1. ¿Chem femquei fentren pu che?

 NGÜNEDUAMQUEIMI chi famülque mu pu che quisutu duamuuquei. Fentren che conquei redes sociales mu, femngechi ñi mallmahual tañi femqueel engün. Huelu rume pichin che püramyequefi Jehová engün. Tüfachi troquiñ mu peaiñ chem cüpa feipi püramyengeal ta Jehová ca chumngelu taiñ femal. Ca peaiñ chumngechi püramyeafuiñ Jehová ca chumngechi quisu püramyeafi ñi üi pichiñma mu.

¿CHEM CÜPA FEIPI PÜRAMYENGEAL TA JEHOVÁ?

2. Sinaí huincul mu, ¿chumngechi pengeli Jehová ñi afmatufalngen? (Ca inaduamnge ti adentun).

² Biblia pengeli Jehová ñi püramyefalngen. Pichi rupalu ñi entufiel pu Israel che Egipto mu, Jehová pengeli ñi afmatufalngen. Trahuluucülelu pu Israel che, nag meu mülei engün Sinaí huincul mu ñi allcütuafiel ta Chau Dios. Quiñe fütra tromü tacunacümfi ti huincul. Ca fütra nüyün rupai ca ti huincul mu tripai fitrun. Llüfquei ca mülei tralcan ca nehuentu allcün-ngei quiñe cullcull (Éx. 19:16-18; 24:17; Sal. 68:8). Pu Israel che pefilu ñi fente nehuen-ngen Jehová, ¿rume afmatulehuepelaingün?

3. ¿Chem cüpa feipi püramyengeal ta Jehová?

³ ¿Inchiñ cai? ¿Chem piafuiñ? ¿Püramyeafuiñ Jehová? Felei llemai. Püramyeafuiñ ta Jehová nütramcafiliyiñ ta caquelu che tañi afmatufalchi femquen ca tañi  cüme piuquengen. Fillque dungu femqueiñ Jehová taiñ quelluqueteu, feimu feipiliyiñ “Jehová ñi duam mu tripai”, ca püramyequefiyiñ (Is. 26:12). Inayentufali David ñi püramyequefiel Jehová. Com pu Israel che ñi adquiñ mu, llellipui: “Ahuem Jehová, eimi ngen-ngeimi cüme üitun, nehuen, cüme adelcalen, püramyen ca afmatufalngen, com tati mülelu huenu mapu ca nag mapu mu eimi am ta ngen-ngelu”. Rupan llellipulu, com pu Israel che püramyefi ta Jehová (1 Crón. 29:11, 20).

4. Jesús, ¿chumngechi püramyefi Jehová?

⁴ Jesús mülepalu mapu meu, fill dungu meu püramyefi Jehová. Femün mu afmatun dungu, rumel feipiquefui Jehová ñi quellueteu (Mar. 5:18-20). Quimeltuchequefui ñi cüme piuquengen Jehová ca poyechequefui, femngechi ca püramyefi Jehová. Quiñe rupa quimeltuchemequelu ngillatuhue ruca mu, pefi quiñe domo. Yeniefui 18 tripantu ñi cutraneleteu quiñe huesa püllü. Rume potrongcülerquei, pepi norümlai ñi furi. Pefilu ñi fente cutrancaucülen, Jesús cutranpiuqueyefi ti domo. Fei piuqueyen mu feipi: “Lamngen, tremotupe tami cutran”. Fei fampuhulelfi ñi cuhu. Ti domo norümfemtui ñi furi, ca “eluhui ñi püramyeafiel ta Chau Ngünechen” (Luc. 13:10-13). Tüfachi domo rume mañumcülefui ñi tremoltueteu Jehová, feimu püramyefi. Iñchiñ ca femngechi mülei taiñ püramyeafiel.

¿CHUMNGELU PÜRAMYEFALI JEHOVÁ?

5. ¿Chumngelu mülei taiñ respetayafiel ta Jehová?

⁵ Püramyequefiyiñ Jehová taiñ rume respetaniefiel. Rume respetafali Jehová fentren dungu mu. Jehová femafui com tañi ayünieel ñi femal ca turpu cansaquelai (Sal. 96:4-7). Tañi fütra quimün pequefiyiñ com tañi deumael mu. Elueiñmu mongen ca com taiñ duamnieel (Apoc. 4:11). Chau Jehová rume manelfali (Apoc. 15:4). Cüme tripaquei com tañi femel ca huechutripaquei com tañi feipicünuel (Jos. 23:14). Feimu Jeremías feipifi ta Jehová: “Mapu mu mülei fentren quimche fillque gobierno mu, huelu inei no rume trürlai eimi mu” (Jer. 10:6, 7). Felei llemai, fillque dungu mu respetafali taiñ Chau Jehová. Huelu fei müten no, ca rume piuqueyeniefiyiñ.

6. ¿Chumngelu piuqueyeniefiyiñ Jehová?

⁶ Püramyequefiyiñ Jehová taiñ piuqueyeniefiel com piuque mu. Quimfiel mu Chau Jehová ñi chumngen, rume piuqueyeniefiyiñ. Quisu rume cutranpiuqueyechequei (Sal. 103:13; Is. 49:15). Cutrancahun mu iñchiñ, Jehová inaye cutrantupiuquei (Zac. 2:8). Quelluqueiñmeu taiñ fülconal quisu meu ca taiñ hueniyeafiel (Sal. 25:14; Hech. 17:27). Cafei ñom piuquengei, feimu ‘pochongnagquei reque ñi adquintual tati huenu ca tati mapu, femngechi quelluquefi pu ñom che trañmalelu reque trufür mapu mu’ (Sal. 113:6, 7). Rume cüme Dios ta Jehová, ¿püramyenoafulu cai ta iñchiñ? (Sal. 86:12).

7. Quimfiel mu ñi rüf chumngen Jehová, ¿chumaiñ?

⁷ Püramyequefiyiñ Jehová caquelu che tañi quimaeteu. Fentren pu che cüme quimlafingün ñi chumngen ta Jehová. ¿Chumngelu am? Huecüfü feipiquei coilaque dungu Jehová mu, femngechi traumalnieñmafi pu che tañi raquiduam (2 Cor. 4:4). Huecüfü  raquiduamelchequei ñi lladcüfemquen ta Jehová ca ñi duamtuchequenon. Ca feipiquei Chau Dios ñi duam mu cutrancauqueiñ. Huelu iñchiñ cüme quimnieiñ coila dungu tati. Feimu iñchiñ mülei taiñ quelluafiel pu che ñi quimafiel ta Jehová, fei ñi ca püramyeafiel engün (Is. 43:10). Feula ngüneduamaiñ quiñeque versiculo ti Salmo 96, pengelaiñmu chumngechi püramyeafiel ta Jehová.

¿CHUMNGECHI PÜRAMYEAFUIÑ JEHOVÁ?

8. ¿Chumngechi püramyenieafuiñ Jehová? (Salmo 96:1-3).

⁸ (Papeltunge Salmo 96:1-3). Püramyeafuiñ Jehová taiñ nütramyequefiel mu. Tüfachi versiculo mu feipingeiñ taiñ ülcantulelafiel Jehová, püramyeafiel tañi üi, amuldunguñmayafiel tañi cümeque dungu ca huldungual tañi afmatufalngen. Femngechi femliyiñ, püramyenieafiyiñ Jehová taiñ dunguquen mu. Jehová tañi pu che cuifi mu, eluucülefui ñi nütramcayafiel caquelu che ñi cüme Dios ngen ta Jehová, femngechi incañpequefingün tañi üi (Dan. 3:16-18; Hech. 4:29). ¿Iñchiñ cai? ¿Chumngechi femafuiñ?

9, 10. ¿Chem quimeltueiñmu ñi rupan Angelina? (Ca inaduamnge ti adentun).

⁹ Peafiyiñ ñi rupan quiñe lamngen Estados Unidos mu Angelina pingei. a Quisu nehuen piuque mu incañpefi Jehová tañi hue cüdau mu. Quisu ca caquelu hue cüdaufe mangelngei quiñe trahun mu, feimu mülefui ñi feipial tañi ineingen ca ñi chumquen engün caquelu che tañi quimaeteu. Taiñ lamngen pepicaniefui quiñeque foto ñi pengelal fente tañi ayüucülen ñi testigongen. Huelu Angelina petu ñi dungunon, cangelu huentru hune dungui. Feipi petu pichicalu ñi quimfiel pu testigo, huelu huesa acordafi, fei ayentufi. Angelina feipi: “Rume llican, tripayalu ñi piuque troquihun. Huelu ramtuhun: ‘¿Eluñmayafiñ tañi huesa acordamequengeal ta Jehová cam incañpeafiñ?’”.

¹⁰ Rupan dungulu chi huentru, Angelina llellipufi Jehová tañi piuque mu. Fei hula, cüme duam mu nütramcafi chi huentru: “Pichicalu iñche, ca quimfiñ pu testigo ca petu mülen quisu engün mu”. Com pu allcütulelu lelilehuei,  ¿chumai am tüfa pipelaingün? Huelu taiñ lamngen tüngcülei, fei pengelelfi foto ñi ayühunquechi serfimequefiel ta Jehová. Fei yamün mu incañpefi tañi feyentun (1 Ped. 3:15). ¿Chem rupai deu dungulu taiñ lamngen? Ti huentru tüngcületui. Ca feipi cümeque dungu ñi rupaquefel mülelu pu testigo mu. Angelina feipi: “Mülei taiñ püramyeafiel Jehová tañi üi, rume falin cüdau nieiñ” pi. Iñchiñ ca femngechi mülei taiñ femal. Rume falintuquefiyiñ taiñ incañpeafiel Jehová tañi üi huesa acordamequengen mu rume.

11. Jehová tañi pu che, ¿chumngechi inaquefi ñi feipin Salmo 96:8?

¹¹ (Papeltunge Salmo 96:8). Püramyeafuiñ Jehová taiñ falinque chemcün mu. Jehová tañi pu che rumel femquei, femngechi ñi püramyeafiel (Prov. 3:9). Pu Israel che hulquefuingün plata ca falinque chemcün, fei ñi deumangeal ti templo ca ñi cüme adniengeal (2 Rey. 12:4, 5; 1 Crón. 29:3-9). Jesús tañi pu discipulo ca femngechi pünequefui tañi nieelchi chemcün ñi serfiafiel Jesús ca tañi pu apostol (Luc. 8:1-3). Biblia feipi hunen siglo mu quiñeque cristiano nienolu iyael, caquelu trahunche mandaleyu tañi duamniefel (Hech. 11:27-29). Ca femngechi famülque mu iñchiñ ca püramyeafuiñ ta Jehová hul-liyiñ taiñ nieel.

12. ¿Chumngechi püramyequefiyiñ Jehová taiñ hulqueelchi plata mu? (Ca inaduamnge ti adentun).

¹² Peafiyiñ quiñe dungu chumngechi taiñ quelluconquen taiñ hulqueelchi plata mu püramyequefiyiñ Jehová. Feichi 2020 tripantu mu, Zimbabue mapu mu fentreñma mahunhuelai, feimu niehuelai iyael chi pu che. Feimu entrin mu layafui engün. Tüfa mu ca mülefui quiñe lamngen Prisca pingelu. Tunte huesa rupalefui rume, quisu amuldungulequefui fill miercoles ca viernes antü. Puufui ñi cüdaungeal ti mapu, huelu taiñ lamngen amuldungulei. Feimu tañi pu carucatu ayentuquefeyu. Feipingequefui: “Entrin mu layaimi”. Huelu Prisca maneluucülequefui Jehová mu ñi cuidayaeteu, feimu feipifi tañi pu carucatu: “Jehová turpu quisucünuquelafi tañi pu che”. Pichiñma mu, Jehová tañi pu che trahulelfi itrofill ñi duamnieel, fei yelelngei. ¿Chumngechi ngülümngei tüfa? Taiñ hulqueelchi plata mu. Quiñeque  tañi pu carucatu afmatulehuei. “Turpu quisucünulaeimu tami Ngünechen, doi cüpa quimfiyiñ” pi engün. Regle tüfachi pu che eluhui ñi amual trahun mu engün.

13. ¿Chumngechi püramyeafuiñ Jehová taiñ cüme femquen mu? (Salmo 96:9).

¹³ (Papeltunge Salmo 96:9). Püramyeafuiñ Jehová taiñ cümeque femquen mu. Pu sacerdote cüchaquefui tañi cuhu ca tañi namun engün, femngechi ñi lifcülen conpual Jehová ñi ruca mu (Éx. 40:30-32). Iñchiñ ca mülei taiñ lifcüleal, huelu doi falin-ngei taiñ yenieal lif mongen Jehová tañi adquiñ meu (Sal. 24:3, 4; 1 Ped. 1:15, 16). Biblia feipi: “Famentuafimün tamün chumngechi chengefel cuifi”, cafei “huecünutuafimün tamün chumngechi chengen”. Tüfa cüpa feipi mülei taiñ elcünual tati huesa mongen taiñ yeniequefel ca cüme mongen yenietuaiñ, femngechi inayentuafiyiñ Jehová com taiñ femqueel ca raquiduam mu (Col. 3:9, 10). Jehová ñi quellu mu, pu che rume huesa mongen niequefulu rume, cüme elcünutuafui ñi mongen.

14. Ñi rupan mu Jack, ¿chem quimeltuqueiñmu? (Ca inaduamnge ti adentun).

¹⁴ Peaiñ chumngechi chengefel Jack. Huecüfü pingequefui ñi fente huesa chengen. Fente huesa dungu ñi femün mu, presungei fei elngei ñi langümngeal. Üngümcülequefui ñi acual chi antü tañi langümngeal, fei eluhui ñi chillcatual Biblia quiñe testigo engu. Rume huesaque dungu femfui. Huelu papeltulu Biblia, cüme mongen yenietui fei fautizahurpui. Ñi yenietun mu cüme mongen, pu soltau rume falinturpueyu. Feimu aculu chi antü ñi langümngeal, llancünagi ñi cülleñu engün. Quiñe soltau feipi: “Aculu Jack carcel mu, doi huesañmangefui com caquelu presu mu, huelu feula müna cüme chengetufui”. Quiñe semana rupai, amui pu testigo ñi adnieafiel ti trahun carcel mu. Fei puhui quiñe presu amuquenofulu, ¿chumngelu amui tüfa? Afmatui ñi cüme mongen yenietun Jack, feimu ayüi ñi quimal chumngechi quisu ca cüme elcünutuafui ñi mongen, fei ñi poyeafiel ta Jehová. Felei llemai, taiñ cüme femün mu püramyengequei ta Jehová (1 Ped. 2:12).

 PICHIÑMA MU, ¿CHUMNGECHI PÜRAMYEAI ÑI ÜI JEHOVÁ?

15. Pichiñma mu, ¿chumai Jehová ñi püramyeal tañi üi? (Salmo 96:10-13).

¹⁵ (Papeltunge Salmo 96:10-13). Salmo 96 ca feipilei Jehová quiñe Lonco Ülmen nor juzgachequelu. Pichiñma mu, ¿chumngechi püramyeafi ñi üi Jehová? Cüpalai nor dungu. Epe puucülei ñi apümafiel ti Fütra Babilonia, tüfa com pu coilaque religion femquelu huesaque dungu ca quimeltuquelu coilaque dungu Chau Dios mu (Apoc. 17:5, 16; 19:1, 2). Quiñeque pu che pefile tüfa ñi apümcangen ti Fütra Babilonia, ca eluhuafui ñi poyeafiel ta Jehová. Ca fei hula Armagedón mu, Jehová apümafi Huecüfü ñi com ngünenieel ca com apümafi ñi üdequeteu ca podüñmaqueteu ñi üi. Huelu montulafi com tañi piuqueyeteu, feyentuqueteu ca püramyequeteu (Mar. 8:38; 2 Tes. 1:6-10). Fei hula, Jesús ngünenieafi chi mapu mil tripantu. Afle feichi mil tripantu, com pu che elungeai tañi pengelal ñi püntütripanon Jehová mu, femngechi Jehová quimfalcünuai quisu müten mülei tañi püramyengeal (Apoc. 20:7-10). Feichi mu, “chumngechi tati co tacuniefi ti lafquen, ca femngechi ti mapu apoleai che meu quimfilu Chau Jehová ñi püramyefalngen” (Hab. 2:14).

16. ¿Chem eluucüleimi femal? (Ca inaduamnge ti adentun).

¹⁶ Puule chi antü com pu che püramyefile Jehová ñi üi, müna cüme ayühun dungu. Üngümcüleiñ ñi acual feichi antü, com piuque mu cüdahuelnieafiyiñ Jehová taiñ püramyeafiel. Taiñ quimtucunieal tüfachi falin cüdau, ti Troquiñ Adniechequelu dulli Salmo 96:8 taiñ loncontucunieal tüfachi 2025 tripantu. Feipilei: “Tañi üi ñi duam mu püramyeafimün Jehová”.