TROQUIÑ ÑI CHILLCATUNGEAL 51
ÜLCANTUN 3 Jehová eluqueiñmu nehuen ca maneluhun
Ngümaliyiñ, Jehová yafültucuqueiñmu
“Tami trülque metahue mu ngülümüñmaen tañi cülleñu. ¿Huiriconcülepelai eimi tami lifru mu?” (SAL. 56:8).
¿CHEM QUIMAIÑ?
Jehová cüme quimniei taiñ cutrantupiuquelen ca yafültucuqueiñmeu.
1, 2. ¿Chem dungu meu ngümayafuiñ?
QUIÑEQUE MU com iñchiñ ngümaqueiñ, ca quiñeque mu ngümaqueiñ rume ayüucülen mu. Eimi, ¿ngümapelaimi aculu tami hue püñeñ? Cam, ¿raquiduamün mu ayühun-ngechi dungu tami rupan? Cam ngümaimi chi petufilu quiñe hueni cuifi tami pehuenofiel.
2 Ngümaqueiñ ayühun mu, huelu doi ngümaqueiñ taiñ hueñancülen mu. Ngümaqueiñ huesa pieteu mu taiñ piuqueyenieelchi che. Alüñma huesa cutrancülelu iñchiñ ca layeluhun mu, ngümayafuiñ. Femngechi dungu rupan mu, huesa duamcüleafuiñ Jeremías reque. Apümcangelu Jerusalén, Jeremías feipi: “Tañi nge mu huitrunco reque tripai tañi cülleñu [...]. Rupan ngümalayan, fentecünulayan” (Lam. 3:48, 49).
3. Cutrancahun mu iñchiñ, ¿chum duamquei Jehová? (Isaías 63:9).
3 Jehová quimniei tunten rupa ngümaqueiñ taiñ huesa rupalen mu. Biblia feipi Jehová com quimniei taiñ cutrancaqueteu ca allcütuquei “quelluen” pifilu iñchiñ (Sal. 34:15). Huelu Jehová re allcütuquelaeiñmu müten. Fei iñchiñ taiñ Chau tati ca rume piuqueyequeiñmu. Feimu ngüman mu iñchiñ, Jehová inaye hueñancüquei, fei eluuquei taiñ pürüm quelluaeteu (papeltunge Isaías 63:9).
4. ¿Chem quimürpuaiñ tüfachi troquiñ mu?
4 Biblia pengeli chum duami Jehová ngümalu tañi pu che cuifi mu ca chumi tañi quelluafiel engün. Tüfachi troquiñ mu ngüneduamaiñ chem ñi rupan Ana, David ca ti lonco ülmen Ezequías. ¿Chem dungu mu ngümaingün? ¿Chumngechi quellueyu Jehová? Iñchiñ cai, ¿chumngechi quelluqueiñmu Jehová hueñancüleliyiñ, huesalcangeliyiñ ca cutrancüleliyiñ?
NGÜMALIYIÑ TAIÑ HUEÑANCÜLEN MU
5. ¿Chum duamcülequefui Ana tañi huesa rupan mu?
5 Ana chaftufi alün huesaque dungu, feita ngümaleyu. Tañi füta niequefui ca domo Peniná pingelu. Feichi domo üdequefui ta Ana. Peniná niefui alün püñeñ, huelu Ana pepi niepüñeñquelafui rume, ¡müna huesa! (1 Sam. 1:1, 2). Feimu Peniná rumel ayentuquefui ta Ana. Eimi, ¿chum duamafuimi? ¿Rume hueñancüpelayafuimi? Femngechi rupai Ana. Rume hueñancülequefui, feimu “ngümatripaquefui, cüpa iquelafui rume” (1 Sam. 1:6, 7, 10).
6. ¿Chumi Ana tañi doi cüme duamal?
6 ¿Chumi Ana tañi doi cüme duamal? Amui ti ngillatuhue tolto ruca mu ñi püramyemeafiel ta Jehová. Inafül ti puerta mu, Ana “llellipufi ta Jehová” ca “af ngümalai”. Feipifi: “Adquintuen fente tañi hueñancülen. Iñche eimi tami cüdaufe, fei acordaen” (1 Sam. 1:10b, 11). Ana feipifi ta Jehová com ñi mülen tañi piuque mu. Chau Jehová pefilu Ana ñi ngümamequen, inaye cutrantupiuquei. Rume piuqueyefi, feimu ayüfui tañi quelluafiel.
7. ¿Chum duami Ana rupan llellipulu?
7 Rupan llellipulu Ana, ti loncolechi sacerdote Elí feipieyu Jehová tañi allcütuaeteu. ¿Chum duamtui Ana? Biblia feipi Ana amutui ca huiño itui, fei tañi ange hueñancülehuetulai (1 Sam. 1:17, 18). Felecai tañi huesa rupamequen, huelu tüngduamcülei. Ana maneluucülefui Jehová tañi quelluaeteu. ¡Femngechi femi Jehová llemai! Ngüneduami tañi chum duamcülen, allcütui tañi llellipun ca elufi tañi nieal quiñe pichiche (1 Sam. 1:19, 20; 2:21).
8, 9. ¿Chemu fente falin-ngei amual trahun meu? (Hebreos 10:24, 25; ca inaduamnge ti adentun).
8 ¿Chem quimeltueiñmu? Rupamequeimi chi huesa dungu mu, fei rume hueñancülnieimu. Lai chi quiñe tami pu che cam quiñe hueni. Femngechi rupan mu che, ayüquei tañi quisuleal. Huelu acordafinge Ana tañi rupan. Fei amui ti ngillatuhue tolto ruca mu, üyeu Jehová yafültucueyu. Ca femngechi eimi hueñancülefulmi rume, amuaimi trahun meu, fei Jehová yafültucuaimu (papeltunge Hebreos 10:24, 25). Trahun mu allcütufiel mu quiñeque troquiñ Biblia, fei yafültucuqueiñmu. Femngechi Jehová quelluqueiñmu taiñ raquiduamnoal hueñancün dungu mu. Femngechi felecale rume taiñ huesa rupamequen, doi cüme duamcüleaiñ.
9 Taiñ trahun mu taiñ pu peñi ca lamngen yafültucuqueiñmu ca pengelqueiñmu taiñ piuqueyeteu, fei doi cüme duamcülequeiñ mülen mu fei meu (1 Tes. 5:11, 14). Raquiduamaiñ ñi rupan quiñe peñi precursor especial lalu tañi domo. Quisu feipi: “Fente tañi hueñancütun tañi domo, rume ngümaquen. Huelu amun mu trahun mu yafültucungequen chumngechi tañi duamnieel. Allcütufiel mu pu peñi ca lamngen, tüngduamquei tañi piuque. Quiñeque mu hueñancülen amuquen trahun mu, huelu huiñotun mu doi cüme duamcülequetun”. Felei llemai, amun mu trahun mu Jehová adcünuquefi pu peñi ca lamngen taiñ yafültucuaeteu.
Taiñ pu peñi ca lamngen yafültucuqueiñmu. (Inaduamnge parrafo 8, 9).
10. Hueñancüleliyiñ, ¿chumngechi inayentuafuiñ Ana?
10 Ana rupan llellipulu, doi tüngcületui. Eimi ca elcünuafuimi com tami raquiduamelnieteu Jehová mu, fei maneluhuafuimi tami allcütuaeteu (1 Ped. 5:7). Quiñe lamngen langümüñmangelu ñi füta, feipi: “Catrücangelu ñi piuque troquihun ca ñi turpu cüme duamcülehuenoal. Huelu llellipufilu tañi poyen Chau Jehová, fei yafültucueneu. Quiñeque mu cüdautuquefun ñi feipiafiel tañi chum duamcülen, huelu quisu com quimüñmaeneu. Fill raquiduamcülelu iñche, llellipuquefun tañi tüngcületual. Fei müchai müten cüme duamcülequetufun ca nehuencontuquefun”. Feipifiel mu Jehová taiñ hueñancülen, Jehová ca inaye hueñancüquei ca cüme quimniei chem ñi mülen piuque mu. Felecayafui taiñ huesa rupamequen, huelu Jehová tüngduamelqueiñmu ca yafültucuqueiñmu (Sal. 94:19; Filip. 4:6, 7). Jehová peniei taiñ serfiquefiel huesa rupaleliyiñ rume, fei cümelcayaiñmu (Heb. 11:6).
NGÜMALIYIÑ TAIÑ HUESALCAETEU TAIÑ PIUQUEYEN CHE
11. ¿Chum duami David caquelu ñi huesalcaeteu?
11 David chaftufi alün huesaque dungu, feita ngümalcaeyu. Fentren che üdeeyu, ca quiñeque tañi pu che ca tañi pu hueni quisucünueyu ca huesalcaeyu (1 Sam. 19:10, 11; 2 Sam. 15:10-14, 30). Feimu huirintucui: “Fente tañi eyütun afduamcülen, pun meu tunte tañi ngüman cülchafcülehuei tañi cahuitu, fente tañi ngümatripan focholehuei tañi ngütantu”. ¿Chumngelu femngechi duami David? ‘Fente tañi caiñetungeel’ (Sal. 6:6, 7). Fente tañi huesalcaeteu pu che, David rume ngümaquefui.
12. ¿Chem dungu mu maneluucülefui David? (Salmo 56:8).
12 David cüdaungefulu rume tañi mongen, maneluucülefui Jehová tañi piuqueyeteu. Feimu feipi: “Chau Jehová allcüñmayaeneu ñi ngüman” (Sal. 6:8). Ca huirintucui ñi feipin Salmo 56:8 (papeltunge). Papeltufilu tüfa, quimiyiñ Jehová fente taiñ duamtuqueteu ca piuqueyequeteu. David feipi Jehová ngülümquefi reque tañi cülleñu ca huirintucuquefi quiñe lifru mu. David maneluucülefui Jehová ñi cüme quimnieel tañi huesa rupamequen ca ñi chum duamcülen.
13. Huesalcaeliyiñmu taiñ piuqueyenque che, ¿chem loncontucunieafuiñ? (Ca inaduamnge ti adentun).
13 ¿Chem quimeltueiñmu? ¿Huesalcaeimu quiñe che tami piuqueyefiel? ¿Quisucünueimu tami afcadi? ¿Eldungucünufuimi tami niehual quiñe che engu, huelu elcünueimu? Quiñe tami piuqueyenieelchi che, ¿püntütripai Jehová mu? Femngechi dungu rupan mu che, rume hueñancülequei. Peafiyiñ ñi rupan quiñe peñi. Tañi domo ñihuañpeyu, fei elcünueyu. Quisu feipi: “Armulehuen, ¿rüfngei ñi rupan? pilehuen. Hueñancülefun, lladcülefun, falinolu troquihun”. ¿Chem quellueyu taiñ peñi? Quisu feipi: “Quimürpun taiñ piuqueyenque che elcünueliyiñmu rume, Jehová femquelai. Chem rupaliyiñ rume, Jehová iñchiñ mu mülequei. Chau Jehová quisucünuquelafi tañi pu che” (Sal. 37:28). Huesalcaelmu quiñe tami piuqueyenieelchi che, ¿chem quelluafeimu? Loncontucuaimi Chau Jehová tami turpu quisucünunoaeteu. Chau Jehová doi piuqueyenieimu chem che meu rume. Elcünuelmu tami piuqueyenquechi che, feita rume hueñancün-ngei. Huelu loncontucuaimi, Jehová amulei tami piuqueyeteu (Rom. 8:38, 39).
Ti lifru Salmos feipicünui Jehová püllelei pu hueñancülelu ñi piuque. (Inaduamnge parrafo 13).
14. ¿Chem feipicünui Salmo 34:18?
14 Huesalcangeliyiñ, ca yafültucuafeiñmu ñi feipin David Salmo 34:18 (papeltunge). Tati pu huesa duamcülelu afduamqueingün, rumel felerpualu troquiuqueingün. Jehová, ¿chumngechi quelluqueyu? Fei fülmaniequefi com pu femngechi duamcülelu. Quiñe chau piuqueyen mu metaquefi tañi pichiqueche ngümalu, fei tüngduamelquefi. Femngechi reque femquei Jehová. Hueñancülen mu iñchiñ, Jehová inaye hueñancüquei ca eluuquei taiñ quelluaeteu. Ayüquei tañi tüngduamelafiel taiñ piuque. Cafei eluqueiñmu maneluhun taiñ chaftuafiel tati huesaque dungu (Is. 65:17).
NGÜMALIYIÑ TAIÑ CUTRANCÜLEN MU
15. ¿Chemu Ezequías müna hueñancülefui ca ngümaquefui?
15 Ti lonco ülmen Ezequías 39 tripantu nielu, contueyu huesa cutran. Chau Jehová ñi huerquen Isaías pingelu feipieyu ñi layal feichi cutran meu (2 Rey. 20:1). Quimlu tüfa Ezequías, rume hueñancülefui, ngümaconcülefui, fei llellipufi Jehová tañi quelluaeteu (2 Rey. 20:2, 3).
16. ¿Chem femi Jehová Ezequías mu?
16 Jehová allcütulu Ezequías tañi llellipun ca pefilu tañi ngüman, cutranpiuqueyeyu. Feimu feipifi: “Allcütuñmaeyu tami llellipun ca peñmaeyu tami cülleñu. Iñche tremoltuayu”. Fei feipifi tañi mongeleal ca tañi montulafiel Jerusalén tañi pu caiñe mu, pu Asiria che (2 Rey. 20:4-6).
17. ¿Chumquei Jehová huesa cutrancülelu iñchiñ? (Salmo 41:3; ca inaduamnge ti adentun).
17 ¿Chem quimeltueiñmu? ¿Chem femafuimi huesa cutrancülelmi? Llellipuafimi ta Jehová. Ngümalen feipiafuimi rume, quisu allcütuaimu. Biblia feipi: “Taiñ Fütra Chau rume cutranpiuqueyechequei. Chau Ngünechen itrofill dungu mu yafültucuchequei” (2 Cor. 1:3, 4). Fachantü Jehová apümlayafui com taiñ huesa rupamequen, huelu fei quelluaiñmu taiñ cüme chaftuafiel (papeltunge Salmo 41:3). Jehová tañi nehuen mu eluqueiñmu nehuen, quimün ca taiñ tüngcüleal (Prov. 18:14; Filip. 4:13). Jehová ca feipicünueiñmu inei no rume ñi cutranhuenoal, femngechi eluqueiñmu maneluhun (Is. 33:24).
Jehová eluqueiñmu nehuen, quimün ca tüngduamelqueiñmu, fei pengeli taiñ huiñoldungueteu. (Inaduamnge parrafo 17).
18. ¿Chem texto yafültucuqueimu eimi rupan mu huesaque dungu meu? (Inaduamnge ti huichulechi dungu “ Jehová tañi feipin liftuquei taiñ cülleñu reque”).
18 Ezequías yafültucueyu Chau Jehová ñi dungu. Iñchiñ ca femngechi yafültucuafeiñmeu ñi feipin Chau Jehová Biblia mu, tüfa tüngduamelqueiñmu rupan mu huesaque dungu mu (Rom. 15:4). Peaiñ ñi rupan quiñe lamngen África Occidental mu mülelu. Quisu rume ngümaquefui feipingelu ñi nieel cancer. Feipi: “Rume yafültucuqueneu ñi feipin Isaías 26:3. Quiñeque mu cacünutulayafuiñ huesaque dungu taiñ rupaquen, huelu tüfachi versiculo mu Jehová feipiqueiñmu taiñ quelluaeteu ñi tüngduamcüleal ca chaftuafiel chem huesa dungu rume”. Eimi, rupamequelmi huesaque dungu mu, ¿nieimi quiñe texto tami yafültucueteu?
19. ¿Chem maneluhun mülei?
19 Epe puucülei ñi afal huesaque dungu, feimu doyelcülei ñi rupamequen huesaque dungu. Huelu ñi rupan Ana, David ca Ezequías pengeleiñmu Jehová cutrantupiuquequei pefiel mu taiñ ngümamequen. Jehová rume piuqueyenieiñmu, feimu acordaquei taiñ ngüman. Rupamequeliyiñ huesaque dungu mu, nülalelafiyiñ taiñ piuque ta Jehová llellipun mu. Quiñeucüleaiñ taiñ pu peñi pu lamngen iñchiñ, fei engün piuqueyenieiñmu. Amulepe taiñ papeltun Biblia, femngechi quintuaiñ Jehová taiñ yafültucuaeteu. Nehuentuleliyiñ rupan mu huesaque dungu mu, Jehová cümelcayaiñmu. Cüpalechi antü mu, Jehová liftuñmayaiñmu taiñ cülleñu (Apoc. 21:4). Fei ti hue mapu mu ngümahuelayaiñ taiñ hueñancün meu, doi mai ayühun mu tripayai taiñ cülleñu.
ÜLCANTUN 4 “Jehová iñche ñi Camañfe”
