Quiñe curehuen María ca Juan pingelu a cheu ñi mülen engu acuquei fentren che Filipinas mapu tuulu. Fei Juan ca María ayühunquechi amuldungulelquefi engün. Aculu ti COVID-19, María eluhui ñi quimeltulelafiel Biblia fentren che caque rume troquiñ mapu mu mülelu. ¿Chumngechi am ta femi?

María ramtuquefi tati pu che ñi chillcatulelquefiel Biblia: “¿Quimfimi caquelu che ca ayülu tañi chillcatual?”. Feingele, María ca feipiquefui: “Presentalelafen tañi nütramcayafiel”. Femngechi femün mu taiñ lamngen, rume cüme tripai. ¿Chumngelu am? Tati pu che falintuquefilu Biblia ñi quimeltun ayüquei ñi quimeltulelafiel tañi pu che ca tañi pu hueni chem tañi quimürpuel. ¿Ca chem rupai ta María?

María quimeltulelquefi Biblia quiñe domo Jasmin pingelu. Feitachi domo presentaleleyu meli che tañi ca quimeltulelngeal. Quiñe tüfa Cristina pingei. Fente ayüfilu am ti chillcatun, feipi epu rupa semana mu ñi quimeltulelngeal. María ca ramtufi: “¿Quimfimi caquelu che ca ayülu tañi chillcatual?”. “Mai” pingei. Pichi rupalu, Cristina presentaleyu meli hueni, fei hula ca quiñeque. Feitachi pu hueni presentaleleyu caquelu che ca ayülu ñi chillcatual Biblia.

Cristina ñi pu che mülefui Filipinas mapu mu. Fei ayüfui quisu engün tañi ca quimelelngeal Biblia. Fei nütramcafi tañi püñeñ Andrea pingelu. Ellaca mu, Andrea raquiduami: “Pu testigo cangechi religion, feyentuquelaingün Jesús mu ca duamtuquefingün Antiguo Testamento müten”. Huelu hue eluulu müten ñi quimelngeal Biblia, ngüneduami tañi huelulcaucülen. Quimfiel mu hueque dungu Biblia mu, feipiquefui: “Biblia am feipilu, rüfngei tati”.

Rupachi antü mu, Andrea presentalelfi ta María epu hueni ca quiñe compañ cüdau. Fei ca eluhuingün ñi chillcatual ta Biblia. Cafei Andrea niei quiñe palu Angela pingelu. Fei traumalefui, huelu allcütulerquei Andrea quimeltulelngelu Biblia. María turpu quimlafui. Feimu quiñe antü, Andrea feipieyu ñi palu: “Iñche ca ayüfun ñi chillcatual, ¿presentalafen tami quimeltuqueteu?”. Femngechi Angela chillcaturpui Biblia. Rume falinturpufi com tañi quimel. Quiñe cüyen mu müten loncontucui fentren texto ca ayüfui ñi quimelelngeal Biblia meli rupa semana mu. Cafei Andrea ñi quellun mu conquefui trahun internet mu.

 Cristina ñi huentru Josué pingelu allcüntuculefui petu chillcatulu tati domo. Quimürpulu María, mangeleyu tañi conal ti estudio meu. “Felei” pi Josué. “Huelu allcütuan müten. Chem rume ramtueli, amufemtuan”. Huelu quechu minuto müten yenielu ñi estudiamequen, entui fentren ramtun ca eluhui ñi ca chillcatual Biblia.

Felei llemai, María ramtufiel mu tañi pu estudiante caquelu che ñi chillcatual, pei fentren che tañi quimeltulelafiel. Feimu 28 che eluhuingün tañi chillcatual Biblia meli pais mu. María feipifi caquelu testigo ñi quimeltulelafiel Biblia quiñeque engün.

¿Chem rupai com tüfachi pu che mu chillcatulu Biblia? Jasmin fautizahui abril 2021 tripantu. Cristina fautizahui mayo 2022 tripantu, ca huiñotui Filipinas mu ñi mülepual tañi pu che engün. Ca fautizahui Cristina tañi epu hueni. Quiñeque cüyen rupalu, Angela ca fautizahui ca precursora regularngerpui. Josué, tañi ñahue Andrea ca caquelu che petu estudiamequeingün Biblia ca amulei tañi doi quimafiel ta Jehová.

Hunen siglo mu, fentren pu che quimürpufilu ta Jesús nütramcafingün tañi pu che ca tañi pu hueni (Juan 1:41, 42a; Hech. 10:24, 27, 48; 16:25-33). María reque, ramtuafuimi tami pu estudiante: “¿Quimfimi caquelu che ca ayülu tañi chillcatual Biblia?”. Tüfachi ramtun mu müten peafuimi fentren che ayülu tañi quimelelngeal Biblia.