1. ¿Chumngelu duamnieiñ taiñ adnieaeteu Jehová? Feipinge quiñe ejemplo.

 RAQUIDUAMNGE: ñamquiyahuimi quiñe fütra mahuidantu mu. Feita mu müna cuñihun-ngefui, mülei huapoque culliñ. Ca mülei fütraque lolo, feimu ütrüfconafuimi. Ca ünatuafeimu chi pichique pülü. Feimu cümeafui quiñe che quimfilu tati mahuidantu tami adnieaeteu. Cheu taiñ mülemum fachantü tüfachi cuñihun-ngechi mahuidantu reque felei. Fentren cuñihun dungu mülei, feita püntünentuafeiñmu Jehová mu. Huelu nieiñ taiñ adnieteu: Jehová llemai. Quisu cuñiutucuqueiñmu ca feipiqueiñmu chem rüpü taiñ inayal, femngechi taiñ puhual ti hue mapu mu.

2. ¿Chumngechi adniequeiñmu Jehová?

² ¿Chumngechi adniequeiñmu Jehová? Biblia mu. Ca pünequefi quiñeque huentru taiñ adnieaeteu, quiñeque tüfa “tati quim manelfal cüdaufe”. Feitachi pu peñi quimeltuqueiñmu taiñ cüme femal (Mat. 24:45). Ca mülei pu loncolelu ca pu huitran-ngepaquechi loncolelu. Feitachi pu peñi yafültucuqueiñmu ca quelluqueiñmu taiñ chaftuafiel chem huesaque dungu rume. Felei llemai, Jehová adnieiñmu feitachi pichilehuechi antü mu, feimu rume mañumniefiyiñ. Jehová quelluqueiñmu taiñ hueniyenierpuafiel ca taiñ amuleal ñi rüpü mu.

3. ¿Chem inaduamaiñ feitachi troquiñ mu?

³ Quiñeque mu cüdautuafuiñ taiñ inayal ñi feipin pu huentru Jehová tañi elcünuel. ¿Chemu am? Ayülayafuiñ chi taiñ feipieteu. Raquiduamafuiñ chi tañi ngülam ñi nehue cümenon, feimu cüpapeafui Jehová mu piafuiñ. Femngechi raquiduam nieliyiñ, doi mülei taiñ maneluhual Jehová mu taiñ adniequeteu. Ca maneluucüleaiñ  ñi rumel cüme tripaquen Jehová tañi ngülam. Feimu tüfachi troquiñ mu peaiñ cüla dungu: 1) chumngechi ñi adniefiel Jehová tañi pu che cuifi mu, 2) chumngechi adniequeiñmu fachantü, ca 3) chumngechi cümelcaqueiñmu inaniefiliyiñ com taiñ feipieteu Jehová.

CHUMNGECHI ADNIEFI JEHOVÁ TATI PU ISRAEL CHE

4, 5. ¿Chumngechi pengeli Jehová ñi adniefiel ta Moisés? (Inaduamnge ti adentun hunen pagina mu).

⁴ Jehová üitufi ta Moisés ñi lifrenentuafiel pu Israel che Egipto mapu mu. Jehová cüme pengeli ñi loncocünufiel ta Moisés pu Israel che mu. ¿Chumngechi femi? “Antü mu adniefi engün quiñe tromü mu ca pun meu adniefi engün cütral mu” (Éx. 13:21). Moisés inafi feichi cütral ca ti tromü, femngechi puhuingün ti Quelü lafquen mu. Pu Israel che pefilu ñi hualloñmanieteu pu Egipto che, rume llicaingün. Raquiduamingün ñi huesa dulliel ta Moisés tañi yefiel mu ina lafquen. Huelu Moisés huelulcaulai, Jehová mai adnieyu cheu püle tañi amual (Éx. 14:2). Fei Jehová femi quiñe afmatun dungu ñi montulafiel pu Israel che (Éx. 14:26-28).

⁵ Pu Israel che rupaingün 40 tripantu ti huellin mapu mu, feimu Moisés inaniefi ti tromü tañi adnieaeteu. a Quiñeque mu ti tromü huitracünuuquefui itrotripa Moisés ñi tolto ruca mu, femngechi com pu Israel che ñi peafiel engün (Éx. 33:7, 9, 10). Femngechi Jehová dunguquefi ta Moisés, fei Moisés ngülamtuquefi pu Israel che (Sal. 99:7). Feimu pu Israel che cüme pefingün chumngechi Jehová adniefi ta Moisés.

6. Jehová adniefi ta Moisés, huelu ¿chem chumingün pu Israel che? (Números 14:2, 10, 11).

⁶ Quimfalcülefui rume Jehová ñi adniefiel ta Moisés, fentren pu Israel che famentufingün (papeltunge Números 14:2, 10, 11). Feimu Jehová elulafi engün ñi conal ti Feipicünuelchi Mapu mu (Núm. 14:30).

7. ¿Inei engün inafingün Jehová tañi adnieteu? (Números 14:24; ca inaduamnge ti adentun).

⁷ Huelu quiñeque Israel che inafingün Jehová tañi adnieteu. Quiñe tüfa ta Caleb. Jehová feipi: “Com tañi piuque mu inanieneu” (papeltunge Números 14:24). Feimu Jehová cümelcafi ca elufi ñi dullial cheu ñi mülenagal Canaán mapu mu (Jos. 14:12-14). Pu caquelu Israel che mülelu Caleb ñi antü mu ca eluhuingün ñi adnieaeteu Jehová. Lalu ta Moisés, Jehová loncocünufi ta Josué pu Israel che mu. Fei “tunte puulu ñi mongen Josué, pu Israel che rume yamnieyu” (Jos. 4:14). Feimu Jehová cümelcafi ca elufi ñi conal engün ti Feipicünuelchi Mapu mu (Jos. 21:43, 44).

8. Pu lonco ülmen ñi antü mu, ¿chumngechi adniefi Jehová tañi troquiñche? (Ca inaduamnge ti adentun).

⁸ Rupachi tripantu mu, Jehová elcünui quiñeque jueces ñi adnieafiel tañi troquiñche. Ca quiñeque tripantu rupalu, mülerpui lonco ülmen Israel mu. Fei Jehová elcünui profeta ñi adnieafiel tañi pu che. Tati pu lonco ülmen nor piuquengelu allcütufingün pu profeta. Quiñe tüfa ta David. Ñom piuque mu eluhui ñi norümtuaeteu ti profeta Natán (2 Sam. 12:7, 13; 1 Crón. 17:3, 4). Cangelu ejemplo  fei tati lonco ülmen Jehosafat. Quisu inafi ñi feipieteu ti profeta Jahaziel ca yafültucufi pu Judá che ñi maneluhual pu profeta mu (2 Crón. 20:14, 15, 20). Ca rupalu engün cüdaungechi dungu mu, ti lonco ülmen Ezequías feipifi ta Isaías ñi quelluaeteu (Is. 37:1-6). Jehová cümelcaquefi ca cuñiutucuquefi pu lonco ülmen inafiel mu ñi feipin (2 Crón. 20:29, 30; 32:22). Cüme quimfalcünungei Jehová ñi elcünufiel ti pu profeta ñi adnieafiel tañi pu che. Femlu rume, fentren Israel che ca pu lonco ülmen famentufingün (Jer. 35:12-15).

CHUMNGECHI ADNIEFI JEHOVÁ TATI PU HUNENQUE CRISTIANO

9. Jehová, ¿chumngechi adniefi tati pu hunenque cristiano? (Ca inaduamnge ti adentun).

⁹ Deu huiñomongetulu Jesús, Jehová amulcünufi ti cristiano trahunche. ¿Chumngechi adniefi engün? Üitufi ta Jesús ñi loncoleal ti trahunche mu (Efes. 5:23). Huelu Jesús feipilafi caque quiñeque engün tañi chem chumal. Doi mai adniefi pu apostol ca pu loncolelu Jerusalén mu ñi cuidayafiel ti trahunche (Hech. 15:1, 2). Cafei fillque trahunche mu dullingei pu loncolealu ñi adnieafiel pu peñi ca pu lamngen (1 Tes. 5:12; Tito 1:5).

10. 1) Pu hunenque cristiano, ¿chumngechi llohuingün ñi feipingeel? (Hechos 15:30, 31). 2) Cuifi mu, ¿chumngelu quiñeque famentufingün pu huentru Jehová ñi elcünuel? (Inaduamnge ti huichulechi dungu “ Quiñeque famentufingün pu huentru Jehová ñi elcünuel”).

¹⁰ Epe com pu hunenque cristiano ayühunquechi llohuingün ñi feipieteu pu apostol ca pu loncolelu, fei inafingün. Biblia feipi “müna ayühuingün ti yafüluhun dungu meu” (papeltunge Hechos 15:30, 31). ¿Feula cai? ¿Chumngechi adniefi Jehová tañi troquiñche? Peafiyiñ.

CHUMNGECHI ADNIEIÑMU JEHOVÁ FAMÜLQUE MU

11. Taiñ antü mu, Jehová ¿chumngechi dulliquefi quiñeque huentru taiñ adnieaeteu?

¹¹ Taiñ antü mu, Jehová amulei ñi adniefiel tañi troquiñche Biblia mu ca Jesús ñi loncolen mu. Ca femngechi Jehová dulliquefi quiñeque huentru ñi adnieafiel tañi troquiñche. ¿Chumngelu  feipiafuiñ? Raquiduamnge 1870 tripantu püle chem ñi rupan. Feichi mu, Russell ca tañi pu quelluqueteu adümürpuingün 1914 tripantu mu ñi rupayal quiñe falin dungu Chau Dios ñi Gobierno mu (Dan. 4:25, 26). ¿Chumngelu femngechi raquiduamingün? Papeltufiel mu ti profecia mülelu Biblia mu. Ca Jehová llemai elueyu quimün tañi adümafiel. Fei 1914 tripantu mu rupai fentren huesaque dungu. Coni ti Primera Guerra Mundial, fütraque nüyün, ngüñün ca fill huesaque cutran. Com tüfachi dungu pengeli ñi ngünenien huenu mu Chau Dios tañi Gobierno (Luc. 21:10, 11). Femngechi felerpui ñi adümfiel Russell ca tañi pu quelluqueteu. Fei quimfalcünungei Jehová ñi adniefiel tüfachi pu huentru ñi quelluafiel tañi troquiñche.

12, 13. Ti Segunda Guerra Mundial mu, ¿chumi Jehová tañi troquiñche tañi doi amuldungual?

¹² Ca ngüneduamaiñ ñi rupan ti Segunda Guerra Mundial mu. Pu peñi ngüneduamlu engün Apocalipsis 17:8, quimürpuingün ñi acunoal ti Armagedón deu rupale ti hueichan. Doi mai hune mületuafui tüngün, femngechi ñi doi amuldungungeal ti cümeque dungu. Feimu mülelu rume ti hueichan, Jehová tañi troquiñche amulcünufi Galaad pingechi escuela, femngechi cüme pepicangei pu misionero ñi amuldungumeal caque mapu mu. Mülelu ti hueichan rume, huercüngei pu misionero fentren mapu mu. Cafei Jehová tañi troquiñche pepicafi quiñe escuela tañi quelluafiel com pu amuldunguquelu ñi doi cüme quimeltucheal. Com tüfachi dungu pepicafi Jehová tañi troquiñche ñi doi cüme huechurpual tañi amuldungun cüdau.

¹³ Cüme ngüneduamafuiñ chumngechi Jehová adniefi tañi troquiñche rupalu rume cüdaungechi dungu. Aflu ti Segunda Guerra Mundial ta fantepu mu, Jehová tañi pu che amuldungumequei fillque troquiñ mapu mu. Feimu huall mapu püle fentren che quimürpufi ta Jehová.

14. ¿Chumngelu maneluhuafuiñ Jehová tañi troquiñche ca pu loncolelu taiñ adnieteu? (Apocalipsis 2:1; ca inaduamnge ti adentun).

 ¹⁴ Famülque mu ti Troquiñ Adniechequelu ca eluuqueingün ñi adnieaeteu Cristo. Tañi quimeltuafiel pu peñi ca pu lamngen, hune quintuqueingün Jehová ca Jesús ñi raquiduam. Tañi chem piel ti Troquiñ Adniechequelu, tati pu huitran-ngepaquechi loncolelu ca pu loncolelu quimelelquefi engün ti pu trahunche. b Jesús adniefi com pu loncolelu, feimu Biblia feipi ñi mülen engün Jesús tañi man cuhu mu (papeltunge Apocalipsis 2:1). Com pu loncolelu culpafe chengelu engün cai, feimu huelulcaqueingün quiñeque mu Moisés, Josué ca pu apostol reque (Núm. 20:12; Jos. 9:14, 15; Rom. 3:23). Femlu rume, Jesús adniequefi ti Troquiñ Adniechequelu ca pu loncolelu. Ca femürpuai “fentepuule mapu meu müleyechi dungu” (Mat. 28:20). Feimu llemai rüf maneluhuafuiñ tüfachi pu peñi mu taiñ adnieteu.

INANIEFILIYIÑ JEHOVÁ TAIÑ ADNIETEU, ¿CHUMNGECHI CÜMELCAYAIÑMU?

15, 16. ¿Chem quimeltuafeiñmu ñi feipin ti curehuen ca ti lamngen?

¹⁵ Inaniefiliyiñ Jehová taiñ adnieteu, müna cümelcaqueiñmu fachantü. Peafiyiñ ñi femün quiñe curehuen Andy ca Robyn pingelu. Quisu engu adcünuingu ñi mongen tañi doi cüdahuelafiel ta Jehová (Heb. 13:5). Femngechi quelluntucuingu deumayal Trahunhue Ruca. Tati lamngen feipi: “Quiñeque mu quiñe pichi ruca mu mülequefuyu. Niequelayu rume cheu tayu deumaiyalal”. Ca feipi: “Iñche müna ayüquefun nentual adentun, huelu fentren tañi maquina fendefiñ. Ngümanquechi fendefiñ, huelu inayentufiñ Sara. Quisu hueñancülequelafui tañi elcünun mu, doi mai ayüniefui ayühuelafiel ta Jehová” (Heb. 11:15). ¿Quisu engu mai ayüucülepei ñi femün? Ti lamngen feipilei: “Müna ayüucüleyu. Eluniefiyu ta Jehová com tayu nieel. Tañi cüdahuelfiel ta Chau Jehová, raquiduameleiñmu tayu müleal hue mapu mu”. ¿Chem feipi Andy? “Doi ayüucüleyu. Elcünuyu com tayu nehuen Jehová ñi cüdahuelafiel”.

¹⁶ Inaniefiliyiñ Jehová taiñ adnieteu, ¿ca chumngechi cümelcaqueiñmu? Peafiyiñ ñi femün feitachi lamngen Marcia. Deu tripalu tañi colegio mu, taiñ lamngen ayüniefui ñi precursorangeal (Mat.  6:33; Rom. 12:11). Quisu feipi: “Quiñe universidad elufeneu ñi cullinoal meli tripantu. Huelu iñche ayüniefun doi cüdahuelafiel ta Jehová, feimu amulan tati universidad mu. Doi mai quintun pichin ñi papeltual, fei nieal quiñe cüdau ca serfinieafiel Jehová. Müna ayüucülen tañi femngechi femün. Feula precursora regularngen. Iñche adcünuquen tunte ñi cüdahual, feimu nien tiempo ñi cüdahual Betel mu ca ñi femal caquelu ayüfalchi cüdau”.

17. ¿Ca chumngechi cümelcaqueiñmu Jehová tañi quimeltun? (Isaías 48:17, 18).

¹⁷ Quiñeque mu Chau Jehová tañi troquiñche eluqueiñmu ngülamtun taiñ cuñiutucuaeteu. Quiñe ejemplo, ngülamtungequeiñ taiñ fente poyenoafiel tati plata ca chem huesalcan no rume femnoal tañi püntünentunoaeteu Jehová mu. Inaniefiliyiñ Jehová ñi quimeltun, cümelcaqueiñmu. Cüme raquiduam niequeiñ ca tüngcülequeiñ (1 Tim. 6:9, 10). Femngechi com piuque mu serfinieafiyiñ Jehová, feita tüngduamelqueiñmu ca doi ayühuelqueiñmu (papeltunge Isaías 48:17, 18).

18. ¿Chumngelu eluucüleimi inanieafiel ta Jehová?

¹⁸ Jehová amulerpuai ñi püneafiel pu huentru ñi adnieafiel tañi troquiñche. Femai fütra cutrancahun mu ca feichi huaranca tripantu ñi ngünenietual ta Jesús (Sal. 45:16). Feichi antü mu ayülayafuiñ chi taiñ chem pingeal, huelu ¿inaniepeafuiñ mai? Fachantü doi feyentufiliyiñ ta Jehová, müte cüdautulayaiñ ñi femal cüpalechi antü mu. Feimu mülei taiñ rumel inanieafiel Chau Jehová taiñ adnieteu. Cafei mülei taiñ inanieafiel pu huentru Jehová ñi elcünuel (Is. 32:1, 2; Heb. 13:17). Rüf maneluucüleiñ Jehová mu taiñ cüme adnieteu, fei quelluqueiñmu taiñ hueniyenieafiel, femngechi diturpuafuiñ ti rumel mongen.