Ti apostol Pablo huirintuculelfi ta Timoteo, loncolelu Pablo reque, feipifi: “Chau Ngünechen, Cristo Jesús ca pu dullin cümeque püllü ñi adquiñ meu feipicünueyu tami femal tüfachi dungu. Petu tami dullinon chem femal, cüme ngüneduamaimi com dungu ca dullintuchequelayaimi” (1 Tim. 5:21). ¿Inei engün am feichi “pu dullin cümeque püllü”?

Hune ngüneduamaiñ inei engün coneltulelai feichi troquiñ cüme püllü. Pu 144 mil dullin cristiano coneltulelai feichi troquiñ cüme püllü. ¿Chumngelu? Huirintuculu Pablo feichi dungu, pu dullin cristiano petu huiñomongelngetulaingün huenu mu. Pu apostol ca pu dullin cristiano petu elungelafui feichi cuerpo püllü reque. Feimu, “pu dullin cümeque püllü” feipingelaingün (1 Cor. 15:50-54; 1 Tes. 4:13-17; 1 Juan 3:2).

Cafei pu huesaque püllü caiñetufilu ta Chau Dios cüpalu ti Fütra Mangin Co coneltulelaingün feichi cüme troquiñ püllü ñi feipin Pablo. Cümeque püllüngefuingün, huelu quelluntucufingün tati Huecüfü, fei huesaque püllüngetuingün ca Jesús tañi pu caiñengetuingün (Gén. 6:2; Luc. 8:30, 31; 2 Ped. 2:4). Cüpalechi antü, Jesús cerrantucünuafi engün quiñe fütra lolo meu reque, fei rupale mil tripantu, apümcayafi fei engün ca tati Huecüfü (Jud. 6; Apoc. 20:1-3, 10).

Feichi “pu dullin cümeque püllü” tripalu 1 Timoteo 5:21 quiñentrür üitungeingün Chau Dios ca Cristo Jesús engün, feimu llemai feichi “pu dullin cümeque püllü” quelluntucumequefingün.

Mülei rume fentren cümeque püllü (Heb. 12:22, 23). Fei com pu cümeque püllü elungelaingün trür femngechi cüdau (Apoc. 14:17, 18). Por ejemplo, quiñe cüme püllü müten huercüngei ñi langümafiel 185 mil Asiria hueichafe (2 Rey. 19:35). Cafei, Chau Dios ngünenietule ta mapu, quiñe troquiñ cüme püllü müten peno quelluntucuai ñi ngehuenoal “com pu huelulcachequelu ca pu huesa femquelu” (Mat. 13:39-41). Ca quiñe troquiñ cüme püllü peno “trahulafi pu dullinche” ñi amual huenu mu (Mat. 24:31). Caquelu cümeque püllü feipingei taiñ ‘cuñiutucuaeteu cheu amuliyiñ rume’ (Sal. 91:11; Mat. 18:10; ca ngüneduamafuimi Mateo 4:11 ca Lucas 22:43).

Feimu feichi “pu dullin cümeque püllü” tripalu 1 Timoteo 5:21 mu, fei ta quiñe troquiñ cüme püllü peno feipingelu ñi quelluafiel pu trahunche. Üitufilu pu cümeque püllü, Pablo petu dungumequefui tati pu loncolelu ca ngülamtumequefui ti trahunche ñi yamnieafiel pu loncolelu. Petu ñi dullinon chem femal, pu loncolelu mülei ñi ‘cüme ngüneduamal com dungu ca dullintuchequenoal’. Fei Chau Jehová adniefi ta Pablo ñi raquiduamelafiel pu loncolelu quiñe falin dungu, ¿chem dungu am? “Chau Ngünechen, Cristo Jesús ca pu dullin cümeque püllü” adquintumequefingün ñi cüdau pu loncolelu. Quimfali llemai, mülei cümeque püllü elungelu ti cüdau ñi cuñiutucuafiel pu trahunche, adnieafiel ti amuldungun cüdau ca mülei ñi feipiafiel engün ta Chau Jehová chumngechi femmequengei ti cüdau (Mat. 18:10; Apoc. 14:6).