TROQUIÑ ÑI CHILLCATUNGEAL 3
ÜLCANTUN 35 Doyümaimi tati doi falin-ngechi dungu
Cüme dulliaiñ taiñ ayühulafiel ta Jehová
“Quiñe che ñi quimchengeal, hunelu mülei tañi rume yamnieafiel ta Jehová, cafei ñi quimfiel mu ti Doi Alüpüralelu, fei quim ngüneduamngei” (PROV. 9:10).
¿CHEM QUIMAIÑ?
Chumngechi quelluaiñmu ti quimün, adümuhun ca quim ngüneduamün taiñ cüme dullial.
1. ¿Chemu cüdaungeafui taiñ dullial quiñeque dungu?
FILL antü iñchiñ dulliqueiñ taiñ chumal. Quiñeque müte cüdaungelai tañi dullial: chem taiñ iyal cam chem hora taiñ cudual. Huelu quiñeque mu mülei taiñ dullial doi falinque dungu, feimu cüdaungeafui. ¿Chemu? Dullifiel mu quiñeque dungu, quelluafeiñmu taiñ cüme feleal, taiñ ayüucüleal ca taiñ cüme poyeafiel ta Jehová. Huelu cüme dullinoliyiñ, huesalcahuafuiñ. Ayülayafuiñ taiñ rupayal femngechi dungu mu, huelu doi mai, rume ayünieiñ taiñ ayühulafiel ta Jehová taiñ dulliqueel mu (Rom. 12:1, 2).
2. ¿Chem quelluafeimu tami cüme dullial?
2 Tüfachi troquiñ mu peaiñ cüla dungu taiñ quelluafeteu taiñ cüme dullial: 1) cüme quimafiyiñ com ti dungu, 2) ngüneduamaiñ chem raquiduamquei Jehová feitachi dungu mu, ca 3) raquiduamaiñ chem doi cümeafui taiñ femal. Tüfachi troquiñ mu ca ngüneduamaiñ chem quelluafeiñmu taiñ quim ngüneduamal chem ñi cümen ca chem ñi cümenon (Prov. 2:11).
CÜME QUIMAFIYIÑ COM TI DUNGU
3. ¿Chemu fente falin-ngei taiñ cüme ngüneduamal ti dungu? Feipinge quiñe ejemplo.
3 Taiñ cüme dullial, hunelu mu duamfali taiñ cüme quimafiel ti dungu. ¿Chemu fente falin-ngei? Raquiduamaimi tüfachi dungu: quiñe che huesa cutrancülele, amuai doctor mu. Ti doctor, ¿elufempeafeyu mai lahuen tañi pütocoal? Femlayafui llemai, hunelu mu tati doctor ramtucayafi tati che chem tañi cutrancülen ca femngechi cüme ngüneduamafi. Tati doctor reque, eimi ca femngechi cüme ngüneduamafimi com ti dungu, fei hula dulliaimi tami chumal. ¿Chumngechi femafuimi? Peafiyiñ.
4. Tami cüme quimafiel ti dungu, ¿chumafuimi? (Proverbios 18:13; ca inaduamnge ti adentun).
4 Ramtuliyiñ, quimaiñ taiñ chumal. Quiñe ejemplo, amuayu fiesta mu pingelmi, ¿amuafuimi? Müte quimnofilmi tati ngen ruca cam quimnolmi chem ñi femal engün feitachi fiesta mu, ramtuafuimi: “¿Cheu femngeai feitachi trahun ca chumül? ¿Chumten che amuai ca inei engün am? ¿Inei am adnieafi feitachi trahun? ¿Chumai engün tati fiesta mu? ¿Mülepeai mai ta pulcu?”. Tami chem piaeteu tati ngen ruca, quelluaimu tami amual cam amunoal (papeltunge Proverbios 18:13).
Entuaimi ramtun tami quimafiel com ti dungu. (Inaduamnge parrafo 4). a
5. Deu quimfiel mu com ti dungu, ¿chumaimi?
5 Deu quimfilmi com ti dungu, cüme raquiduamaimi chem tañi rupayafel. Raquiduamaiñ tati fiesta mu. Feipingelmi tañi amual quiñeque che inaquenofilu Jehová tañi ngülam. Ca müleai ta pulcu, huelu inei rume ngüneduammequelayai tunte ñi putual ta che. ¿Chem pimi? Femngechi dungu mülele fiesta mu, ¿pofolcaupeafui mai pu amulu? (1 Ped. 4:3). Cam feichi antü nielmi trahun cam amuldungun, fei quiñepülecünufilmi, ¿cümepeafui mai? Cüme raquiduamülmi com ñi rupayafel, cüme dulliaimi tami chumal. Huelu ca quiñe dungu mülei tami quimal: ¿Jehová cai? ¿Chem raquiduamquei tüfachi dungu mu? (Prov. 2:6).
NGÜNEDUAMAIÑ CHEM RAQUIDUAMQUEI JEHOVÁ
6. Ñi feipin Santiago 1:5, ¿chemu llellipuafiyiñ Jehová taiñ quelluaeteu?
6 Llellipuafuimi Jehová, femngechi tami quimal chem ñi raquiduamqueel. Biblia feipi: “Chau Ngünechen com piuque mu hulquei alün dungu, fei lladcütuquelafi tuchi tañi llellipueteu” (papeltunge Santiago 1:5). Feimu llellipufiliyiñ quimün, fei eluaiñmu llemai. Nieliyiñ Jehová ñi quimün, fei quimaiñ taiñ chum duamelafiel taiñ dulliqueel mu.
7. ¿Chumngechi quimafuimi chem ñi raquiduamqueel ta Jehová? Feipinge quiñe ejemplo.
7 Deu llellipufilmi Jehová, cüme ngüneduamnge chumngechi tami quelluaeteu. Raquiduamnge tüfa: pasiayahulmi camapu mu, fei ñamrumelmi, quelluen piafuimi quiñe che mülelu feichi mapu mu. Huelu re ramtulayafimi müten, cüme allcütuafuimi llemai tami chem piaeteu. Ca femngechi femaiñ inchiñ. Re llellipulayafiyiñ müten ta Jehová, ca mülei taiñ allcütuafiel. Quintuafiyiñ Biblia mu chem ngülam nüucülei taiñ rupamequen mu. Ca huiño nütramcayaiñ tati fiesta mu. Raquiduamcülelmi tami amual cam amunoal, cüme ngüneduamaimi chem pilen Biblia tati pofolcalechi fiesta mu, tati huesaque compañ mu ca ñi fente falin-ngen doyümafiel Chau Jehová ñi dungu (Mat. 6:33; Rom. 13:13; 1 Cor. 15:33).
8. Duamülmi quellu tami quintual ngülam, ¿chumafuimi? (Ca inaduamnge ti adentun).
8 Quiñeque mu duamnieafuiñ quellu taiñ peal ngülam taiñ quelluaeteu. Quiñe peñi cam quiñe lamngen cüme hueniyefilu Jehová ngülamtuafeiñmu. Huelu ca cümeafui tami quisu quintual quimeltun. Taiñ femal, nieiñ fentren quellu. Mülei ti lifru Biblia ñi ngülam adniequeiñmeu. Loncontucuaimi: doi falintufali ayühulafiel ta Jehová.
Quimtucunieaimi chem raquiduamquei Jehová. (Inaduamnge parrafo 8). b
9. Dulliliyiñ quiñe dungu, ¿chumngechi quimafuiñ ñi ayühulafiel ta Jehová? (Efesios 5:17).
9 Dulliliyiñ quiñe dungu, ¿chumngechi quimafuiñ ñi ayühulafiel Jehová? Hunelu mu, mülei taiñ cüme quimafiel. Biblia feipi: “Quimfiel mu ti Doi Alüpüralelu, fei quim ngüneduamngei” (Prov. 9:10). Feimu mülei taiñ cüme quimafiel ñi chumngen ta Jehová, chem tañi femal, chem tañi ayüqueel ca chem tañi üdequeel. Cümeafui tami ramtuhual: “Tañi quimniefiel mu ta Jehová, ¿chem dungu doi ayühulayu?” (papeltunge Efesios 5:17).
10. ¿Chumngelu doi falintuquefiyiñ Biblia ñi ngülam?
10 Taiñ ayühulquefiel mu ta Jehová, quiñeque mu taiñ pu che cam taiñ pu hueni ayülayafui chi taiñ dulliqueel. Raquiduamnge tüfa: quiñeque chau cüme duam mu ngüchaltucuafui tañi ñahue ñi fütayeafiel quiñe huentru fentren plata nielu cüme hueniyenofilu rume ta Jehová. Rüfcünu mai, pu chau ayüquei tañi ñahue ñi faltalenoal chem no rume. Huelu, ¿inei quelluayu ñi doi cüme hueniyeafiel Jehová? ¿Chem raquiduamquei Jehová tüfa mu? Biblia ngülamtuqueiñmu taiñ doyümnieafiel ñi cüdahuelafiel ta Chau Ngünechen (Mat. 6:33). Iñchiñ respetaquefiyiñ taiñ pu chau ca taiñ pu lof che, huelu doi ayüqueiñ taiñ ayühulafiel ta Jehová.
RAQUIDUAMAIÑ CHEM DOI CÜMEAFUI TAIÑ FEMAL
11. Ñi feipin Hebreos 5:14, ¿chem quelluaiñmu taiñ cüme dullial?
11 Deu ngüneduamfiliyiñ Biblia ñi ngülam nüucülelu taiñ rupamequen mu, raquiduamaiñ chem doi cümeafui taiñ femal (papeltunge Hebreos 5:14). ¿Chem quelluafeiñmu? Quim ngüneduamliyiñ, quimaiñ chum tripayafui caque rume dungu taiñ dulliafel. Quiñeque mu, müte cüdaungelai quimal chem doi cümeafui taiñ femal, huelu caquelu rupa doi cüdaungeafui mai. Cüdaungefule rume, quim ngüneduamün quelluaiñmu taiñ cüme dullial.
12, 13. Tami cüme dullial quiñe cüdau, ¿chumngechi quelluafeimu ti quim ngüneduamün?
12 Raquiduamnge tüfa: quintuyahulimi cüdau tami eluafiel tami pu che chem tañi duamnieel, fei epu cüdau peimi. Petu tami dullinon, cüme ngüneduamfimi com ti dungu. Ngüneduamfimi chem cüdau tami femal, tunten hora tami cüdahual ca cheu tami femal. Feitachi epu cüdau chaftuquelafi Biblia ñi feipin. Quiñe cüdau doi ayüfimi ca doi plata cullingeaimi. Feimu, “tüfa peno dulliafiñ” pileimi. Huelu petu mülei caquelu dungu tami ngüneduamal.
13 Cümeafui tami ramtuhual: “Quiñe tüfachi cüdau, ¿eluñmapeafeneu mai ñi amual com trahun mu? Llouli tüfachi cüdau, ¿niepean mai tiempo tañi cüme cuidayafiel tañi pu che ca ñi doi hueniyeafiel Jehová?”. Femngechi ramtuhulmi, quelluaimu tami doyümafiel Jehová tami mongen mu ca cüme cuidayafiel tami pu che, tüfa am doi falilu plata mu. Femngechi dulliaimi quiñe cüdau tami ayühulafiel ta Jehová.
14. Quim ngüneduamliyiñ ca piuqueyecheliyiñ, ¿chumngechi quelluaiñmu taiñ huelulcanoafiel taiñ quimnieteuchi pu che?
14 Quim ngüneduamliyiñ, raquiduamaiñ taiñ chum duamelafiel taiñ quimnieteuchi pu che taiñ dulliquen mu. Femngechi ‘huelulcalayafiyiñ ta caquelu che’ (Filip. 1:10). Tüfa rume falin-ngei dulliliyiñ chumngechi taiñ tucutuhual ca chumngechi taiñ adelcahual. Quiñeque mu, taiñ pu peñi pu lamngen cam caquelu che huesa duamafui taiñ tucutuhun mu. Fei, ¿chumaiñ? Quim ngüneduamal quelluaiñmu taiñ yamnieafiel ñi raquiduam engün. Cafei piuqueyecheliyiñ, quisu duamuulayaiñ müten, doi mai quintuaiñ caquelu che ñi cüme feleal ca mallmangenon mu tucutuhuaiñ (1 Cor. 10:23, 24, 32; 1 Tim. 2:9, 10). Loncontuculiyiñ tüfachi dungu, taiñ dulliqueel mu pengelaiñ taiñ piuqueyefiel ca respetaquefiel caquelu che.
15. Dullifilmi fütraque dungu, ¿chem cümeafui tami raquiduamal?
15 Duamfalngele tami dullial quiñe fütra dungu, raquiduamaimi chem tami femal tami huechurpual. Jesús quimeltueiñmu petu taiñ femnon chem no rume, hune mülei taiñ nentucuentayal (Luc. 14:28). Feimu deu dullifilmi quiñe dungu, raquiduamaimi tunten plata, tiempo ca nehuen duamfali tañi huechunenturpuafiel. Quiñeque mu, nütramcayafuimi tami pu che chem ñi femal caque quiñeque eimün, fei ñi cüme tripayal ti dungu. ¿Chumngelu cümeafui tüfa? Femülmi, ngüneduamafuimi chi ñi duamfalngen pichi cacünutuafiel tami dulliel cam dulliafiel cangelu dungu. Cafei ramtufilmi tami pu che chem ñi raquiduamcülen ca allcütufilmi engün, doi eluucüleaingün ñi huechunenturpual tami dulliel (Prov. 15:22).
CÜME DULLIAIMI TAMI CHUMAL
16. ¿Chem mülei tami femal ñi cüme tripayal tami dulliel? (Ca inaduamnge ti huichulechi dungu “ Chumngechi cüme dulliaiñ”).
16 Inafilmi taiñ peel tüfachi troquiñ mu, cüme dulliaimi tami chumal. Hune cüme quimafimi com ti dungu ca quintuaimi ngülam Biblia mu tami ayühulafiel ta Jehová tami dulliel mu. Deu femülmi com tüfachi dungu, feichi hula llellipuafuimi Jehová ñi com cüme tripayal.
17. ¿Chem quelluaiñmu taiñ cüme dullial?
17 Cüme tripafule rume tami dulliel cuifi, loncontucuaimi: ñi cüme tripayal tami dulliel, maneluulayaimi eimi tami quimün mu, Jehová tañi quimün meu llemai. Chau Jehová müten eluafeiñmu rüfngechi quimün, adümuhun ca quim ngüneduamün, femngechi quimchengerpuaiñ (Prov. 2:1-5). Felei llemai, Jehová quelluafeiñmu taiñ cüme dullial, femngechi taiñ ayühulmayafiel tañi piuque (Sal. 23:2, 3).
ÜLCANTUN 28 ¿Chumngechi hueniyerpuafuiñ Jehová?
