TROQUIÑ ÑI CHILLCATUNGEAL 8
ÜLCANTUN 130 Huiñoduamtuchefengeaiñ
¿Chumngechi inayentuafuimi Chau Jehová ñi perdonachequen?
“Chau Jehová com piuque mu rulpacünui com tamün huelulcan, feimu ca femngechi femqueaimün” (COL. 3:13).
¿CHEM QUIMAIÑ?
Tüfachi chillcatun mu peaiñ chem dungu femal taiñ perdonacheal huesalcangeliyiñ.
1, 2. 1) ¿Chem dungu mu doi cüdautuafuiñ taiñ perdonacheal? 2) Denise, ¿chumngechi pengeli tañi perdonachen?
¿CÜDAUTUQUEIMI tami perdonacheal? Cüdaungeafui llemai, doyelchi mai huesa femngeliyiñ cam huesa duamelngeliyiñ. Huelu rulpacünuafuiñ taiñ huesa duamcülen, fei perdonacheaiñ. Peaiñ ñi rupan quiñe lamngen Denise pingelu. a Taiñ lamngen pengeli fente tañi perdonachequen. Feichi 2017 tripantu mu Denise ca tañi familia pemefingün ti hue fütra Betel ruca. Amuletulu tañi ruca mu engün, quiñe huentru ngüneniehuelafi tañi auto, fei troncüfi ti auto cheu ñi amulen Denise ca tañi familia. Denise rulpaduami. Trepelu ngüneduami ñi rume allfülen tañi pu püñeñ ca ñi lan tañi füta Brian pingelu. Raquiduamlu tañi rupan, Denise feipi: “Cutrantupiuquelefun, quimlafun chem chumal”. Rupalu ta antü, Denise quimürpui feitachi huentru ngollilelafui, drogatulelafui, lelinielafui tañi telefono, ca chem huesa dungu rume femlafui. Femlu rume, Denise llellipufi ta Chau Jehová ñi eluaeteu tañi tüngün.
2 Ti huentru chocalu tañi auto juiciantucungei ñi langümchen tuntucun mu. Condenangefule, presuntucungeafui. Quiñe huentru coneltulelu juicio mu feipifi ta Denise tami feipin mu ti huentru carceltucungeafui cam femlayafui. Denise feipi: “Fente tañi cutrancahun nülañmangen reque tañi allfeñ ñi tucungeal chadi. Mülefui ñi entudungual com tañi huesa rupan feichi antü”. Quiñeque semana rupalu, Denise amui juicio mu ñi entudungual tañi rupan ti huentru ñi adquiñ mu, feiti huentru rume huesalcafilu tañi pu che. ¿Chem feipi Denise? Feipifi ti juez ñi cutranpiuqueyeafiel ti huentru. b Fentecünulu ñi nütram, ti juez ngümai. Fei feipi: “Yenien 25 tripantu tañi juzgachequen, huelu turpu pequelafun femngechi dungu. Turpu allcüquelafun pu familia huesa femngelu ñi llellipual tañi cutranpiuqueyengeal pu juzgangelu. Turpu pequelan pu che ñi piuqueyechequen ca ñi perdonachequen”.
3. ¿Chem quellueyu ta Denise ñi perdonacheal?
3 ¿Chem quellueyu ta Denise ñi perdonacheal? Raquiduami chumngechi perdonachequei Jehová (Miq. 7:18). Falintuniefiliyiñ chumngechi taiñ perdonaeteu Chau Jehová, quelluaiñmu taiñ perdonayafiel ta caquelu.
4. Chau Jehová, ¿chem ayüquei taiñ femal? (Efesios 4:32).
4 Chumngechi taiñ perdonaqueteu Chau Jehová, ca femngechi ayüquei taiñ perdonacheal com piuque mu (papeltunge Efesios 4:32). Fei ayüquei taiñ pepicaucüleal ñi perdonayafiel taiñ pu huesa femeteu (Sal. 86:5; Luc. 17:4). Tüfachi chillcatun mu, peaiñ cüla dungu taiñ quelluaeteu doi perdonacheal.
QUIMTUCUNGE TAMI HUESA DUAMCÜLEN
5. Hueñancüleliyiñmu quiñe che, ¿chum duamcüleafuiñ? (Proverbios 12:18).
5 Rume hueñancülafeiñmu chem taiñ feipieteu ca femeteu quiñe che, doyelchi mai hueniyefiliyiñ feiti che cam familiangele (Sal. 55:12-14). Quiñeque mu, taiñ rume hueñancülen trürümngeafui chüngartucungeliyiñ reque cuchillo mu (papeltunge Proverbios 12:18). Entunofiliyiñ chi cuchillo, tremolayafui ti allfeñ. Ca femngechi rupaliyiñ huesaque dungu mu, huesa duamcüleafuiñ, huelu “cümelecan tati” piliyiñ, cümelayafui. Quimtucunoliyiñ taiñ huesa duamcülen, amuleai taiñ hueñancülen.
6. Huesa duamelngeliyiñ, ¿chumafuiñ?
6 Huesa duamelngeliyiñ, illcuafuiñ. Tati Biblia feipi quiñeque mu illcuafuiñ. Huelu ngülamtueiñmu taiñ ngünenienoaeteu ti illcun (Sal. 4:4; Efes. 4:26). ¿Chumngelu? Chumngechi taiñ duamcülen cüme femafuiñ cam huesa femafuiñ. Fei illculeliyiñ, huesa femafuiñ chi (Sant. 1:20). Loncontucuaimi: huesa femngeliyiñ, illcurumeafuiñ chi, huelu ngünehuafuiñ taiñ illculehuenoal.
Huesa femngeliyiñ, illcurumeafuiñ chi, huelu ngünehuafuiñ taiñ illculehuenoal
7. Huesa femngeliyiñ, ¿ca chumngechi duamcüleafuiñ?
7 Huesa femngeliyiñ caquerumeafui chumngechi taiñ duamcülen. Peaiñ ñi rupan quiñe lamngen Ana pingelu. Fei feipi: “Pichicalu iñche, tañi chau elcünufi tañi ñuque, niehui ti domo cüdauquelu tañi ruca mu. Cuñifallcülelu troquihun. Nierpulu yall engu, quiñepülecünungelu troquihun. Feimu tremcülelu iñche, inei no rume piuqueyequelaeneu pifun”. Cangelu lamngen Georgette pingelu ñihuañpengei, fei nütramcai ñi chum duamcülen. Feipi: “Pichicalu iñchiu, hueniyehuiyu tañi füta iñchiu. Trür precursorngefuyu. Fei ñihuañpeteu tañi füta, allfülehuei reque tañi piuque”. Ca lamngen Noemí pingelu feipi: “Turpu raquiduamquelafun tañi huesalcayaeteu tañi füta. Feimu entudungulu ñi ellca peniefiel pornografia, ñihuañpengelu troquihun”.
8. 1) ¿Chemu mülei taiñ perdonacheal? 2) ¿Chumngechi cümelcaqueiñmu perdonacheal? (Inaduamnge ti huichulechi dungu feipilu “ Rume huesalcaelimu quiñe che, ¿chumafun?”).
8 Ngünenielayafuiñ chem taiñ feipiafeteu caquelu che ca chem taiñ femafeteu, huelu ngünenieafuiñ chem chumal. Fentren rupa doi cümei taiñ perdonacheal, ¿chemu? Piuqueyefiyiñ ta Chau Jehová, ca quisu ayüquei taiñ perdonacheal. Amulele taiñ illculen ca perdonanofiliyiñ ta che, huedhued dungu femafuiñ ca cutranconafuiñ (Prov. 14:17, 29, 30). Ngüneduamnge ñi rupan quiñe lamngen Cristina pingelu. Feipi: “Illculeli ca hueñancülele tañi piuque, müte ayehuequelan, cüme iquelan, cüme umautuquelan. Ca doi cüdautuquen tañi ngünehual chumngechi duamcülen tañi piuque. Fei doi cüdaungei ñi cüme yeucüleal tañi füta iñchiu ca caquelu che iñchiñ”.
9. ¿Chumngelu cümei taiñ illcuhuenoal?
9 Ti che taiñ rume huesalcaeteu, perdonaen pinole rume, quiñeque dungu femafuiñ taiñ ñochiquechi cüme duamcületual. ¿Chumafuiñ? Peaiñ ñi feipin ta Georgette. Feipi: “Alüñmai, huelu ñochiquechi illcutuhuelafiñ tañi füta, fei cüme duamcületun”. Illcuhuenolu iñchiñ, ca hueñancühuelayai taiñ piuque, fei huesa duamel-layafiyiñ ta caquelu che. Femliyiñ, quisutu cümelcahuaiñ, raquiduamhuelayaiñ taiñ rupan ca huiño ayüucületuaiñ (Prov. 11:17). Eimi ngüneduamafuimi tami chum duamcülen, huelu petu pepicaunolmi tami perdonacheal, ¿chumafuimi?
¿CHEM QUELLUAIMU TAMI ILLCUHUENOAL?
10. ¿Chemu duamnieiñ tiempo taiñ cüme duamcületual? (Ca inaduamnge ti adentun).
10 Illculelmi cam hueñancülelmi, ¿chumafuimi tami cüme duamcületual? Elcünunge tiempo tami cüme feletual. Quiñe pengelün dungu: lahuentuñmangele quiñe che tañi huesa cutran mu, pürüm tremotulai, duamniei tiempo tañi tremotual. Ca femngechi duamnieiñ tiempo ñi cüme duamcületual taiñ piuque, fei hula pepicaucüleaiñ taiñ rüf perdonacheal (Ecl. 3:3; 1 Ped. 1:22).
Lahuentuñmangele quiñe che tañi huesa cutran mu, duamniei tiempo tañi tremotual. Ca femngechi duamnieiñ tiempo ñi cüme duamcületual taiñ piuque. (Inaduamnge parrafo 10).
11. ¿Chumngechi quelluqueiñmu ti llellipun taiñ perdonacheal?
11 Llellipuafimi ta Chau Jehová tami quelluaeteu perdonacheal. c Ana feipi chumngechi ñi quellueteu ti llellipun. Feipi: “Llellipufiñ Chau Jehová ñi perdonayaeteu iñche ca tañi familia, iñchiñ huesa entuiñ taiñ feipin ca huesa femiyiñ. Fei hula, huirintuculelfiñ quiñe carta tañi chau ca tañi hue domo, feipifiñ engu ñi perdonafiel”. Cüdaungei ñi femngechi femal pi Ana. Ca feipi: “Tañi inayentufiel mu iñche Chau Jehová ñi perdonachequen, ayüafun tañi chau ca tañi domo ñi quimafiel Chau Jehová”.
12. ¿Chumngelu maneluuquelaiñ taiñ chum duamcülen mu, doi mai Chau Jehová mu? (Proverbios 3:5, 6).
12 Maneluulayaimi tami chum duamcülen mu, doi mai maneluhuaimi Chau Jehová mu (papeltunge Proverbios 3:5, 6). Chau Jehová cüme quimniei chem taiñ cümelcaqueteu (Is. 55:8, 9). Ca turpu feipilayaiñmu taiñ femal chem taiñ huesalcayaeteu. Feimu ngülamtueiñmu taiñ perdonacheal. Cüme quimnieiñ fente taiñ cümelcaqueteu femngechi femal (Sal. 40:4; Is. 48:17, 18). Huelu maneluuliyiñ taiñ chum duamcülen mu, turpu perdonalayafuiñ ta che (Prov. 14:12; Jer. 17:9). Noemí, taiñ nütramcapeel, feipi: “Ellaca mu, cümelu troquifiñ ñi perdonanofiel tañi füta pefilu pornografia. Llicalequefun ñi huiño huesalcayaeteu ca ñi ngoimayafiel tañi huesa femün. Chau Jehová quimniei tañi chum duamcülen pifun, huelu quimnielu rume, cümei piquelafui tañi raquiduam ca tañi chum duamcülen iñche. Quimtucun tüfa: Chau Jehová cüme quimniei tañi chum duamcülen ca ñi alüñmayal tañi cüme duamcületual, huelu ca ayüniei ñi perdonacheal” pi Noemí. d
ÑOCHIQUECHI CÜME DUAMCÜLETUAIMI
13. Chumngechi feipi Romanos 12:18-21, ¿chem mülei taiñ femal?
13 Huesalcaeliyiñmu quiñe che, perdonayafiyiñ ca huiño nütramcayaiñ taiñ femeteu. Cafei huesalcaeliyiñmu quiñe peñi, quiñe lamngen mülei taiñ perdonayafiel taiñ cümelcautual (Mat. 5:23, 24). Taiñ illcuhuenoal mülei taiñ cutranpiuqueyecheal ca perdonacheal (papeltunge Romanos 12:18-21; 1 Ped. 3:9). ¿Chem quelluaiñmu taiñ femngechi femal?
14. ¿Chem mülei taiñ femal? ¿Chumngelu cai?
14 Chau Jehová ngüneduamquei pu che ñi cümeque dungu. Inayentuafiyiñ Chau Jehová ñi femquen. Quintuaiñ tati cümeque dungu ñi nieel ti che taiñ huesalcaeteu (2 Crón. 16:9; Sal. 130:3). Ngüneduamfiliyiñ pu che ñi cümeque femün, peaiñ cümeque dungu. Huelu ngüneduamfiliyiñ ñi huesaque femün, peaiñ huesaque dungu. Ngüneduamliyiñ pu che ñi cümeque dungu, cüdautulayaiñ taiñ perdonayafiel. Quiñe peñi Jarrod pingelu feipi: “Quimtucun com tati cümeque dungu ñi femquen pu peñi ca pu lamngen. Huesa femngen mu iñche, raquiduamquen tañi cüme femquen engün, fei cüdautuquelan tañi perdonayafiel engün”.
15. ¿Chemu cümei taiñ feipiafiel ta che taiñ rüf perdonafiel?
15 ¿Ca chem falin dungu femafuiñ? Perdonaeyu piafiel ta che. ¿Chemu? Raquiduamnge ñi feipin Noemí. Feipi: “Tañi füta ramtueneu ‘¿perdonaen am?’. Perdonaeyu ayüfun ñi feipial, huelu pepi entulafun tañi feipin. Quimtucun ñi rüf perdonanofiel. Rupalu ta antü, entun tüfachi falin dungu: ‘Rüf perdonaeyu’ pifiñ. Tañi füta epe ngümafui. Afmatuleneu ñi cüme duamcületun, iñche ca cüme duamcületun. Feula huiño maneluuquen tañi füta mu ca cüme hueniyehuiyu”.
16. ¿Chem falin dungu femafuiñ taiñ perdonacheal?
16 Chau Jehová ayüquei taiñ perdonacheal (Col. 3:13). Huelu quiñeque mu, cüdautuafuiñ taiñ perdonacheal. Huelu femafuiñ famentunoliyiñ taiñ chum duamcülen ca nehuentuleliyiñ taiñ illcuhuenoal. Femngechi femliyiñ, nierpuaiñ cümeque raquiduam ca cüme duamcületuaiñ (inaduamnge ti huichulechi dungu feipilelu “ Cüla dungu femafuiñ taiñ perdonacheal”).
¿CHUMNGECHI CÜMELCAQUEIÑMU PERDONACHEAL?
17. ¿Chumngechi cümelcaqueiñmu perdonacheal?
17 ¿Chumngelu perdonachequeiñ? Fillque dungu mu. Peaiñ quiñeque. Quiñe, ayühuelquefiyiñ ca inayentuquefiyiñ ta Chau Jehová cutranpiuqueyechequelu (Luc. 6:36). Epu, pengelqueiñ taiñ mañumniefiel ta Chau Jehová taiñ perdonaqueteu (Mat. 6:12). Cüla, cüme felequetuiñ ca cüme yeucüleiñ taiñ pu hueni iñchiñ.
18, 19. ¿Chum quelluaiñmu taiñ perdonacheal?
18 Perdonacheliyiñ, nierpuafuiñ cümeque dungu taiñ üngümnoel. Ngüneduamaiñ ñi rupan ta Denise taiñ nütramcapeel. Feiti huentru troncülu tañi auto ayüfui ñi langümuhual rupalu hula ti juicio. Denise quimlafui tüfa, huelu ti huentru afmatulehuei ñi perdonaeteu ta Denise, feimu eluhui ñi estudiayal Biblia pu testigo engün.
19 Quiñeque mu, rume cüdautuafuiñ perdonacheal. Huelu cafei rume cümelcayafeiñmu femal tüfa (Mat. 5:7). Feimu amulepe taiñ inayentuniefiel Chau Jehová ñi perdonachequen.
ÜLCANTUN 125 “Ayühun niei tati cutranduamyequefilu”
a Tüfachi troquiñ mu, ca üi tuculelngei ta quiñeque che.
b Rupale femngechi dungu, quisuque pu cristiano mülei ñi dullial chem chumal.
c Inaduamnge jw.org mu tüfachi ayüfalchi ül: “Hay que perdonar,” “¡Perdonachean may!,” and “Puhui llemai tayu huiño hueniyeutual” mapudungun mu.
d Quiñe che pefile pornografia culpaquei ca huesalcaquei, huelu femngelu rume Biblia feipilai tañi afcadi ñi püntühual tüfachi dungu meu.
