TROQUIÑ ÑI CHILLCATUNGEAL 4
ÜLCANTUN 18 Mañumcüleiñ tati montulchen mu
¿Chem quimeltuqueiñmu ñi lan ta Jesús?
“Femngechi pengelelngeiñ Chau Ngünechen ñi piuqueyechen” (1 JUAN 4:9).
¿CHEM QUIMAIÑ?
Jesús tañi lan chem quimeltuqueiñmu ñi chumngen Jehová ca Jesús.
1. Amuliyiñ ti Trahun Jesús tañi lan ñi acordangeal, ¿chumngechi cümelcayaiñmu?
JEHOVÁ elueiñmu quiñe rume cüme regalo huercülu tañi Fotüm ñi layal iñchiñ mu (2 Cor. 9:15). Jesús tañi lan mu hueniyeafuiñ ta Jehová ca maneluucüleiñ taiñ rumel mongeleal. Jehová taiñ piuqueyenieteu mu, elufi tañi layal tañi Fotüm iñchiñ mu, feimu rume mañumcüleiñ (Rom. 5:8). Jesús elcünui tati trahun ñi acordangeal quisu tañi lan, femngechi taiñ mañumcüleal ca taiñ falintuafiel ñi femün Jehová ca Jesús iñchiñ mu (Luc. 22:19, 20).
2. ¿Chem peaiñ tüfachi troquiñ mu?
2 Ti Trahun Jesús tañi lan ñi acordangeal femngeai sabado 12 abril, 2025 tripantu mu. Com pepicaumequeiñ taiñ amual. Raquiduamliyiñ ñi femün Jehová ca Jesús iñchiñ mu, rume cümelcaqueiñmu. Tüfachi troquiñ mu ngüneduamaiñ chem quimeltuqueiñmu Jesús tañi lan Jehová mu ca Jesús mu. Cangelu troquiñ mu, ngüneduamaiñ chumngechi cümelcaqueiñmu Jesús tañi lan ca chumngechi pengelaiñ taiñ mañumcülen.
JESÚS ÑI LAN, ¿CHEM QUIMELTUEIÑMU JEHOVÁ MU?
3. ¿Chumngechi quiñe huentru tañi duam mu müten fentren che montulngeafui? (Ca inaduamnge ti adentun).
3 Jesús tañi lan mu, Jehová pengeleiñmu tañi norngen (Deut. 32:4). Adán feyentunofilu ta Jehová, culpafe chengerpui ca larpui. Com iñchiñ cüpalu am ta Adán mu, feimu culpafe chengeiñ ca laqueiñ (Rom. 5:12). Taiñ montulaeteu ta Jehová, huercüi tañi saquin Fotüm. ¿Chumngechi feipiafuiñ quiñe huentru ñi lan mu fentren che montulngeafui? Ti apostol Pablo feipi: “Quiñe huentru ñi feyentunon mu, fentren che culpafengetui. Huelu quiñe huentru ñi feyentun, fentren che nor che pingetui” (Rom. 5:19; 1 Tim. 2:6). Felei llemai, Adán tañi feyentunon mu, com iñchiñ rulpaleleiñmu ti culpan ca lan dungu. Huelu Jesús turpu culpalai, feimu tañi lan mu montuleiñmu com iñchiñ.
Quiñe huentru tañi culpan mu, com culpaqueiñ ca laqueiñ. Ca femngechi, quiñe huentru ñi duam mu lifrecünungeiñ culpan ca tati lan dungu. (Inaduamnge parrafo 3).
4. Adán ñi pu yall feyentufilu Jehová, ¿chumngelu elungelai tañi rumel mongeleal?
4 Quiñeque che feipiafui: “Adán culpai, huelu tañi pu yall culpalai. ¿Chemu elungelai ñi rumel mongeleal feyentufile Chau Jehová? ¿Duamfalngepefui mai ñi layal ta Jesús?” piafuingün. Huelu Jehová norngelu am, femngechi raquiduamlai. Jehová elufile Adán ñi pu yall tañi rumel mongeleal, culpanolu Adán troquingeafui, huelu tüfa rüfngelai. Adán fütra culpai ca rulpalelfi ti culpan tañi pu yall.
5. ¿Chumngelu maneluhuafuiñ ñi femal Jehová norngechi dungu?
5 Jehová elufile müten Adán tañi pu yall ñi rumel mongeleal, Jehová famentuafui ti norngechi dungu, feimu pu che maneluulayafui Jehová ñi rumel femal ti nor dungu. Ramtuhuafuingün: “¿Rüf femürpuai tañi feipicünuel cüpalechi antü mu?”. Huelu Jehová femi norngechi dungu llemai, rume cutrancaufulu rume hulün mu tañi Fotüm. Feimu maneluucüleafuiñ Jehová ñi rumel femal norngechi dungu.
6. Jehová, ¿ca chem dungu mu huercüi tañi Fotüm? (1 Juan 4:9, 10).
6 Ñi lan Jesús Jehová pengel-lai re tañi norngen, ca pengeli taiñ rume piuqueyenieteu (Juan 3:16; papeltunge 1 Juan 4:9, 10). Chau Jehová huli tañi Fotüm tañi lapayal, femngechi taiñ afnoachi mongen nieal ca taiñ conelturpual tañi familia mu. Adán culpalu, coneltulehuelai Jehová tañi familia mu. Ca femngechi choyüngelu müten ta iñchiñ, coneltuquelaiñ Jehová tañi familia mu. Huelu Jesús ñi lan mu com iñchiñ feyentuliyiñ Jehová mu, coneltuafuiñ quisu tañi familia mu. Ca fachantü Jehová perdonaqueiñmu taiñ culpan ca cüme hueniyefiyiñ quisu ca taiñ pu peñi ca pu lamngen. Chau Jehová rüf piuqueyequeiñmu llemai (Rom. 5:10, 11).
7. Jesús rume cutrancahui taiñ montulaeteu, ¿chem quimeltueiñmu tüfa Jehová mu?
7 Jehová rume cutrancahui pefiel mu Jesús ñi cutrancaumequen. Raquiduamliyiñ fei mu, ngüneduamaiñ fente taiñ piuqueyenieteu Jehová. Huecüfü feipi quiñe che huesa dungu rupafule, püntütripayai Jehová mu. Jehová tañi pengelal tañi coilangen ta Huecüfü, eluñmafi tañi Fotüm ñi huesa rupayal (Job 2:1-5; 1 Ped. 2:21). Jesús ayentungei, hulelcangei ca clafantucungei orcon mamüll mu. Ca rume cutrancahui tañi layal. Chau Jehová com peniefui, feimu rume hueñancüpelai (Mat. 27:28-31, 39). Jehová catrütuafui ñi femngechi rupanoal. Pu che feipi Chau Dios cüpa quellufile, montulafui tañi Fotüm (Mat. 27:42, 43). Femngechi femfule ta Jehová, Jesús hul-layafui tañi mongen taiñ montulaeteu, feimu Jehová eluñmafi tañi layal tañi Fotüm.
8. ¿Chemu quimiyiñ Jehová inaye cutrancahui Jesús mu? (Ca inaduamnge ti adentun).
8 Jehová fente nehuen-ngefulu rume, ca hueñancüquei. ¿Chemu quimiyiñ? Jehová deumaeiñmu taiñ inayentuafiel ñi chumngen. Pefiel mu caquelu che ñi cutrancaumequen, iñchiñ ca cutrancauqueiñ, feimu quimnieiñ Jehová ca cutrancauquei. Biblia feipi Chau Jehová quiñeque mu hueñancüquei ca huesa duamquei (Sal. 78:40, 41). Peaiñ tañi rupan Abrahán. Jehová feipifi ta Abrahán ñi chalintucual tañi quiñen fotüm (Gén. 22:9-12; Heb. 11:17-19). ¿Rume hueñancülepelafui Abrahán huitrampürafilu tañi cuchillo ñi langümafiel ñi fotüm? Jehová doi hueñancüpelai pefiel mu quiñeque che ñi ahucafiel ca langümfiel tañi Fotüm. (Ca inaduamnge ti video Inayentuafiyiñ pu feyentulu Jehová mu: Abrahán [troquiñ 2] mülelu jw.org).
Jehová rume hueñancüi pefilu tañi Fotüm tañi huesa rupamequen. (Inaduamnge parrafo 8).
9. ¿Chem quimeltueiñmu Romanos 8:32, 38, 39 Jehová ñi piuqueyen mu?
9 Jesús ñi lan pengeleiñmu Jehová fente taiñ piuqueyenieteu. Doi piuqueyenieiñmu quiñe hueni mu, quiñe familia mu (papeltunge Romanos 8:32, 38, 39). Iñchiñ piuqueyehuiyiñ, huelu Jehová doi piuqueyenieiñmu. ¿Ayüafuimi tami rumel mongeleal? Jehová doi ayüquei tami femal. Eimi, ¿ayüqueimi tami perdonangeal? Jehová doi ayüquei tami perdonayaeteu. ¿Chem ayüquei taiñ femal ta Jehová? Taiñ mañumtuafiel ñi femün ta iñchiñ mu, taiñ feyentuleal ca cüme inayal taiñ feipieteu. Jesús ñi lan pengeleiñmu chumte taiñ piuqueyenieteu. Tati hue mapu mu, doi quimürpuaiñ chumte taiñ piuqueyenieteu Jehová (Ecl. 3:11).
JESÚS TAÑI LAN, ¿CHEM QUIMELTUEIÑMU QUISU MU?
10. 1) Petu ñi lanon, ¿chem dungu doi hueñancülelfeyu Jesús? 2) Jesús, ¿chumngechi pengeli Huecüfü ñi coilangen? (Ca inaduamnge ti huichulechi dungu “ Jesús tañi lan mu pengeli Jehová ñi norngen”).
10 Jesús raquiduamcülefui caquelu che ñi huesa dungunoal Chau Jehová mu (Juan 14:31). Jesús quimniefui ñi layal quiñe huesa che reque, ca femngechi langümngefui pu caiñetuquefilu ta Chau Dios. Jesús raquiduamcülefui chumngechi ñi layal ñi huesa dunguyengeal tañi Chau, fei rume hueñancülfeyu. Feimu llellipui: “Tañi Fütra Chau, füreneen, müntuñmaen tüfachi copa” (Mat. 26:39). Jesús com tañi mongen püntütripalai tañi Chau mu cutrancaufulu rume, femngechi pengeli Huecüfü ñi coilangen.
11. Fente tañi piuqueyeniefiel ta che, ¿chumi Jesús? (Juan 13:1).
11 Hulün mu tañi mongen, Jesús pengeli fente tañi piuqueyechequen, doyelchi mai tañi pu inanieteu (Prov. 8:31; papeltunge Juan 13:1). Jesús cüme quimniefui quiñeque dungu tañi rupayal rume cüdaungeafui. Quiñe ta tüfa: tañi langümngeal. Huelu cüdaungefulu rume, Jesús feyentufi tañi Chau. ¿Chemu? Rume piuqueyefui com che. Feimu com piuque mu eluhui tañi quellual ta che, tañi amuldungulelafiel ca tañi enseñayafiel. Epe puulu rume ñi layal, cüchanamunfi tañi pu apostol, feipifi tañi chumal engün ca yafültucufi (Juan 13:12-15). Clafaconcülelu rume quiñe orcon mamüll, Jesús amuldungulelfi quiñe huesa huentru inafülcülelu quisu mu. ¿Ca chumi? Elfalcünufi ta Juan ñi cuidalelaeteu tañi ñuque (Luc. 23:42, 43; Juan 19:26, 27). Felei llemai, hulün mu tañi mongen, Jesús pengelfi fente tañi piuqueyeniefiel che. Doi mai mülepalu mapu mu, rumel pengeli tañi duamtuchequen.
12. Fantepu, ¿chummequei Jesús iñchiñ mu?
12 Biblia feipi: “Quiñe rupa müten lai Jesús” (Rom. 6:10). Huelu amulei tañi cüdaucülen, femngechi taiñ cümelcayaeteu quisu tañi lan. Jesús taiñ Lonco Ülmen, Hunen Lonco Sacerdotengei ca loncolei ti trahunche mu (1 Cor. 15:25; Efes. 5:23; Heb. 2:17). Jesús ca elfalcünungei ñi trapümal pu dullinque cristiano ca pu caquelu ufisa petu ñi acunon ti fütra cutrancahun (Mat. 25:32; Mar. 13:27). a Jesús ca elufi tati “quim manelfal cüdaufe” tañi cuidayafiel Jehová tañi troquiñche ca tañi eluafiel com tañi duamnieel engün ti afaelchi antü mu (Mat. 24:45). Ca ngünenietule mil tripantu mu, Jesús fentecünulayai ñi cüdaucüleal iñchiñ mu. Rüfcünu llemai, Jehová hulcünui tañi quiñen Fotüm iñchiñ taiñ duam mu.
AMULEAI TAMI QUIMAL HUEQUE DUNGU
13. ¿Chumngechi doi quimürpuafuiñ Jehová ca Jesús taiñ piuqueyenieteu?
13 Raquiduamliyiñ tañi femün Jehová ca Jesús iñchiñ mu, doi quimaiñ taiñ piuqueyenieteu. Quiñeque semana petu ñi acunon Jesús tañi acordangeal, ca quiñeque semana rupale, papeltuafuiñ quiñe Evangelio cam doi chi. Papeltulmi, papeltufemlayafimi fentren capitulo. Doi mai ñochiquechi papeltunierpuafuimi, ca ramtuunge: “¿Chem dungu mu doi piuqueyeafiñ Jehová ca Jesús?”. Ca nütramcayafimi caquelu che tami quimürpuel.
14. ¿Chumaiñ taiñ doi quimal Jesús tañi lan mu ca caquelu quimeltun? (Salmo 119:97; ca inaduamnge ti adentun).
14 Fentren tripantu yenielmi tami fautizaucülen, ramtuhuafuimi: “¿Doi quimürpuafun Jehová ñi norngen ca piuqueyen, ca Jesús tañi lan mu?”. Doi quimafuimi llemai. ¿Chumngechi femafuimi? Papeltuafuimi tati publicacion taiñ nieel. Cüme adümnofilmi quiñeque troquiñ Biblia, quintuaimi chumngechi tami doi quimal. Rupan papeltulmi, raquiduamcüleafuimi tami quimürpuel, chem tami quimürpuel Jehová mu, Jesús mu ca fente tami piuqueyenieteu engu (papeltunge Salmo 119:97).
Chumten tripantu yenieliyiñ rume taiñ fautizahun, amuleafui taiñ doi quimal Jesús tañi lan mu. Femngechi doi mañumtuafuiñ Jehová ca Jesús tañi femün mu ta iñchiñ mu. (Inaduamnge parrafo 14).
15. ¿Chumngelu fente falin-ngei quintual hueque dungu Biblia mu?
15 Papeltulmi Biblia, huelu penolmi hueque dungu, huesa duamlayaimi. Raquiduamnge tüfa mu: pu quintuquelu oro fentrenque hora ca antü rupaquei ñi quintufiel pichin oro, huelu fentecünuquelaingün. Pichin pefile rume, amulei tañi quintuafiel rume falilu am. Doi falin-ngei taiñ peal hueque dungu Biblia mu (Sal. 119:127; Prov. 8:10). Feimu, amulepe tami papeltufiel ta Biblia ca tami quintual hueque falin dungu (Sal. 1:2).
16. ¿Chumngechi inayentuafuiñ Jehová ca Jesús?
16 Papeltulmi Biblia, raquiduamaimi chumngechi tami inayal tami quimürpuel. Inayentuafiyiñ Jehová tañi norngen, feimu dullintuchelayaiñ. Inayentuafuiñ Jesús ñi piuqueyeniefiel tañi Chau ca pu che. Eluucüleaiñ taiñ femal Jehová tañi ayüqueel, ca quelluafiel ta caquelu cüdaungefule rume. Ca inayentuafiyiñ ta Jesús amuldungun mu, femngechi caquelu ñi quimal Jehová ñi femün com pu che mu, fei ñi maneluhual engün Jesús tañi lan mu.
17. ¿Chem peaiñ cüpalechi troquiñ mu?
17 Doi quimürpuliyiñ Jesús ñi lapan iñchiñ mu, doi piuqueyeafiyiñ Jehová ca Jesús. Fei engu ca doi piuqueyenieaiñmu (Juan 14:21; Sant. 4:8). Jehová eluqueiñmu fentren quellu taiñ doi quimal, feimu amuleaiñ taiñ doi quimürpual Jesús tañi lan mu. Cüpalechi troquiñ mu, ngüneduamaiñ chumngechi cümelcaqueiñmu Jesús tañi lan, ca chumngechi mañumtuafuiñ Jehová taiñ piuqueyenieteu.
ÜLCANTUN 107 Chau Dios tañi piuqueyen inayentufali
a Efesios 1:10 mu Pablo feipi ñi trapümngeal “tati dungu huenu mu mülelu”. Cafei Mateo 24:31 ca Marcos 13:27 mu Jesús feipi ñi trapümngeal pu “dullinche”. Jesús ca Pablo nütramcai caquerumen dungu mu. Pablo nütramcai Jehová ñi dullifiel quiñeque che ñi ngünenieal Jesús engu. Huelu Jesús nütramcai pu dullinque cristiano petu mülelu mapu mu trapümngeai ñi amual huenu mu engün.
