1-3. ¿Chem dungu ngümalqueiñmu?

 ¿CHUMNGELU ngümaquei che? Quiñeque mu ngümaqueiñ fente taiñ ayühun. Huelu doi fentren rupa ngümaqueiñ fente taiñ hueñancülen. Quiñe lamngen Lorilei, Estados Unidos mapu tuulu, feipi: “Tañi domo püñeñ ñi lan mu fente cutrantulefui tañi piuque. Raquiduamün inei no rume ñi elunoafeteu nehuen. Iñche raquiduamfun, turpu rupanoalu ñi hueñancün troquiufun” pi taiñ lamngen.⁠ *

² ¿Ca chumngelu ngümaqueiñ? Quiñeque mu ngümaqueiñ tañi allcütunon mu tati pu che amuldungun mu. Quiñe lamngen Japón mapu tuulu, Hiromi pingelu, feipi: “Ñi pefiel mu pu che ñi allcütunofiel Jehová ñi quimeltun, hueñancüquen. Quiñeque mu, ngümalen mu llellipuquefiñ Jehová ñi peal quiñe cüme piuquengechi che” pi taiñ lamngen.

³ Fentrenque iñchiñ femngechi dungu mu rupaqueiñ tüfachi epu lamngen reque (1 Ped. 5:9). Iñchiñ ayünieiñ taiñ serfiafiel Jehová ayüucülen. Huelu quiñeque mu ngümalen mu serfiquefiyiñ. ¿Chumngelu? Nien mu quiñeque hueñancün ca niequelaiñ nehuen. Cam rupan mu quiñeque huesa dungu mu, cüdautuafuiñ taiñ serfinieafiel Jehová (Sal. 6:6; 100:2). ¿Chumafuiñ femngechi dungu mu rupaliyiñ?

4. ¿Chem inaduamaiñ tüfachi chillcatun mu?

⁴ Feula inaduamafiyiñ Jesús ñi ejemplo. Fei quiñeque mu ngümaquefui (Luc. 19:41; 22:44; Juan 11:35; Heb. 5:7). Peafiyiñ chem dungu ñi ngümalquefeteu, fei chem  dungu quimafiyiñ Jesús mu ca Jehová mu. Ca peafiyiñ chem mülei ñi femal rupaliyiñ huesaque dungu mu taiñ ngümalqueteu.

5. Ñi feipin Juan 11:32-36, ¿chem quimeltueiñmu Jesús ñi femün mu?

⁵ 32 tripantu mu Lázaro cutrani, ca lai. Tüfa Jesús tañi cüme hueni yem (Juan 11:3, 14). Lázaro niefui epu lamngen, María ca Marta pingefui. Jesús rume piuqueyequefui tüfachi familia. Tüfachi epu lamngenhuen, María ca Marta, rume hueñancülefui ñi lan mu tañi lamngen Lázaro. Deu ñi lamum Lázaro, Jesús amui ta Betania pemeafilu Marta engu María. Marta quimlu müten ñi amulen ta Jesús, trafmefi. Marta fente ñi hueñancülen mu feipifi ta Jesús: ‘Ñidol, eimi mülefulmi tüfa meu, iñche ñi lamngen lalayafui’ (Juan 11:21). Fei Jesús pefiel mu ñi ngümangümangen ta María ca caquelu che ñi compañeteu, Jesús ca ngümai (papeltunge Juan 11:32-36).

6. ¿Chumngelu ngümai Jesús?

⁶ ¿Chumngelu ngümai Jesús feichi antü meu? Ti lifru Perspicacia para comprender las Escrituras, feipi: “Ñi lan mu tañi cüme hueni Lázaro, ca tañi hueñancülen Lázaro tañi epu lamngen, ñi pefiel mu Jesús feimu trefcütripai tañi cülleñu” pi tati lifru.⁠ * Jesús raquiduampelai fente ñi cutrantulefel Lázaro tañi cutrancülen mu. Ca raquiduampelai ta Jesús fente ñi hueñancün ta Lázaro quimlu pürüm tañi layal. Ca femngechi hueñancülpelaeyu ta Jesús ñi pefiel Marta ca María ñi cutrancaucülen Lázaro tañi lan mu. ¿Eimi cai? Lan mu quiñe tami cüme hueni cam quiñe tami familia, ¿ca femngechi hueñancüquepelaimi? Cüpalechi parrafo mu inaduamafiyiñ cüla quimeltun tüfachi nütram mu.

7. Jesús ñi ngüman ñi lan tañi pu hueni, ¿chem quimeltueiñmu Jehová mu?

 ⁷ Jehová com quimniei tami chum duamcülen. Biblia pengeli Jesús tañi chumngechi chengen Chau Ngünechen mu trüri (Heb. 1:3). Feimu Jesús ñi ngüman mu, ¿chem pengeli? Jehová ca femngechi hueñancüquei ñi lan mu quiñe che (Juan 14:9). Eimi layeluhulmi quiñe tami familia cam hueni, chumngechi tami hueñancülen com quimniei Jehová. Huelu fei ca müten no, Jehová ca hueñancüquei. Jehová ayüquei tami tremolmayaeteu tami piuque (Sal. 34:18; 147:3).

8. ¿Chumngelu maneluucüleafuiñ Jesús ñi huiñomongeltuafiel pu la?

⁸ Jesús ayüquei tañi huiñomongeltuafiel tami piuqueyen pu che. Jesús feipifi ta Marta: “Eimi tami lamngen ta huiñomongetuai”. Fei Marta feyentui (Juan 11:23-27). Marta poyequefui Jehová, feimu quimniefui ti profeta Elías ca Eliseo ñi huiñomongeltufiel quiñeque che cuifi mu (1 Rey. 17:17-24; 2 Rey. 4:32-37). Ca femngechi Marta allcüpelafui Jesús ñi huiñomongeltufiel quiñeque che cuifi mu (Luc. 7:11-15; 8:41, 42, 49-56). Marta reque, eimi ca maneluucüleafuimi tami petuafiel tami poyenque pu che lalu cuifi. Feimu lalu tañi pu hueni, Jesús yafültucufi tati pu ngen familia, ca inaye ngümai fente ñi hueñancülen. ¿Chem pengeleiñmu tüfa? Jesús rume ayüniei ñi huiñomongeltuafiel pu la.

9. Jesús reque, ¿chumngechi quelluafuimi tati pu layeluulu?

⁹ Eimi quelluafuimi tati familia layeluulu. Jesús re ngümalai müten Marta ca María engu, doi mai cüme allcütufi ca yafültucufi. Iñchiñ ca femngechi femafuiñ. Quiñe loncolelu Australia mapu mu tuulu, Dan pingelu feipi: “Lalu tañi domo duamniefun ñi yafültucungeal. Alünque curehuen eluucülefui tañi allcütuaeteu. Allcütueneu engün tañi chem duamcülen ca peeneu tañi ngümamequen. Ca eluucülei tañi quelluaeteu engün tañi cüchalelaeteu tañi auto. Cafei ngillacalmeneu supermercado mu, ca deumaleleneu iyael. Ca quiñeque mu, ngillatuquefuingün iñche mu. Fei engün rüf pengeli tañi hueniyeteu huesalcalen mu iñche” (Prov. 17:17).

10. Feipinge chem dungu ñi rupan feichi antü mu ñi ngüman Jesús (Lucas 19:36-40).

¹⁰ 33 tripantu mu, 9 conchi nisán, Jesús amui Jerusalén huaria mu. Epe concülepulu Jesús Jerusalén mu, fentren che üngümnieyu. Pefilu ñi amulen engün, inüfcünui tañi tacun engün tañi llohuafiel rey reque. Müna ayühun-ngefui tüfa (papeltunge Lucas 19:36-40). Fei mu, ¿chem rupai hula? Jesús puquintufilu Jerusalén huaria, fei ngümai. Feimu Jesús apolen mu ñi nge cülleñu mu, feipifi pu che chem huesaque dungu ñi rupayal (Luc. 19:41-44).

11. ¿Chumngelu ngümai Jesús Jerusalén mülechi pu che mu?

¹¹ ¿Chumngelu ngümai Jesús? Jesús quimniefui ñi allcütunoafiel Jehová ñi ngülam alünque pu judio. Femngechi Jerusalén ñi teifücangeal, ca pu mongetripayalu ñi esclavongeal (Luc. 21:20-24). Rupachi antü mu, Jesús ñi feipin femtripai. Fentren che feyentulaeyu. Eimi tami lof mu, ¿chumngechi llouquei pu che ti amuldungun cüdau? Cüme llounole pu che, ¿chem quimeltuafeimu eimi Jesús tañi ngüman mu? Peafiyiñ cüla falinque dungu.

12. Jesús ngümalu tañi chafche mu, ¿chem quimeltueiñmu Jehová mu?

 ¹² Jehová duamtuniefi pu che. Biblia feipi ta Jehová ayünielai inei no rume ñi apümcangeal. Ayüniei ta com pu che ñi nor raquiduamtual (2 Ped. 3:9). Fachantü iñchiñ, rume nehuentun mu amuldungulelquefiyiñ taiñ pu chafche, femngechi pengelquefiyiñ taiñ duamtuniefiel (Mat. 22:39).

13, 14. 1) ¿Chumngechi pengeli Jesús ñi cutranpiuqueyefiel pu che? 2) ¿Chumngechi inayentuafuiñ Jesús?

¹³ Jesús rume fentrenque rupa amuldungulelfi tati pu che. Femngechi ñi femün mu Jesús, pengeli ñi piuqueyeniefiel pu che (Luc. 19:47, 48). ¿Chumngelu femquefui? Ñi cutranpiuqueyefiel mu pu che femquefui. Quiñeque mu rume fentren che cüpa allcütuquefui, feimu Jesús ca tañi pu discipulo pepi iquelafuingün rume (Mar. 3:20). Ca quiñe rupa, quiñe huentru ayüfui ñi nütramcayafiel Jesús pun mu. Fei Jesús elcünui tiempo tañi allcütuafiel (Juan 3:1, 2). Alünque che allcütufilu ta Jesús, huelu com discipulongerpulaingün. Femngechi ñi rupan mu rume, huelu Jesús com cüme quimeltufingün. Iñchiñ fachantü ca femngechi ayüleiñ com pu che tañi allcütual (Hech. 10:42). ¿Fei chem mülei taiñ femal? Mülei taiñ cambiayal chumngechi taiñ amuldungual.

¹⁴ Eluucüleaiñ taiñ cambiayal taiñ amuldungun. Fill hora amuldungucheaiñ, femngechi femnoliyiñ pelayafuiñ ti pu che cüme piuquengelu. Quiñe precursora, Matilda pingelu, feipi: “Tañi füta iñchiu amuldungulelquefiyu tati pu che fill hora. Pulihuentu amuldunguqueyu negocio mu. Puulu ñi almuerzameal che, rume fentrenque che miyauquei calle mu, feimu amuldunguqueyu carrito mu. Doi nagantü pu che mületuquei ñi ruca mu, feimu amuldunguqueyu fill ruca püle” feipi taiñ lamngen. Iñchiñ ngelai taiñ amuldungulelafiel pu che chem hora taiñ ayüqueel, mülei taiñ amuldungual chem hora mu taiñ allcütuafeteu tati pu che. Femngechi femliyiñ, Jehová rume ayüucüleai.

15. Epe puulu ñi layal Jesús, ¿chem dungu rupai? (Lucas 22:39-44).

¹⁵ 33 tripantu mu, 14 conchi nisán mu, Jesús amui Getsemaní pingechi jardin. Fei mu ngillatufi ta Jehová com ñi piuque mu, nülalelfi ñi piuque reque (papeltunge Lucas 22:39-44). Feichi mu Jesús epe pulei ñi layal, fei nehuentu dungui ca ngümai cütu ñi llellipufiel ca ñi ngillatufiel ta Chau Ngünechen (Heb. 5:7). ¿Chem dungu mu ngillatui Jesús feichi pun? Ngillatufi Jehová ñi quelluaeteu ñi püntütripanoal quisu mu. Ca ngillatufi ñi fentecünunoal tañi cüdau. Jehová allcütuñmafi ñi ngillatun ta Jesús, fei huercüleleyeu quiñe cüme püllü ñi yafültucuaeteu.

16. ¿Chumngelu Jesús hueñancülefui petu ngillatulu?

¹⁶ Jesús rume hueñancülefui pu che tañi feipieteu ñi respetanofiel Chau Jehová ñi üi. Jesús rume falintuquefui ñi püntütripanoal ta Jehová mu ca ñi incañpeafiel Chau Jehová ñi üi. Eimi huesaque dungu mu rupalmi, fei cüdautuafuimi chi tami püntütripanoal Jehová mu. ¿Chem quimeltueimu Jesús tañi ngüman? Peaiñ cüla falinque dungu.

17. Jehová ñi allcütuñmafiel ñi llellipun ta Jesús, ¿chem quimeltuqueiñmu iñchiñ?

¹⁷ Jehová allcütuñmaqueimu tami llellipun. Jehová cüme allcütuñmafi Jesús tañi llellipun, ¿chumngelu? Jesús doi falintuquefui tañi püntütripanoal Jehová mu ca ñi yamnieafiel Jehová tañi üi. Ca femngechi iñchiñ Jesús reque femliyiñ, Jehová allcütuñmayaiñmu taiñ llellipufiel (Sal. 145:18, 19).

18. ¿Chumngelu am ta Jesús quiñe cüme hueni?

¹⁸ Jesús quimniei tami chum duamcülen. Fill raquiduamcülen mu, quiñe cüme hueni allcütuñmaeliyiñmu taiñ chum duamcülen ca entendeeliyiñmu, rume ayühuafuiñ. Jesús fei ta cüme hueni. Fei quiñeque mu nehuen-ngehuequelafui ca duamniefui tañi quellungeal, feimu cüme quimniei taiñ chum duamcülen ca quimniei chumül ca chumngechi taiñ quelluaeteu (Heb. 4:15, 16). Petu llellipulu Jesús  Getsemaní pingechi jardin mu, quiñe cüme püllü quellupaeyu. Fei Jesús eluhui tañi quellungeal. Iñchiñ ca femngechi eluhuaiñ taiñ quelluaeteu ta Jehová. ¿Chumngechi quelluqueiñmu Jehová? Quiñe publicacion mu cam quiñe video, quiñe hueupin, quiñe loncolelu ñi feipin mu cam quiñe cüme hueni.

19. Rupamequeliyiñ huesaque dungu mu, ¿inei quelluafeiñmu?

¹⁹ Jehová eluaimu tañi tüngün. Huesaque dungu mu rupaliyiñ, ¿chumngechi eluaiñmu nehuen Jehová? Llellipufiliyiñ Jehová, fei llohuaiñ quisu tañi cüme tüngün, pu che pepi adümquelafi tüfachi cüme tüngün (Filip. 4:6, 7). Femngechi tüngcüleai taiñ piuque ca cüme raquiduamaiñ. Peaiñ chem ñi rupan quiñe lamngen, Luz pingelu, fei feipi: “Fentrenque rupa quisulelu troquiuquen. ‘¿Rüf piuqueyequepeneu mai Jehová?’ ramtuuquen. Femngechi raquiduamün mu, llellipufemquefiñ ta Jehová, feipiquefiñ tañi chum duamcülen. Femün mu, doi cümelcaletuquen” feipi taiñ lamngen. Luz tañi feipin mu, ngillatuliyiñ rüf quelluafeiñmu.

20. ¿Chem falinque dungu quimeltueiñmu Jesús tañi ngüman mu?

²⁰ Jesús tañi ngüman mu quimeltuqueiñmu falinque dungu. ¿Chem falinque dungu? Mülei taiñ quelluafiel taiñ pu hueni layeluulu. Ca mülei taiñ maneluucüleal Jehová ca Jesús quelluaiñmu layeluuliyiñ. Cafei Jehová ca Jesús reque, amuldungucheliyiñ ca quimeltucheliyiñ, duamtuafiyiñ. Cafei Jehová ca Jesús quimnieingu taiñ chum duamcülen ca quelluaiñmu taiñ aguantaleal. Tüfa eluqueiñmu fentrenque nehuen. Feimu llemai, loncontucunieafiyiñ com taiñ quimürpuel acule ti antü Jehová liftuñmayaiñmu taiñ cülleñu (Apoc. 21:4).