TROQUIÑ ÑI CHILLCATUNGEAL 2
ÜLCANTUN 132 Feula quiñeucüleayu
Pu füta, falintunieafimün tamün afcadi
“Eimün pu füta, […] falintuqueafimün tamün domo” (1 PED. 3:7).
¿CHEM QUIMAIÑ?
Chumngechi pu füta falintuafi tañi afcadi tañi feipin mu ca tañi femquen mu.
1. ¿Chemu Jehová elcünui ñi niehual quiñe huentru ca quiñe domo?
JEHOVÁ “ayühun-ngechi Chau Ngünechen” ngei, feimu ayüquei iñchiñ taiñ ca ayüucüleal (1 Tim. 1:11). Quisu fentrenque regalo eluqueiñmu taiñ ayüucüleal (Sant. 1:17). Quiñe feitachi regalo fei tati curehuen. Quiñe huentru ca quiñe domo nieulu engu, epuñpüle feipihuingu tañi piuqueyehual ca ñi respetahual engu. Feimu piuqueyeucülele engu, rume ayüucüleai engu (Prov. 5:18).
2. ¿Chumquei fentrenque curehuen?
2 Huelu rupan mu tripantu, fentrenque curehuen piuqueyeuhuequelai ca yamuuhuequelai, feimu ayüucülelaingün, ¡müna huesa! Tati Organización Mundial de la Salud feipi fentrenque füta hulelquefi tañi domo ca huesa piquefi. Quiñeque huentru cüme troquiquefi ñi domo caquelu che tañi adquiñ mu, huelu mülen mu ruca mu huesalcaquefi. Cafei fentren huentru pequeingün ta pornografia, feimu huesa duamelquefingün ñi domo.
3. ¿Chemu quiñeque huentru huesa troquiquefi tañi domo?
3 ¿Chemu quiñeque huentru huesa troquiquefi tañi domo? Quiñeque chau huesa troquiquefi tañi domo, feimu tañi fotüm feipiafui tañi huesa dungu no fel. Fei nierpulu quisu ñi domo, ca femngechi femürpui. Cafei quiñeque lof mu, huimtulefui huentru ñi huesa femafiel ñi domo, femngechi ñi pengelelafiel ñi doicülen tañi domo mu. Ca quiñeque huentru turpu quimeltungequelai ñi quim ngünehual, feimu lladcüfemqueingün. Ca quiñeque pequelu am pornografia, feimu fülcontuquefingün tañi domo tañi cudumafiel müten. Ca feipingequei aculu ti COVID-19, doicülerpui pu huentru ñi huesa femquefiel ñi domo. Huelu tati huentru turpu ngelafui ñi huesa femafiel tañi domo.
4. ¿Chem dungu mu mülei ñi cuñiutucuhual pu huentru? ¿Chemu?
4 Pu huentru poyequefilu ta Jehová mülei ñi cuñiutucuhual ñi huesa raquiduamanoafiel pu domo, a ¿chemu? Quiñe huentru huesa raquiduamtucule, fei yeafeyu tañi huesa femal. Pablo feipifi pu dullin cristiano Roma mu mülelu: “Inayentuhuelayafimün fantepu meu mülechi pu che” (Rom. 12:1, 2). Fei engün deu yeniefui quiñeque tripantu ñi poyequefiel ta Jehová. Huelu quiñeque engün petu inayentuniefui ñi femquen pu poyequenofilu ta Jehová, feimu Pablo ngülamtufi tañi cüme elcünutual tañi raquiduam ca tañi femqueel engün. Tüfachi ngülam ca mülefui ñi inayafiel tati pu füta fachantü. Huelu quiñeque peñi inayentuquefi pu poyequenofilu Jehová, fei huesalcaquefingün tañi afcadi, ¡müna huesa! b Chau Jehová, ¿chumngechi ayüquei ti huentru ñi troquiafiel ñi domo? Taiñ quimal, ngüneduamafiyiñ chi texto cheu ñi entungen tüfachi articulo.
5. Tañi feipin 1 Pedro 3:7, ¿chumngechi mülefui ti pu huentru ñi troquiafiel tañi domo?
5 (Papeltunge 1 Pedro 3:7). Jehová feipiquefi tati pu huentru tañi falintuafiel tañi domo. Quiñe huentru falintufilu tañi domo, piuqueyenquechi dunguquefi ca respetaquefi. Tüfachi troquiñ mu, ngüneduamaiñ chem ñi femnoafel pu huentru. Fei hula peaiñ chumngechi pu huentru pengelelafui ñi domo ñi falintuquefiel.
HUESA FEMLAYAFIMI TAMI DOMO
6. ¿Chem raquiduamquei Jehová quiñe huentru hulelcafiel mu tañi domo? (Colosenses 3:19).
6 Ti huentru ngelai tañi hulelafiel tañi domo. Chau Jehová üdequefi tati quehuafe chengelu (Sal. 11:5). Huelu doi üdequefi quiñe huentru ahucafilu tañi domo (Mal. 2:16; papeltunge Colosenses 3:19). Tañi feipilen 1 Pedro 3:7, quiñe huentru cüme troquinofile tañi domo, hueniyehuelayafi ta Jehová. Llellipufile ta Jehová, fei allcütuhuelayafeyu chi.
7. Pu huentru dungufiel mu tañi domo, ¿chem ngelafui ñi femal? (Efesios 4:31, 32; ca inaduamnge ti “Falin dungu”).
7 Tati füta ngelai tañi huesa piafiel tañi domo. Quiñeque huentru fente lladcülen mu, huirarelquefi tañi domo ca huesa duamelquefi. Huelu Jehová üdequei “ti fütra illcun, huirarcahun, huesa pihun” (papeltunge Efesios 4:31, 32). c Jehová com allcüquei, feimu quimniei quiñe huentru chumngechi ñi dunguquefiel tañi domo quisulen mu engu rume. Quiñe huentru huesa pifile tañi domo, huesa femquelafi tañi domo müten, tañi femün mu püntünentuuquei Jehová mu (Sant. 1:26).
8. Jehová, ¿chem raquiduamquei ti pornografia mu? ¿Chumngelu?
8 Ti huentru ngelai ñi peal pornografia. Chau Jehová üdequefi tati pornografia. Quiñe huentru pele ta pornografia, hueniyehuelafi ta Jehová ca respetaquelafi tañi domo. d Jehová ayüquei tati huentru ñi ñihuañpenoafiel tañi domo, raquiduam mu rume ngelafui ñi femal. Jesús feipi: “Inei rume adquintuniefile quiñe domo, ca illurpufile, deu ñihualdomoi ñi piuque mu” (Mat. 5:28, 29). e
9. Jehová, ¿chemu üdequefi tati huentru ñi huesa duamelafiel tañi domo cudumuhun dungu meu?
9 Cudumuule ti curehuen, ti huentru ngelai ñi huesa duamelafiel tañi domo. Quiñeque huentru obligaquefi tañi domo tañi femal quiñeque dungu tañi ayüquenofel, feimu lifcülenolu troquiuquei Jehová tañi adquiñ mu ca falintungenolu troquiuquei. Femngechi femle ti huentru, pengelai ñi quisutu duamuuquen müten ca ñi rüf falintuquenofiel tañi domo. Chau Jehová üdequefi femngechi dungu. Fei ayüquei tati huentru ñi piuqueyeafiel tañi domo ca ñi respetañmayafiel tañi raquiduam (Efes. 5:28, 29). Quiñe cristiano huesa duamelfile tañi domo ca pele pornografia, ¿chumafui tañi cüme elcünutuafiel tañi raquiduam ca tañi femürpual? Peafiyiñ.
¿CHUMAFUI TI HUENTRU ÑI HUESA FEMHUENOAFIEL TAÑI DOMO?
10. Pu füta, ¿chem quimeltuafeyu Jesús tañi femün?
10 Ti huentru huimtulele tañi huesa femafiel tañi domo, ¿chumafui? Cüdautufule rume, inayafui Jesús ñi chumngen. Fei nienofulu rume afcadi, inayentufali tañi chumngechi troquiquefiel tañi pu discipulo (Efes. 5:25). Pu füta ngüneduamfile Jesús ñi chumngechi dungufiel tañi pu apostol, fentren quimeltun entuafuingün.
11. Jesús, ¿chumngechi troquifi tañi pu apostol?
11 Jesús cüme troquiquefui tañi pu apostol, respetaquefui ca llicalcaquelafui engün. Jesús doi niefui poder rume, pünelafi tañi huesa duamelafiel tañi pu inanieteu, doi mai ñom piuque mu serfifi (Juan 13:12-17). Feipifi tañi pu discipulo: “Inaquintuniemuan ta iñche, ñom piuquengelu cai iñche. Fei füshcüduamaimün” (Mat. 11:28-30). ¿Ngüneduamfimi? Jesús feipi tañi ñom piuquengen. Quiñe che ñom piuquengelu nehuen-ngelai pingelayafui, doi mai quim ngünenieuquei. Lladcülcangen mu, tüngcülei. Ñi femal tüfa, duamfalngei tañi rume nehuen-ngeal.
12. Jesús, ¿chumngechi dunguquefi caquelu che?
12 Jesús nütramcafiel mu caquelu che, yafültucuquefui ca cüme duamelquefui engün. Jesús turpu huesa dunguquelafui tañi pu inanieteu (Luc. 8:47, 48). Huesa pieteu mu rume tañi pu caiñe, Jesús “huiñoldungulai huesaque pin mu” (1 Ped. 2:21-23). Quiñeque mu chem piquelai rume (Mat. 27:12-14). Inayentufali ñi femün Jesús, fentren quimeltun entuafui pu füta.
13. Quiñe huentru, ¿chumngechi pengelafui ñi quiñeucülen tañi domo engu? (Mateo 19:4-6; ca inaduamnge ti adentun).
13 Jesús feipifi pu füta ñi ñihuañpenoafiel tañi domo. Jesús acordafiel mu ñi chem pin tañi Chau, feipi: “Ti huentru [...] quiñehuai ñi domo engu” (papeltunge Mateo 19:4-6). Griego quehun mu, tüfa feipifui pu curehuen pünaucülequeingu reque. Feita feipifui tañi piuqueyeucülen engu rume nehuen-ngei. Püntüufule ti curehuen, mür rume hueñancüafuingu. Quiñe huentru rume piuqueyefile tañi domo, famentuafi com tati pornografia. Huefrumele podngechi dungu, famentufemai tañi quintun (Sal. 119:37). Job reque, eluucülei ñi adquintunoafiel caquelu domo huesa raquiduam mu (Job 31:1).
Quiñe cüme füta famentuquefi ti pornografia. (Inaduamnge parrafo 13). g
14. Quiñe huentru huesalcaquefilu tañi domo, ¿chem fillque dungu mülei ñi femal?
14 Quiñe huentru huesalcafile tañi domo, mülei ñi femal fillque dungu ñi cümelcautual tañi domo engu ca ñi hueniyetuafiel ta Jehová. ¿Chem mülei ñi femal? Quiñe, mülei ñi quisutu ngüneduamuhual tañi rume huesalcamequen. Jehová am com pequelu, chem no rume ellcalelai quisu tañi adquiñ mu (Sal. 44:21; Ecl. 12:14; Heb. 4:13). Epu, mülei ñi huesalcahuenoafiel tañi domo ca elcünutual tañi huesa femmequen (Prov. 28:13). Cüla, mülei ñi feipiafiel ñi domo tañi perdonayaeteu ca Jehová llemai (Hech. 3:19). Llellipuafui Jehová tañi quelluaeteu tañi cüme raquiduamal, tañi cüme femal ca tañi fillpinoal. Ca feipiafui ta Jehová tañi eluaeteu ñi piuque mu tañi doi cüme femtual (Sal. 51:10-12; 2 Cor. 10:5; Filip. 2:13). Meli, mülei ñi femal chem tañi llellipuel. Ca mülei ñi üdeafiel tati huesaque pin ca tati quehuan dungu (Sal. 97:10). Quechu, pürüm quintuafi pu loncolelu tañi quelluaeteu (Sant. 5:14-16). Cayu, mülei ñi cüme raquiduamal chem dungu quelluayu tañi turpu huesalcahuenoafiel tañi domo. Quiñe huentru pequelu pornografia ca inayafui tüfachi cayu dungu. Chau Jehová quelluayu llemai tañi cüme femtual (Sal. 37:5). Rume falin-ngei ti huentru ñi huesalcanoafiel tañi domo, huelu ca femngechi mülei ñi pengelelafiel fente tañi falintuquefiel. ¿Chumngechi femafui? Peafiyiñ.
CHUMNGECHI YAMAFUIMI TAMI DOMO
15. Quiñe huentru, ¿chumngechi pengelelafui tañi domo ñi piuqueyeniefiel?
15 Pengelelfinge tami piuqueyefiel. Quiñeque peñi huimtulei tañi fill antü pengelelafiel tañi domo ñi piuqueyeniefiel, feimu ayüucüleingün ñi curehuen mu (1 Juan 3:18). Quiñe peñi curengelu pichique dungu mu rume femafui tüfa. Nüñmayafui ñi cuhu cam piuqueyenquechi pancoafui (rofülafui). Ca quiñeque mensaje mu feipiafui “Raquiduamtucunieyu”, cam ramtuafui “¿Com cüme amulei?”. Cafei huirintuculelafui quiñe carta cam tarjeta mu ñi rume piuqueyeniefiel. Femün mu tati füta, pengelafui tañi domo ñi falintuquefiel, femngechi doi quiñeucületuaingu.
16. ¿Chemu quiñe huentru saquiafui tañi domo?
16 Feipiafimi tami domo tami falintuquefiel. Feipiafimi tami domo chumngelu tami falintuquefiel ca cüme duamelafimi. Rumel mañumafimi tami domo fente tami quelluqueteu (Col. 3:15). Rüf piuque mu saquifilmi tami domo, quisu falintuniengelu ca piuqueyengelu troquihuai (Prov. 31:28).
17. ¿Chumngechi tati füta pengelelafui tañi respetaniefiel tañi domo?
17 Cüme duamelafimi tami domo ca respetayafimi. Tati huentru piuqueyefilu tañi domo, quiñe falin regalo troquiquefi Jehová tañi elueteu (Prov. 18:22; 31:10). Feimu falintuquefi, cuidaquefi ca cüme duamelquefi chem dungu meu rume. Cudumuhun mu ti curehuen, ti huentru obligaquelafi tañi domo ñi femal quiñeque dungu tañi ayüquenofel, femngechi ñi huesa duamnoal ca ñi tüngcüleal tañi raquiduam. f Ti huentru ca cuñiutucuhuai ñi femnoal chem huesa dungu no rume ñi podümnoal ñi raquiduam Jehová tañi adquiñ meu (Hech. 24:16).
18. ¿Chem mülei ñi femal tati pu füta? (Ca inaduamnge ti huichulechi dungu “ ¿Chumngechi pengelelafuimi tami respetaniefiel tami domo?”).
18 Eimün pu füta, Chau Jehová penieimünmeu tamün chumngechi troquiquefiel tamün domo ca tamün falintuquefiel. Chumlayaimün rume tamün huesa duamelafiel tamün domo. Doi mai piuqueyenquechi dunguafimün, cüme duamelafimün ca cuidayafimün, femngechi pengelelafimün tamün piuqueyefiel ca falintuquefiel. Femülmün, cuñiutucuafimün tamün curehuen, huelu doi mai ayühulafimün ta Jehová (Sal. 25:14).
ÜLCANTUN 131 “Ngünechen ñi trapümel”
a Cümeafui tati pu füta papeltuafiel feitachi troquiñ “¿Yamquefimi pu domo Jehová reque?” tripalu Ti Huerquen enero 2024.
b Tami füta hulelelmu tami ruca mu, papeltuafuimi ti troquiñ “Ayuda para las víctimas de la violencia doméstica”. Tüfa mülei huincadungun mu cheu ñi feipin “Otros temas” jw.org ca JW Library®.
c FALIN DUNGU: “Huesa pihun mu” quiñe che huesa duamelquefi ta caquelu tañi pin mu, falinolu troquilquefi. Fill antü feipiyahulquefi chem tañi ayüquenoel ta quisu mu.
d Inaduamnge huincadungun mu jw.org ca JW Library ti troquiñ “La pornografía puede destruir su matrimonio”.
e Tami füta pequelu pornografia quelluafeimu tüfachi troquiñ “Tami huentru pequefile pornografia, ¿chumafuimi?” tripalu Ti Huerquen agosto 2023.
f Biblia feipilai ñi chumal ca ñi chumnoal ti curehuen cudumuule engu. Ti curehuen müten dulliquei ñi chumal, huelu rumel respetaquefingu Jehová tañi raquiduam, ca femngechi tañi tüngcüleal ñi raquiduam engu ca tañi epuñpüle cüme duameluhual. Huelu ti curehuen nütramcaquelafi caquelu che feitachi dungu.
g ¿CHEM PENGELI TI ADENTUN? Quiñe peñi tañi cüdau mu tañi pu compañ pengeleleyu quiñe revista nielu pornografia, huelu quisu pilai ñi peafiel.
