MIERCOLES 18 conchi enero 2023 tripantu mu, jw.org mu feipingei taiñ pu peñi Gage Fleegle ca Jeffrey Winder feula coneltuleingu ti Troquiñ Adniequefilu pu Dunguquelu Ineingen Jehová. Fei engu alün tripantu yenieingu ñi serfiniefiel ta Jehová.

Taiñ peñi Fleegle tremi Pensilvania mu, Estados Unidos mapu. Tañi pu chau poyequefingu ta Jehová, feimu quimeleleyu ti rüf dungu. Petu huechengelu taiñ peñi, ñi familia engu huiñamtuhui lelfün püle, cheu duamniengelu doi amuldunguquelu. Peñi Fleegle fautizahui 20 conchi noviembre 1988 tripantu.

Tañi pu chau rume yafültucuquefeyu ñi serfiafiel ta Jehová fill antü. Taiñ peñi ñi ruca mu rumel lloungequefui tati pu huitran-ngepaquechi loncolelu ca pu betelita. Feimu ngüneduamfi ñi ayüucülequen engün. Fei 1 conchi septiembre 1989 tripantu mu precursor regularngerpui. Taiñ peñi 12 tripantu nielu ayüfui ñi conal Betel ruca. Fei octubre cüyen 1991 tripantu coni Betel mu.

Betel mu taiñ peñi Fleegle pura tripantu cüdahui cheu ñi deumangequemum lifru. Fei hula cüdahui ti Troquiñche Adcünuquelu ti Amuldungun. Feichi mu alün tripantu coneltulefui ti trahunche ruso quehun dungulu. Fei 2006 tripantu niehui Nadia engu, fei trür cüdahuingu Betel ca coneltuingu ti trahun portugues quehun. Fei hula, mari tripantu coneltuleingu ti trahun huincadungun mu. Fentren tripantu cüdaulu ti Troquiñche Adcünuquelu ti Amuldungun, taiñ peñi Fleegle huercüngei ñi cüdahual ti Troquiñche Pepicaquelu ti Quimeltun. Marzo 2022 tripantu elfalcünungei ñi quelluntucual ti Troquiñche Adcünuquelu ti Amuldungun Cüdau ñi nieel ti Troquiñ Adniechequelu.

 Ti peñi Winder tremi quiñe pichi huaria California mülelu, Estados Unidos mapu. Tañi pu chau quimeltueyu ti rüf dungu. Fei 29 conchi marzo 1986 tripantu fautizahui. Quiñe cüyen rupalu, precursor auxiliarngerpui. Rume ayühueleyu, feimu amulei ñi precursorngeal. Quiñeque cüyen müten rupai, fei 1 conchi octubre 1986 tripantu precursor regularngerpui.

Petu huechengelu taiñ peñi Winder, pemequefui tañi pu peñi cüdauquefulu Betel. Tüfa yafültucueyu tañi ca cüdahual Betel. Feimu mayo 1990 tripantu, mangelngei ñi cüdahual Betel ruca Wallkill, Nueva York huaria mu.

Betel mu, taiñ peñi Winder fillque cüdau elungei. Liftuafiel Betel ruca, cüdauquefui ti hacienda mu, ca ti Troquiñche Ngüneduamquelu ñi Cümelcaleal Betel. Feichi 1997 tripantu niehui taiñ lamngen Angela engu, fei trür cüdahuingu Betel ruca. Fei hula, 2014 tripantu huercüngeingu Warwick huaria mu. Tüfa mu taiñ peñi Winder quelluntucui ñi deumangeal ti fütra Betel ruca. Fei 2016 tripantu huercüngeingu ti Ruca ñi Adcünuel ta Watchtower Cheu ñi Quimeltuchequen, Patterson mapu. Üye meu taiñ peñi Winder cüdahui ti Troquiñche Pepicaquelu Fillque Audio ca Video. Meli tripantu rupalu huiñotuingu Warwick Betel ruca, fei elfalcünungei ñi cüdahuelafiel ti Troquiñche Adcünuquelu pu Cüdauquelu Betel mu. Marzo 2022 tripantu elungei ñi cüdahual ti Troquiñche Adcünuquelu pu Cüdauquelu Betel mu ñi nieel ti Troquiñ Adniechequelu.

Llellipuquefiyiñ ta Jehová ñi quelluafiel tüfachi epu “adümuhun-ngechi huentru”, com ñi nehuen mu cüdauqueingu ñi quelluntucual Chau Dios ñi Gobierno (Efes. 4:8).