CÜLA peñihuen mülei quiñe pichi huaria, Guatemala mapu mu: Yomara, Marcelo ca Hiver. Yomara, ti domo lamngen, eluhui ñi estudiayal Biblia pu testigo engün. Fei tañi epu huentru lamngen ca eluhui ñi estudiayal Biblia. Huelu com fei engün traumangeingün, ca quim papeltulafuingün braille mu. Feimu ti peñi ñi quimeltulelqueteu ta Biblia engün, papeltulelquefeyu nehuen dungu mu.

Tüfachi cüla peñihuen rume cüdaungefui ñi amual trahun mu. ¿Chumngelu am? Ti trahunhue ruca mülefui doi 40 minuto ñi puhuam trahun mu engün, fei quisu amulayafuingün trahun mu. Feimu ti trahunche eluhuingün ñi yeafiel engün com trahun mu. Ca nien mu asignacion trahun mu, pu peñi quelluquefeyu ñi cüme loncontucual chem pial engün.

Mayo 2019 tripantu mu, pu testigo eluhuingün ñi deumayal trahun feichi pichi huaria mu. Ca quiñe curehuen precursor regularngelu huiñamtuhuingu ñi mülepual feichi huaria mu. Tüfachi curehuen quim papeltulafuingu braille mu, huelu eluhuingu ñi quim papeltuafiel braille, femngechi ñi quelluafiel tüfachi cüla peñihuen.

Rupachi antü mu, ti cüla peñihuen quim papelturpuingün braille mu, femngechi cüme hueniyerpufingün ta Jehová. a Famülque mu, Yomara, Marcelo ca Hiver precursor regularngeingün. Marcelo siervo ministerialngerpui. Com fei engün cüdahuelniefi ta Jehová com tañi piuque mu engün. Caquelu pefiel mu ta fei engün, yafüluuqueingün.

Tüfachi cüla peñihuen, rume mañumcüleingün chumngechi ñi quellueteu ti trahunche ca ñi piuqueyenieteu. Yomara feipi: “Quimfilu iñchiñ pu testigo, pengeleiñmu rüfngechi piuqueyen”. Marcelo feipi: “Nieiñ cümeque hueni trahunche mu. Ca iñchiñ taiñ testigongen mu, nieiñ ta quiñe familia com huall mapu mu”. Feitachi cüla peñihuen rume ayünieingün ñi ayüfalngetual ta mapu (Sal. 37:10; Is. 35:5).