1, 2. 1) ¿Chumngelu afmatulquelaeiñmu taiñ rupamequen huesaque dungu mu? 2) ¿Chem peaiñ tüfachi troquiñ mu?

 TAIÑ conpual Chau Dios ñi Gobierno mu, hune “fentren huesaque dungu rupayaiñ” (Hech. 14:22). Quimnieiñ com ñi afal ti huesaque dungu ngünenietule ta Chau Dios ti mapu. Feichi mu müten “ngehuelayai lan, afai ta hueñancün, ngüman ca cutrantun” (Apoc. 21:4). Feimu llemai, afmatuquelaiñ taiñ rupamequen huesaque dungu mu.

² Jehová entuñmaquelaeiñmu taiñ huesaque rupamequen, huelu quelluqueiñmu taiñ nehuencüleal. Peaiñ ñi rupan pu cristiano mülelu Roma mu. Fei engün rupaqueingün fentren huesaque dungu mu, huelu Pablo feipieyu: “Feiti taiñ piuqueyeteu ñi quellun mu, hueutripaqueiñ com tüfachi dungu meu” (Rom. 8:35-37). Tüfa ta quimeltueiñmu Jehová quelluqueiñmu rupamequeliyiñ huesaque dungu mu. Tüfachi troquiñ mu peafiyiñ Jehová chumngechi ñi quellufiel ta José ca chumngechi quelluafeiñmu iñchiñ.

3. ¿Chumngechi caletui ñi mongen ta José?

³ Quimfalcülefui Jacob ñi rume piuqueyefiel ta José (Gén. 37:3, 4). Feimu tañi hunenque pu fotüm ütrirfingün  ta José, feimu fendefingün ta José quiñeque negociante Madián mapu mu tuulu. Feitachi pu negociante yefingün ta José fütra camapu, Egipto mapu mu. Üyeu fendelelfingün quiñe loncolelu ti pu guardia meu, Potifar pingelu. José ñi mongen müchai caletui, ñi saquin fotümngefel esclavolerpui Egipto mapu mu (Gén. 39:1).

4. ¿Chem huesaque dungu mu rupayafuiñ?

⁴ Biblia feipi com pu che “huesa ruparumeafuingün” (Ecl. 9:11). Com iñchiñ rupaqueiñ huesaque dungu mu (1 Cor. 10:13). Cafei rupaqueiñ huesaque dungu mu taiñ inaniefiel mu ta Jesús: ayentungeafuiñ ca quiñeque mu inacangeafuiñ taiñ testigongen mu (2 Tim. 3:12). Chem huesaque dungu mu rume rupaliyiñ, Jehová quelluaiñmu taiñ hueutripayal. Femngechi femfi ta José, peafiyiñ.

5. Potifar, ¿chem inaduami José mu? (Génesis 39:2-6).

⁵ (Papeltunge Génesis 39:2-6). Potifar inaduamfi ta José ñi nien rume adümuhun ca ñi cüme cüdaufengen. Potifar inaduami José ñi quelluquefeteu ta Jehová, feimu ‘rume tutelcai itrocom dungu ñi femqueel meu’. b Rupachi antü mu, Potifar üitufi ta José tañi quelluaeteu ca ñi adnieafiel com tañi ruca. Femngechi ñi femün mu, Potifar ñi mongen com cüme triparpui.

6. Ñi rupan mu ta José, ¿chum duamcülequefui chi?

⁶ Raquiduamnge chem ñi duamniefel ta José. ¿Ñi ayühuelpeafiel mai ta Potifar fei ñi füreneaeteu? ¿Cam ñi lifreletual fei ñi petuafiel tañi chau? José tunte ñi füreneeteu rume ta Potifar, huelu rüf ayüucülelafui. Jehová lifrecünulafi ta José, huelu fei müten no, doi huesaque dungu contueyu ta José.

7. ¿Chumngechi doyelcülerpui José ñi mongen? (Génesis 39:14, 15).

⁷ Génesis capitulo 39 feipi Potifar ñi  domo ayüfi ta José. Fei alünque rupa feipifi ta José ñi cudumaeteu, huelu José turpu pilai. Feichi domo illcutufi ta José, fei dalluntucufi tañi nüntuafeteu (papeltunge Génesis 39:14, 15). Potifar allcülu tüfa, presuntucufi ta José (Gén. 39:19, 20). Cheu ñi presuntucungen ta José, hebreo quehun mu raquiduameleiñmu ñi mülequefel quiñe dumiñcülechi lolo mu, feimu ¿rume huesa duamcülepelafui ta José? (Gén. 40:15). Biblia ca feipi José traricünuñmangei tañi namun ca tañi pel (Sal. 105:17, 18). José manelfal esclavongefui, huelu feula presuntucungei carcel mu, feimu doyelcülerpui ñi rupan ta José.

8. Doyelcülerpule rume ti dungu, huelu ¿chem mülei taiñ quimtucunieal?

⁸ Quiñeque mu taiñ huesa rupamequen mu, fill antü ngillatuquefiyiñ ta Jehová taiñ quelluaeteu, huelu doyelcülerpuquei ti dungu. Tüfachi mapu ngüneniei ta Huecüfü, fei Jehová catrütulayafui taiñ rupanoal huesaque dungu mu (1 Juan 5:19). Huelu mülei taiñ quimtucunieafiel Jehová quimniei taiñ rupamequen huesa dungu mu, fei duamtunieiñmu (Mat. 10:29-31; 1 Ped. 5:6, 7). Fei feipicünueiñmu: “Turpu elcünulayayu, quisucünulayayu rume” (Heb. 13:5). Jehová quelluaiñmu taiñ nehuentuleal nienolu maneluhun troquiuliyiñ rume. Femngechi quellufi ta José, peafiyiñ.

9. Ñi mülen mu carcel mu José, ¿chumngechi quimiyiñ ñi quellunieteu Jehová? (Génesis 39:21-23).

⁹ (Papeltunge Génesis 39:21-23). Ñi huesa rupan mu rume ta José, Jehová quellunieyu, ¿chumngechi femeyu? Jehová ñi femün mu, ti loncolelu carcel mu inaduamfi ñi cüme femün ta José, fei respetanierpufi. Cafei üitufi ñi adnieafiel caquelu presu, fei ti loncolelu carcel mu müte raquiduamcülehuelafui José ñi elfalcünufiel ti cüdau. Feula José nierpui chem mu ñi cüdahuam. José ñi feipintucungen mu rume ñi nüntuafiel Potifar ñi domo, feula elungei quiñe falin cüdau. Afmatufali ñi rupan tüfa. Chumngechi ñi feipin Génesis 39:23, Jehová ñi femün mu com cüme amulequefui José ñi femelchi dungu.

10. José raquiduamquefui chi ñi cüme amulenon tañi femquefel, ¿chumngelu feipiafuiñ?

¹⁰ José ñi dalluntucungen mu presuntucungei, fei ¿raquiduamquepefui mai ñi cüme amulen tañi femquefel? ¿Chem doi duamniefui ta José? ¿Ñi ayühuelafiel ti loncolelu carcel mu fei ñi füreneaeteu? ¿Cam ñi lifrecünungetual? José dungufi cangelu presu ñi lifrecünungetual. Feipifi ti presu ñi dunguafiel Faraón, fei ñi nentungetual carcel mu (Gén. 40:14). Huelu ti presu feipilafi ta Faraón, feimu José epu tripantu mülenagi carcel mu (Gén. 40:23; 41:1, 14). Huelu Jehová quellunieyu ñi cüme tripayal com ñi femel José, ¿chumngechi? Peafiyiñ.

11. 1) Jehová ñi quellun mu, ¿chem dungu femi José? 2) ¿Chumngelu fente falin-ngei ñi femün ta José?

¹¹ José petu ñi mülen carcel mu, Jehová eluñmafi ti Faraón peumayal epu rupa. Fei Faraón ayülefui ñi quimal chem dungu ñi peumael. Faraón quimlu José ñi rulpadunguquefiel ti peuma, fei mütrümfi José. Fei Jehová ñi quellun mu, José rulpadungulelfi  ti peuma ca elueyu quiñeque ngülam. Faraón afmatulehuei, fei quimürpui Jehová engu ñi mülen ti hueche. Fei elufi quiñe falin-ngechi cüdau ñi adnieafiel iyael Egipto mu. Femngechi ñi pepicanieafiel acule ti fütra ngüñün (Gén. 41:38, 41-44). Rupachi antü mu, acui fütra ngüñün Egipto mapu mu ca cheu ñi mülen José ñi pu che Canaán mapu mu. Feimu José montulfi tañi familia, tüfa engün mu ñi cüpayal ti Mesías. Feimu rume falin-ngefui ñi femün ta José.

12. Jehová, ¿chem dungu mu quellufi ta José?

¹² Raquiduamiyiñ com dungu ñi rupan ta José. Potifar inaduamfi ñi cüme femün ta José esclavongefulu rume. Ti loncolelu carcel mu maneluhui José mu. Ti Faraón peumalu, José rulpadunguleleyu ñi peuma. Faraón elufi falin-ngechi cüdau Egipto mu ta José. ¿Inei ñi duam mu rupai com tüfa? Jehová ñi duam mu llemai (Gén. 45:5). Jehová ñi quellun mu com ñi femquefel ta José cüme tripaquefui. José ñi pu peñi ayüniefui rume ñi langümafiel ta José, huelu Jehová elufi ta José quiñe falin cüdau ñi femal femngechi ñi huechutripayal com tañi feipicünuel.

13. Com dungu taiñ rupaquen, ¿Jehová ñi femqueel mu? ¿Chem piafuimi?

¹³ ¿Chem quimeltuqueiñmu José ñi rupan mu? Com dungu mu taiñ rupaquen, ¿Jehová ñi femqueel mu? Com huesa dungu mu taiñ rupaquen, ¿Jehová cümelcacünutuquefi? Biblia femngechi quimeltuquelai (Ecl. 8:9; 9:11). Huelu quimnieiñ tüfa: taiñ rupamequen huesaque dungu mu, Jehová com quimniei ca allcütuñmaqueiñmu taiñ llellipun (Sal. 34:15; 55:22; Is. 59:1). Ca quelluqueiñmu taiñ chaftuafiel huesaque dungu, ¿chumngechi?

14. ¿Chumngechi quelluqueiñmu Jehová taiñ rupamequen mu huesaque dungu?

¹⁴ ¿Chumngechi quelluqueiñmu Jehová? Yafültucuqueiñmu ca eluqueiñmu  nehuen taiñ doi duamniefiel (2 Cor. 1:3, 4). Peafiyiñ ñi rupan quiñe peñi Turkmenistán mapu tuulu, Eziz pingei. Müleaimi epu tripantu carcel mu pingei tañi testigongen mu. Fei feipi: “Feichi antü tañi juiciantucungeal, quiñe peñi pengeleneu Isaías 30:15, feipi: ‘Tüngcülelmün ca maneluucülelmün ta iñche meu, nehuentuleaimün’. Feichi versiculo quellueneu tañi tüngcüleal ca maneluhual Jehová mu com dungu mu. Carcel mu mülelu iñche, feichi texto rume quellueneu”. Eimi cai, ¿quimtucunieimi tami quellueteu Jehová tami doi duamniefel?

15, 16. ¿Chem quimeltueiñmu Tori ñi rupan mu?

¹⁵ Quiñeque mu quimquelaiñ rume chumngechi taiñ quelluqueteu Jehová taiñ huesa rupamequen mu. Femngechi dungu mu rupai quiñe lamngen Tori pingelu. Fei ñi püñeñ, Mason pingelu, cancer cutran contueyu cayu tripantu mu, fei lai. Taiñ lamngen rume hueñancülefui, quisu feipi: “Ñamümngen mu quiñe püñeñ chem dungu mu rume trürümfal-lai. Iñche quimnierpun pu chau, pu ñuque doi cutrancahurpuingün pefiel mu ñi cutrancaumequen tañi pu püñeñ”.

¹⁶ Tori rume cutrancahui pefiel mu ñi cutrancaumequen tañi püñeñ, huelu rupachi antü mu quimürpui chumngechi ñi quellueteu Jehová. Quisu feipi: “Raquiduamün mu feichi antü ñi cutrancülefel tañi püñeñ, Jehová quelluniequeneu. Quiñeque mu tañi püñeñ doi cutranürpulu pital mu, ayüquelafui ñi peafiel inei no rume. Huelu taiñ pu peñi ca pu lamngen pemequefeiñmu  epu hora mu rume ñi puuquefel engün. Turpu quisucünungelafuyu, mülequefui inei rume taiñ quelluaeteu. Taiñ pu peñi, pu lamngen eluquefeiñmu chem taiñ duamnieel. Rume cüdaungechi dungu mu rume taiñ rupafel mu, niequefuiñ chem taiñ duamnieel”. Jehová com elufi Tori ca tañi püñeñ ñi yafüluucüleal (inaduamnge ti huichulechi dungu “ Jehová elueiñmu com taiñ duamniequeel”).

17, 18. Rupamequeliyiñ huesaque dungu mu, ¿chem quelluaiñmu taiñ mañumcüleal ca taiñ peal chumngechi taiñ quelluqueteu Jehová? (Salmo 40:5).

¹⁷ (Papeltunge Salmo 40:5). Quiñe che ayüle ñi puhual ti huechuñ mahuida mu, nor amufemquelai, huelu pichique huitracünuuquei, adquintuquefi tañi hualloñmanieteu. Ca femngechi iñchiñ, mülei taiñ pichique huitracünuhual reque chumngechi taiñ quelluqueteu Jehová. Fill pun mülei taiñ ramtuhual: “¿Chumngechi quellueneu Jehová fachantü?”. Ca rupamequeliyiñ quiñe huesa dungu mu ramtuhuaiñ chumngechi taiñ quellunieteu Jehová.

¹⁸ Huesa rupamequeliyiñ, llellipuafuiñ Jehová taiñ entuñmayaeteu taiñ huesa rupan. Huelu ngelai femngechi müten taiñ raquiduamal (Filip. 4:6). Doi mai mülei taiñ raquiduamal chumngechi taiñ quellunieteu taiñ aguantayal. Rumel mañumnieafiyiñ Jehová, femngechi quimtucuaiñ Jehová taiñ quelluaeteu rupaliyiñ rume huesaque dungu mu (Gén. 41:51, 52).