Choyüngen 1927 tripantu mu Estados Unidos mapu mu, quiñe pichi huaria mu püllelelu ta Chicago. Nien epu deya ca epu peñi. Tañi hunen deya Jetha pingei, inalei tañi peñi Don. Fei hula iñche mu inalei tañi peñi Karl ca ti inan curam fei tañi deya Joy pingelu. Com taiñ piuque mu ayüniefuiñ taiñ cüdahuelafiel ta Chau Jehová. Jetha amui ta Galaad pingechi Escuela ti clase 2, 1943 tripantu mu. Tañi peñi Don mangelngei Betel mu 1944 mu. Tañi peñi Karl mangelngei 1947 mu ca tañi deya Joy mangelngei 1951 mu. Com engün coningün Betel Brooklyn, Nueva York huaria mu. Rume nehuentucuqueneu ñi femün tañi pu che.

Ñi chau ca ñuque rume poyefingu Chau Dios ca papeltuqueingu Biblia, fei quimeltueiñmu taiñ ca femngechi femal. Huelu tañi chau coni tati Primera Guerra Mundial, feimu feyentuhuelai tati religion mu. Huelu mai, tañi ñuque rume mañumniefui ta Chau Dios ñi mongetripan hueichan mu tañi chau. Feimu feipifi: “Karl, amuyu iglesia mu chumngechi femquefuyu cuifi”. Tañi chau huiñoldungueyu: “Yeayu, huelu conpulayan”. “¿Chumngelu cai?”, tañi ñuque feipi. Tañi chau huiñoldungui: “Hueichan mu pefiñ pu loncolechi religioso ñi cümelcaquefiel quisuque tañi pu troquiñ hueichafe. ¿Chumngechi cümelcayafui Chau Dios epuñpüle?”.

Quiñe antü miyaulu tañi ñuque iglesia mu, cüpai epu testigo. Elungei tañi chau epu lifru nüucülelu Luz pingefuingu, quimeltuquefui ñi feipin ti lifru Apocalipsis. Tañi chau ayüfi ti epu lifru, feimu llohui. Tañi ñuque pefilu ti lifru, papeltufi. Fei hula, diario mu mangelngei pu che ñi chillcatual Biblia feichi epu lifru mu. Tañi ñuque pefi, fei amui. Puulu üyeu quiñe papai llohueyu, fei ñi ñuque pengelfi quiñe lifru ca ramtufi: “¿Tüfa mu quimeltungequei tüfachi lifru?”. “Mai, ñaña, conpange” pieyu ti papai. Ca semana amuiñ tañi ñuque iñchiñ, fei hula fill semana amuquefuiñ.

Trahun mu, ti peñi adcünupelu feipieneu ñi papeltual Salmo 144:15, feipilu ñi ayühun-ngen pu poyequefilu ta Chau Jehová. ¡Rume  ayüfiñ feiti texto! Ca ayüfiñ caquelu epu texto: 1 Timoteo 1:11 feipilu Chau Jehová ñi “ayühun-ngechi Chau Ngünechen” ngen, ca Efesios 5:1 ngülamtulu “inayentuafimün ta Chau Ngünechen”. Quimtucun ñi ayüucüleal tañi poyefiel mu tañi Huenu Chau ca mülei ñi mañumnieafiel tañi elueteu mu ñi poyeafiel. Fantepu mu, piuquentucuniefiñ feiti epu falin dungu.

Chicago huaria mu mülefui ti trahunche, 32 kilometro camapulefui. Huelu amuquefuiñ fill trahun mu, fei doi quimürpufiñ ti Biblia. Quiñe trahun mu Jetha elungei ñi huiñoldungual. Allcütufilu iñche, raquiduamün: “Iñche ca quimfun ti huiñoldungun, ¿chumngelu huiñoldungulan?”. Feimu doi yafüluhun ñi pepicahual tañi amual trahun mu, fei eluhun ñi huiñoldungual. Doyelchi mai tañi pu peñi ca pu deya reque, doi hueniyerpufiñ Jehová ca fautizahun 1941 tripantu mu.

Piuquentucuniefiñ feiti fütra trahun femngelu 1942 tripantu mu Cleveland huaria mu. Umapuiñ tolto ruca meu caquelu peñi ca lamngen iñchiñ taiñ püllelepual ti fütra trahun mu. Huall Estados Unidos mapu mu, doi 50 huaria mu allcütungei ti trahun telefono mu. Petu amulefui ti Segunda Guerra Mundial, fei doyelcülerpui ñi caiñetungen pu testigo. Pun meu pu peñi cuñiutucuquefingün ti campamento, llihuatuquefuingün caque quiñeque auto mu. Feimu acurumele huesaque che, aloftuquefuingün ñi tretrilcünuafiel ca tocaquefuingün ti bocina. Femngechi, caquelu peñi matu quellupayafuingün. Feichi dungu raquiduameleneu: “Rume pepicaucülei Jehová tañi pu che chem dungu ruparumele”. Tüngcülequefun, cüme umautun, chem huesa dungu rupalai.

Rupalu ta tripantu, ngüneduamün tañi ñuque ñi llicaquenon. Com tañi piuque mu maneluuquefui Jehová mu ca tañi adcünuelchi troquiñche mu. Rumel loncontucunien tañi cüme femün.

Tañi ñuque eluhui ñi precursora regularngeal. Pichiñma rupalu, amuiñ feiti fütra trahun. Fei, tañi ñuque cüme allcütufi fillque hueupin nütramcalu pu cristiano cüdahuelquefilu Jehová fill antü. Huiñotulu taiñ ruca mu, tañi ñuque feipi: “Ayüfun ñi fentecünunoal ñi precursorangen. Huelu ruca mu ca mülei fentren cüdau, ¿trür fempeafun chi? Eimün, ¿quellumuafun?” pieiñmu. Mai pifiyiñ. Feimu elfalcünueiñmu caque quiñeque iñchiñ liftual quiñeque pieza petu taiñ amunon escuela pulihuen mu. Fei hula tañi ñuque ngüneduamquefui ñi cüme elcünufiel ti ruca, fei ñi tripayal amuldungual. Fentren duam niefui tañi ñuque, huelu siempre elcünuquefui tiempo taiñ quiñentrür rupayal. Tripalu iñchiñ escuela mu, üngümniequefeiñmu taiñ iyal. Quiñeque mu, quiñentrür tripaquefuiñ amuldungual. Femngechi quimtucuiñ tañi femquen pu precursor ñi huechurpual com tañi cüdau.

Nielu iñche 16 tripantu, precursorngerpun. Tañi chau petu testigongelafui, huelu ramtuqueneu chum amulefui tañi amuldungun cüdau. Quiñe pun, feipifiñ tañi chau: “Quintuquefiñ che ñi quimeltuafiel Biblia, huelu inei no rume pilai”.  Pichiñma ñücüfcülehueyu, fei ramtufiñ: “¿Ayüfuimi tayu trür chillcatual Biblia?”. Raquiduamcülehuei, ca feipieneu: “¿Chem piafeyu? ¿Chemu femnoafulu iñche?”. Femngechi rupai, tañi chau fei tati hunen che tañi quimelfiel Biblia. Tüfa rume falin-ngei iñche mu.

Chillcatuyu ti lifru “La verdad os hará libres”. Amulelu ti chillcatun, tañi chau quellueneu ñi doi cüme chillcatual ti Biblia ca doi cüme quimeltucheal. Quiñe pun deu papeltungelu ti parrafo, tañi chau ramtueneu: “Tüfa ñi feipin ti lifru müten. Huelu, ¿cüme quimniepeimi mai ñi rüfngen?”. Quimlafun chem pial, feimu feipifiñ: “Feula quimlan chem feipiafeyu, huelu ca chillcatun mu huiñoldunguayu”. Femngechi femün. Pefiñ quiñeque texto Biblia mu pengelquelu ñi rüfngen tayu nütramcael. Feichi mu doi adümuhurpun chumngechi tañi ngüneduamal ti Biblia, femngechi doi pepicaucülefun tañi quimeltual. Com tüfa quellueyumu tañi chau iñchiu doi cüme adümafiel ti Biblia. Tañi chau inafi com tañi quimürpuel, fei fautizahui 1952 tripantu mu.

Nielu iñche 17 tripantu, elcünun ñi ruca. Feichi antü meu, Jetha a misionerangerpui ca tañi peñi Don mangelngei Betel mu. Rume ayüumaquefeyu tañi cüdau, fei iñche ca cüpa femün. Feimu trür apolfiñ ti solicitud ñi amual ta Betel ca Galaad pingechi Escuela mu, “Jehová feipipe cheu tañi cüdahual” pin. ¿Chem rupai? Mangelngen Betel 1946 tripantu mu.

Deu yenien 75 tripantu Betel mu, fei elungen fillque cüdau. Feimu fentren dungu quimürpun: chumngechi ñi entuhuiringeal lifru, chumngechi ñi adcünungeal ti plata, ca chumngechi ngillayal fillque dungu ñi duamnieel Betel ca ñi huercüngeal falinque chemcün caquelu lof mu. Huelu doi falintuquefiñ taiñ cüme quimeltungequen Biblia, fill pulihuen mu poyequefiyiñ Jehová ca fentren cümeque hueupin hulngequei.

Tañi inan peñi Karl fentren dungu quimeltueneu. Rume cüme adümquefui Biblia ñi dungu, fei cüme quimeltuchequefui. Quiñe rupa, feipifiñ tañi quelluaeteu ñi pepicayal quiñe hueupin. Feipifiñ: “Deu ngüneduamün fentren informacion, huelu rume cüdautuquen cüme adcünuafiel, topalafiñ”. Quiñe dungu müten ramtueneu, fei rume quellueneu: “Joel, ¿chem falin dungu mülei ñi quimfalcünungeal tami hueupin mu?” pieneu. Müchai müten quimtucun: mülefui ñi feipial tati falin-ngechi dungu müten, caquelu dungu mülefui ñi quiñepülecünuafiel. Loncontucuniequen feichi ngülam.

 Taiñ ayüucüleal Betel mu, mülei taiñ amuldungual com taiñ piuque mu. Femngechi rupayafuiñ cümeque dungu taiñ yafültucuaeteu. Nütramcaleluhuaiñ quiñe dungu. Nagantü mu, quiñe antü pemefiyiñ quiñe domo lloufilu ti revista Ti Huerquen ca ¡Tami quimafel! Feipifiyiñ: “Fachantü, nütramcamequefiyiñ pu che cümeque dungu Biblia mu mülelu”. Fei feipi: “¿Biblia pimün am? Conpamün müten”. Trür ngüneduamfiyiñ quiñeque texto Biblia mu, femngechi nütramelfiyiñ Chau Dios ñi ngünenietual ta mapu fei ñi cüme elcünutuafiel cüpalechi antü mu. Ti domo rume ayüfi taiñ nütramcan, feimu peno ca semana mangelfi quiñeque tañi pu hueni ñi allcütupayal. Rupalu ta tiempo, feiti domo ca tañi füta poyerpufingün ta Jehová com piuque mu.

Ayüfun ñi nieal tañi ayün, huelu 10 tripantu rupai, fei pen tañi cüme compañ. ¿Chem quellueneu ñi cüme dullial? Llellipuquefiñ ta Jehová ñi quelluaeteu ca raquiduamquefun chem tañi cüpa femal tañi domo iñchiu.

Rupalu ti fütra trahun 1953 tripantu mu, quimfiñ quiñe lamngen Mary Aniol pingelu. Mary ca iñche tañi deya trür conürquefui Galaad pingechi escuela mu. Tripalu engu, trür misionerangequefui Caribe mapu mu. Üye mu Mary quimeltulelfi Biblia fentren che, fei nütrameleneu fente ñi ayüucülen tañi cüdau mu. Doi quimürpuhuiyu, trür ayüniefuyu amuleal tayu cüdahuelniefiel ta Chau Jehová fill antü. Caque antü doi piuqueyehuiyu, feimu 1955 tripantu mu tripai mafün. Chau Jehová elueneu ta Mary quiñe regalo reque, rume falintufiñ, inayentufalngei iñche mu. Mary ayüucülequefui chem cüdau rume tañi elungeel. Rume cüdauquefui, rüf duamtuquefui pu che. Ca doyümniequefui Chau Jehová tañi dungu (Mat. 6:33). Cüla tripantu mu huitranmaquefuyu pu trahunche, fei 1958 tripantu mu mangelngeyu cüdahual Betel mu.

Mary quimeltueneu fentren dungu. Hue nieulu iñchiu, eluhuiyu tayu quiñentrür papeltual Biblia, 15 versiculo fill antü. Mary cam iñche papeltuquefuyu fillque versiculo, fei hula ngüneduamquefuyu ñi chem pilen, fei nütramcaquefuyu chumngechi inayal feichi dungu taiñ mongen mu. Fentren rupa, Mary nütrameleneu quiñeque dungu ñi quimürpuel Galaad mu ca fillque dungu ñi rupan misionerangelu. Feichi nütramcan quellueneu ñi doi cüme hueupial ca doi cüme yafültucuafiel pu lamngen (Prov. 25:11).

Tañi saquin Mary lai 2013 tripantu mu. Rume ayünien ñi huiño petuafiel cüpalechi antü mu. Fei petu ñi acunon feichi antü, rume yafüluuquen ñi doi quimürpual ca maneluucüleal Chau Jehová mu com tañi piuque mu (Prov. 3:5, 6). Raquiduamün mu com ñi femal Chau Jehová tañi pu che hue mapu mu, rume ayüumaquei tañi piuque. Feichi mu, taiñ Fütra Quimeltuchefe Jehová doi quimeltuaiñmu fentren dungu ca doi cüme quimürpuafiyiñ. Rume fentren dungu quimeltueneu Chau Jehová, fentecünuquelan ñi mañumniefiel, huelu puhulfalngelai fente tañi elueteu.