi falin-ngei?
12 Juan capitulo 6 quimeltueiñmu quiñe falin dungu: doicülei taiñ huenihuen Jehová iñchiñ ca inangeal tañi feipin ta Jehová. Jesús cüme quimfalcünui tüfa. Huecüfü cüpa ngünencaeyu, huelu Jesús pengeli ñi doi falintufiel Chau Dios tañi dungu (Mat. 4:3, 4). Cafei hul-lu tañi hueupin huincul mu, quimeltui ñi fente falin-ngen taiñ cüme hueniyeafiel Chau Jehová (Mat. 5:3). Feimu ngüneduamuhuaiñ: “¿Doi falintuquepefiñ mai tañi hueniyeafiel ta Chau Jehová cam tañi duamnieel müten?”.
13. 1) ¿Chumngelu huesa dungu no taiñ ayühulaeteu ti iyael? 2) ¿Chem falin ngülam mülei taiñ cüme inayal? (1 Corintios 10:6, 7, 11).
13 Llellipuafuiñ ta Chau Dios taiñ eluaeteu taiñ duamnieel, ayühulqueiñmu nieal tüfa, huesa dungu no (Luc. 11:3). Biblia feipi cüme dungu cüdahual taiñ nieal ‘iyael ca taiñ putual’, com tüfa cüpai Chau Dios ñi cuhu meu (Ecl. 2:24; 8:15; Sant. 1:17). Huelu cuñiutucuhuaiñ taiñ doyümnienoafiel chem taiñ duamnieel. Tüfachi dungu raquiduamelfi Pablo tati pu cristiano. Pablo huirintucui ñi huesa femün pu Israel che cuifi, Sinaí pingechi huincul püle miyaufulu. Fei ngülamtufi pu cristiano ñi femnoal “huesaque dungu” pu Israel che reque (papeltunge 1 Corintios 10:6, 7, 11). Chau Jehová femi afmatun dungu ñi eluafiel pu Israel che chem tañi iyal, huelu fente ñi doyümniefiel engün tati iyael, huesalcaingün (Núm. 11:4-6, 31-34). Ca femngechi huesalcaingün anücünuulu ñi iyal, putual ca cüme rupayal petu ñi püramyefiel engün quiñe pichi oro culliñ (Éx. 32:4-6). Pablo nütramelfi feichi dungu tati pu cristiano petu ñi apümcangenon Jerusalén ca Chau Dios ñi ruca 70 tripantu mu. Famülque mu, püllelepai ñi afal mapu meu müleyechi dungu, fei falin-ngei taiñ inayal Pablo ñi ngülam.
14. Ñi feipin Biblia, ¿chem iyael nieaiñ cüpalechi antü mu?
14 Quimeltulu Jesús chumngechi taiñ llellipual, feipi: “Elumuiñ ti cofque taiñ duamnieel fachantü”. Huelu cafei feipi chumngechi ñi femngequen Chau Dios ñi “ayüqueel huenu meu, ca femngechi femngepe mapu mu” (Mat. 6:9-11). ¿Chumletuaiñ feichi mu? ¿Chem pimi? Chau Dios ayüniei ti mapu ñi hulal cümeque iyael. Biblia feipi Chau Dios ngünenietule ti mapu, fentren cümeque iyael müleai (Is. 25:6-8). Cafei, Salmo 72:16 feipi: “Fentren iyael müleai tüfachi mapu meu; huente huincul cütu huefpayai ti fün”. Raquiduamnge pepicamequelmi cofque tüfachi cümeque fün ñi müleal feichi hue mapu meu, ca raquiduamnge cosechamequelmi tami anüm ofad (Is. 65:21, 22). Cafei raquiduamnge, huall mapu femngechi feleai.
15. ¿Chem müleai ñi femal pu che huiñomongetualu? (Juan 6:35).
15 (Papeltunge Juan 6:35). Quiñeque pu che elungelu cofque ca challhua feyentulaingün Jesús mu, huelu cüpalechi antü mu huiñomongetuafuingün (Juan 5:28, 29). Huiñomongetule engün, müleafui tañi cüme adümafiel Jesús tañi feipin: “Iñche tati cofque hulquelu rüfngechi mongen. Tuchi cüpalu iñche mu, ngüñühuelayai”. Müleai tañi feyentual engün Jesús mu, ñi hulün tañi mongen tañi perdonangeal ñi culpan engün. Feichi mu, pu che huiñomongetualu ca pu pichiqueche choyüngealu müleai ñi quimürpual Chau Dios ñi dungu, fei com adcünungeai ñi quimeltungeal engün. Fei llemai, rume ayühulaiñmu iyal fente cüme cofque hue mapu mu, huelu doi ayüucüleaiñ taiñ quellunieafiel com feichi pu che ñi hueniyerpuafiel taiñ Huenu Chau Jehová.
16. ¿Chem inaduamaiñ cüpalechi troquiñ mu?
16 Tüfachi troquiñ mu, ngüneduamiyiñ quiñe troquiñ müten Juan capitulo 6 mu. Huelu Jesús doi fentren dungu quimeltui tati “rumel mongen” mu. Pu judio rume duamniefui allcütual com feichi dungu, cafei iñchiñ famülque mu. Fei cüpalechi troquiñ mu, doi inaduamafiyiñ ñi chem pilen Juan capitulo 6.
ÜLCANTUN 20 Hulimi tami saquin Fotüm
a Ayülmi doi cüme quimal tüfachi rupan dungu, papeltuafuimi Jesús: el camino, la verdad y la vida, pag. 131, ca ti lifru Ejemplos de fe, pag. 185.
