1. ¿Chumngechi ayühulafuiñ Jehová?

 RAQUIDUAMNGE tüfa, elufimi quiñe che tami piuqueyefiel quiñe falin regalo. Ti che nüfile ti regalo, guardacünufi ca pelafi rume, ¿rume hueñancüpelayafuimi? Huelu rume ayühulpelayafeimu ti che mañumfile ca cüme pünefile tami regalo. Tüfachi pengelün dungu raquiduamelqueiñmu Chau Jehová ñi femün iñchiñ mu. Taiñ piuqueyeteu mu, Jehová hultucui tañi quiñen Fotüm ñi lapayal iñchiñ meu. Feimu mañumcüleliyiñ fei tañi regalo, Jehová rume ayüucüleai (Juan 3:16; Rom. 5:7, 8).

2. ¿Chem ngüneduamaiñ tüfachi troquiñ mu?

² Rupan mu tripantu, rume falintuhuelayafuiñ Jehová ñi hulfiel tañi Fotüm. Femngechi femfuliyiñ, guardacünuafuiñ reque ti poyen regalo Chau Jehová taiñ elueteu. Femngechi taiñ femnoal, rumel raquiduamtucunieafiyiñ ñi femün Jehová ca Jesús iñchiñ mu. Tüfachi troquiñ quelluaiñmu taiñ femngechi raquiduamcüleal. Ngüneduamaiñ chumngechi Jesús tañi lan cümelcaqueiñmu feula ca cüpalechi antü mu. Ca peafiyiñ chumngechi mañumafuiñ Jehová ñi piuqueyechen, doyelchi mai puucülelu ñi acordangeal Jesús tañi lan.

¿CHUMNGECHI CÜMELCAQUEIÑMU FEULA?

3. ¿Chumngechi cümelcaqueiñmu Jesús tañi lan fachantü?

³ Jesús ñi lan cümelcaqueiñmu fachantü, ¿chumngechi am? Quiñe dungu, Jesús ñi hulün mu tañi mongen, Jehová perdonaqueiñmu taiñ culpan. Inei no rume obligalayafui Jehová taiñ perdonayaeteu, huelu Jehová ayüniei ñi femal. Tati salmista rume mañumcülefui, feimu feipi: “Ahuem Jehová, eimi am cüme piuquengeimi ca  pepicaucüleimi tami huiñoduamtual” (Sal. 86:5; 103:3, 10-13).

4. ¿Inei engün mu am Jehová huli tañi Fotüm? (Lucas 5:32; 1 Timoteo 1:15).

⁴ “Inei am ta iñche tañi perdonayaeteu Jehová” piafuiñ. Feingei, com culpafe chengeiñ, feimu felelayafui taiñ perdonayaeteu Jehová. Ti apostol Pablo ca femngechi duamcülefui, “apostol pingelayafun” pi. Huelu ca feipi: “Chau Ngünechen rume cutranpiuqueyeneu, feimu apostolngen” (1 Cor. 15:9, 10). Repentiutulu iñchiñ, Jehová perdonaqueiñmu fente taiñ piuqueyenieteu. Feimu rume huesa duamcülelmi tami culpafengen, loncontucunge: Jehová hultuculai ñi Fotüm tati pu culpaquenolu mu, doi mai pu rüf repentiutulu tañi culpan mu (papeltunge Lucas 5:32; 1 Timoteo 1:15).

5. ¿Chumngelu ngelafui taiñ feipial Jehová mülei taiñ perdonayaeteu?

⁵ Yenieliyiñ alün tripantu rume taiñ serfiquefiel Jehová, feipilayafuiñ Jehová mülei taiñ perdonayaeteu. Felei llemai, Chau Jehová rume falintuquei taiñ serfiquefiel (Heb. 6:10). Taiñ piuqueyenieteu, Jehová hultucui tañi Fotüm, huelu femlai taiñ culliaeteu taiñ serfiquefiel mu. Feimu, Jehová mülei taiñ perdonayaeteu piliyiñ, cümelayafui taiñ femngechi raquiduamal. Feipiafuiñ reque ñi duamfalnon Jesús ñi hulün ñi mongen iñchiñ mu (ca ngüneduamafuimi Gálatas 2:21).

6. Pablo, ¿chemu eluuquefui ñi doi cüdahuelafiel Jehová?

⁶ Pablo quimniefui chumte cüdaufule rume, Jehová obligaucülelafui ñi perdonayaeteu. Huelu, ¿chemu eluuquefui ñi doi cüdahuelafiel? Femquefui tañi mañumniefiel ñi fütra cutranpiuqueyeteu (Efes. 3:7). Ca femngechi iñchiñ, eluucüleiñ taiñ cüdahuelafiel Jehová. Huelu femquelaiñ taiñ perdonayaeteu, doi mai taiñ mañumcülen.

7. ¿Ca chumngechi cümelcaqueiñmu Jesús tañi lan fachantü? (Romanos 5:1; Santiago 2:23).

⁷ Ca quiñe cüme dungu nieiñ Jesús ñi lapan mu: cüme hueniyeafiel Jehová. a Chumngechi peiñ rupachi troquiñ mu, choyüngelu müten iñchiñ, hueniyequelafiyiñ Jehová. Huelu Jesús ñi hulün mu ñi mongen, cümelcautuafuiñ Chau Dios mu ca hueniyeafuiñ (papeltunge Romanos 5:1; Santiago 2:23).

8. ¿Chumngelu falintufali tati llellipun?

⁸ Taiñ cüme hueniyequefiel Jehová, llellipuquefiyiñ, feita rume falintufali. Jehová allcütuquei tati llellipun ñi femngeel trahun meu, ca quisuque taiñ llellipuqueel. Llellipun mu iñchiñ, tüngcülequeiñ ca cüme duamcülequeiñ. Huelu ti doi falin-ngelu: doi pülleconqueiñ Chau Jehová mu (Sal. 65:2; Sant. 4:8; 1 Juan 5:14). Jesús mülepalu mapu meu, rume llellipuquefui, quimniefui tañi allcütuquefeteu Jehová ca tañi doi hueniyequefiel tañi Chau (Luc. 5:16). Felei llemai, Jesús ñi lan mu hueniyequefiyiñ Jehová ca llellipuquefiyiñ, feimu rume mañumcüleiñ.

¿CHUMNGECHI CÜMELCAYAIÑMU CÜPALECHI ANTÜ MU?

9. Jesús hulün mu ñi mongen, ¿chem cümelcan llohuai Jehová tañi pu che cüpalechi antü mu?

⁹ Jesús hulün mu ñi mongen, ¿chem cümelcan llohuai Jehová tañi pu che  cüpalechi antü mu? Jehová eluayu rumel mongen. Jehová deumaeiñmu taiñ rumel mongeleal. Inei no rume rupalayafui lan dungu mu culpanofule Adán. Huelu Adán culpai, feimu com che laquei. Alün che feyentuquelai ñi rumel mongeleafel. Cüdaungele rume taiñ raquiduamal taiñ rumel mongeleal, maneluhuafuiñ ñi femtripayal. ¿Chemu? Jehová hultucufilu cai tañi quiñen Fotüm, rume fütra culli taiñ eluaeteu rumel mongen (Rom. 8:32).

10. Pu dullinque cristiano ca tati pu caquelu ufisa, ¿chem üngümcüleingün?

¹⁰ Petu nielaiñ ti rumel mongen, huelu Jehová ayüniei taiñ raquiduamtucunieafiel. Pu dullin cristiano ayühunquechi üngümcüleingün ñi amual huenu mu ñi quelluntucuafiel Jesús ñi ngünenieafiel mapu (Apoc. 20:6). Caquelu pu ufisa ca ayühunquechi üngümcüleingün ñi rumel mongeleal mapu mu ngehuenole cutrancahun ca chem huesa dungu no rume (Apoc. 21:3, 4). ¿Maneluucüleimi tami rumel mongeleal mapu meu? Feipilayaimi doi cümen ta amual huenu mu, trür femngechi falin-ngei tüfachi epu dungu. Loncontucuaiñ: Jehová deumaeiñmu taiñ rumel mongeleal mapu meu. Feimu huechurpule tüfachi dungu, rüfcünu mai rume ayüucüleaiñ.

11, 12. ¿Chem cümeque dungu peyeniefimi hue mapu mu? (Ca inaduamnge ti adentun).

¹¹ Yefinge tami raquiduam hue mapu meu. Tati cutran ca tati lan dungu ngehuetulayai (Is. 25:8; 33:24). Chau Jehová eluaimu com cümeque dungu tami raquiduamquefel. Tati hue mapu mu, ¿chem ayüafuimi tami adümafiel? ¿Ayüafuimi tami quim deumayafiel metahue, tami cüme ñimicafengeal cam dungulafiel quiñe instrumento? Tati hue mapu mu ca duamniengeai che deumarucaquelu, tucucaquelu, deumaiyaelquelu  ca adelcacünuquefilu ti mapu (Is. 35:1; 65:21). Rumel mongelealu cai eimi, cüme adümafuimi com tami ayünieel.

¹² Müna ayühun-ngeai taiñ llohuafiel pu huiñomongetulu (Hech. 24:15). Cafei, rume ayühulaiñmu taiñ fill antü doi cüme quimafiel Jehová ca tañi deumael (Sal. 104:24; Is. 11:9). Huelu doi cüme dungu taiñ culpahuenoal, feimu serfiafiyiñ Jehová chumngechi taiñ ayüniefel lif raquiduam mu. ¿Famentuafuimi com tüfachi cümeque dungu tami pichiñma cüme rupayal ca culpaconal Jehová mu? Femlayafui llemai (Heb. 11:25). Taiñ cüme feleal hue mapu meu trürümngelayafui taiñ pichiñma cüme rupan famülque meu. Tati hue mapu peuma müten no tati. Huechutripayai llemai, fei mülenagaiñ fei meu. Fente taiñ piuqueyeteu Jehová, com femtripayai hultuculu ñi Fotüm cai.

MAÑUMAFIYIÑ JEHOVÁ TAIÑ PIUQUEYETEU

13. ¿Chumngechi mañumafiyiñ Jehová taiñ piuqueyeteu? (2 Corintios 6:1).

¹³ ¿Chumngechi mañumafuiñ Jehová ñi hultucun tañi Fotüm? Doyümnieaiñ taiñ mongen mu taiñ serfiafiel (Mat. 6:33). Biblia cai feipilu: “Cristo lai com pu che meu ca huiñomongetui, feimu pu mongelelu femhuelayaingün quisu tañi ayünieel, doi mai femaingün Cristo tañi ayünieel” (2 Cor. 5:15). Adümfilu iñchiñ Jehová tañi fütra cutranpiuqueyechen, eluuqueiñ taiñ cüdahuelafiel com piuque mu, femngechi pengelqueiñ taiñ mañumcülen (papeltunge 2 Corintios 6:1).

14. ¿Chumngechi pengelafuiñ taiñ maneluucülen Jehová ñi ngülam meu?

¹⁴ Maneluhuaiñ Jehová mu ca inayafiyiñ tañi feipin, femngechi pengelaiñ taiñ mañumniefiel. ¿Chumngechi femqueiñ tüfa? Dullin mu iñchiñ chem dungu rume, mülei taiñ raquiduamal chem ayüquei Jehová taiñ femal. Quiñeque tüfa: tunte puhuai taiñ estudio ca chem cüdau taiñ femal (1 Cor. 10:31; 2 Cor. 5:7). Maneluuliyiñ Jehová mu taiñ dullial chem chumal, doi maneluuqueiñ fei meu ca doi hueniyequefiyiñ. Cafei, doi feyentuqueiñ Jehová ñi feipicünuel mu (Rom. 5:3-5; Sant. 2:21, 22).

15. Acordanieliyiñ Jesús ñi lan, ¿chumngechi pengelafuiñ taiñ mañumcülen?

¹⁵ ¿Ca chumngechi pengelafuiñ taiñ mañumniefiel Jehová? Petu acunole ca deu rupale taiñ acordanieafiel Jesús ñi lan, doi cüdahuaiñ. Pepicauqueiñ taiñ amual tüfachi falin trahun meu, huelu ca invitaquefiyiñ caquelu che (1 Tim. 2:4). Femlu iñchiñ, nütramcayafuiñ pu  che chem dungu ñi coneltulen tüfachi falin trahun meu. Pengelelafuiñ ti video mülelu taiñ pagina mu feipiquelu ¿Chumngelu lai Jesús? ca Acordayafiyiñ Jesús ñi lan. Pu loncolelu adcünuai ñi invitameafiel com pu amuldunguhuenolu. Quiñe tüfachi pu che huiñotule Jehová mu, rume müleai ayühun huenu mu ca mapu meu (Luc. 15:4-7). Tüfachi falin trahun mu re hueluquentu chaliulayaiñ, doi mai cüme chaliafiyiñ ca cüme llohuafiyiñ pu amuldunguhuenolu ca pu hue amulu (Rom. 12:13).

16. Acordanieliyiñ Jesús tañi lan, ¿chumngelu cümeafui taiñ doi cüdahual?

¹⁶ Püllelepalu ti Trahun Jesús tañi lan ñi acordangeal, allmalltuafuiñ taiñ doi cüdahuelafiel Jehová. Felei, femngechi pengelafuiñ taiñ mañumniefiel Jehová ca Jesús. Doi amuldungun mu iñchiñ, doi ngüneduamqueiñ Jehová tañi quellu, femngechi doi maneluuqueiñ fei meu (1 Cor. 3:9). Cafei, tami pepicayal tami piuque, inayafimi ti papeltun Biblia tripalu ti folleto Fill antü ngüneduamaiñ tati Biblia ca Ti papel taiñ pepicahuam. Püneafuiñ feichi texto biblico quisulen chillcatuliyiñ taiñ doi cüme ngüneduamal.

17. ¿Chem dungu meu ayühulquefiyiñ ta Jehová? (Ca inaduamnge ti huichulechi dungu “ Chumngechi mañumafuimi Jehová tañi piuqueyechen”).

¹⁷ Huelu pepi femnolmi com taiñ peel tüfachi troquiñ mu, huesa duamquilnge. Loncontucuafuimi: Jehová trürümquelai tañi femquen caque quiñeque tañi pu che. Chau Jehová peniei chem ñi mülen tami piuque mu. Chau Jehová ngüneduamquei tami mañumcülen hultucufiel mu ñi Fotüm, feimu rume ayüucülei (1 Sam. 16:7; Mar. 12:41-44).

18. ¿Chemu rume mañumcüleiñ Jehová ca Jesús mu?

¹⁸ Jesús tañi lan mu perdonangequeiñ taiñ culpan, hueniyequefiyiñ Jehová ca maneluuqueiñ taiñ rumel mongeleal. Feimu rumel pengelelafiyiñ ta Jehová taiñ mañumcülen, fei taiñ piuqueyeteu mu elueiñmu com tüfachi cümelcan (1 Juan 4:19). Cafei pengelaiñ taiñ mañumcülen Jesús mu, fei ca piuqueyeiñmu ca hultucui ñi mongen iñchiñ mu (Juan 15:13).