Tañi chau ca tañi ñuque rume catolicongequefui. Huelu Biblia mu pelu Chau Dios ñi üi Jehová pingei, pürüm testigongerpui engu. Tañi chau carpinterongefui, deumaquefui Jesús ñi pichique adentun, huelu quimfilu Jehová femhuelai. Ca taiñ nageltu ruca adcünufi ñi Trahunhue Ruca ngeal. Tüfa tati hunen Trahunhue Ruca mülelu San Juan del Monte huaria mu, Filipinas mapu meu.

Choyüngen 1952 tripantu mu. Tañi pu chau eluhuingu tañi pürüm quimeltulelaeteu Chau Dios ñi dungu, chumngechi ñi femquefel tañi meli peñi ca cüla lamngen. Amulelu ñi tremcülen iñche, tañi chau feipiquefeneu tañi papeltual quiñe capitulo Biblia fill antü, quiñentrür papeltuquefuyu tañi chau iñchiu. Quiñeque mu, umapaquefui taiñ ruca mu ti huitran-ngepaquechi loncolelu ca quiñeque betelita. Tati pu peñi nütramcaeiñmu tañi rupaelchi dungu meu, fei rume yafültucuquefeiñmu, fei quellueiñmu taiñ hunentucuafiel Jehová taiñ mongen meu.

Tañi pu chau rume feyentuquefui Jehová mu. Ñi femün engu quellueneu tañi ca femngechi femal. Tañi poyen ñuque lai 1971 tripantu mu quiñe huesa cutran mu. Feichi mu, tañi chau iñchiu precursorngerpuyu. Tañi chau ca lai 1973 tripantu meu, iñche 20 tripantu niefun. Larpulu tañi pu chau, rume hueñancün ca quisulehuen. Huelu ti maneluhun taiñ elueteu Biblia rüfngei ca nehuen-ngei, fei quellueneu ñi nehuentuleal ca pülleconal Jehová mu (Heb. 6:19). Pichin mu ñi lan tañi chau, üitungen ñi precursor especialngeal. Huercüngen ñi amual Coron pingechi huapi mu, Palawan troquiñ mapu meu, tüfa rume camapulei.

Puulu Coron iñche, 21 tripantu nien. Iñche huaria mu tremün, feimu puulu feichi mapu mu iñche, afmatulehuen pefiel ñi müte  nienon electricidad, llafeco, auto ca moto no rume. Fei mu mülei pichin peñi, ca ngelafui cangelu precursor tañi compañaeteu, feimu quiñeque mu quisu amuldunguquefun. Hunen cüyen mu, rume cüdautun ca hueñancütuquefun tañi pu che ca tañi pu hueni. Pun püraquintuquefun huenu, pequefuiñ ti huangülen ca llancünagquefui tañi cülleñu. Ayüquefun tañi elcünutuafiel tañi elfal cüdau ca huiñotual tañi ruca mu.

Feichi mu quisulelu troquiulu iñche, nülanentulelquefiñ reque tañi piuque Jehová. Acordaquefuiñ tañi papeltuel Biblia mu ca taiñ publicacion mu, fei yafültucuquefeneu. Rume raquiduamquefun Salmo 19:14. Quimtucun raquiduamli chem dungu ñi ayüqueel Jehová, tañi chumngen ca tañi deumael, Jehová tañi “Fütra Cura” reque feleai ca “tañi Montulqueteu”. Rume quellueneu Ti Huerquen feipilelu “Turpu quisulelaimi”. a Papeltuquefun, fei ca huiño papeltuquefun. Quisulelu iñche, raquiduamquefun Jehová ñi mülen iñche ñi inafül. Feimu llellipuquefuiñ Jehová, papeltuquefuiñ ca raquiduamquefuiñ Biblia, tüfa rume falintuquefun iñche.

Pichiñma puulu iñche Coron mu, üitungen tañi loncolelungeal. Iñche müten loncolequefun trahunche mu, feimu fentren cüdau niefun. Adniequefun com ti trahun semana mu ñi femngeal ca Ti Huerquen, ca tañi hulal com hueupin fill semana mu. Fentren cüdau nielu iñche, nielan tiempo tañi raquiduamal ñi quisulen.

Rume cüme tripai tañi amuldungun Coron mu, quiñeque tañi chillcatuquelu fautizahuingün. Huelu ca mülei cüdaungechi dungu. Quiñeque mu, rangiantüñmaquefuiñ ñi puhual ti lof cheu ñi amuldungual ca quimlafun cheu tañi umayal. Ca amuldunguquefuiñ fentren pichique huapi mu. Taiñ puhual üyeu, amuquefuiñ lancha mu. Huesa antüngen mu, rume huesañmauquefui ti lafquen. Iñche quim hueyelquelafun, huelu Jehová cuñiutucuqueneu. Quimtucun Jehová tañi pepicamequeteu tañi rupayal doi cüdaungechi dungu cüpalechi antü mu.

Ca huercüngen Papúa Nueva Guinea 1978 tripantu mu. Australia ñi norte püle mülefui Papúa Nueva Guinea, fütraque huincul mahuidantu mülei. Feichi mu 3 millon che mülefui, huelu doi 800 quehun dunguquefui engün. Epe com che dunguquefui pidgin de Nueva Guinea, ca feipingequefui tok pisin feichi quehun.

Hunelu huercüngen Port Moresby fütra huaria. Tüfa mu mülefui quiñe trahunche ingles quehun dunguquelu. Huelu müte alüñmalan tüfa meu. Huiñamtuhun cangelu trahunche mu dunguquelu tok pisin quehun ca eluufun ñi quimal feichi quehun. Ñi quimel, fei dunguquefiñ amuldungun meu. Femngechi doi pürüm adümfiñ tüfachi quehun. Pichin mu, hulün hueupin tok pisin quehun meu. Petu yenielan quiñe tripantu Papúa Nueva Guinea mu, üitungen ñi superintendentengeal. ¡Rume afmatulehuen! Feula huitrancontuafiñ fill troquiñ mapu dunguquelu tok pisin quehun dungu mu.

Caque quiñeque tüfachi trahunche rume alü camapulefui. Pepicamequefun fütraque  trahun, fei rume miyauquefun fill püle. Ellaca mu, quimquelafun ti troquiñ mapu, ti quehun ca pu che tañi huimtun, feimu rume quisulelu troquiuquefun. Fütraque huincul mahuidantu mülefui, ngequelafui cüme rüpü, feimu avion mu müten amuquefun epe fill semana mu. Quiñeque mu, iñche müten amuquefun ti pichi avion mu ca huesañmaucülequefui. Chumngechi ñi llicalequefel ti lancha meu, ca femngechi llicalequefun ti pichi avion mu.

Pichin che müten niequefui telefono, feimu huercülelquefuiñ carta pu trahunche. Fentren rupa iñche hune puuquefun ti carta meu, feimu inei no rume üngümquelafeneu. Fei puulu iñche, ramtuquefun pu che cheu ñi mülen pu testigo. Huelu pefilu hula iñche pu peñi, ayühunquechi llouquefeneu. Feimu iñche rume ayüuquefun ñi pefiel engün cüdaungefulu rume. Fillque dungu mu ngüneduamün Jehová ñi quelluqueteu, feimu doi hueniyerpufiñ.

Quiñe rupa hue amulu iñche quiñe trahunche mu, dungupaeneu quiñe curehuen, rume ayüucüleingu. Ramtueneu: “¿Acordaniemuyu?”. ¡Mai, acordaniequefuiñ! Amuldungulelfiñ hue puulu iñche Port Moresby huaria mu. Quimeltulelfiñ Biblia quiñeque mu, fei hula feipifiñ cangelu peñi ñi amul quimeltuniengeal. Feula deu fautizaucülerqueingu, rume ayühuleneu. Cüla tripantu mülefun Papúa Nueva Guinea mu ca fentren caquelu cümelcan llohun.

Chumngechi feipiupeiñ, huercüngen Papúa Nueva Guinea 1978 tripantu mu. Huelu petu tañi amutunon, quimfiñ quiñe lamngen Adel pingelu, rume poyechefengefui ca rume cüdauquefui. Quisu tremümniequefui epu püñeñ Samuel ca Shirley pingei, cuidaquefui ñi cushe ñuque ca precursora regularngefui. Mayo cüyen 1981 tripantu mu, huiñotun ta Filipinas tayu niehual iñchiu, mür precursorngequeyu ca cuidaquefiyu tayu familia.

Feula nielu rume familia iñche, ca üitungen ñi precursor especialngeal 1983 tripantu mu. Huercüngen quiñe huapi Linapacan pingelu. Camapulefui, ngelafui testigo, huelu com huiñamtuhuiyiñ. Yenieiñ quiñe tripantu peno taiñ mülepun, Adel tañi ñuque lai. Taiñ cüdahuelquefiel Jehová fei quellueiñmu taiñ hueñancün meu. Fentren che taiñ quimeltulelquefiel Biblia ayüquefui tañi amual trahun meu, feimeu duamfali quiñe Trahunhue Ruca. Feimu deumafiyiñ quiñe pichi Trahunhue Ruca. Müna ayühun-ngei, cüla tripantu yenieiñ fau, 110 pu che trahui ñi acordayal Jesús tañi lan, fentren tüfa engün fautizahui deu amutulu iñchiñ.

Ca huercüngen Culion huapi mu 1986 tripantu. Üye mu mülei fentren che lepra cutran nielu. Mülepulu üye mu iñchiñ, Adel ca feipingei ñi precursora especialngeal. Llicaquefuiñ ñi amuldungulelafiel ti pu che nielu lepran cutran. Ti pu peñi feipieiñmeu deu lahuentungei tüfachi pu che, feimu cuñihun-ngelai pieiñmeu. Quiñeque tüfa engün amui trahun mu, quiñe lamngen ñi ruca mu trahuluuquefuiñ. Pürüm huimtuiñ taiñ amuldungulelafiel tüfachi  pu che. Tüfachi pu che illamcaqueteu Chau Dios ca caquelu pu che troquiuquefuingün, feimu rume ayühun-ngei taiñ amuldungulelafiel Biblia mu mülechi maneluhun. Quimürpufilu tüfachi pu che ñi nietual cüme mongen, rume ayüuquefuingün, feimu iñchiñ cafei rume ayüuquefuiñ (Luc. 5:12, 13).

Adel iñchiu feipiquefiyu epu üllcha lamngen Coron mapu mu taiñ compañaeteu, femngechi Samuel ca Shirley ñi nieal cümeque hueni. Tüfachi epu lamngen ca tayu epu yall rume ayüucülequefuingün ñi quelluafiel caquelu pu che ñi quimafiel ti rüf dungu. Fei engün quimeltuquefuingün fentren pichiqueche, Adel iñchiu quimeltuquefiyu tati pu chau. Femngechi quimeltufiyiñ Biblia 11 familia. Pichiñma müten, fentren che ayüfui ñi serfiafiel Jehová, femngechi mülerpui quiñe trahunche.

Ellaca mu, iñche müten loncolelungequefun. Culion mapu mu, mülequefui pura amuldunguquelu. Betel feipieneu ñi adnieafiel fillque trahun. Ca femngechi femquefun Marily mapu mu, fei mu mülei ailla amuldunguquelu. Taiñ puhual feichi huaria meu noquefuiñ lafquen cüla hora bote mu. Deumalu taiñ trahun, fentren hora trecaquefuiñ huincul mahuidantu mu taiñ quimeltuchemeal Biblia Halsey huaria mu.

Fentren che testigongerpui, feimu deumaiñ Trahunhue Ruca Marily ca Halsey huaria meu. Pu peñi, pu lamngen ca pu chillcatulu Biblia epe com tucufui ñi duamniengeel ñi deumayal ti Trahunhue Ruca ca rume cüdahuingün. Marily Trahunhue Ruca mu 200 pu che feyafui ca adcünungeafui ñi conpual doi fentren che mülen mu fütraque trahun.

Deu tremlu tayu pu yall, üitungen tañi superintendentengeal Filipinas mapu mu 1993 tripantu. Cafei 2000 tripantu mu, amun ti Chillcatuhue ñi Pepicangeal pu Cüdauquelu ti Trahunche mu, femngechi pepicangen ñi quimeltufengeal feichi escuela mu. Iñche pepicaucülenolu feichi cüdau mu troquiufun, huelu Adel yafültucuquefeneu ca acordalelquefeneu Jehová tañi quelluaeteu (Filip. 4:13). Adel rume cüme quimniefui tüfa ñi feingen,  quisu cüme yeniei ñi cüdau tunte cutrancülefui rume.

Petu quimeltuchefengelu feichi escuela mu, 2006 tripantu, Adel feipingei ñi nieel parkinson cutran. Armulehueyu quimlu iñchiu. Feipifiñ tañi elcünual tayu cüdau ñi dapiafiel, huelu quisu feipieneu: “Femlayayu, quintulelen quiñe cüme medico, quimnien Jehová ta quelluaiñmu taiñ cüme yenieal taiñ cüdau”. Cutrancülelu rume, ayühun-ngechi serfiniefi ta Jehová. Pepi trecahuenolu, amuldunguquefui silla de ruedas mu. Müte dunguhuenolu, huiñoldunguquefui quiñe cam epu dungu trahun mu. Tañi poyen domo turpu fentecünulai ñi serfifiel Jehová, feimu fentren peñi, lamngen huercülelquefeyu mensaje tañi yafültucungeal. Doi 30 tripantu rupai tayu niehun, fei lai 2013 tripantu mu. Rume cüme compañngefui ca poyechefengefui. Feimu lalu, rume hueñancülehuen ca quisulelu troquihun.

Raquiduamün Adel ayüniepelafui iñche ñi amuleal tañi cüdau mu, feimu elcünulafiñ. Fentren cüdau niequefun, fei quellueneu tañi fente quisulelu troquiunoal. Fei 2014 puulu 2017 tripantu mu, huercüngen ñi amual fillque pais cheu catrütungequefel taiñ amuldungun cüdau, fei ñi huitranmayafiel pu trahunche tagalo dunguquelu. Fei hula, huitranmafiñ caquelu trahunche tagalo dunguquelu Taiwán, Estados Unidos ca Canadá mapu mu. Fei 2019 tripantu, amun ta India ca Tailandia mapu mu, fei ñi quimeltucheal ti Escuela ñi Pepicangeam pu Amuldunguquelu Ngünechen ñi Gobierno. Rume ayühun com feitachi cüdau mu. Doi cüdahuelfiel mu ta Jehová, doi ayüucülequen.

Cheu rume ñi huercüngen, piuqueyerpufiñ pu peñi ca lamngen. Feimu amutulu cañpüle, rume hueñancüquen. Huelu maneluuquen Jehová mu, fei quelluqueneu ñi ayüucüleal chem cüdau rume ñi elungen. Feula precursor especialngen Filipinas mapu mu. Mülen quiñe hue trahunche mu, fei piuqueyenquechi cuidaqueneu. Feimu rume ayüucülen ca rume ayühuleneu pefiel Samuel ca Shirley ñi serfifiel Jehová tañi ñuque reque (3 Juan 4).

Rupan fentren cüdaungechi dungu tañi mongen mu, pefiñ tañi poyen domo ñi huesa cutranün ca tañi larpun, cafei elungen caque rume cüdau. Huelu ngüneduamquen Chau Jehová “camapulelai caque quiñeque iñchiñ meu” (Hech. 17:27). Jehová quelluquefi ca yafültucuquefi tañi pu serfiqueteu camapulefule rume (Is. 59:1). Rume mañumfiñ ta Jehová, fei tañi Cura reque felei. Rumel afcadinieneu, turpu quisulequelan.