1, 2. ¿Chem huesaque dungu rupayafui Jehová ñi pu che?

 QUIÑE huesa dungu rupayafuiñ, fei calerumetuafui taiñ mongen. Peaiñ ñi rupan quiñeque peñi ca lamngen. Taiñ peñi Luis a conturumeeyu quiñe huesa cutran, eimi nieimi cancer cutran pieyu ti doctor, quiñeque cüyen rupale müten layafuimi. Ti lamngen Monika tañi füta loncolefui trahun mu, trür serfiquefuingu ta Jehová. Quiñe rupa quimrumei tañi füta fentren tripantu ellcanierquefui tañi huesa femmequen. Taiñ lamngen Olivia fütangelai, cheu tañi mülen ruparumei quiñe fütra meulen, feimu mülefui ñi lefmahual tañi ruca mu. Huiñotulu, teifücalerquei tañi ruca. Taiñ peñi Luis ca taiñ lamngen Monika engu Olivia calerumetui tañi mongen engu. Eimi cai, ¿rupaimi femngechi dungu?

² Com pu che rupaquei huesaque dungu ca cutranquei, iñchiñ Jehová tañi pu che ca femngechi rupaqueiñ. Huelu iñchiñ inantucungequeiñ ca caiñetungequeiñ. Chau Jehová catrütuquelai com taiñ huesa rupan, huelu feipicünueiñmu taiñ quelluaeteu (Is. 41:10). Jehová ñi quellun mu ayüucüleaiñ, cüme dulliaiñ taiñ chem chumal ca püntütripalayaiñ Chau Jehová mu huesa rupaliyiñ rume. Tüfachi chillcatun mu, ngüneduamaiñ meli dungu ñi femün ta Jehová taiñ quelluaeteu, cafei chumaiñ taiñ llohual ñi quellun.

 CHAU JEHOVÁ CUÑIUTUCUAIÑMU

3. Rupan huesaque dungu, ¿chem cüdautuafuiñ taiñ femal?

³ Fütra huesa dungu rupaliyiñ, cüdautuafuiñ ñi cüme dullial chem taiñ chumal. Fente taiñ cutrantupiuquelen, hueñancüleafuiñ, feimu fill raquiduamcüleafuiñ, ñamquiyahuafuiñ reque. Femngechi duamcülefuingu Monika engu Olivia. Olivia feipi: “Pefiel ñi teifücalen tañi ruca, quimlan ñi chem chumal”. Monika quimlu tañi füta ñi ngünencaeteu, feipi: “Re lladcülelan, doi mai allfülelu ñi piuque troquihun, cüdautuquefuiñ ñi femal tañi fillque duam, turpu raquiduamlan ñi rupayal feitachi dungu”. Femngechi duamcüleliyiñ, ¿chumngechi quelluaiñmu Jehová?

4. Ñi feipin Filipenses 4:6, 7, ¿chumquei ta Chau Jehová?

⁴ ¿Chumngechi quelluaiñmu Jehová? Biblia feipi: “Chau Ngünechen hulai tañi cüme tüngün” (papeltunge Filipenses 4:6, 7). Chau Dios ñi hueningen ta iñchiñ, tüngcülequei taiñ piuque, “pu che pepi adümquelafi” tüfa. ¿Llellipufimi mai ta Chau Dios, fei cüme duamnagtui tami piuque? Chau Ngünechen ñi tüngün femquei ta tüfa.

5. Chau Dios ñi cüme tüngün, ¿chumngechi cuñiutucuquefi taiñ raquiduam ca taiñ piuque?

⁵ Filipenses 4:7 feipi Chau Ngünechen tañi cüme tüngün ‘cuñiutucuaiñmu taiñ piuque ca taiñ raquiduam’. Ñi feipin ‘cuñiutucuai’ raquiduamelqueiñmu ñi chumquefel cuifi pu soltau llihuatuquefulu ti huaria. Pu huaria che duamcülequelafui quimnielu cai engün ñi cuñiutucuaeteu pu soltau. Ca femngechi iñchiñ, cüme duamcülequei taiñ raquiduam ca taiñ piuque, quimnielu cai Chau Ngünechen ñi hulqueelchi cüme tüngün cuñiutucuqueiñmu (Sal. 4:8). Amulele rume taiñ huesa rupan, tüngcüleafuiñ chumngechi ñi rupan ta Ana (1 Sam. 1:16-18). Cüme duamcülelu iñchiñ, cüme raquiduamaiñ taiñ chumal.

6. ¿Chumaiñ taiñ llohual Chau Dios ñi cüme tüngün? (Ca inaduamnge ti adentun).

⁶ ¿Chem mülei taiñ femal? Cuifi mu, pu huaria che pediquefuingün pu soltau tañi incayaeteu. Ca femngechi iñchiñ llellipunieafiyiñ ta Chau Jehová elungeliyiñ hula tañi “cüme tüngün” (Luc. 11:9; 1 Tes. 5:17). Femngechi femi taiñ peñi Luis ca tañi domo Ana. Pichiñma mu layaimi feipingelu taiñ peñi Luis, ¿chumingu? Peñi Luis feipi:  “Huesa cutran mu, rume cüdaungei dullial lahuentun dungu mu cam caquelu dungu meu. Llellipulu müten iñchiu, cüme duamiyu”. Peñi Luis ca tañi domo fentecünulaingu tañi llellipun com piuque mu. Llellipufingu ta Chau Jehová ñi eluaeteu tüngün, ñi cüme duamcüleal tañi piuque, ca ñi elungeal quimün, femngechi tañi cüme raquiduamal tañi chem chumal. Femngechi ngüneduamingu ñi huiñoldungueteu Chau Dios. Cüdaungechi dungu rupamequelmi, fentecünuquilnge tami llellipun, femngechi ngüneduamaimi Chau Jehová ñi cüme tüngün cuñiutucuquei tami piuque ca tami raquiduam (Rom. 12:12).

JEHOVÁ QUELLUAIÑMU TAIÑ FOLILUUCÜLEAL REQUE

7. Rupamequeliyiñ cüdaungechi dungu mu, ¿chum duamafuiñ?

⁷ Rupamequeliyiñ huesa dungu mu, cüme ngünelayafuiñ taiñ raquiduam ca taiñ piuque. Quiñe farcu cheu rume yeafeyu ti cürüf, ca femngechi quim ngünelayafuiñ taiñ piuque ca chem taiñ raquiduamquen. Ana rupai femngechi dungu mu lalu tañi füta Luis, feipi: “Quiñeque mu rume huesa duamcülequefun, quisu cutrantupiuquequefun. Ca quiñeque mu, illcutuquefiñ ta Luis tañi quisucünueteu”. Taiñ lamngen quiñeque antü quisulelu troquiuquefui, tañi füta ñi femquefelchi dungu cüdautuquefui ñi femal quisu, feimu huesa duamcülequefui. Taiñ lamngen rangiñ cürüftucu lafquen mu mülelu troquiuquefui. Iñchiñ ca femngechi rupaliyiñ, ¿quellupeafeiñmu mai Jehová?  

8. Ñi feipin 1 Pedro 5:10, ¿chumngechi quelluaiñmu Jehová?

⁸ ¿Chumngechi quelluaiñmu Jehová? Jehová feipicünueiñmu taiñ nehuentucuaeteu, femngechi taiñ cüme foliluucüleal reque (papeltunge 1 Pedro 5:10). Rangiñ cürüftucu mu ti farcu cheu rume amuafui, fente ñi nengümcaunoam fentren farcu epuñpüle miñche mu niei aleta reque, femngechi ñi mütroucaunoal. Feimu tati pu che amuleyelu farcu mu tüngcüleafuingün. Huelu ti farcu mülei ñi amulngeal, femngechi cheu rume yelayaeyu ti cürüf. Ca femngechi iñchiñ mülei ñi amuleal Jehová ñi cüdau mu, femngechi Jehová quelluaiñmu taiñ yenoaeteu huesaque dungu cürüftucu mu reque.

9. Com ti quellu taiñ eluqueteu Jehová tañi troquiñche, ¿chumngechi quelluqueiñmu? (Ca inaduamnge ti adentun).

 ⁹ ¿Chem mülei taiñ femal? Taiñ piuque fill raquiduamcülele, amulepe taiñ llellipun, taiñ trahuluhual ca taiñ amuldungun. Pepi femlayafuiñ chi taiñ femquefel cuifi, huelu Jehová dicümtucuquelaeiñmu taiñ doi femal (ca ngüneduamnge Lucas 21:1-4). Elantücünunge tami papeltual ca tami raquiduamal. Jehová tañi troquiñche eluqueiñmu fillque quellu, video, publicacion taiñ huesa duamnoal taiñ piuque rupaliyiñ huesaque dungu mu. ¿Chumngechi quintuafuiñ femngechi quimeltun? Conafuiñ JW Library^® mu cam Índice de las publicaciones Watch Tower ca conafuiñ Guía de Estudio para los testigos de Jehová. Monika, taiñ nütramcapeel, quintuquefui femngechi quellu huesa duamcülen mu tañi piuque. Fei quintuquefui ti dungun “ira”, “traición” cam “lealtad”, cüme duamcületulu hula, elcünuquefui tañi papeltun. Quisu feipi: “Hue eluulu tañi papeltual, rume huesa duamcülefun. Amulen mu tañi papeltun, tüng duamnagi tañi piuque. Pancopaeteu ta Jehová troquihun. Papeltun mu ngüneduamün Jehová quimniei tañi chum duamcülen ca quelluqueneu”. Ca femngechi iñchiñ Jehová quelluaiñmu tüngcüleal taiñ piuque rupale hula ti huesaque dungu cürüftucu reque felelu (Sal. 119:143, 144).

JEHOVÁ NEHUENTUCUAIÑMU

10. Ruparumeliyiñ huesa dungu mu, ¿chum duamafuiñ?

¹⁰ Rupaliyiñ cutrancahun dungu mu, yafüngehuelayafuiñ. Quiñe atleta rume lefquelu allfürumele, fente lefhuelayafui. Iñchiñ ca femngechi rupayafuiñ. Cüdautuquelafuiñ taiñ femqueel cuifi, huelu feula rume cüdautuqueiñ, ca pihuelayafuiñ taiñ femal taiñ ayühuelquefeteu. Elías reque, ayüafuiñ taiñ cuduleal müten ca umautuleal (1 Rey. 19:5-7). ¿Chem chumai Jehová yafüngehuenoliyiñ?

11. Ñi feipin Salmo 94:18, ¿chumngechi quelluaiñmu Jehová?

¹¹ ¿Chumngechi quelluaiñmu Jehová? Jehová nehuentucuaiñmu (papeltunge Salmo 94:18). Quiñe atleta  allfülele, duamnieafui ñi quellungeal. Iñchiñ ca duamnieafuiñ quellu taiñ serfinieafiel ta Chau Jehová. Fei feipieiñmu: “Iñche am Jehová, tami Ngünechen, nüñmanieyu tami man cuhu, feiti tami feipiqueteu: ‘Llicalayaimi. Iñche ta quelluayu’” (Is. 41:13). David caiñetungelu, ngüneduami Jehová tañi quellunieteu, feimu feipi ‘Chau Jehová nehuentucuqueyu tañi man cuhu mu’ (Sal. 18:35). Huelu ¿chumngechi Jehová nehuentucunieiñmu?

12. Jehová, ¿inei engün am adcünuafui taiñ quelluaeteu?

¹² Jehová adcünuquefi caquelu che taiñ nehuentucuaeteu. Quiñe rupa, David rume ngañhuadcülefui, fei tañi hueni Jonatán pemeyu tañi yafültucuaeteu (1 Sam. 23:16, 17). Cafei quiñe rupa, Jehová adcünufi ta Eliseo ñi quelluafiel ta Elías (1 Rey. 19:16, 21; 2 Rey. 2:2). Famülque mu, Jehová adcünuafui taiñ pu che, pu hueni ca pu loncolelu taiñ nehuentucuaeteu. Huesa duamcüleliyiñ, ayüafuiñ taiñ quisuleal, fentren che femngechi rupaquei. ¿Chem femafuiñ taiñ llohual Jehová tañi quellu?

13. ¿Chem mülei taiñ femal ñi llohual Jehová tañi quellun? (Ca inaduamnge ti adentun).

¹³ ¿Chem mülei taiñ femal? Eluulayaiñ taiñ quisuleal. Püntütripaliyiñ caquelu mu, quisu mu raquiduamqueiñ ca taiñ huesa rupalen, feimu huesa dulliafuiñ chem taiñ femal (Prov. 18:1). Rupaliyiñ huesa dungu mu, ayüafuiñ taiñ quisuleal. Huelu alüñma quisuleliyiñ, lloulayafuiñ Jehová tañi quellu. Feimu ayüliyiñ taiñ quisuleal rume, llohuaiñ taiñ quelluaeteu taiñ pu che, hueni ca pu loncolelu. Piuquentucunieaiñ Jehová mu cüpai tüfachi quellu (Prov. 17:17; Is. 32:1, 2).

JEHOVÁ YAFÜLDUAMELAIÑMU

14. ¿Chem dungu llicalcayafeimu?

¹⁴ Quiñeque mu, rume llicaleafuiñ chi. Biblia mu quiñeque poyequefilu Jehová cuifi müllmüllcülefuingün, ca llicalequefuingün caiñetungen mu cam rupamequen mu huesaque dungu (Sal. 18:4; 55:1, 5). Iñchiñ ca femngechi rupayafuiñ. Caiñetuafeiñmu taiñ pu che, taiñ pu compañ cüdau, colegio mu cam ti gobierno. Contuafeiñmu quiñe huesa cutran, fei llicayafuiñ  taiñ layal. Femngechi rupaliyiñ, quiñe pichiche reque ngenolu quellu troquihuafuiñ. ¿Chumai Jehová taiñ quelluaeteu?

15. Ñi feipin Salmo 94:19, ¿chem femai ta Jehová?

¹⁵ ¿Chumngechi quelluaiñmu Jehová? Jehová yafülduamelaiñmu ca tüngduamelaiñmu (papeltunge Salmo 94:19). Raquiduamnge tüfa mu: mülele tralcan, cürüftucu mahun, llüfqueñ, rume llicayafui quiñe pichi malen, umautulayafui. Huelu acui tañi chau, pancoeyu, fei hula umaunagtui. Amulefule rume ti cürüftucu, huelu tati pichi malen tüngcületui mülen mu tañi chau engu. Iñchiñ ca femngechi llicaleliyiñ, Chau Jehová ta müleai iñchiñ mu, fei doi cümelcaletuaiñ.

16. ¿Chem mülei taiñ femal taiñ yafülduamelaeteu Jehová? (Ca inaduamnge ti adentun).

¹⁶ ¿Chem mülei taiñ femal? Rumel müleaiñ Jehová mu, llellipunieafiyiñ ca papeltuaiñ tañi Dungu (Sal. 77:1, 12-14). Fei rupaliyiñ huesaque dungu mu, quelluen feipifemafiyiñ taiñ Huenu Chau Jehová. Feipiafiyiñ ta Jehová chem taiñ huesa duamelnieteu ca taiñ llicalcanieteu. Ca allcütuafiyiñ papeltufiel mu tañi Dungu, femngechi yafülduamelaiñmu (Sal. 119:28). Quiñeque troquiñ Biblia doi yafültucuafeiñmu llicaleliyiñ. Quiñeque tüfa: Job, Salmos, Proverbios cam ñi feipin ta Jesús Mateo capitulo 6 mu. Llellipufiliyiñ ca papeltufiliyiñ Biblia, Jehová yafülduamelaiñmu.

17. ¿Chem mu maneluhuafuiñ?

¹⁷ Rupaliyiñ huesaque dungu mu, maneluucüleaiñ Jehová taiñ quelluaeteu. Chumcaunorume quisucünulayaiñmu (Sal. 23:4; 94:14). Jehová incañpeaiñmu, quelluaiñmu taiñ cüme foliluucüleal reque, nehuentucuaiñmu ca yafülduamelaiñmu. Isaías feipifi ta Jehová: “Eimi incañpeafimi pu recüluulu com piuque eimi mu, eimi eluafimi ñi tüngcüleal, maneluulu cai engün eimi mu” (Is. 26:3). Feimu maneluhuaiñ Jehová mu, eluucüleaiñ taiñ quelluaeteu. Femngechi chem huesa dungu rupale rume taiñ mongen mu, nehuentuleaiñ.