TI Hue Mapu ñi Biblia feipi “carreta” miyahulquei ti Etiopía huentru. Griego quehun mu carreta ca femngechi feipingefui fillque carretela (Hech. 8:28, 29, 38). Feichi carretela pünengequelu hueichan ca cuden mu doi pichingefui. Huelu ¿doi fütra carretela mu miyaufui peno ti Etiopía che? ¿Chumngelu feipiafuiñ tüfa? Ngüneduamaiñ cüla dungu.

Tati Etiopía huentru falin-ngechi cüdau niefui ca fütra camapulefui tañi mapu. Tüfachi huentru “quiñe falin cüdaufe autoridadcülelu, Etiopía mapu mu. Fei quelluquefui ta Candace pingechi domo ca adniequefui ñi falinque fillem. Feichi domo lonco ülmencülerquei Etiopía mapu mu” (Hech. 8:27). Cheu ñi mülefel Etiopía mapu mu, feula mülei Sudán ca Egipto mapu sur püle. Caque carretela mu miyaufui chi ti Etiopía huentru, huelu fente ñi miyahun, ¿fentren chemcün yeniepelafui? Hunen siglo mu, fillque carretela mu miyauquefui che. Quiñeque meli rueda niequefui ca toltoucülefui. Quiñe lifru nütramcalu ñi feipin Hechos feipi: “Feichi carretela mu püramngequefui fentren fillem, doi cüme miyauquefui che ca doi camapu amuquefui”.

Ti Etiopía huentru papeltumequefui, fei Felipe fülcontueyu. Biblia feipi: “Felipe lefcülen amui cheu ñi mülen ti Etiopía che, fei allcüi ñi nehuentu papeltumequen ta Isaías, Chau Ngünechen ñi huerquen” (Hech. 8:30). Feichi carretela miyahulquefilu ta che matu amuquelafui. Feimu pepi papeltulefui ti Etiopía huentru, fei Felipe diturpueyu.

Ti Etiopía huentru“llellipufi ta Felipe ñi pürayal tañi carreta meu ca anüal tañi inafül püle” (Hech. 8:31). Feichi carretela conquelu cuden meu huitralequefui ti che. Huelu feitachi carretela miyahulquefilu ta che doi alü rupafui, feimu ta Felipe anüpui tati Etiopía che ñi inafül püle.

Chumngechi feipi Hechos capitulo 8 ca ñi feipin pu quimche, feula taiñ fillque papel mu pengelquelu ti Etiopía huentru ñi adentun tripaquei tati doi alü rupachi carretela, tripahuelai feichi carretela pünengequefulu hueichan ca cuden mu.