1. Quiñe che ayüle ñi doi cümelu troquingeal, ¿chumafui?

FACHANTÜ tati pu che notücauquei fei doi cümelu troquiuquei caquelu che mu. Fei ñi doicülelu troquingeal, huesalcachequei cütu. Por ejemplo, quiñe huentru negociaquelu, rume ayüafui ñi nieal doi plata, fei tañi femal huesalcayafui rume ta caquelu che. Cam quiñe pelotatuquelu chumafui rume tañi allfülafiel tati ca aucantupelu femngechi ñi huehual. Quiñe estudiante copiañmayafui tañi compañ ñi prueba fei ñi conal quiñe fütra universidad mu. Com tüfa ñi femqueel tati pu che inaquefilu ñi huesaque ayüqueel (Gál. 5:19-21). Feimu iñchiñ taiñ cristianongen mu femquelaiñ. Huelu quiñeque taiñ pu peñi, pu lamngen inaduamuulayafuingün rume chi ñi doicülelu troquiucülequen ta caquelu meu. Fei raquiduamtuculelafui ta caquelu che ñi ca femngechi femal. Rume falin-ngei taiñ cuñiutucuucüleal. Ayüliyiñ taiñ doicülelu troquingeal, ti trahunche quiñeucülehuelayai.

2. ¿Chem inaduamaiñ tüfachi troquiñ mu?

² Tüfachi troquiñ mu peaiñ chumngelu ayüafuiñ taiñ doi cümelu troquingeal. Ca peaiñ ñi femün quiñeque poyequefilu ta Jehová cuifi mu, fei engün doicülelu troquiulaingün. Hunelu mu peaiñ chumngechi quimafuiñ chem ñi mülen taiñ piuque mu.

3. Caque quiñeque iñchiñ, ¿chem ramtuhuafuiñ?

³ Quiñeque mu rume cümei taiñ inaduamuhual. Quisutu ramtuhuafuiñ: “Doicülelu caque che mu troquiuli,  ¿fei müten mai cümelcaquepeneu? ¿Chumngelu fente cüdauquen trahunche mu? ¿Re tañi doicülelu troquiaeteu pu peñi, pu lamngen? ¿Cam fente ñi piuqueyefiel mu ta Jehová?”. Müna cümeafui taiñ femngechi ramtuhual, ¿chumngelu am? Peafiyiñ.

4. Ñi feipin Gálatas 6:3, 4, ¿chumngelu cümelai taiñ trürümuhual caquelu che mu?

⁴ Tati Biblia ngülamtueiñmu cümelai taiñ trürümuhual caquelu che mu (papeltunge Gálatas 6:3, 4). ¿Chumngelu? Doi adümuucülelu caque che mu troquiuliyiñ, mallmahurpuafuiñ. Huelu raquiduamliyiñ caquelu che ñi doi adumuucülequen ta iñchiñ meu, huesa duamafuiñ. Mür feitachi dungu cümelai (Rom. 12:3). Quiñe lamngen Katerina pingei,⁠ * mülelu Grecia mapu mu feipi: “Iñche trürümuuquefun caque pu lamngen mu. Doi cüme adngelu iñche mu troquiquefiñ engün. Doi adümuucülelu ñi amuldungual ca doi nielu hueni troquiquefiñ engün. Femlu iñche müna huesa duamfun”. Loncontucuaiñ: Chau Jehová ngüneduamquelai taiñ cüme adngen, taiñ cüme amuldunguquen cam taiñ huenicachefengen. Huelu mai ngüneduamquei taiñ cüpa serfiquefiel ca taiñ cüpa inaquefiel ta Jesús, feimu cüpaleiñmu quisu mu (Juan 6:44; 1 Cor. 1:26-31).

5. Taiñ peñi Hyun ñi rupan, ¿chem enseñalqueiñmu?

⁵ Ca cümeafui taiñ famngechi ramtuhual: “¿Quimniengequepen mai tañi quellufiel ti trahunche ñi tüngcüleal? ¿Cam quimniengepen mai tañi illcufemquen?”. Ngüneduamaiñ ñi rupan quiñe loncolelu Hyun pingelu, Corea del Sur mu mülelu. Taiñ peñi raquiduamquefui caquelu loncolelu doicülelu troquiuquefui quisu mu. Fei feipi: “Chem pieteu rume engün, ‘felelai’ piquefiñ engün. Femngechi raquiduamtuculu ta iñche quiñeucülehuetulai tati trahunche” pi taiñ peñi. Hyun tañi pu hueni feipieyu tañi huesalcamequen. Rupai chi antü, taiñ peñi huesa raquiduam niehuetulai, fei feula cüme loncolequei tati trahunche meu. Feimu llemai, iñchiñ ca femngechi huesa raquiduam nieliyiñ fei quellunofiliyiñ ñi quiñeucüleal tati trahunche, mülei taiñ pürüm norümtufemafiel taiñ raquiduam.

6. Ñi feipin Gálatas 5:26, ¿chem huesa dungu yeafeiñmu taiñ doicülelu troquihual?

⁶ (Papeltunge Gálatas 5:26). ¿Chem huesa dungu yeafeiñmu taiñ doicülelu troquihual? Quiñe dungu, tati mallmahun. Quiñe che mallmangelu quisutu raquiduamuuquei müten. Epu dungu, tati ütriruhun. Quiñe che ütrirchefengelu ayüquei caquelu tañi nieel. Huelu fei ca müten no, ca ayüfui tañi müntuñmayafiel. Feimu feipiafuiñ tati ütrirchefengelu üdechequei. Feimu llemai, iñchiñ ayüquelaiñ taiñ femngechi chengeal.

7. ¿Chumngelu cümelai taiñ mallmangeal ca taiñ ütrirchefengeal? Feipinge quiñe pengelün dungu.

⁷ Tati mallmahun ca tati ütriruhun, termita reque trürümafuiñ. Ti termita conpun mu ruca mu, pürüm com ifemquelafi. Feimu feipiafuiñ: ti ruca pürüm tranlayai, huelu rupachi antü mu trananagai llemai. Ca femngechi quiñe che poyeafui ta Jehová, huelu mallmangele ca ütrirchefengele, rupalu ta antü ti ruca reque trananagai (Prov. 16:18). Felei llemai poyehuelayafi ta Jehová, cafei quisutu huesalcahuai ca huesalcayafi ta caquelu. Feimu,  ¿chumafuiñ taiñ mallmangenoal ca taiñ ütrirchefengenoal? Peafiyiñ.

8. ¿Chumafuiñ taiñ mallmangenoal?

⁸ Taiñ mallmangenoal inayafiyiñ ti apostol Pablo ñi ngülam. Fei feipi: “Chem dungu rume femquilmün ta caiñetuhun meu cam mallmahun meu no rume, huelu mai ta ñom piuque meu, fei caque quiñeque eimün doi cümelu tamün troquiafiel ta caquelu pu che” (Filip. 2:3). Raquiduamnge, mülei quiñeque peñi ca quiñeque lamngen doi adümuulu. Huelu inafiliyiñ Pablo tañi ngülam, eluulayaiñ taiñ doicülelu troquingeal. Huelu mai ayühuaiñ quisu engün tañi doi adümuhun mu, doyelchi mai eluule engün tañi serfiafiel ta Jehová. Huelu tati pu peñi, pu lamngen doi adümuulu, ¿chumafui? Inafile Pablo tañi ngülam, cüme raquiduam nieai iñchiñ mu. Feimu llemai, com iñchiñ inafiliyiñ Pablo tañi ngülam quiñeucüleaiñ.

9. ¿Chumafuiñ taiñ ütrirchefengenoal?

⁹ ¿Chumafuiñ taiñ ütrirnoafiel taiñ pu peñi, pu lamngen? Loncontucuaiñ, quiñeque mu com cüme tripaquelai taiñ femquen. Ñom piuquengeliyiñ, doi adümuulu caquelu mu troquiulayaiñ. Doi mai, eluhuaiñ taiñ quimeltuaeteu taiñ pu peñi, pu lamngen doi adümuulu iñchiñ mu. Por ejemplo, quiñeque peñi hulquei cümeque hueupin trahunche mu, feimu ramtuafuiñ chumngechi ñi pepicauquen. Quiñeque lamngen müna pepiluhui ñi deumayal cümeque iyael, femngechi ramtuafuiñ chumngechi tañi cüme femqueel. Quiñe hueche peñi cüdautuafui ñi peal hueni, fei ¿chumafui? Ramtuafui cangelu peñi huenicachefengelu tañi quelluaeteu. Feimu llemai eluuliyiñ taiñ enseñangeal, doi adümurpuaiñ ca ütrirchefengelayaiñ.

10. ¿Chem huesa dungu mu rupafui Gedeón?

¹⁰ Inaduamaiñ ñi rupan ta Gedeón. Jehová quellufi ta Gedeón ca tañi pu 300 hueichafe ñi huehuafiel tañi pu caiñe. Tañi huehun mu, quisu engün  mallmahuafuingün chi. Fei ¿chem rupai? Pu efraimita pemefingün ta Gedeón. Huelu amulaingün tañi saquimeafiel, doi mai illcutufingün. ¿Chemu fente illculefuingün? Gedeón mangel-laeyu ñi amual hueichan mu. Tati pu efraimita duamniefuingün tañi respetañmangeal tañi tribu. Huelu inaduamlaingün Gedeón tañi cuñiutucufiel Jehová tañi pu che, femngechi tañi fampüramngeal Jehová tañi üi (Juec. 8:1).

11. Gedeón, ¿chem raquiduamelfi tati pu efraimita?

¹¹ Fei ¿chumi Gedeón? Ñom piuque mu raquiduamelfi pu efraimita Jehová ca quellueyu engün tañi femal fütraque dungu. Feipieteu ta Gedeón tüngduamnagingün (Juec. 8:2, 3). Felei llemai, Gedeón eluhui ñi ñom piuquengeal, femngechi ñi quiñeucüleal Jehová tañi pu che.

12. ¿Chem enseñalqueiñmu ñi femün tati pu efraimita ca Gedeón?

¹² ¿Chem quimeltuafeiñmu ti pu efraimita ñi femün? Quintuyaulayaiñ iñchiñ taiñ falintungeal, doi mai Jehová tañi püramyengeal. Pu loncolelu familia mu ca pu loncolelu trahunche mu, ¿chumngechi inayentuafuingün ta Gedeón? Quiñe che illcutunieliyiñmu, mülei taiñ raquiduamal chumngelu tañi felen. Inaduamfiliyiñ ñi huelulcaucülen ti che, rume falin-ngei taiñ ñom piuquengeal. Loncontucuaiñ: doi falin-ngei taiñ quiñeucüleal, feimu feipilafiyiñ ti che ñi huelulcaucülen. Doi mai, eluhuaiñ taiñ saquiafiel tañi cüme femquen mu.

13. ¿Chem cutran-ngechi dungu mu rupai ta Ana? Fei ¿chumi?

¹³ Peaiñ ñi rupan ta Ana. Ana fütayequefi quiñe levita Elcaná pingelu. Huelu Elcaná ca domo niequefui, Peniná pingequefui. Elcaná doi piuqueyequefui ta Ana Peniná mu. Peniná nieyequefui pichiqueche, huelu Ana pepi niepüñeñquelafui. Feimu Peniná ayentuquefi ta Ana tañi huesa duamelafiel. Fei ¿chum duamfui ta Ana? “Ngümaquefui ca iquelafui rume” (1 Sam. 1:2, 6, 7). Hueñancülefulu rume ta Ana, huelu Biblia feipilai tañi caiñetuniefiel ta Peniná. ¿Chumi ta Ana? Nütramcafi ta Jehová tañi ruparupangen, fei maneluhui Jehová mu tañi quelluaeteu. Peniná ¿fentecünupei mai tañi ayentuniefiel ta Ana? Quimlaiñ, Biblia feipilai. Huelu quimnieiñ Ana tañi femün mu “hueñancülehuetulai” (1 Sam. 1:10, 18).

14. ¿Chem enseñalqueiñmu ñi chumün ta Ana?

¹⁴ ¿Chem enseñalqueiñmu ñi femün ta Ana? Quiñe che doi falilu iñchiñ mu troquiule, iñchiñ ngünehuafuiñ llemai. Duamnielaiñ taiñ pengelelafiel iñchiñ taiñ doi falin-ngen. Eluulayaiñ taiñ caiñetunieafiel, doi mai taiñ cümelcaucüleal (Rom. 12:17-21). Feiti che elcünunole rume  tañi huesa raquiduam, iñchiñ ayüucüleaiñ ca cüme duamcüleaiñ.

15. Apolos engu Pablo, ¿chem dungu mu trürcülefuingu?

¹⁵ Inaduamafiyiñ ñi rupan Apolos ca tati apostol Pablo. Rüf cüme quimniequefuingu Jehová tañi huirintucuel. Mür quimniengequefuingu tañi cüme enseñachequen engu. Mür engu quelluquefingu fentrenque che ñi discipulongerpual. Femfulu rume, ütriruuquelafuingu.

16. ¿Chumngechi chengequefui Apolos?

¹⁶ Apolos, Alejandría huaria mu tuhui. Feichi meu, feitachi huaria mu pütrünque che amuquefui ñi papeltual. Apolos cüme hueupifengefui ca cüme quimniefui Chau Dios tañi huirintucuel (Hech. 18:24). Apolos mülefulu Corinto huaria mu quiñeucülelafui tati trahunche. Quiñeque pu peñi, pu lamngen doyümquefingün ta Apolos caquelu huentru meu, Pablo mu cütu (1 Cor. 1:12, 13). Apolos, ¿“cümei tamün femün” pipefi mai? Femlai llemai. Apolos chem dungu no rume femlai ñi püntülcayafiel ti trahunche. Feimu amutulu Corintio huaria mu, Pablo feipieyu ñi huiñotual (1 Cor. 16:12). Quimfali llemai, Apolos tañi adümuhun mu eluhui tañi amuldungual ca ñi yafültucuafiel tañi pu peñi, pu lamngen. Cafei Apolos ñom piuquengequefui. Quiñe rupa, Áquila Priscila engu quellufingu ta Apolos ñi doi cüme adümafiel Jehová tañi huirintucuel. Biblia feipilai Apolos ñi illcun, feimu feipiafuiñ Apolos ñi ñom piuquengen (Hech. 18:24-28).

17. Pablo ¿chumi ñi quiñeucüleal ti trahunche?

¹⁷ Ti apostol Pablo cüme quimniefui ñi fente cüme cüdauquefel ta Apolos. Huelu Pablo huesa duamlai, ñom piuquengefui.  ¿Chumngechi quimiyiñ tüfa? Inaduamliyiñ Pablo ñi huirintuculelfiel pu corintoche, quimafuiñ ñi ñom piuquengen ta Pablo. Pablo ayüquelafui pu che ñi pial “iñche inaquefiñ Pablo”. Feimu raquiduamelfi engün ñi inayentuafiel ta Jesús ca ñi püramyeafiel ta Jehová (1 Cor. 3:3-6).  

18. Ñi feipin 1 Corintios 4:6, 7, ¿chem quimeltueiñmu ñi femün Apolos ca Pablo?

¹⁸ ¿Chem enseñalqueiñmu ñi chumün Apolos ca ti apostol Pablo? Iñchiñ müna cüdauquefuiñ chi Jehová mu, yequefiyiñ pütrünque che ñi fautizahual. Huelu com taiñ cüdau taiñ femqueel, quisu taiñ duam mu femquelaiñ, Jehová mai quelluqueiñmu. ¿Ca chem quimeltueiñmu Apolos ca ti Apostol Pablo ñi femün? Doi falinque cüdau niefuliyiñ trahunche mu, doi eluucüleaiñ taiñ quelluafiel ti trahunche ñi quiñeucüleal. Ti pu loncolelu ca tati pu siervo ministerial ngülamtueteu Biblia mu, quelluqueiñmu taiñ quiñeucüleal ca taiñ cüme feleal, feimu müna mañumtuquefiyiñ. Cafei doi falilu troquiuquelaingün, doi mai quelluntucuquefi tati trahunche ñi allcütuafiel ta Jesús ca ñi inayentuafiel (papeltunge 1 Corintios 4:6, 7).

19. ¿Chem eluhuaiñ taiñ femal caque quiñeque iñchiñ? (Inaduamnge ti huichulechi dungu “ Rüf quelluaiñ ñi quiñeucüleal ti trahunche”).

¹⁹ Caque quiñeque iñchiñ Jehová elueiñmu adümuhun, fei püneafiyiñ feichi adümuhun taiñ hueluquentu quelluhual (1 Ped. 4:10, TNM). Huelu “nehue falilai tañi femquen” piliyiñ, ¿chem quelluafeiñmu? Raquiduamaiñ tüfa: deumangele quiñe ruca, pichiquen trafla tucuniengerpule, nehuentulerpuafui. Fei ca femngechi iñchiñ pichiquen dungu rume femfuliyiñ trahunche mu, quelluntucuafuiñ ñi nehuentulerpual ca quiñeucülerpual. Eluulayaiñ taiñ doi cümelu troquiaeteu caquelu pu che. Doi mai eluucüleaiñ taiñ quelluntucuafiel ti trahunche fei ñi quiñeucüleal ca ñi cüme feleal (Efes. 4:3).