TROQUIÑ ÑI CHILLCATUNGEAL 7
ÜLCANTUN 15 ¡Püramyeafiyiñ Jehová tañi hunen Fotüm!
¿Chumngechi cümelcaqueiñmu Jehová taiñ perdonaqueteu?
“Eimi mu mülei tati rüf huiñoduamtuchequen” (SAL. 130:4).
¿CHEM QUIMAIÑ?
Ngüneduamaiñ quiñeque troquiñ Biblia feipilu Jehová taiñ rüf perdonaqueteu. Tüfachi chillcatun quelluaiñmu taiñ doi falintuafiel Jehová tañi huiñoduamtuchequen.
1. Quiñe hueni perdonaeyu pielmu, ¿chem raquiduamafuimi?
HUESA duamelfiliyiñ quiñe hueni, müna ayühuelqueiñmu allcüfiel taiñ perdonaeteu. Perdonaeyu feipielmu tami hueni, ¿cüpa feipi tamu huiño hueniyeutual cuifi reque? Cam ¿ayüpelai ñi dunguhuenoal tamu yafcahun mu? Caquerumei ñi raquiduamquen che tüfachi dungu mu.
2. ¿Chem feipi Biblia Jehová ñi huiñoduamtuchequen mu? (Ca inaduamnge ti quimal dungu).
2 Jehová ñi perdonachequen trürlai chumngechi perdonachequei ti pu che. Jehová ñi perdonachequen doicülei. Ti salmista feipi Jehová mu: “Eimi mu mülei tati rüf huiñoduamtuchequen, femngechi tami rume yamngeal” (Sal. 130:4). a Felei tati, Jehová rüf perdonachequei. Tati huirintuculu Biblia hebreo quehun mu püneingün quiñe palabra quimfalcünual Jehová ñi perdonachequen. Turpu pünequelaingün feichi palabra ñi nütramcayal pu che ñi perdonachequen mu.
3. ¿Chemu trürlai Jehová ñi perdonachequen chumngechi perdonachequei pu che? (Isaías 55:6, 7).
3 Jehová perdonafiyüm quiñe che, ngoimaquefi ñi culpan. Feichi che ca huiño hueniyetuafui ta Jehová. Müna mañumcüleiñ alünque rupa taiñ perdonaqueteu Jehová (papeltunge Isaías 55:6, 7).
4. ¿Chumngechi quelluqueiñmu Jehová taiñ cüme adümal ñi rüf perdonachequen?
4 Quisu iñchiñ com adümlayafuiñ chumngechi ñi perdonachequen ta Jehová. Huelu Jehová quelluqueiñmu taiñ adümafiel, ¿chumngechi? Biblia mu elcünui quiñeque pengelün dungu. Tüfachi chillcatun mu ngüneduamaiñ quiñeque. Tüfa pengelelaiñmu rüf repentiuliyiñ, Jehová ngoimanentuafi taiñ culpan ca eluaiñmu taiñ huiño hueniyetuafiel. Femngechi doi piuqueyeafiyiñ ca doi falintuñmayafiyiñ taiñ cüme Chau Jehová ñi rüf perdonachequen.
JEHOVÁ YEÑMAQUEIÑMU REQUE TAIÑ CULPAN
5. ¿Chem rupaquei taiñ perdonaeteu Jehová taiñ culpan mu?
5 Biblia mu trürümngequei taiñ culpan quiñe fanetufalngechi chemcün mu. Ti lonco ülmen David feipi tañi huelulcan mu: “Tañi culpan huente ñi lonco meu reque mülei. Rume fanei iñche meu” (Sal. 38:4). Huelu Jehová huiñoduamtuquefi pu repentiulu (Sal. 25:18; 32:5). Hebreo quehun mu ti palabra perdon ca feipi “huitrapüramngeal” ca “yengeal”. Culpaliyiñ, meñcuniefiyiñ reque fanechi dungu. Huelu Jehová taiñ perdonaeteu, entuñmaqueiñmu reque taiñ fanetunieteu ca yequefi.
“Perdonaquei” (Sal. 32:5).
6. ¿Tunte camapu yequei Jehová taiñ culpan?
6 Cangelu adentun pengeli fente alü camapu yequen Jehová iñchiñ taiñ culpan. Salmo 103:12 feipi: “Tunte alü camapulelu ti tripahue antü ca ti conhue antü mu, ca femngechi alü camapucünui taiñ culpan”. Ti tripahue antü alü camapulei conhue antü mu. Tüfa pengeli Jehová alü camapucünuquei taiñ culpan. Quimfali Jehová tañi rüf perdonachequen.
“Tunte alü camapulelu ti tripahue antü ca ti conhue antü mu” (Sal. 103:12).
7. Biblia ñi feipin mu, ¿chumquei Jehová taiñ culpan mu? (Miqueas 7:18, 19).
7 Jehová püntünentuñmaqueiñmu taiñ culpan, huelu ¿huiño acordaniequefi? No, femquelai. Ti lonco ülmen Ezequías feipi Jehová mu: “Tami furitu mu ütrüfentufimi com tañi fillque culpan” (Is. 38:9, 17). Tüfachi adentun pengeli quiñe che rüf repentiule, Jehová famentuquefi reque tañi adquiñ mu feichi che ñi culpan. Ñi feipin ti lonco ülmen Ezequías ca rulpadungungeafui: “Turpu culpanolu reque troquiqueen”. Jehová ca cüme pengelcünuquei cangelu adentun mu, tüfa mülei Miqueas 7:18, 19 (papeltunge). Fei tüfa mu feipilei com taiñ culpan ütrüftucuquefi reque alüconcüleyechi lafquen mu. Cuifi mu, tranaconlu quiñe chemcün alüconcüleyechi lafquen mu, ca pepi huiño entungequelai.
“Tami furitu mu ütrüfentufimi com tañi fillque culpan” (Is. 38:17).
“Eimi ütrüftucuafimi com tañi huelulcan engün alüconcüleyechi lafquen mu” (Miq. 7:19).
8. ¿Chem quimürpuiñ tüfa?
8 Tüfachi fillque adentun pengeleiñmu Jehová perdonafiel mu quiñe che, yeñmaquefi reque tañi culpan ca müntuñmaquefi reque fanechi dungu. Femngechi feipi ti lonco ülmen David: “Ayühun niei feiti che rulpacünuñmangelu ñi huesa femün, ca tati pu ngoimanentungelu ñi culpan. Ayühun niei ti huentru, Chau Jehová raquinieñmalayafi ñi culpan” (Rom. 4:7, 8). Fei tüfa cüme pengeli Jehová ñi rüf perdonachequen.
CHAU JEHOVÁ BORRACÜNUQUEFI TAIÑ CULPAN
9. Biblia, ¿chumngechi quimeltuqueiñmu Jehová taiñ perdonaqueteu com taiñ culpan?
9 Feula ca ngüneduamaiñ caquelu adentun. Femngechi quimaiñ, Jesús tañi lan mu, Jehová borracünufi reque pu repentiutulu ñi culpan. Biblia feipi Jehová cüchaquei ca liftuquefi taiñ culpan, femngechi lifcülequetui ti culpafe che (Sal. 51:7; Is. 4:4; Jer. 33:8). Jehová feipiquei chem dungu ñi rupaquen taiñ culpan mu: “Tamün culpan huilüf quelülefule rume, ligcünungetuai tati pire reque; fente quelülele rume quiñe añiltungeelchi pañu reque, cal ufisa reque elcünungetuai” (Is. 1:18). Quelü co cam mollfüñ püteftungele quiñe lig tacun, rume cüdaungeafui ñi liftungeal. Femngechi Jehová quimeltuqueiñmu quisu com cüme liftuafui taiñ culpan.
“Tamün culpan huilüf quelülefule rume, ligcünungetuai tati pire reque” (Is. 1:18).
10. ¿Ca chem pengelün dungu feipiquei Jehová ñi eluucülen taiñ perdonayaeteu?
10 Chumngechi quimeleiñmu rupachi chillcatun, taiñ culpan quiñe “defen” reque felei (Mat. 18:32-35). Feimu huiño culpaliyiñ, mufüque rupachi defequefiyiñ Jehová. Huelu Jehová perdonaeliyiñmeu, com culliquei reque taiñ culpan, feimu iñchiñ ngelai taiñ cullial. Jehová feipilaeiñmu taiñ cullial cuifique culpan taiñ perdonaeteu. Müna yafültucuqueiñmu femngechi ñi femqueel Jehová.
“Rulpacünuñmafeyu com tami defen” (Mat. 18: 32-35).
11. Biblia feipilu ñi rulpacünungeal taiñ culpan, ¿chem pengeleiñmu? (Hechos 3:19).
11 (Papeltunge Hechos 3:19). Tüfachi texto ti palabra “rulpacünungeal” griego quehun mu ca cüpa feipi “borracünungeal, femngechi ñi ngehuenoal”. Biblia feipi Jehová cüme liftucünuquefi taiñ culpan, fei ñi ngehuenoal. Taiñ cüme pepilafiel, raquiduamaiñ tüfa mu: cuifi mu pu che pünequefui tinta ñi huirintucual, tüfachi tinta cüdaungequelafui ñi borracünungeal. Feimu quiñe defen borracünungefule, ngehuetuquelafui, inei no rume pelayafui chem ñi huiriconcülen. Ca femngechi femquei Jehová, perdonaeliyiñmu, com borracünuquefi reque taiñ culpan, ngehuequetulai (Sal. 51:9).
“Rulpacünungeai tamün culpan” (Hech. 3:19).
12. Ti tromü ñi feipin Biblia, ¿chem quimeleiñmu?
12 Isaías 44:22 ca mülei cangelu adentun pengelquelu Jehová ñi chumquen taiñ culpan mu. Feipi: “Ñamümüñmayayu tami huelulcan, quiñe tromü tacuayu reque. Tami culpan quiñe fütra tromü tacuayu”. Chau Jehová perdonafiel mu quiñe che, tacuquefi quiñe fütra tromü mu reque tañi culpan, femngechi inei no rume pehuelayayu.
“Ñamümüñmayayu tami huelulcan, quiñe tromü tacuayu reque” (Is. 44:22).
13. ¿Chum duamqueiñ Jehová taiñ perdonaeteu?
13 Com tüfachi pengelün dungu, ¿chem quimeltuqueiñmu iñchiñ? Jehová deu perdonaeliyiñmu, ngelai taiñ quisutu culpatumequehual. Jesús ñi chalintucuhun mu com culli taiñ culpan mu, com cüme borracünungei, ngehuequetulai. Rüf piuque mu huiño raquiduamtuliyiñ, Jehová rüf perdonaqueiñmu.
JEHOVÁ HUIÑO LLOUQUETUEIÑMU QUISU TAÑI HUENI REQUE
Jehová tañi perdonachequen mu eluqueiñmu taiñ hueniyeucüleal quisu iñchiñ. (Inaduamnge parrafo 14).
14. ¿Chumngelu maneluhuafuiñ Jehová taiñ rüf perdonaqueteu? (Ca inaduamnge ti adentun).
14 Jehová perdonaeteu iñchiñ, huiño hueniyequefiyiñ. Taiñ quimfiel mu tüfa, quelluqueiñmu taiñ culpatumequeunoal. Cafei llicalequelaiñ Jehová taiñ illcutunieteu cam taiñ cüpa castigayaeteu. Fei tüfachi dungu rupaquelai. ¿Chumngelu quimnieiñ tüfa? Jehová feipifi ti profeta Jeremías: “Iñche perdonayafiñ ñi huelulcan engün ca acordahuelayan ñi culpan engün” (Jer. 31:34). Tati apostol Pablo huiño feipi ñi feipin Jeremías: “Raquiduamtucuhuelayafiñ tañi culpan engün” (Heb. 8:12). ¿Chem cüpa feipi tüfachi texto?
“Acordahuelayan ñi culpan engün” (Jer. 31:34).
15. Jehová acordahuequelai taiñ culpan, ¿chem pengeleleiñmu tüfa?
15 ¿Chem cüpa feipi Jehová ñi acordahuequenon taiñ culpan? Huiño raquiduamquelayai taiñ culpan, cafei deu perdonaeteu mu iñchiñ chumlayaiñmu rume. ¿Chumngelu quimiyiñ? Biblia mu ti palabra “acordayal” ca pengeli chem ñi femal quiñe che. Raquiduamnge ti huesa huentru Jesús ñi inafül clafantucungelu, fei feipifi ta Jesús: “Ngünenietulmi mapu, acordayaen” (Luc. 23:42, 43). Tüfachi huentru re feipifi ta Jesús ñi acordayaeteu, doi mai tañi füreneaeteu. Fei Jesús feipieyu ñi huiñomongeltuafiel. Feimu Jehová feipilu ñi acordahuenoafiel taiñ culpan, pengeli taiñ perdonaeteu cafei castigalayaiñmu cuifique culpan ñi deu perdonael.
16. Perdonaeteu mu Jehová, ¿chum duamqueiñ?
16 Jehová rulpacünuñmaeteu taiñ culpan, lifrenentungelu troquiuqueiñ. Biblia mu ca mülei cangelu pengelün dungu taiñ quimelqueteu. Com iñchiñ culpafe chengeiñ, feimu “ngüneniequeiñmu reque ti culpan”. Huelu Jehová perdonaelumu iñchiñ, “lifrenentungeiñ culpan dungu meu” (Rom. 6:17, 18; Apoc. 1:5). Quimlu iñchiñ Jehová taiñ perdonaqueteu, rume ayühuelqueiñmu quiñe esclavo reque lifretripalu.
“Lifrenentungeimün culpan dungu meu” (Rom. 6:18).
17. Perdonaeteu mu Jehová tremotuiñ reque, ¿chumngelu feipiafuiñ? (Isaías 53:5).
17 (Papeltunge Isaías 53:5). Feula inaduamaiñ ti quiñelehuechi adentun. Tati Biblia feipi com culpafengelu am iñchiñ, nieiñ reque quiñe huesa cutran nienolu lahuen. Huelu Jehová tremoleiñmu reque Jesús ñi chalintucuhun mu, femngechi huiño hueniyetuafuiñ Jehová (1 Ped. 2:24). Quiñe che nielu quiñe rume huesa cutran tremotui, fei rume ayüuquei. Ca femngechi Jehová perdonaeteu mu iñchiñ, tremoltueiñmu reque ca quelluqueiñmu taiñ huiño hueniyetuafiel. Fei tüfa rume ayühuelqueiñmu.
“Quisu tañi allfeñ meu iñchiñ tremolngetuiñ” (Is. 53:5).
CHUMNGECHI CÜMELCAQUEIÑMU JEHOVÁ TAIÑ PERDONAQUETEU
18. ¿Chem quimürpuiñ ti pengelün dungu nütramcalu Jehová ñi perdonachequen mu? (Inaduamnge ti huichulechi dungu “Chumngechi perdonaqueiñmu Jehová”).
18 ¿Chem quimürpuiñ com tüfachi pengelün dungu Jehová ñi perdonachequen mu? Jehová taiñ perdonaeteu, taiñ culpan ngehuetuquelai, femngechi cüme hueniyeucüleaiñ taiñ Huenu Chau iñchiñ. Acordanieaiñ, Jehová taiñ perdonaqueteu quiñe cüme regalo reque felei. Tüfa pengeli taiñ piuqueyenieteu ca tañi fente fürenechefengen. Feimu turpu feipilayaiñ Jehová mülei taiñ perdonayaeteu (Rom. 3:24).
19. 1) ¿Chem mu mañumcüleaiñ? (Romanos 4:8). 2) ¿Chem peaiñ cüpalechi chillcatun mu?
19 (Papeltunge Romanos 4:8). Rume ayühuelqueiñmu Jehová ñi “rüf huiñoduamtuchequen” (Sal. 130:4). Huelu ayüleliyiñ Jehová taiñ perdonayaeteu, mülei taiñ femal Jesús ñi feipin: “Rulpanofilmün caquelu che ñi huelulcan, tamün Chau ca rulpalayai tamün huelulcan” (Mat. 6:14, 15). Feimu rume falintufali inayentuafiel Jehová ñi perdonachequen. Cüpalechi chillcatun mu ngüneduamaiñ chumngechi taiñ femal.
ÜLCANTUN 46 Mañumniehuiyiñ Chau Jehová
a Hebreo quehun mu tüfachi texto pengeli Jehová müten rüf perdonaquei pu che ñi culpan. Tati Hue Mapu ñi Biblia femngechi rulpadungungei Salmo 130:4, huelu caquelu Biblia mu femngechi huirintuculelai.
