TROQUIÑ ÑI CHILLCATUNGEAL 49
ÜLCANTUN 147 Afnoachi mongen feipicünungei
¿Chem mülei taiñ femal taiñ rumel mongen nieal?
“Com tati llouquefilu tati Fotüm ca pengelquelu ñi feyentuniefiel, llohuai rumel mongen” (JUAN 6:40).
¿CHEM QUIMAIÑ?
Quimürpuaiñ chumngechi ñi lan Jesús cümelcaquefi pu dullin cristiano ca pu “caquelu ufisa”.
1. Feipingelu pu che ñi rumel mongeleafel, ¿chem piqueingün?
FENTREN che cüme dulliquei chem tañi iyal ca yafüluuqueingün ñi femal ejercicio, ayünieingün ñi cüme feleal. Huelu quimnieingün ñi quellunoaeteu tüfa tañi rumel mongen nieal. Pepilfalngenolu troquifingün, “re cutrancahuafuiñ müten rumel mongeleliyiñ” piqueingün. Huelu Jesús cümeque dungu feipi tati “rumel mongen” mu, chumngechi feipilei Juan 3:16 ca 5:24.
2. Juan capitulo 6, ¿chem pi tati rumel mongen mu? (Juan 6:39, 40).
2 Quiñe antü Jesús entui fentren iyael pichin cofque ca challhua mu, fei elufi iyael fentren che. a Afmatufali ñi femün, huelu doi afmatufalngei ñi feipin ca antü mu. Capernaúm mu inafül Galilea mu, Jesús feipifi com feichi pu che huiñomongetuafui ca rumel mongen nierpuafui (papeltunge Juan 6:39, 40). ¿Deu lapelai quiñeque tami pu familia ca pu hueni? Jesús tañi feipin eluqueimu maneluhun. Fentren che huiñomongetuafuingün, fei eimi ca tami piuqueyen che rumel mongeleafuimün. Huelu mülei caquelu dungu Jesús ñi feipiel Juan capitulo 6 mu. Fentren che rume cüdautuquei ñi adümafiel, fei cüme ngüneduamafiyiñ.
3. ¿Chem pi Jesús Juan 6:51 mu?
3 Jesús elufilu iyael feichi fentren pu che, raquiduamingün ca femngechi Jehová elufi mana pu Israel che cuifi mu. Biblia mu “huenu cüpachi cofque” üitungei ti mana (Juan 6:31; Sal. 105:40). Jesús ca feipi pu Israel che ifingün feichi cüme cofque cüpalu Chau Dios mu, huelu ca larpuingün (Juan 6:49). Huelu Jesús feipi quisu fei tati “rüf cofque huenu mu cüpalu”, “Chau Ngünechen ñi cofque” ca “iñche tati cofque hulquelu rüfngechi mongen” pi (Juan 6:32, 33, 35). Fei hula, Jesús doi cüme quimfalcünui ñi chem pilen, feipi: “Iñche tati cofque huenu mu nagpalu ca hulquelu mongen. Inei rume ifile feiti cofque, rumel mongeleai” (papeltunge Juan 6:51). Allcütulu tüfa pu judio, illcuingün. Feipipelaingün: “¿Doi cümelu troquiuquepei mai Jesús tati mana mu elungelu taiñ pu cuifiqueche yem? ¿Chem am ta feipimequei?”. Jesús ayüfui ñi quimürpual engün tañi chem pilen, feimu feipifi engün: “Ti cofque iñche ñi hulal pu che ñi nieal mongen, feita iñche ñi cuerpo”. Rume falin-ngei iñchiñ mu cüme adümafiel ñi chem pilen Jesús tüfa mu, femngechi quimürpuafuiñ chumngelu rumel mongeleafuiñ iñchiñ ca taiñ piuqueyen che. Feimu cüme ngüneduamafiyiñ.
COFQUE HULQUELU RÜF MONGEN CA ÑI CUERPO, ¿CHEM PIFEL?
4. Quiñeque che allcütulu ñi feipin Jesús nüngaitufingün, ¿chumngelu?
4 Rume nüngaitufingün quiñeque che allcütufilu ta Jesús ñi hulal tañi cuerpo, fei ñi eluafiel mongen tati pu che. ¿Raquiduampelaingün ñi rüf iyafiel Jesús ñi cuerpo? (Juan 6:52). Doi afmatuingün allcütufilu Jesús ñi feipin: “Inolmün ti Huentru ñi Fotüm ñi cuerpo ca pütoconolmün ñi mollfüñ, lloulayaimün mongen” (Juan 6:53).
5. Jesús ayülafui pu che ñi rüf pütocoal tañi mollfüñ, ¿chumngelu quimnieiñ tüfa?
5 Noé ñi antü mu, Chau Jehová deu feipifui tati pu che ñi inoal mollfüñ (Gén. 9:3, 4). Fentren tripantu rupalu, Jehová ca feipifi pu Israel che ñi inoal mollfüñ. Inei rume ifile, mülefui “ñi langümngeal” (Lev. 7:27). Jesús yamniequefui Moisés tañi ley (Mat. 5:17-19). Feimu, Jesús turpu feipilayafui pu judio ñi iyal tañi cuerpo ca tañi mollfüñ no rume. Huelu mai Jesús femngechi dungufi tati pu che, fei ñi quimeltuafiel engün ñi llohual tati “rumel mongen” (Juan 6:54).
6. ¿Chumngechi adümürpuafuiñ Jesús tañi feipin?
6 Jesús adentucünumequefui tañi quimeltun. Ca femngechi femfui amuldungufilu feiti Samaria domo, feipifi: “Feiti che pütocole ti co iñche ñi eluafiel, huihuhuelayai. Doi mai feichi co iñche ñi eluafiel, huitrunco reque feleai tañi piuque mu. Fei tüfa eluaeyu rumel mongen” (Juan 4:7, 14). b Jesús re adentucünufi chem ñi femafel ti domo. Pütocole rume quiñe pozoco mu, rumel mongen nielayafui. Ca femngechi tati pu che Capernaúm mu ngelafui ñi rüf iyal tañi cuerpo ca tañi mollfüñ, fei ñi nieal rumel mongen.
EPU FEIPIN TRÜRÜMNGEAFULU, HUELU TRÜRLAINGU
7. Quiñeque che, ¿chem feipiqueingün Juan 6:53 mu?
7 Quiñeque che huelu adümqueingün ñi feipin Jesús Juan 6:53 mu. Feipiqueingün feichi mu Jesús quimeltumequefui chem tañi femafel engün trahuluule ñi acordayafiel tañi lan. Trürümqueingün ñi feipin tüfa mu ca tañi feipin feichi pun petu ñi lanon, “müna trüri” piqueingün (Mat. 26:26-28). Feimu raquiduamqueingün com che trahuluule ñi acordayal tañi lan, mülei ñi iyal ti cofque ca pütocoal ti pulcu. ¿Feingepei mai tüfa? Mülei taiñ cüme huiñoldungual tüfachi ramtun, fill tripantu fentren che trahuluuqueiñ taiñ acordayafiel ñi lan ta Jesús. Feimu inaduamafiyiñ chem mu calei ñi feipin Juan 6:53 ca ñi feipin Jesús feichi pun petu ñi lanon.
8. ¿Chem mu trürlai ñi feipin Jesús Capernaúm mu ca feichi pun petu ñi lanon? (Ca inaduamnge ti adentun).
8 Inaduamaiñ epu dungu ñi trürnon feichi epu feipin. Quiñe dungu, ¿chumül nütramcai Jesús? Ca, ¿cheu femi? Juan 6:53-56 mu, Jesús nütramcafi tati pu judio Galilea mu 32 tripantu mu. Rupalu quiñe tripantu hula, Jerusalén mu Jesús quimeltui chumngechi ñi acordangeal tañi lan. Epu dungu, ¿inei engün am dungufi? Galilea mu tati pu che doyümquefui tañi duamnieel engün, müte duamtulafingün Chau Dios tañi dungu (Juan 6:26). Feimu cüdautulu müten ñi adümafiel tañi feipin, feyentuhuelaingün Jesús mu. Quiñeque tañi pu discipulo cafei inahuelafi (Juan 6:14, 36, 42, 60, 64, 66). Tüfa rume calei tañi rupan 33 tripantu mu, quimeltulu Jesús chumngechi ñi acordaniengeal tañi lan. Feichi mu trahuluhui tañi pu 11 apostol engün, fei engün trürümngelayafui ta epe com feichi pu che Galilea mu mülefulu. Cüdautuquefuingün rume chem tañi quimeltumequeteu Jesús, pu apostol rüf maneluuquefuingün Jesús mu, Chau Dios ñi Fotüm piquefingün, huenu mu nagpalu (Mat. 16:16). Feimu Jesús saquifi engün, feipifi: “Com tañi rupaelchi dungu mu, eimün quisucünumulan” (Luc. 22:28). Tüfachi epu dungu müten cüme quimeltueiñmu Juan 6:53 feipilai chumngechi ñi acordangeal ñi lan ta Jesús. Huelu doi mülei dungu taiñ quimeltueteu, inaduamafiyiñ.
Juan capitulo 6 nütrameleiñmu Jesús ñi dungufiel fentren judio Galilea mu (huele püle mülechi adentun). Rupalu quiñe tripantu, dungufi tañi pu apostol Jerusalén mu (man püle mülechi adentun). (Inaduamnge parrafo 8).
¿CHUMNGECHI CÜMELCAQUEIMU ÑI FEIPIN JESÚS?
9. ¿Inei engün coneltulei Jesús tañi feipin mu feichi pun petu ñi lanon?
9 Trahuluulu Jesús ca tañi pu apostol feichi pun petu ñi lanon, elufi cofque nienolu lefaura ca feipifi tüfa ñi adentulen tañi cuerpo. Fei hula, rulpalelfi quiñe copa pulcu ca feipifi tüfa ñi adentulen tañi mollfüñ, “tüfa meu elcünungeai quiñe eldungu” pifi (Mar. 14:22-25; Luc. 22:20; 1 Cor. 11:24). Tüfachi hue eldungu mu coneltulei Jehová ca tati pu dullin cristiano müten. Tüfa engün amuaingün huenu, fei ngünenieaingün Jesús engu Chau Ngünechen ñi Gobierno mu (Heb. 8:6, 10; 9:15). Feichi mu, pu apostol cüme adümlafingün. Huelu pichiñma rupai, fei elungeingün Chau Dios ñi nehuen, femngechi coningün feichi hue eldungu mu ñi nütramcael Jesús (Juan 14:2, 3).
10. ¿Ca chem mu trürlai ñi feipin Jesús feichi pun petu ñi lanon ca Galilea mu? (Ca inaduamnge ti adentun).
10 Ca pichin raquiduamaiñ tüfa mu. Feichi pun Jesús quimeltulu chumngechi ñi acordaniengeal tañi lan, quiñe “pichi troquiñche” müten dungufi. Feichi mu, pu apostol müten coneltulefui tati “pichi troquiñche” mu (Luc. 12:32). Rupalu chi tripantu, doi che conelturpui feichi troquiñche mu ñi mülepual huenu mu. Feimu müleafui ñi iyal ti cofque ca pütocoal ti pulcu adentulelu Jesús tañi cuerpo ca tañi mollfüñ. Tüfa rume calei tañi feipifiel Jesús tañi pu apostol Galilea mu. Feichi mu, Jesús raquiduamcülefui ñi cümelcangeal quiñe doi fütra troquiñche.
Quiñe pichi troquiñche müten rüf iquei ti cofque ca pütocoquei ti pulcu, huelu “inei rume” pengel-le tañi feyentun Jesús mu, llohuafui rumel mongen. (Inaduamnge parrafo 10).
11. Galilea mu Jesús nütramcamequefui ñi cümelcangeal fentren che, ¿chemu quimnieiñ tüfa?
11 Dungulu Jesús Galilea mu feichi 32 tripantu mu, quimeltumequefui pu judio duamnielu cofque. Huelu Jesús cüpa quimeltufi ñi mülen quiñe doi falin dungu ta iyael mu: tüfa eluafeyu rumel mongen. Jesús ca feipifi pu lalu huiñomongetuafui cüpalechi antü mu, fei ñi rumel mongeleal engün. Feichi mu, Jesús raquiduamcülelafui ñi cümelcangeal quiñe pichi troquiñche müten, chumngechi ñi femün feichi pun petu ñi lanon. Galilea mu Jesús raquiduamcülefui ñi cümelcangeal com pu che. Feimu feipi “inei rume ifile feiti cofque, rumel mongeleai”. Ca feipi ñi hulal tañi cuerpo cofque reque, “pu che ñi nieal mongen” (Juan 6:51). c
12. Ñi feipin Jesús Galilea mu, ¿chem mülefui ñi femal pu che tañi llohual rumel mongen?
12 ¿Chumngechi adümürpuafuiñ ñi feipin Jesús Galilea mu? Com che refalta lloulayafui rumel mongen, doi mai mülefui ñi iyal ti cofque reque. Tüfa adentulefui ñi pengelal tañi feyentulen Jesús mu. Fentren che re feipiquei müten tañi feyentulen Jesús mu ca “tüfei tati montulchefe” piquefingün (Juan 6:29). Galilea mu fentren che feipifui tañi feyentulen Jesús mu, huelu fentecünuingün ñi inayafiel. ¿Chumingün? Peafiyiñ.
13. ¿Chem mülei ñi femal ta che ñi rüf inayal ta Jesús?
13 Fentren che inaquefui ta Jesús re tañi elungeal tañi duamnieel. Ayüniefuingün ñi re quimeltungeal tañi ayüqueel müten. Ca ayüniefuingün ñi refalta elungeal iyael ca ñi tremoltungeal. Huelu Jesús cüme quimfalcünui chumngelu tañi cüpan mapu mu. Cüpalai ñi eluafiel tati pu che tañi ayüqueel, doi mai ñi quimeltual chem tañi femafel engün tañi rüf inayaeteu. Mülefui ñi llohual com ñi feipieteu ca inayal com tañi quimeltun (Juan 5:40; 6:44).
14. Taiñ llohual ti cümelcan cüpalu Jesús tañi cuerpo ca tañi mollfüñ mu, ¿chem mülei taiñ femal?
14 Jesús cüme quimeltui pu che mülei ñi pengelal tañi feyentulen. Huelu, ¿chem mu mülefui ñi feyentual engün? Mülefui ñi rüf maneluhual feichi cuerpo ca mollfüñ ñi hulal ta Jesús ñi eluaeteu rumel mongen. Com feichi pu judio duamniefui ñi maneluucüleal tüfa mu, ca femngechi mülei taiñ femal iñchiñ famülque mu (Juan 6:40). Feimu llemai taiñ llohual ti cümelcan cüpalu feiti cuerpo ca mollfüñ ñi feipin Juan 6:53, mülei taiñ rüf maneluhual Jesús ñi hulün tüfa taiñ montulaeteu. Rume fentren che llohuafui ti cümelcan maneluule tüfa mu (Efes. 1:7).
15, 16. ¿Chem falinque quimeltun entuiñ Juan capitulo 6?
15 Juan capitulo 6 quimeltuqueiñmu falinque dungu, fei rume yafültucuqueiñmu com iñchiñ. Pengelqueiñmu Jesús ñi fente piuqueyefiel tati pu che. Galilea mu tremoltufi pu cutrancülelu, quimeltufi engün Chau Dios ñi ngünenietual ta mapu ca elufi iyael tañi duamnieel engün (Luc. 9:11; Juan 6:2, 11, 12). Doyelchi mai, feipifi engün: “Iñche tati cofque hulquelu rüfngechi mongen” (Juan 6:35, 48).
16 Jesús üitufi quiñe troquiñche “caquelu ufisa”, tüfa engün ngelai ñi iyal ti cofque ca pütocoal ti pulcu ñi acordayafiel tañi lan (Juan 10:16). Huelu iqueingün reque Jesús tañi cuerpo ca tañi mollfüñ feyentulelu engün tañi lan mu, femngechi cümelcangeingün (Juan 6:53). Ti cangelu troquiñche rüf iquefilu ti cofque ca pütocoquelu ti pulcu coneltuqueingün tati hue eldungu mu, fei amuaingün huenu mu ñi ngünenieal Jesús engün. Feimu dullin cristianongeliyiñ cam femngenoliyiñ rume, rume falintuquefiyiñ ñi feipin Juan capitulo 6: taiñ rumel mongen nieal, pengelaiñ taiñ feyentulen.
ÜLCANTUN 150 ¡Jehová montulaimu llemai!
a Rupachi troquiñ 48 mu ngüneduamngei Juan 6:5-35.
b Feiti co ñi feipiel Jesús adentulei com tañi femün Jehová ñi eluafiel rumel mongen tati pu che.
c Juan capitulo 6 feipi “tuchi cüpalu iñche mu”, “inei rume” ca “com tati llouquefilu tati Fotüm”. Tüfa pengelquei com che nierpuafui rumel mongen (Juan 6:35, 40, 47, 54, 56-58).
